Ирмосы 8 гласа ноты воду прошед яко сушу

Ирмологий, с Богом Святым, обдержай вся ирмосы осмогласника, Владычних же и Богоматере праздников и всего лета

Ирмосы 1-го гласа

Твоя́ победи́тельная десни́ца / Боголе́пно в кре́пости просла́вися: / та бо, Безсме́ртне, / я́ко всемогу́щая проти́вныя сотре́, / изра́ильтяном путь глубины́ новосоде́лавшая.

В Рождество Христово:

Христо́с ражда́ется – сла́вите! / Христо́с с Небе́с – сря́щите! / Христо́с на земли́ – возноси́теся! / По́йте Го́сподеви, вся земля́, / и весе́лием воспо́йте, лю́дие, / я́ко просла́вися.

Спасе́ лю́ди чудоде́йствуяй Влады́ка, / мо́крую мо́ря во́лну оземлени́в дре́вле; / во́лею же ро́ждься от Де́вы, / стезю́ прохо́дну Небесе́ полага́ет нам. / Его́же, по Существу́ ра́вна же Отцу́ и челове́ком, сла́вим.

В поклонение Честнаго Креста:

Боже́ственнейший прообрази́ дре́вле Моисе́й, / в Чермне́м мо́ри прове́д Изра́иля Кресто́м Твои́м, / во́ду жезло́м пресе́к, / песнь Тебе́ исхо́дную / воспева́я, Христе́ Бо́же.

Во Святую Пасху:

Воскресе́ния день, / просвети́мся, лю́дие, / Па́сха, Госпо́дня Па́сха: / от сме́рти бо к Жи́зни / и от земли́ к Небеси́ / Христо́с Бог нас преведе́, / побе́дную пою́щия.

Пои́м, вси лю́дие, / от го́рькия рабо́ты фарао́ни Изра́иля Изме́ншему / и во глубине́ морсте́й нога́ми немо́крыми Наста́вльшему / песнь побе́дную, / я́ко про сла́вися.

Во Успение Богородицы (ин канон):

Преукраше́нная Боже́ственною сла́вою, / свяще́нная и сла́вная, Де́во, па́мять Твоя́ / вся собра́ к весе́лию ве́рныя, / начина́ющей Мариа́ме с ли́ки и тимпа́ны / Твоему́́ пою́щия Единоро́дному: / сла́вно я́ко просла́вися.

Введения (ин канон):

Песнь побе́дную пои́м вси Бо́гу, / сотво́ршему ди́вная чудеса́ мы́шцею высо́кою / и спа́сшему Изра́иля, / я́ко просла́вися.

Прочии по алфавиту:

Вознесу́ Тя, Бо́же, Спа́се мой, / я́ко воскре́сл еси́ от ме́ртвых, / попра́в смерть.

Го́рькия рабо́ты изба́влься Изра́иль, / непроходи́мое про́йде, я́ко су́шу, / врага́ зря потопля́ема, / песнь я́ко Благоде́телю пое́т Бо́гу, / чудоде́ющему мы́шцею высо́кою, / я́ко просла́вися.

Го́сподеви пои́м побе́дную песнь, / во исхо́де Изра́илеве из Еги́пта / Чермна́го мо́ря и Иорда́на струи́ огусти́вшему, / Еди́ному пресла́вно, / лю́дем, пешеше́ствующим посреде́ его́, / сла́вно бо просла́вися.

Пои́м Го́сподеви песнь но́вую, / непроходи́мое бо оземлени́в Чермно́е, / пешеше́ствовати сотвори́ сыно́м Изра́илевым, / и сопроти́вныя враги́ покры́ мо́ре.

Пои́м песнь но́вую Бо́гу, / от рабо́ты фарао́новы / изба́вльшему сы́ны Изра́илевы / и в пусты́ни ты́я препита́вшему, / я́ко сла́вно просла́вися.

Помо́гшему Бо́гу во Еги́пте Моисе́ови / и тем фарао́на со всево́инством погрузи́вшему, / побе́дную песнь пои́м, я́ко просла́вися.

Похвалу́ Богови́дец Моисе́й Изра́илю предвозглаша́ет, / начина́ет же Мариа́м прему́дрым же на́м, / песнь побе́дную Изба́вителю Бо́гу вси воспои́м.

Столпо́м о́гненным и о́блачным Изра́иля наставле́й я́ко Бог / мо́ре разве́рже, / колесни́цы же фарао́новы глубино́ю покры́, / пои́м песнь побе́дную, / я́ко Еди́н просла́вися.

Фарао́на с колесни́цами / в мо́ри Христо́с потопи́ / и наста́ви лю́ди, пою́щия и глаго́лющия: / пои́м Го́сподеви, / сла́вно бо просла́вися.

Христо́с во гра́де Вифлее́мсте младе́нствует, / на́ше, я́ко Благоутро́бен, обновля́я естество́. / Усе́рдно прииди́те, земноро́днии, / се́рдцем песнь сладкопе́сненную воспои́м Влады́це во ве́ки: / сла́вно бо просла́вися.

Ви́дите, ви́дите, я́ко Аз есмь Спас ми́ра, / Свет И́стинный, Исто́чник жи́зни, / Сын Бо́жий.

Ви́дите, ви́дите, я́ко Бог Аз есмь, / порабоще́нныя лю́ди Изра́илевы / Моисе́ю народоводи́ти в пусты́ ни повеле́вый / и спасы́й, я́ко си́лен, / вла́стию Мое́ю.

Вонми́ гла́су моему́, от Де́вы Рожде́йся, / и глаго́лы моя́ внуши́, / я́ко И́мя Твое́ ди́вное, Го́споди, призва́х.

Вонми́ гла́су моле́ния моего́, / Царю́ мой и Бо́же мой, / пе́сненно Тебе́ вопию́, / я́ко к Тебе́ помолю́ся, Го́споди, / и спаси́ мя.

Вонми́, Не́бо, и возглаго́лю, / и воспою́ Христа́, Спа́са ми́рови, / еди́наго Человеколю́бца.

Вонми́ Не́бо, и возглаго́лю, / и да слы́шит земля́ глаго́лы уст мои́х: / я́ко И́мя Твое́, Го́споди, призва́х.

Вонми́, Не́бо, и возглаго́лю, / я́ко Сло́во О́тчее во́лею сни́де на зе́млю, / приклони́в Небеса́, и бысть Челове́к, / да челове́ка спасе́т, / я́ко Человеколю́бец.

Вонми́, Не́бо, и слы́ши, земле́, / и Христа́ воспо́й, пелена́ми обви́таго / и вери́ги прегреше́ний мои́х разреши́вшаго.

Еди́не, ве́дый челове́ческаго существа́ не́мощь / и ми́лостивно в не вообра́жся, / препоя́ши мя с высоты́ си́лою, / е́же вопи́ти Тебе́, Святы́й, / одушевле́нный хра́ме неизрече́нныя сла́вы Твоея́, Человеколю́бче.

В Рождество Христово:

Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / Свят еси́, Го́споди.

При́зри на пе́ния рабо́в, Благоде́телю, / врага́ смиря́я вознесе́нную горды́ню, / нося́й же, Всеви́дче, греха́ превы́шше / непоколе́блемо утвержде́ныя, Бла́же, певцы́ / основа́нием ве́ры.

Утверди́, Влады́ко Христе́, Кресто́м на ка́мени мя ве́ры, / не поколеба́тися уму́ прило́ги врага́ зла́го, / Еди́н бо еси́ Свят.

Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник, / из гро́ба одожди́вша Христа́, / в Не́мже утвержда́емся.

Утверди́ мене́, Христе́, / на недви́жимом ка́мени за́поведей Твои́х / и просвети́ мя све́том лица́ Твоего́: / несть бо свят, па́че Тебе́, / Человеколю́бче.

Успения Богородицы (ин):

Соде́тельная и содержи́тельная всех / Бо́жия му́дросте и си́ло, / непрекло́нну, недви́жиму Це́рковь утверди́, Христе́, / Еди́н бо еси́ Свят, / во святы́х почива́яй.

Да утверди́тся се́рдце мое́ в во́ли Твое́й, Христе́ Бо́же, / И́же над вода́ми не́бо утвержде́й второ́е / и основа́вый на вода́х зе́млю, Всеси́льне.

Высокоца́рствуяй Безнача́льне, / ми́лостиве Сло́ве, / при́зри, вонми́ ми,– / слезоточа́щая приле́жно вопия́ше Ти дре́вле А́нна; / но я́ко о́ную услы́шал еси́ рыда́ющую, / и на́ша утверди́ мы́сли, Царю́, / досто́йно пе́ти Твое́ Рождество́.

Да утверди́тся се́рдце мое́ наде́ждею, Христе́, благ Твои́х, / да непреста́нно с пе́снию пе́ние взыва́ю Ти, / и́бо несть свят, па́че Тебе́, Человеколю́бче.

Ка́мень, его́же небрего́ша зи́ждущии, / сей бысть во главу́ у́гла: / той есть Ка́мень, / на не́мже утверди́ Це́рковь Христо́с, / ю́же от язы́к искупи́.

Не му́дростию и бога́тством да хва́лится сме́ртный свои́м, / но ве́рою Госпо́днею, / правосла́вно взыва́я Христу́ Бо́гу и поя́ при́сно: / на ка́мени Твои́х за́поведей / утверди́ мя, Влады́ко.

Пре́жде зача́тия честна́го Саму́ила несумне́н но Бо́гу обеща́вши, / священнома́ти А́нна ны́не, ра́дующися, пое́т с на́ми: / утверди́ся в Го́споде се́рдце мое́.

Утверди́, Го́споди, Це́рковь Твою́, / ю́же стяжа́л еси́ / си́лою Креста́ Твоего́, / и́мже врага́ победи́л еси́ / и просвети́л еси́ вселе́нную.

Утвержде́й сло́вом Небеса́ и зе́млю основа́вый, Бо́же, / и мене́ утверди́, вопию́ща Тебе́ песнь: / Свят еси́, Го́споди.

Утвержде́й сло́вом Твои́м вселе́нную, / я́же не подви́жится, / утверди́ и на́шу мысль в страх Твой, Влады́ко Го́споди.

Утвержде́ние ми бу́ди, / основа́вый зе́млю на вода́х, / я́ко несть свят, па́че Тебе́, Го́споди.

Го́ру Тя, благода́тию Бо́жиею приосене́нную, / прозорли́выма Авваку́м усмотри́в очи́ма, / из Тебе́ изы́ти Изра́илеву / провозглаша́ше Свято́му / во спасе́ние на́ше и обновле́ние.

В Рождество Христово:

Жезл из ко́рене Иессе́ова / и цвет от него́, Христе́, / от Де́вы прозя́бл еси́, / из горы́, Хва́льный, / приосене́нныя ча́щи / прише́л еси́, вопло́щся / от Неискусому́жныя, Невеще́ственный и Бо́же. / Сла́ва си́ле Твое́й, Го́споди.

Ро́да челове́ча обновле́ние / дре́вле, поя́, проро́к Авваку́м предвозвеща́ет, / ви́дети неизрече́нно сподо́бився о́браз: / млады́й Младе́нец бо из горы́ – Де́вы, изы́де / люде́й во обновле́ние, Сло́во.

На Кресте́ Тя, Си́льне, / свети́ло вели́кое ви́дев, тре́петом взя́тся, / лучи́ сопря́тав, скры. / Вся же тварь воспе́ со стра́хом Твое́ долготерпе́ние, / и́бо испо́лнися земля́ Твоего́ хвале́ния.

На Боже́ственней стра́жи / Богоглаго́ливый Авваку́м / да ста́нет с на́ми и пока́жет / светоно́сна А́нгела, / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.

Ве́лия та́йна / Твоего́, Христе́, смотре́ния: / сию́ бо свы́ше прови́дя Богозри́тельно, Авваку́м, / изше́л еси́, вопия́ше Тебе́, / во спасе́ние люде́й Твои́х, /Человеколю́бче.

Успения Богородицы (ин):

Ре́чи проро́ков и гада́ния / воплоще́ние прояви́ша от Де́вы Твое́, Христе́, / сия́ние блиста́ния Твоего́ во свет язы́ков изы́дет, / и возгласи́т Тебе́ бе́здна с весе́лием: / си́ле Твое́й сла́ва, Человеколю́бче.

Ду́хом прови́дя, проро́че Авваку́ме, Словесе́ воплоще́ние, / пропове́дал еси́, вопия́: / внегда́ прибли́житися ле́том – позна́ешися, / внегда́ приити́ вре́мени – пока́жешися. / Сла́ва си́ле Твое́й, Го́споди.

Авваку́м, сла́вное Твое́ прише́ствие а́бие, Сло́ве, прови́дя, вопия́ше: / услы́шах, Го́споди, я́ко от горы́ святы́я прии́деши / во спасе́ние челове́ков, / и, стра́ха испо́лнь быв, взыва́ет: / я́ко ве́лия дела́, Христе́ мой, Твоея́ сла́вы.

Взя́тся со́лнце, и луна́ ста в чи́не свое́м, / возне́слся еси́, Долготерпели́ве, на Дре́во / и водрузи́л еси́ на нем Це́рковь Твою́.

Взя́тся со́лнце, и луна́ ста в чи́не свое́м, / возне́слся еси́, Долготерпели́ве, на Дре́во / и водрузи́л еси́ на нем Це́рковь Твою́.

Возсия́ благода́ть Твоя́ язы́ком, / и ви́деша концы́ сла́ву Твою́, / я́ко Кресто́м Твои́м мир весь спасл еси́.

Разуме́х, Всеси́льне, / Твое́ смотре́ние / и со стра́хом просла́вих Тя, Спа́се.

С чу́дным ста Авваку́мом / на Боже́ственней твое́й стра́жи, Григо́рие, / и, Су́щаго на ра́му Херуви́мску позна́вый, / всеми́рнаго был еси́ возвести́тель спасе́ния, при́сно зовы́й: / сла́ва си́ле Твое́й, Го́споди.

Слы́ша дре́вле Авваку́м, Христе́, чу́дный Твой слух / и стра́хом взыва́ше: / от ю́га Бог прии́дет и Святы́й от горы́ приосене́нныя ча́щи / спасти́ пома́занныя. / Сла́ва си́ле Твое́й, Го́споди.

Слух си́лы Твоея́ проро́к Авваку́м услы́шав, убоя́ся, / дела́ Твоя́, Бо́же, разуме́в, ужасе́ся и вопия́ше: / сла́ва си́ле Твое́й, Го́споди.

Слух Твой, Го́споди, услы́шах и убоя́хся, / дела́ Твоя́ разуме́х и ужасо́хся, / я́ко Бог, пре́жде век Сый, от Де́вы рожде́йся, бысть Челове́к.

Услы́шах, Го́споди, слух Твой и убоя́хся, / разуме́х дела́ Твоя́, – проро́к глаго́лаше, – / и просла́вих си́лу Твою́.

Услы́шах, Го́споди, слух Твой и убоя́хся, / я́ко Кресто́м Твои́м мир просвети́л еси́ / и нам дарова́л еси́ Твое́ Воскресе́ние.

Услы́шав проро́к, Христе́, слух Твой, убоя́ся, / я́ко и́маши от Де́вы пройти́, / и возопи́ тре́петом: сла́ва си́ле Твое́й, Го́споди.

Что вопие́ши ду́хом, рцы, проро́че, / прови́дев, ужасну́лся еси́, / Бо́га разуме́в от Де́вы, / соедине́на мне пло́тию, / те́мже ужаса́юся.

Я́ко Бог воплоща́ется, не пострада́в преложе́ния, / Боже́ственный ужасе́ся, услы́шав, Авваку́м / и, е́же в Богове́дение от идолонеи́стовства / разуме́в ве́рных спасе́ние, взыва́ше: / Го́споди, сла́ва си́ле Твое́й.

Просвети́вый сия́нием / прише́ствия Твоего́, Христе́, / и освети́вый Кресто́м Твои́м ми́ра концы́, / сердца́ просвети́ све́том Твоего́ Богоразу́мия / правосла́вно пою́щих Тя.

Бог Сый ми́ра, Оте́ц щедро́т, / Вели́каго Сове́та Твоего́ А́нгела, / мир подава́юща, посла́л еси́ нам; / тем, Богоразу́мия к све́ту наста́вльшеся, / от но́щи у́тренююще, / славосло́вим Тя, Человеколю́бче.

Из но́щи дел омраче́нныя пре́лести / очище́ние нам, Христе́, / бо́дренно ны́не соверша́ющим песнь, я́ко Благоде́телю, / прииди́, подава́яй удо́бну стезю́, / по не́йже востека́юще, обря́щем сла́ву.

У́тренююще, Тя воспева́ем, / Спа́се Ще́дре, / мир обре́тше Кресто́м Твои́м, / и́мже обнови́л еси́ род челове́ческий, / к Све́ту Невече́рнему вводя́ нас.

У́тренюем у́тренюю глубоку́, / и вме́сто ми́ра песнь принесе́м Влады́це, / и Христа́ у́зрим, / Пра́вды Со́лнце, / всем жизнь возсия́юща.

От но́щи у́тренююще, пое́м Тя, Христе́, / Отцу́ Собезнача́льна и Спа́са душ на́ших, / мир ми́рови пода́ждь, Человеколю́бче.

Успения Богородицы (ин):

Бо́жию и неизрече́нную добро́ту / доброде́телей Твои́х, Христе́, испове́м: / от Присносу́щныя бо Сла́вы / Соприсносу́щное и Ипоста́сное возсия́вый Сия́ние, / из де́вственныя утро́бы / су́щим во тьме и се́ни вопло́щся, / возсия́л еси́, Со́лнце.

Све́тлый нам возсия́й Свет Присносу́щный, / у́тренюющим о судьба́х за́поведей Твои́х, / Влады́ко Человеколю́бче, Христе́, Бо́же наш.

О Всеви́дче, царе́й сла́во, / кто Твоему́ человеколю́бию земноро́дных не удиви́тся? / на земли́ бо яви́лся еси́, не оста́вль Оте́ческих, / днесь всю обновля́яй тварь / и мир, я́ко еди́н Миронача́льник, подая́й.

Озари́ наш ум, Бо́же, / све́том за́поведей Твои́х / и све́тлостию благода́ти Твоея́, / да́руя нам, Бла́же, Твоя́ ми́лости, / зане́ свет и мир повеле́ния Твоя́.

От но́щи неве́дения просвеще́й концы́, / просвети́ мя у́тром / человеколю́бия Твоего́, Го́споди.

От но́щи у́тренююще, воспева́ем Тя, Христе́ Бо́же, / обнища́вшаго нас ра́ди / и Крест и смерть пло́тию претерпе́вшаго.

От но́щи у́тренююще, Тебе́ сла́ву возсыла́ем, Го́споди Бо́же наш, / Твой мир даждь нам, / я́ко, ра́зве Тебе́, бо́га ино́го не ве́мы.

Свет Твой, Го́споди, и и́стину Твою́ низпосли́, / е́же наста́вити нас на повеле́ния Твоя́, / и да́руй нам мир Твой, Человеколю́бче.

Свет Твой незаходи́мый возсия́й, Христе́, / в серд ца́ ве́рно пою́щих Тя, / мир подава́яй нам па́че ума́; / тем, от но́щи неве́дения ко дню Све́том Твои́м теку́ще, / славосло́вим Тя, Человеколю́бче.

Твой мир даждь нам, / Сы́не Бо́жий: / ино́го бо, ра́зве Тебе́ бо́га не зна́ем, / И́мя Твое́ имену́ем, / я́ко Бог живы́х и ме́ртвых еси́.

Угль горя́щий, и́же до Иса́ииных усте́н / Серафи́м приложи́ не́когда, / клеща́ми взем и приложе́н; / он же, очище́н быв, /– пра́вде научи́теся, – всем пропове́даше.

Я́ко просвеще́ние на́ше сый, Христе́, / просвети́ нас, Защи́тителю жи́зни на́шея, / сохрани́ ны, наде́ющияся на Тя.

Обы́де нас после́дняя бе́здна, / несть избавля́яй, / вмени́хомся, я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих и ис правле́ние.

Из утро́бы Ио́ну младе́нца изблева́ морски́й зверь, / якова́ прия́т; / в Де́ву же все́льшееся Сло́во / и плоть при е́м шее про́йде, сохра́ншее нетле́нну: / Его́же бо не по стра да́ истле́ния, / Ро́ждшую сохрани́ неврежде́нну.

Обита́я Ио́на в преиспо́дних морски́х, / приити́ моля́шеся и бу́рю утоли́ти; / унзе́н же аз муча́щаго стрело́ю, / Христу́ воспева́ю, зол губи́телю, / ско́ро приити́ Тебе́ к мое́й ле́ности.

О́браз Боже́ственнаго Креста́ / Ио́на во чре́ве ки́тове / просте́ртыма дла́нма проначерта́ / и взира́ше, спасе́н от зве́ря / си́лою Твое́ю, Сло́ве.

Снизше́л еси́ в преиспо́дняя земли́ / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от Гро́ба.

Проро́ка спасл еси́ от ки́та, Человеколю́бче, / и мене́ из глубины́ прегреше́ний / возведи́, молю́ся.

Успения Богородицы (ин):

Морски́й пучиноро́дный ки́тов вну́тренний огнь – / тридне́внаго Твоего́ погребе́ния проображе́ние, / его́же Ио́на проро́к показа́ся. / Спасе́н бо, я́ко и предпосла́ся, неврежде́н, вопия́ше: / пожру́ Ти со гла́сом хвале́ния, Го́споди.

Проро́ка Ио́ну подража́я, вопию́: / живо́т мой, Бла́же, свободи́ из тли / и спаси́ мя, Спа́се ми́ра, зову́ща: сла́ва Тебе́.

Весь от страсте́й безме́рных содержу́ся / и ки́том зол снизпадо́х, / но возведи́ из истле́ния мя, Бо́же, / я́ко же пре́жде Ио́ну, / и ве́рою безстра́стие ми да́руй, / я́ко да во гла́се хвале́ния и спасе́ния / ду́хом пожру́ Ти.

Во глубину́ поги́бели / окая́нное естество́, Христе́ мой Спа́се, дости́гшее дре́вле / лежа́ше, – увы́ мне! – в те́мных глубо́ких, / поне́же Твое́ю Боже́ственною си́лою к Небеси́ взы́де, / красне́йшим добро́там, / пожру́ Тебе́, Спа́се, вопие́т, / же́ртву хвале́ния.

И́же в по́нте подъе́мый злоключе́ние / убеже́нием бу́ри и метне́нием жре́бия / и усты́ ят быв морска́го зве́ря, невреди́мь пребы́в, / но вопия́ше Ио́на к Тебе́: / живо́т мой да взы́дет, Христе́.

Из глубины́ в ско́рби вопия́ше: / возведи́ от тли живо́т мой,– / проро́к Ио́на к Тебе́, Человеколю́бцу.

Отве́ргл мя еси́ во глубины́ се́рдца морска́го, / и спасл еси́ мя, Спа́се, от рабо́ты сме́ртныя, / и разреши́л еси́ у́зы беззако́ний мои́х.

Со Ио́ною вопие́м Ти, Го́споди, / со гла́сом хвале́ния моля́щеся: / возведи́ от тли живо́т наш.

Я́ко во глубины́ морски́я отве́ргся / и углебо́х 1 в тиме́нии 2 глубины́, / от отча́яния у́мныя зимы́ 3 , / ле́ности моея́, Христе́, изми́ мя, / я́ко Ио́ну от зве́ря.

Я́ко Ио́ну проро́ка, / возведи́, Христе́ Бо́же, живо́т мой от тли, / вопию́ Ти, Человеколю́бче, / я́ко жизнь у тебе ́ есть, / и нетле́ние, и си́ла.

Тебе́, у́мную, Богоро́дице, пещь, / разсмотря́ем, ве́рнии, / я́коже бо о́троки спасе́ три Превозноси́мый, / мир обнови́, во чре́ве Твое́м всеце́л, / хва́льный отце́в Бог и препросла́влен.

В Рождество Христово:

О́троцы, благоче́стию совоспита́ни, / злочести́ваго веле́ния небре́гше, / о́гненнаго преще́ния не убоя́шася, / но, посреди́ пла́мене стоя́ще, поя́ху: / отце́в Бо́же, благослове́н еси́.

Всецаря́ любо́вию уловле́ннии, о́троцы / укори́ша безчи́сленно яря́щася мучи́теля злобо́жное языковре́дие, / и́мже повину́ся огнь мно́гий, / Влады́це глаго́лющим: / во ве́ки благослове́н еси́.

Из пла́мене о́троки избавле́й, / плоть прии́м, прише́л еси́ на зе́млю / и, на Кресте́ пригвожде́н, спасе́ние нам дарова́л еси́, Христе́, / еди́н благослове́н, отце́в Бо́же, / и препросла́влен.

О́троки от пе́щи изба́вивый, / быв Челове́к, /стра́ждет, я́ко сме́ртен, / и стра́стию сме́ртное / в нетле́ния облачи́т благоле́пие, / еди́н благослове́н / отце́в Бог и препросла́влен.

О́бразу служи́ти / мусики́йскому согла́сию созыва́ющу лю́ди, / от пе́сней сио́нских пою́ще оте́чески, о́троцы Дави́довы / мучи́телево разори́ша злочести́вое веле́ние / и пла́мень в ро́су преложи́ша, / песнь воспева́юще: / превозноси́мый отце́в и наш Бо́же, благослове́н еси́.

Успения Богородицы (ин):

Безсту́дней я́рости же и огню́ / Боже́ственное жела́ние сопротивля́яся, / огнь у́бо ороша́ше, / я́рости же смея́шеся, / Богодохнове́нною слове́с ною преподо́бных тривеща́нною цевни́цею / противовеща́я мусики́йским орга́ном посреди́ пла́мене: / препросла́вленный отце́в и наш Бо́же, благо слове́н еси́.

Пещь, Спа́се, ороша́шеся, / о́троцы же, лику́юще, поя́ху: / отце́в Бо́же, благослове́н еси́.

Авраа́мстии о́троцы в пещи́, / Тро́ицу прообрази́вше, / оѓненный пла́мень на ро́су преложи́ша / и, пою́ще, вопия́ху: / благослове́н еси́, Бо́же оте́ц на́ших.

В гремя́щую пещь сни́де А́нгел Госпо́день / к су́щим о Аза́рии отроко́м, / и не прикосну́ся их отню́д огнь. / Тогда́ трие́, воспева́юще, глаго́лаху: / благослове́н еси́, Бо́же оте́ц на́ших.

Вся дела́ Твоя́ и́стинна / и пра́ви путие́ Твои́, / Бо́же оте́ц на́ших.

По мно́жеству ми́лости Твоея́, / Человеколю́бче, сотвори́ с на́ми, / да Тебе́ ве́рно вси, воспева́юще, пои́м, / я́коже о́троцы: / благослове́н еси́, Бо́же оте́ц на́ших.

Проидо́ша, я́ко черто́г, пе́щный пла́мень нестерпи́мый / и́же за благоче́стие иногда́ / о́троцы святи́и, показа́вшеся я́ве, / и, согла́сно воспева́юще, песнь поя́ху: / отце́в Бо́же, благослове́н еси́.

Су́щим в пещи́ отроко́м Твои́м, Спа́се, / не прикосну́ся, ниже́ стужи́, огнь. / Тогда́ трие́, я́ко еди́неми усты́, поя́ху / и благословля́ху, глаго́люще: / благослове́н Бог оте́ц на́ших.

Явле́йся в купине́ законополо́жнику огне́м / и рождество́ Де́вы проображе́й в ней, / благослове́н еси́, Го́споди, Бо́же оте́ц на́ших.

Я́ко о́троцы дре́вле, зове́м Тебе́, Сло́ве: / бу́ди Твои́х рабо́в, Спа́се, храни́тель и покро́в / и спаси́ вся от прило́га сопроти́внаго, / я́ко да, пою́ще Твое́ Рождество́, / во ве́ки, глаго́лем, благослове́н еси́.

В пещи́ о́троцы Изра́илевы, / я́коже в горни́ле, / добро́ тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, / по́йте и превозноси́те во вся ве́ки.

В Рождество Христово:

Чу́да преесте́ственнаго / росода́тельная изобрази́ пещь о́браз: / не бо, я́же прия́т, пали́т ю́ныя, / я́ко ниже́ огнь Божества́ Де́вы, / в Ню́же вни́де утро́бу. / Тем, воспева́юще, воспое́м: / да благослови́т тварь вся Го́спода / и превозно́сит во вся ве́ки.

Утро́бу неопа́льно образу́ют Отрокови́цы / и́же в Ве́тсем опаляя́емии ю́ноши, / преесте́ственно ражда́ющую запечатле́нну. / Обоя́ же, содева́ющи чудо де́йство еди́но, / лю́ди к пе́нию возставля́ет благода́ть.

Ру́це, в ров ве́рженный львов, / иногда́ вели́кий во проро́цех / крестообра́зно просте́р Дании́л, / неврежде́н от сих сне́ди спасе́ся, / благословя́ Христа́ Бо́га во ве́ки.

Сей нарече́нный и Святы́й День – / еди́н суббо́т царь и госпо́дь, / пра́здников пра́здник / и торжество́ есть торже́ств, / в о́ньже благослови́м Христа́ во ве́ки.

В пла́мени о́гненне горя́щия пе́щи / сохра́ншаго де́ти / и во зра́це А́нгела снизше́дшаго к ним, / по́йте Го́спода / и превозноси́те Его́ во ве́ки.

Успения Богородицы (ин):

Пла́мень ороша́ющ преподо́бныя, / злочести́выя же попаля́ющ, / А́нгел Бо́жий всемо́щный показа́ отроко́м, / живонача́льный же исто́чник соде́ла Богоро́дицу, / тлю сме́рти и живо́т точа́щу пою́щим: / Соде́теля еди́наго пои́м, изба́вленнии, / и превозно́сим во вся ве́ки.

Его́же ужаса́ются А́нгели и вся во́инства, / я́ко Творца́ и Го́спода, / по́йте, свяще́нницы, просла́ви те, о́троцы, / благослови́те, лю́дие, / и превозноси́те во вся ве́ки.

И́же пи́щею не оскве́рншиися о́троцы от ца́рския трапе́зы, / во огнь, ра́дующеся, внидо́ша не́когда / и, в пла́мени прохлажда́еми, / усе́рдно поя́ху: /благослови́те, дела́ Госпо́дня, Го́спода.

На Сина́и купину́ горя́щу / неопа́льну сохра́ншаго / и о́троки посреде́ горя́щаго пла́мене изба́вльшаго Бога, / по́йте, благослови́те / и превозноси́те Его́ во ве́ки.

Небеса́ небе́с и вода́, я́же превы́ше небе́с, / благослови́те, по́йте Го́спода / и превозноси́те Его́ во ве́ки.

Новоде́телю всего́ ми́ра и Спаси́телю, / пое́т Тя вся со А́нгелы тварь, / игра́ет, лику́ет и ра́дуется тре́петом: / благослови́те, глаго́лющи, / вся дела́, честно́е рождество́ Изба́вителя моего́, / со мно́ю во ве́ки / любо́вию превознося́щая.

Песносло́вцы в пещи́ спа́сшаго де́ти / и громопла́менную прело́жшаго на ро́су, / Христа́ Бо́га по́йте и превозноси́те во вся ве́ки.

Песнопе́вцы пещь дре́вле о́троки прие́мши, неопа́льны сохрани́, / посреде́ же пла́мене стоя́щия согла́сно пе́ти научи́: / благослови́те, вся дела́ Госпо́дня, Го́спода.

Песнь Ана́ниеву Безнача́льному вси Отцу́ и Бо́гу, / моли́тву Аза́риеву Собезнача́льному Сло́ву, Сы́ну О́тчу, / и Мисаи́лову песнь Боже́ственному Ду́ху и Соприсносу́щному / правосла́вною ве́рою принесе́м, лю́дие, / во спасе́ние на́ше.

Песнь Тебе́ прино́сим Безпло́тных, / я́коже о́троцы в пещи́, и, пою́ще, глаго́лем: / благослови́те, вся дела́ Госпо́дня, Го́спода.

Пою́т Тя во́и А́нгельстии, сла́вит Тя род челове́ческий, / свяще́нницы, раби́ и ду́ши пра́ведных, / я́ко Творца́ и Го́спода всех во ве́ки.

Прему́дростию и Сло́вом вся соста́вльшаго Бо́га, / от язы́ков и ва́рваров изба́вльшаго нас, / о́троцы, по́йте, / свяще́н ницы, просла́вите, / лю́дие, превозноси́те во вся ве́ки.

Прему́дростию Небеса́ утверди́вшаго, / и на вода́х зе́млю основа́вшаго, / и тварь всю созда́вшаго, / благослови́те, по́йте, свяще́нницы, Го́спода, / лю́дие, превозноси́те Его́ во вся ве́ки.

Трисве́тлое Существо́ и Трисо́лнечная сла́ва / сни́де отроко́м посреде́ огня́, / сия́ невреди́мы соблюда́ющи / и Воскресе́ние нам предвозвеща́ющи / Христа́ Бо́га на́шего, / Его́же пою́т Ангели и мно́жества, / я́ко Победи́теля сме́рти во ве́ки.

Царя́ сла́вы и Победи́теля сме́рти, / Иису́са Назоре́я, / Того́ превозноси́те во вся ве́ки.

Чу́да преесте́ственнаго / показа́ о́браз огнеро́сная пещь дре́вле, / огнь бо не опали́ ю́ныя де́ти, / Христо́во явля́я безсе́менное от Де́вы Боже́ствен ное рождество́. / Тем, воспева́юще, воспои́м: / да благослови́т тварь вся Го́спода / и превозно́сит во вся ве́ки.

О́браз чи́стаго рождества́ Твоего́ / огнепали́мая купина́ показа́ неопа́льная; / и ны́не на нас напа́стей свире́пеющую угаси́ти, мо́лимся, пещь, / да Тя, Богоро́дице, / непреста́нно велича́ем.

В Рождество Христово:

Та́инство стра́нное ви́жу и пресла́вное: / Не́бо – верте́п, Престо́л Херуви́мский – Де́ву, / я́сли – вмести́лище, / в ни́хже возлеже́ Невмести́мый – Христо́с Бог, / Его́же, воспева́юще, велича́ем.

Люби́ти у́бо нам я́ко безбе́дное стра́хом / удо́бее молча́ние, / любо́вию же, Де́во, / пе́сни тка́ти, спротяже́н но сложе́нныя, / неудо́бно есть; / но и, Ма́ти, си́лу, / ели́ко есть произволе́ние, даждь.

О Ма́ти, Де́во / и Богоро́дице нело́жная, / ро́ждшая безсе́менно Христа́ Бо́га на́шего, / на Крест возне́сшагося пло́тию. / Тя, ве́рнии вси, досто́йно с Ним ны́не велича́ем.

Свети́ся, свети́ся, / Но́вый Иерусали́ме, / сла́ва бо Госпо́дня / на тебе́ возсия́, / лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Тебе́, све́тлую свещу́ и Ма́терь Бо́жию, / пречу́дную сла́ву и вы́шшую всех тва́рей, / пе́сньми велича́ем.

Успения Богородицы (ин):

Побежда́ются естества́ уста́вы / в Тебе́, Де́во Чи́стая, / де́вствует бо рождество́ и живо́т предобруча́ет смерть: / по рождестве́ Де́ва и по сме́рти жива́, / спаса́еши при́сно, Богоро́дице, насле́дие Твое́.

Светоно́сный о́блак, в о́ньже всех Влады́ка, / я́ко дождь с небесе́ на руно́, сни́де / и воплоти́ся нас ра́ди, / быв Челове́к, Безнача́льный, / велича́ем вси я́ко Ма́терь Бо́га на́шего Чи́стую.

Живоприе́мный исто́чник приснотеку́щий, / светоно́сный свети́льник благода́ти, / храм одушевле́нный, сень пречи́стую, / Небесе́ и земли́ простра́ннейшую, / Богоро́дицу, ве́рнии, вели ча́ем.

И́же вы́шнюю глубину́ Боже́ственнаго непостиже́ния / благоче́стно отве́рз, / ум, я́ко из ка́мене необъе́млемыя / Богонача́льныя возвы́сил еси́ Тро́ицы, всеблаже́нне о́тче, / тя велича́ем.

Неизглаго́ланна Де́вы та́йна: / Его́же бо не вмести́ша горе́ Небе́сная вели́чествия, / вмеща́ется во утро́бу. / Те́мже, соше́дшеся, ублажа́ем Ю / и с ве́рою и весе́лием велича́ем.

Неизглаго́ланное Де́вы та́инство: / Не́бо бо Сия́, и Престо́л Херуви́мский / и светоно́сный черто́г показа́ся / Христа́ Бо́га Вседержи́теля. / Сию́ благоче́стно я́ко Богоро́дицу велича́ем.

Ра́дуйся, Богоро́дице Де́во, Ма́ти благослове́нная, / из Тебе́ бо про́йде Бог воплоще́нный, / Сего́, сла́вяще и воспева́юще, велича́ем.

Ра́дуйся, де́вственная похвало́, / ра́дуйся, Ма́ти Пречи́стая, / Ю́же, вся тварь, Боже́ственными пе́сньми велича́ем.

Ра́дуйся, Пресвята́я Богоприе́мная Мари́е, / ра́дуйся, Пречи́стая, па́дших основа́ние: / в Тебе́ бо яви́ся днесь Влады́ка, / о, чудесе́! Обновля́яй истле́вшия / и к Све́ту возводя́ невече́рнему, Отрокови́це.

Серафи́мски, приглаша́юще, вопие́м Ти, Богоро́дице, ве́рнии: / Тобо́ю возвели́чи Госпо́дь, / е́же сотвори́ти с на́ми. / Тем Тя, Чи́стая, / и от Тебе ́ неискусому́жно воплоще́ннаго Спа́са, / я́ко Бо́га всех, пе́сньми велича́ем.

Служи́тель безпло́тный предста́, глаго́ля Благода́тней: / Госпо́дь с Тобо́ю! / Ю́же велича́ем.

Сотвори́ держа́ву мы́шцею Свое́ю, / низложи́ бо си́льныя со престо́л / и вознесе́ смире́нныя Бог Изра́илев, / в ни́хже посети́ нас Восто́к с высоты́ / и напра́вил ны есть на путь ми́ра.

Тебе́, ви́денную дверь Иезекии́лем проро́ком, / е́юже никто́же про́йде, то́кмо Бог еди́н, / Богоро́дице Де́во, пе́сньми почита́ем.

Тебе́, Небе́с вы́шшую / и на земли́ Не́бо и Престо́л бы́вшую, Ма́терь Бо́жию, / вси ро́ди, велича́ем.

Ты вмести́лище, Чи́стая, Боже́ственнаго непостиже́ния / па́че естества́ была́ еси́, я́ко Бо́гу плоть взаимода́вшая / и Твою́ де́вственную не растерза́вшая утро́бу, / внегда́ роди́ти безсе́менно: / Тя велича́ем.

Тя, без ма́тере пе́рвее / и без отца́ второ́е, я́ко Бо́га и Челове́ка / пе́сньми велича́ем.

Тя, в ря́сны златы́я оде́янную, / укра́шенную Богоро́дицу, голуби́цу посре́бренную / и позлаще́нную блеща́нием зла́та, велича́ем.

Тя, го́ру Бо́жию усыре́нную, / в не́йже благоволи́ Бог пло́тию всели́тися, / Богоро́дице Мари́е, велича́ем.

Тя, ю́же ви́де Моисе́й, неопали́мую купину́, / и ле́ствицу одушевле́нную, / ю́же Иа́ков ви́де, / и дверь Небе́сную, е́юже про́йде Христо́с Бог наш, / пе́сньми, Ма́ти Чи́стая, велича́ем.

Ирмосы 2-го гласа

Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть: / препросла́вленный Госпо́дь сла́вно бо просла́вися.

Глубины́ откры́л есть дно / и су́шею Своя́ влече́т, / в ней покры́в проти́вныя, / кре́пкий во бране́х Госпо́дь, / я́ко просла́вися.

Ше́ствует морску́ю волня́щуюся бу́рю, / су́шу а́бие Изра́иль я́вльшуюся, / Че́рмный же понт триста́ты еги́петския / покры́ ку́пно, водостла́нен гроб, / си́лою кре́пкою десни́цы Влады́чни.

На Рождество Богородицы:

Гряди́те, лю́дие, пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

В неделю жен мироносиц:

Моисе́йскую песнь восприи́мши, возопи́й, душе́: / Помо́щник и Покрови́тель бысть мне во спасе́ние, / сей мой Бог, и просла́влю Его́.

Бе́здны дре́вле безме́рное / Моисе́й крестообра́зно пресече́ жезло́м / и фарао́ново всево́инство в нем потопи́. / Изра́ильтяне же, на он пол мо́ря преходя́ще, / песнь воспева́ху: / пои́м Го́сподеви, сла́вно бо просла́вися.

Во́ды дре́вле Чермна́го растерза́л еси́ жезло́м законоположи́теля, / и лю́ди избра́нныя немо́кренно спасы́й, / побе́дную пою́щия песнь / победи́тель ней Твое́й, Христе́, десни́це.

Высоковы́йный в колесни́цах и в кре́пких триста́тах фарао́н / в Чермне́м потопи́ся со всево́инством. / Мои се́й же Изра́иля, я́ко по су́ху, прове́д / Боже́ственным веле́нием, поя́ше: / пои́м Го́сподеви, сла́вно бо просла́вися.

Непроходи́мое волня́щееся мо́ре / Бо́жиим Свои́м веле́нием изсуши́вшему / и пешеше́ствовати сквозе́ е́ изра́ильтеския лю́ди наста́вльшему, / Го́сподеви пои́м, сла́вно бо просла́вися.

Нетре́ну, необы́чну, / немо́кренно морску́ю ше́ствовав стезю́, / избра́нный вопия́ше Изра́иль: / Го́сподеви пои́м, я́ко просла́вися.

Обрати́вшему мо́ре в су́шу / и прове́дшему Изра́иля сквозе́ е́, / пои́м Го́сподеви Бо́гу, / я́ко просла́вися.

По бе́здне ходя́ще, изра́ильтеския лю́ди воспева́ху / руко́ю кре́пкою Си́льному, / сокруши́вшему бра́ни фарао́на мучи́теля: / пои́м Го́сподеви, сла́вно бо просла́вися.

Пои́м Го́сподеви, / в мо́ри дре́вле лю́ди наста́вльшему / и в нем фарао́на со всево́инством погрузи́вшему, / песнь побе́дную, я́ко просла́вися.

Пои́м Го́сподеви песнь но́вую: / стра́шно бо чу́до, / я́ко Де́ва породи́ Бо́га вочелове́чшася / и по рождестве́ па́ки Де́ва пребы́сть.

Пои́м Го́сподеви песнь но́вую, / я́ко пресла́вно Изра́иля спасе́, / рабо́ты изба́вив, / и му́чащия враги́ покры́ло есть мо́ре.

Стопа́ми невла́жными Изра́иль прохожда́ше, / сече́нием вод проявля́ше Крест, / вхо́дом – погребе́ние, / исхо́дом – честно́е и Боже́ственное Воскресе́ние, / поя́ в похвале́нии Изба́вителю по бе́дную.

Бог, и́стинна дела́ Его́ / и вси путие́ Его́ судьбы́.

Ви́дите, ви́дите, я́ко Аз есмь в мо́ри спасы́й, /и в пусты́ни насы́тивый изра́ильтеския лю́ди, / и во́ду из ка́мене источи́вый челове́ком, / да дре́вле па́дшаго, поне́с, / привлеку́ ко Мне за неизрече́нную ми́лость.

Внемли́те, лю́дие, / зна́мением дел Боже́ственныя Моея́ си́лы / и о сем уразуме́йте, / я́ко Еди́н Аз Бог есмь всех.

Внемли́те, лю́дие Мои́, зако́ну Моему́, / приклони́те у́хо ва́ше во глаго́лы уст Мои́х, / я́ко И́мя Твое́, Го́споди, призва́х.

Не́бо, вонми́ ми, / земле́, внуши́ глаго́лы моя́, / я́ко из глубины́ се́рдца моего́ отры́гнух, / Бо́жие великоле́пие днесь, / па́мять прему́дрых апо́стол Его́.

Не́бо и земля́ да во́нмет / и Христу́ да воспою́т, / во Иорда́не челове́ческий возсозда́вшему днесь род, / истле́вший от преступле́ния.

Процвела́ есть пусты́ня, я́ко крин, Го́споди, / язы́ческая неплодя́щая Це́рковь / прише́ствием Твои́м, / в не́йже утверди́ся мое́ се́рдце.

Кре́пость дая́й царе́м на́шим Госпо́дь / и рог пома́занных Свои́х вознося́й / от Де́вы ражда́ется, гряде́т же ко Креще́нию. / Тому́, ве́рнии, возопие́м: / несть свят, я́ко Бог наш.

Ели́цы дре́вних изреши́хомся се́тей, / бра́шен львов сотре́нных члено́вными, / ра́дуимся и разшири́м уста́, / сло́во плету́ще от слове́с сладкопе́ния. / И́мже к нам наслажда́ется дарова́ний.

На Рождество Богородицы:

Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.

Непло́дствовавший мой ум / плодоно́сен, Бо́же, покажи́ ми, / Де́лателю до́брых, Насади́телю благи́х, / благоутро́бием Твои́м.

И́же в нача́ле прему́дростию Твое́ю, Христе́, / Небеса́ утвержде́й ра́зумом, / основа́вый же зе́млю Боголе́пно на вода́х безме́рных, / держа́вою Твое́ю утверди́ мя, молю́ся, / в тве́рдом основа́нии ве́ры.

Лук сокруши́ся си́льных / держа́вою Твое́ю, Христе́, / и си́лою немощству́ющии / препоя́сашася.

На ка́мени мя ве́ры утверди́в, / разшири́л еси́ уста́ моя́ на враги́ моя́, / возвесели́ бо ся дух мой, внегда́ пе́ти: / несть свят, я́коже Бог наш, / и несть пра́веден, па́че Тебе́, Го́споди.

Небеса́ небе́с, сла́ву Твою́, Спа́се, пове́дающая, / на похвалу́ воздвиза́ют А́нгелов мно́жества, / и челове́цы воспева́ют: / несть, па́че Тебе́, Бог и Госпо́дь, / от не су́щих во е́же бы́ти приведы́й вся́ческая.

Не́бо простры́й, я́ко ко́жу, и су́шу основа́вый на вода́х / Боже́ственным Твои́м ма́нием, Христе́ Бо ́же, / и мене́ утверди́ в Правосла́вней ве́ре, взыва́юща: / свят несть, па́че Тебе́.

Ты сло́вом Твои́м, Го́споди, / Небеса́ утверди́л еси́, / Ты и се́рдце мое́ / в ве́ре утверди́.

Утверди́ мя, Го́споди, Бо́же мой, / да не похва́лится враг мой о мне: / Ты бо еси́, Го́споди, утвержде́ние мое́, / и прибе́жище, и си́ла.

Утверди́ мя, Го́споди, утверди́вый си́лою Небеса́, / и утверди́ се́рдце мое́ во стра́се Твое́м, / да А́ннину песнь принесу́ Ти, Сло́ву: / несть свят, я́ко Бог наш, / вознесы́й рог пома́занных Свои́х.

Утверди́вый в нача́ле Прему́дростию и Сло́вом Небеса́ в ра́зуме / и зе́млю Основа́вый на вода́х, / воскресни́ от Гро́ба, / дая́й нам рог спасе́ния.

Утверди́ся се́рдце мое́ в Го́споде, / вознесе́ся рог мой в Бо́зе мое́м, / я́ко роди́лся еси́ на земли́ / и спасл еси́ заблу́ждшаго.

Храни́тель тве́рдый / и незы́блемое утвержде́ние Ты еси́, Христе́, / наде́ющияся на Тя, неукло́нны утвержда́я нас, / извести́ в тве́рдом Твое́м основа́нии наде́жды и ве́ры.

Прише́л еси́ от Де́вы не хода́тай, ни А́нгел, / но Сам, Го́споди, вопло́щся, / и спасл еси́ всего́ мя, челове́ка. / Тем зову́ Ти: / сла́ва си́ле Твое́й, Го́споди.

Услы́шах, Го́споди, глас Твой, его́же рекл еси́, глас вопию́щаго в пусты́ни, / я́ко возгреме́л еси над вода́ ми мно́гими, / Твоему́ свиде́тельствуяй Сы́ну, / весь быв соше́дшаго Ду́ха, возопи́: / Ты еси́ Хри сто́с, Бо́ жия му́дрость и си́ла.

Огне́м очи́щся та́йнаго зре́ния, / поя́ проро́к челове́ков новоде́йство, / возглаша́ет глас, ду́хом пле́щущ, / воплоще́ние явля́ющ неизрече́нна Сло́ва, / И́м же си́льных держа́вы сотро́шася

На Рождество Богородицы:

Услы́шах, Го́споди, / слух Твоего́ смотре́ния, / и просла́вих Тя, / Еди́не Человеколю́бче.

Е́же от Де́вы Твое́ рождество́ проро́к предзря́, / возпропове́даше, вопия́: / слух Твой услы́шах и убоя́хся, / я́ко от ю́га и из горы́ святы́я приосене́нныя / прише́л еси́, Христе́.

Внегда́ прибли́житися ле́том, позна́ешися, / положи́л бо еси́ любо́вь тве́рду / кре́пости Твоея́, Го́споди.

Из горы́ ка́мень кроме́ руки́ отсе́клся еси́, Христе́, / от Де́вы Ма́тере. / Те́мже проро́к, прови́дя, вопия́ше: / во спасе́ние люде́й Твои́х прише́л еси́, / сла́ва си́ле Твое́й, Го́споди.

Неизрече́нное та́инство вочелове́чения Твоего́, Христе́ Бо́же, / та́йно прови́дев, Авваку́м вопия́ше: / услы́шах слух Твой и убоя́хся, / разуме́х дела́ Твоя́ / и просла́влю си́лу Твою́.

От Де́вы безсе́менно яви́лся еси́ ми́рови, я́ко со́лнце, / нетле́ния сла́ву озаря́я нам, / от Ада́ма преступле́нием осуди́вшимся, Го́споди. / Те́мже дохнове́нием Ду́ха проро́к Авваку́м взыва́ше: / сла́ва, Христе́, си́ле Твое́й.

Посреде́ двою́ разбо́йнику Живо́т на Дре́ве ви́сяше, / совокупи́ти бо пре́жде разстоя́щее / дла́ни простре́ Свое́ю во́лею, / и воскре́с тридне́вный, совоскреси́в естество́ челове́ческое, / сла́вящее Его́ Боже́ст венное снизхожде́ние.

Пою́ Тя, слу́хом бо, Го́споди, услы́шах и ужасо́хся: / до мене́ бо и́деши, мене́ ища́, заблу́ждшаго. / Тем мно́гое Твое́ снизхожде́ние, е́же на мя, / прославля́ю, Многоми́лостиве.

Прозорли́ве проро́к тайноводи́мый / Твоему́, Христе́, прише́ствию ужаса́ется, / е́же предреки́й вопия́ше: / хвале́ния Твоего́ испо́лнися земля́, / Боголе́пно бо на́шу нищету́ не презре́л еси́, / но прише́л и спасл еси́.

Свеще́ю пре́жде Авваку́м просвеща́емь, Го́споди, / и Твое́ вочелове́чение предвозвеща́я, вопия́ше, / от Святы́я Де́вы проити́, Неизме́нне, / в возсозда́ние дре́вняго Ада́ма.

Услы́шах, Го́споди, / сла́вное Твое́ смотре́ние / и просла́вих, Человеколю́бче, / непостижи́мую Твою́ си́лу.

Услы́шах, Го́споди, слух Твой и убоя́хся, / разуме́х дела́ Твоя́, и диви́хся, и возопи́х: / сла́ва си́ле Твое́й, Го́споди.

Услы́шах слух Боже́ственныя си́лы Твоея́, Христе́, / я́ко безсе́менно во чре́ве Де́вы зача́лся еси́, / и возопи́х: сла́ва си́ле Твое́й, Го́споди.

Чу́ду стра́шному научи́вся чу́дный Авваку́м, / неизрече́нному Твоему́, Сло́ве Бо́жий, прише́ствию, / я́ко от приосене́нныя ча́щи, Неизме́нне, воплоща́емь, проше́л еси́, / и, я́ко во у́жасе быв, взыва́ше: / сла́ва си́ле Твое́й, Го́споди.

Хода́тай Бо́гу и челове́ком был еси́, Христе́ Бо́ же: / Тобо́ю бо, Влады́ко, к Светонача́льнику, Отцу́ Твоему́, / от но́щи неве́дения / приведе́ние и́мамы.

Иису́с, живота́ нача́льник, / разреши́ти осужде́ние гряде́т Ада́ма первозда́ннаго, / очище́ний же я́ко Бог не тре́буя, / па́дшаго очища́ет во Иорда́не, в не́мже вражду́ уби́в, / преиму́щ всяк ум мир да́рует.

Врага́ те́мнаго и оскверне́ннаго я́да / очище́ни ем Ду́ха измове́ни, / к но́вой приста́хом небла́зненной стези́, / водя́щей в непристу́пную ра́дость, Еди́нем присту́пну, / и́мже Бог примири́ся.

На Рождество Богородицы:

Сеннопи́санный мрак гада́ний разори́в / и ве́рных прибы́тием И́стины, / Богоотрокови́цею, озари́в сердца́, / и нас Све́том Твои́м, Христе́, наста́ви.

Мглу души́ моея́, Спа́се мой, / разгна́в све́том за́поведей Твои́х, озари́ мя, / я́ко Еди́н Царь ми́ра.

Живо́т сый и Свет, Христе́ Бо́же, / мра́чнаго неве́дения разори́в мглу, / просвети́ на́ша мы́сли, / у́мная чу́вства незаходи́мым Све́том Твоего́ ра́зума.

Но́щи преше́дшей, прибли́жися день, / и Свет ми́ру возсия́, / сего́ ра́ди хва́лят Тя А́нгельстии чи́ни / и славосло́вят Тя вся́ческая.

Невече́рний Свет Твой, Христе́, / возсия́й в нас, Светода́вче, / и мрак прегреше́ний на́ших разори́, / ми́ра Царю́.

От но́щи пое́м Тя, Христе́ Бо́же, / я́ко благоволе́нием О́тчим / Себе́ во истоща́ние положи́л еси́ / на́шего ра́ди спасе́ния.

Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ ми́ра, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.

Просвеще́нием за́поведей Твои́х, Еди́не Ще́дре, / озари́ ду́шу мою́, молю́ся, / ю́же из глубины́ сна ле́ности / ко у́тру возста́ви составле́ние пе́рстное, / я́ко да пою́ Тя, Христе́, Све́та невече́рняго.

Све́та Пода́телю / и веко́в Тво́рче, Го́споди, / во све́те Твои́х повеле́ний наста́ви нас: / ра́зве бо Тебе́, ино́го бо́га не зна́ем.

Стяжи́ ны, Го́споди, плене́нныя от греха́, и просвети́, Спа́се, / во е́же пе́ти и сла́вити Тя, / Еди́наго Изба́вителя / и Просвети́теля душ на́ших.

Тебе́, сла́вы Со́лнце незаходи́мое, / Христе́, от се́рдца молю́: / просвети́ души́ моея́ ослепле́ннии зе́ницы, / от но́щи греха́ к де́ланию за́поведей Твои́х.

Угль Иса́ии проявле́йся, / Со́лнце из де́вственныя утро́бы / возсия́ во тьме заблу́ждшим, / Богоразу́мия просвеще́ние да́руя.

У́тро све́тлое возсия́ от Гро́ба, / Его́ бо схожде́нием Све́та испо́лнишася преиспо́дняя, / пра́ведных ду́ши воста́ша во сла́ве, / славосло́вящия стра́шное и Боже́ственное Воскресе́ние: / Ты бо Еди́н Царь, и Держа́вный, и Си́льный, / и ми́ра Пода́тель.

В бе́здне грехо́вней валя́яся, / неизсле́дную милосе́рдия Твоего́ призы́ваю бе́здну: / от тли, Бо́же, мя возведи́.

Глас Словесе́, свети́льник Све́та, / денни́ца Со́лнца, Предте́ча в пусты́ни, /– пока́йтеся,– всем вопие́т лю́дем,– и предочи́ститеся: / се бо предстои́т Христо́с, / от тли мир избавля́яй.

Вожделе́ннаго я́вствова 4 со всеблаже́нным гла́сом Оте́ц, / Его́же из чре́ва отры́гну. / Ей,– глаго́лет, – Сей Соесте́ствен Сын, Сый светоза́рен, / произни́че 5 из челове́ча ро́да: / Сло́во же мое́ жи́во и Челове́к промышле́нием.

На Рождество Богородицы:

Ко Го́споду от ки́та Ио́на возопи́: / Ты мя возведи́ из глубины́ а́да, молю́ся, / да я́ко Изба́вителю во гла́се хвале́ния / и́стины же Ду́хом пожру́ Тебе́.

Во глубине́ грехо́вней содержи́мь есмь, Спа́се, / и в пучи́не жите́йстей обурева́емь, / но, я́коже Ио́ну от зве́ря, / и мене́ от страсте́й возведи́ и спаси́ мя.

Бе́здна мя мно́га грехо́вная окружа́ет, / и вопию́ Ти, проро́ка подража́яй: / от тли мя, Го́споди, возведи́.

Бе́здна согреше́ний обы́де мя после́дняя, / но, я́ко проро́ка Ио́ну, Го́споди, / Го́споди, возведи́ / из нетле́ния живо́т мой.

Во глубины́ дости́гша морски́я, / и тридне́вствовавша в ки́товех пе́рсех морска́го зве́ря, / дре́вле Ио́ну подража́яй, зову́ Ти: Спа́се мой, / вопию́ща, возведи́ мя из а́да преиспо́дняго, / я́ко да пожру́ Ти со гла́сом хвале́ния.

Возопи́х в ско́рби мое́й / ко Го́споду Бо́гу моему́, / и посла́ Спа́са ми́ра, / и изба́ви от тли живо́т мой.

Глас глаго́л моле́бных / от боле́зненныя, Влады́ко, души́ услы́шав, / от лю́тых мя изба́ви: / Еди́н бо еси́ на́шего спасе́ния вино́вен.

Е́же из глубины́ се́рдца, / не пре́зри моле́ние рабо́в Твои́х, Го́споди: / но я́ко проро́ка Ио́ну от ки́това чре́ва изве́л еси́, / и нас от у́мнаго 6 зве́ря и душетли́тельнаго спаси́.

Из глубины́ возведи́ мя, / Ио́на к Тебе́ возопи́, / о́браз погребе́ния и воскресе́ния сый, / е́же нам дарова́л еси́, Всеси́льне Спа́се.

Из чре́ва бе́здны долго́в мои́х, Спа́се, изведи́ дух мой, / я́ко дре́вле Ио́ну от ки́това чре́ва возве́л еси́, / да во хра́ме святы́я сла́вы Твоея́ / Твою́ похвалю́ благосты́ню.

Морско́му зве́рю впад, Ио́на здрав спасе́ся, / аз же, содержи́мь мно́гими мои́ми лю́тыми, в про́пасть отве́ржен бых, / но молю́ Тя, Иису́се, Бо́же мой, / предвари́в, уще́дри мя / и от тьмы возведи́ живо́т мой, и от тли.

Прообразу́яй Твое́ погребе́ние, Крест и страсть Ио́на, / во чре́ве ки́тове, Спа́се, тридне́вновав, от внутрь взыва́ше: / да взы́дет живо́т мой, / и прии́дет моли́тва моя́ в храм Твой Боже́ственный, / о Го́споди ми́лости.

Богопроти́вное веле́ние беззако́ннующаго мучи́теля / высо́к пла́мень вознесло́ есть. / Христо́с же простре́ Богочести́вым отроко́м ро́су духо́вную, / Сый благослове́н и препросла́влен.

Ю́ноши благочести́выя, пе́щи оѓненней приобщи́вшияся, / шумя́щ дух ро́сный невреди́мы сохрани́ / и Бо́жия А́нгела снизхожде́ние. / Те́мже, в пла́мени ороша́еми, благода́рственно воспева́ху: / препе́тый оте́ц Го́споди и Бо́же, благослове́н еси́.

Опали́ струе́ю зми́евы главы́ пе́щный высо́кий пла́мень, / ю́ноши нося́щ благочести́выя, / ути́шивый неудободержи́мую мглу из греха́, / всю же омыва́ет росо́ю Ду́ха.

На Рождество Богородицы:

Купина́ в горе́ огненеопа́льная / и росоно́сная пещь халде́йская / я́ве предписа́ Тя, Богоневе́сто: / Боже́ственный бо Невеще́ственный / в веще́ственнем чре́ве Огнь неопа́льно прия́ла еси́. / Те́мже из Тебе́ Ро́ждшемуся пое́м: / благослове́н еси́, Бо́же оте́ц на́ших.

Херуви́мы подража́юще, о́троцы / в пещи́ ликовствова́ху, вопию́ще: / благослове́н еси́, Бо́же, / я́ко и́стиною и судо́м наве́л еси́ сия́ вся грех ра́ди на́ших, / препе́тый и препросла́вленный во вся ве́ки.

Благоче́стия рачи́телие, о́троцы, в Вавило́не о́бразу злато́му не послужи́вше, / в пещь о́гненную, ра́дующеся, самово́льне идо́ша / и пла́мень в ро́су преведо́ша, / сия́нию Бо́жию пою́ще: / отце́в Бо́же, в хра́ме Твое́м благослове́н еси́.

Богочести́вии о́троцы Сио́нстии, / плене́ннии в Вавило́не, предразсуди́вше, / и, посреде́ пе́щи вве́рже ни, / всеми́рное ликова́ние воздвиго́ша, пою́ще: / оте́ц на́ших Бо́же, благослове́н еси́.

В пещь пла́менную ю́ноши три вве́ржени, / ликова́ние спле́тше, я́ко в нетле́ннем травнице́, / Христу́, снаслажда́ющеся, вопия́ху, пою́ще: / отце́в Бо́же, во хра́ме Твое́м благослове́н еси́.

Вети́и яви́шася о́троцы любому́дрейшии дре́вле, / от Богоприя́тныя бо души́, Богосло́вяще устна́ми, поя́ху: / Пребоже́ственный отце́в и наш Бо́же, / благослове́н еси́.

Да пресла́вное рождество́ Твое́, Христе́, е́же от Де́вы, / прообрази́ши я́ве, / неопали́мы в пещи́ о́троки сохрани́л еси́, / пе́сньми пою́щия Тебе́: / отце́в Бо́же, благослове́н еси́.

О́бразу злато́му, на по́ле Деи́ре служи́му, / трие́ Твои́ о́троцы небрего́ша безбо́жнаго веле́ния, / посреде́ же огня́ вве́ржени, ороша́еми, поя́ху: / благослове́н еси́, Бо́же оте́ц на́ших.

Пещь дре́вле всегремя́щую угаси́вый / и о́троки ту́чею духо́вною ороси́вый, / благослове́н еси́, Бо́же оте́ц на́ших.

Те́лу злато́му прему́дрыя де́ти не послужи́ша, / и в пла́мень са́ми поидо́ша, / и бо́ги их обруга́ша, / среди́ пла́мене возопи́ша, и ороси́ я́ А́нгел: / услы́шася уже́ уст ва́ших моли́тва.

Трие́ от́роцы в пещи́ Тро́ицу прообрази́вше, / Царя́ Го́спода пропове́даша / и пре́лесть и́дольскую упраздни́ша, вопию́ще: / благослове́н еси́, Бо́же оте́ц на́ших.

Трисве́тлыя Тро́ицы равночи́сленнии о́троцы, и́же от Иерусали́ма, / в Вавило́не царя́ нечести́ваго попра́ша веле́ние / и, во огнь вве́ржени, ликовствова́ху, глаго́люще: / благослове́н еси́, Бо́же оте́ц на́ших.

Пещь иногда́ о́гненная в Вавило́не де́йства разделя́ше, / Бо́жиим веле́нием халде́и опаля́ющая, / ве́рныя же ороша́ющая, пою́щия: / благослови́те, вся дела́ Госпо́дня, Го́спода.

Та́йну пресла́вную вавило́нская показа́ пещь, источи́вшая ро́су, / я́ко струя́ми имя́ше невеще́ственный Огнь восприя́ти Иорда́н / и объя́ти пло́тию креща́ема Зижди́теля, / Его́же благословя́т лю́дие / и превозно́сят во вся ве́ки.

Свобо́дна у́бо тварь познава́ется / и сы́нове све́та, пре́жде омраче́ннии, / еди́н сте́нет тьмы предста́тель. / Ны́не да благослови́т усе́рдно Вино́внаго / пре́жде окая́нное язы́ков всенасле́дие.

На Рождество Богородицы:

В пещи́ о́трочестей прообрази́л еси́ иногда́ Твою́ Ма́терь, Го́споди: / о́браз же Сия́ из огня́ изыма́ше неопа́льно входя́щия. / Ю́же пое́м, я́вльшуюся Тобо́ю конце́м днесь, / и превозно́сим во вся ве́ки.

В купине́ Моисе́ю Де́вы чу́до / на Сина́йстей горе́ Прообрази́вшаго иногда́, / по́йте, благослови́те / и превозноси́те во вся ве́ки.

А́нгели непреста́нно воспева́ют, / челове́цы при́сно славосло́вят, / и вся тварь / да благослови́т Го́спода.

В нача́ле, Го́споди, зе́млю основа́л еси́, / и дела́ рук Твои́х суть Небеса́; / воспева́ет вся тварь / и славосло́вит де́йства сло́вом во ве́ки.

В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га / по́йте, дела́, я́ко Го́спода / и превозноси́те во вся ве́ки.

Веле́ние беззако́нное до́блии о́троцы небрего́ша / и мусики́йских орга́нов гла́са не послу́шаша, / но, в пещи́ ороша́еми, благода́рно поя́ху: / благослови́те, дела́ Госпо́дня, Го́спода.

Веле́нию мучи́телеву / преподо́бнии трие́ о́троцы не повину́вшеся, / в пещь вве́ржени, Бо́га испове́даху, пою́ще: / благослови́те, дела́ Госпо́д ня, Го́спода.

Глаго́л мучи́телев поне́же превозмо́же, / седмери́цею пещь разжже́на бысть иногда́, / в не́йже о́троцы не опали́шася, / царе́во попра́вше веле́ние, / но вопия́ху: вся дела́ Госпо́дня, Го́спода по́йте / и превозноси́те во вся ве́ки.

Гла́сы А́нгельскими / на Небесе́х сла́вимаго Бо́га / восхва́лим, глаго́люще, земноро́днии, / во вся ве́ки.

Дре́вле ороси́вшаго евре́йския о́троки в пла́мени / и опали́вшаго Го́спода халде́и пресла́вно в нем / воспое́м, глаго́люще: / благослови́те и превозноси́те Его́ во ве́ки.

Истука́ну златосоде́ланному, / на по́ли Деи́ре орга́ны мусики́йскими служи́му, / Бо́гу же, всех Созда́телю, презре́ну, / сио́нстии о́троцы не послу́шаша веле́ния беззако́ннаго, / но показа́ша тва́ри пещь росо да́тельну мучи́теля, / благословя́ща лю́ди, / пре воз нося́щия Еди́наго Бо́га всех во вся ве́ки.

Красноду́шнии от́роцы, в пещь вве́ржени, / Держа́ву взя́ша Ве́чную, Бо́га испове́дающе Небе́снаго, / и мучи́теля посрами́ша, до́гму предпросте́рше сладко пе́ние: / благослови́те, вся́кое дыха́ние и тварь, / Су́щаго над все́ми Царя́ во вся ве́ки.

Неизрече́нною му́дростию соста́вльшаго вся́ческая Бо́га Сло́ва / и от не су́щих во е́же бы́ти приве́дшаго, / благослови́те, дела́, я́ко Го́спода / и превозноси́те во вся ве́ки.

Неразде́льнии Тро́ицы о́троцы бы́ша, / добро́ты о́браза не жела́вше, / душепа́губную пре́лесть отри́нувше, / с Небесе́ ороше́ни, вопия́ху Христу́ песнь: / благослови́те, вся дела́ Госпо́дня, Го́спода.

О подо́бии зла́те небре́гше треблаже́ннии ю́ноши, / неизме́нный и живы́й Бо́жий о́браз ви́девше, / среди́ огня́ воспева́ху: / осуществова́нная да пое́т Го́спода вся тварь / и превозно́сит во вся ве́ки.

Ороси́ А́нгел пещь отроко́в, отвали́ ка́мень от две́ри Гро́ба / и жена́м мироно́сицам благовеща́ше, глаго́ля: / воскре́се Госпо́дь, я́коже прорече́ вам. / Потщи́теся, Песнь 8 пт36 возопи́йте Боже́ственным ученико́м Его́, / я́ко предваря́ет вы в Галиле́и / Ца́рствуяй во вся ве́ки.

От не су́щих во е́же бы́ти Приве́дшаго Сло́вом вся, / по́йте и превозноси́те во вся ве́ки.

Свещено́сцы душе́ю, / све́тлии, па́че сне́га пресия́юще, / преподо́бнии о́троцы посреде́ пла́мене не опали́шася: / вся бо вку́пе, ели́ка под тва́рию, / к Бо́жии пе́сни себе́ созыва́юще, с ра́достию поя́ху: / по́йте, дела́ Госпо́дня, Го́спода.

Устраши́ся отроко́в благочести́вых сообра́знаго души́ нескве́рнаго те́ла / и устрани́ся воспита́нный в безме́рном веществе́ неутружде́н огнь, / присноживу́щу же, изувя́дшу пла́меню, ве́чнующая песнь воспева́шеся: / Го́спода, вся дела́, по́йте / и превозноси́те во вся ве́ки.

Хва́лим, благослови́м, превозно́сим, / пое́м И́мя Твое́, Христе́: / Ты бо Царь во вся ве́ки.

Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Бо горо́дицу велича́ем.

Недоуме́ет всяк язы́к благохвали́ти по достоя́нию, / изумева́ет же ум и преми́рный пе́ти Тя, Богоро́дице: / оба́че Блага́я су́щи, ве́ру приими́, / и́бо любо́вь ве́си Боже́ственную на́шу, / Ты бо христиа́н еси́ Предста́тельница, Тя велича́ем.

О, па́че ума́ Рождества́ Твоего́ чуде́с, / Неве́сто Все чи́стая, Ма́ти Благослове́нная, / Е́юже получи́вше все соверше́нное спасе́ние, / досто́йно хва́лим, я́ко Благоде́теля, / дар нося́ще – песнь благодаре́ния.

На Рождество Богородицы:

Я́же пре́жде со́лнца свети́льника Бо́га возсия́вшаго, / пло́тски к нам прише́дшаго из боку́ Деви́чу, / неизрече́нно воплоти́вшая, Благослове́нная Всечи́стая, / Тя, Богоро́дице, велича́ем.

Преесте́ственно пло́тию Заче́ншую во чре́ве / от Отца́ безле́тно предвозсия́вшее Сло́во / в пе́снех немо́лчных / велича́ем, ве́рнии.

Велича́ем вси страстоте́рпцев па́мять, / водо́ю и огне́м проше́дших и Христа́ моля́щих / спасти́ ду́ши на́ша.

Велича́ем Твое́ Рождество́, Отрокови́це нескве́рная, / Тобо́ю Бо́гу соедини́вшеся, / и вопие́м Ти, Мари́е Богоневе́сто: / ра́дуйся, всех воззва́ние, от дре́вния кля́твы умерщвле́нных, / Твои́м невозде́ланным чрево ноше́нием.

Весь еси́ жела́ние, весь сла́дость, / Сло́ве Бо́жий, Де́вы Сы́не, / Бо́же бого́в, Го́споди, святы́х Пресвяты́й, / тем Тя вси с Ро́ждшею велича́ем.

Возвели́чил еси́, Христе́, ро́ждшую Тя Богоро́дицу, / от Нея́же, Созда́телю наш, в подобостра́стное нам обле́клся еси́ те́ло, / на́ших прегреше́ний реши́тельное: / Сию́ ублажа́юще, вси ро́ди, / Тебе́ велича́ем.

Возвели́чися ве́рных люде́й Це́рковь, / я́ко Созда́тель всех, / в ней обита́яй, / новотвори́т к жи́зни.

Де́вство Твое́, Богоро́дице нескве́рная, / е́же не опали́ Огнь Боже́ственный, / велича́ем.

Душа́ми чи́стыми и нескве́рными устна́ми, / прииди́те, возвели́чим Нескве́рную и Пречи́стую Ма́терь Емману́илеву, / Е́юже, из Нея́ к Рожде́нному принося́ще моли́тву: / пощади́ ду́ши на́ша, Христе́ Бо́же, и спаси́ нас.

На Небесе́х Благослове́нная / и на земли́ славосло́вимая, / ра́дуйся, Неве́сто / Неневе́стная.

Невмести́маго Бо́га / во чре́ве вмести́вшая / и Ра́дость ми́ру роди́вшая, / Тя пое́м, Богоро́дице Де́во.

От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, / я́дию в тле́ние па́дшаго лю́те, / от Святы́я Де́вы неизрече́нно воплоти́вшагося нас ра́ди, / ве́рнии, единому́дренно пе́сньми велича́ем.

От земноро́дных кто слы́ша таково́е / или́ кто ви́де когда́, я́ко Де́ва обре́теся, во чре́ве иму́щая / и безболе́зненно Младе́нца поро́ждшая? / Таково́е Твое́ чу́до, и Тя, Чи́стая Богоро́дице, велича́ем.

Пресла́вное слы́шание и та́инство стра́нное / в Тебе́ соверши́ся, Пречи́стая Де́во: / зача́тие без се́мене и де́вство по рождестве́; / но я́ко Влады́чица Всеца́рица спаси́ ны, я́ко Блага́, / ве́рою несумне́нною покланя́ющимся Рождеству́ Твоему́ и велича́ющия.

Ра́дуйся, Всецари́це, земноро́дных похвало́, / в после́дняя дни Спасе́ние на́ше ро́ждшая, / да от дре́вния кля́твы челове́ческий род свободи́ши, / те́мже вси немо́лчно Тя велича́ем.

Сотвори́ с Тобо́ю вели́чия, Чи́стая, / всех Творе́ц, роди́выйся от Тебе ́, / па́ки це́ло показа́ Твое́ чре́во, Всепе́тая, / тем непреста́нно Тя, Богоро́дице, / челове́ческий род, велича́ем.

Тебе́, мы́сленную и одушевле́нную ле́ствицу, / на не́йже Бог наш утверди́ся, / е́юже к Небеси́ обрето́хом восхожде́ние, / пе́сньми, Богоро́дице, велича́ем.

Утро́ба Твоя́ чи́стая, Богоро́дице Де́во, / Небе́сную ту́чу ми́рови ука́ну, Живо́т возсия́ющую Ве́чный, / и Ада́ма со Е́вою в па́жить ра́йскую всели́. / Те́мже Тя, еди́ну в жена́х, Ма́терь бы́вшую Емману́илеву, / вси ро́ди, велича́ем.

Чи́стую и Пречи́стую / Ма́терь и Де́ву / пе́сньми пе́с ней, вси ве́рнии, / благоче́стно я́ко Богоро́дицу велича́ем.

Что о Тебе́ ве́лия и пресла́вная та́йна, / Ада́мова Дщи и Вы́шняго Ма́ти? / Еди́ный к Бо́гу небла́зненный ве́рных мост, / Тя немо́лчными пе́сньми, ве́рнии, Богоро́дицу велича́ем.

Чу́до пресла́вное и та́инство стра́нное, / зача́тие преесте́ственное, рождество́ несказа́нное, / А́нгелов во́инства и челове́ков мно́жества, / пе́сньми непреста́нными велича́ем.

Ирмосы 3-го гласа

Во́ды дре́вле ма́нием Боже́ственным / во еди́но со́нмище совокупи́вый / и раздели́вый мо́ре изра́ильтеским лю́дем, / Сей Бог наш препросла́влен есть, / Тому́ еди́ному пои́м, я́ко просла́вися.

Су́шу глубороди́тельную зе́млю / со́лнце наше́ствова иногда́: / я́ко стена́ бо, огусте́ обапо́лы вода́ / лю́дем пешемореходя́щим и Богоуго́дно пою́щим: / пои́м Го́сподеви, сла́вно бо просла́вися.

Внеделю о разслабленном:

Ди́вно, сла́вно творя́й чудеса́ / Ты еси́, Бо́же, / бе́здну оземлени́вый, и колесни́цы потопи́вый, / и лю́ди спасы́й, пою́щия Тебе́, / я́ко Царю́ на́шему и Бо́гу.

Изба́вльшему Изра́иля от рабо́ты / и фарао́на погрузи́вшему в мо́ри, / пои́м Спа́су Христу́, / я́ко просла́вися во ве́ки.

Оземлени́вый мо́ре жезло́м Моисе́ем Чермно́е, / рука́ма старца днесь объе́млется Бог, / И́же без ма́тере от Отца́, / в после́дняя же во́лею Ма́терию но́сится.

Песнь но́вую пои́м, лю́дие, / от Де́вы Ро́ждшемуся во спасе́ние на́ше / и еди́но Сотво́ршему с Небе́сными земна́я, / я́ко просла́вися.

Пои́м Го́сподеви, / сотво́ршему ди́вная чудеса́ в Чермне́м мо́ри, / по́нтом бо покры́ проти́вныя и спасе́ Изра́иля, / Тому́ Еди́ному пои́м, я́ко просла́вися.

Пресека́емое мо́ре жезло́м дре́вле / Изра́иль про́йде, я́ко по пусты́ни, / и крестообра́зно я́ве предуготовля́ет стези́. / Сего́ ра́ди пои́м во хвале́нии Чу́дному Бо́гу на́шему, / я́ко просла́вися.

Спа́сшему Бо́гу в мо́ри лю́ди / и погрузи́вшему проти́вныя, / Тому́ Еди́ному пои́м, я́ко просла́вися.

Фарао́ни колесни́цы глубино́ю покры́в, Го́споди, / мо́ре разве́ргл еси́ / и спасл еси́ пе́сньми пою́щия Тя / лю́ди изра́ильтеския.

Ви́дите, ви́дите, я́ко Аз есмь Спас ми́ра, / Свет и́стинный, Исто́чник жи́зни, / Сын Бо́жий.

Вонми́, земле́ и не́бо, / и внуши́ глаго́лы моя́, / возглаго́лю бо на земли́ Бо́жия чудеса́.

Я́ко ту́ча на тро́скот 7 / и я́коже и́ней на се́но, / да сни́дут на зе́млю глаго́ли Мои́.

И́же от не су́щих вся Приведы́й, / сло́вом созида́емая, / соверша́емая Ду́хом, / Вседержи́телю Вы́шний, / в любви́ Твое́й утверди́ мене́.

Утвержде́ние на Тя наде́ющихся, / утверди́, Го́споди, Це́рковь, / ю́же стяжа́л еси́ / Честно́ю Твое́ю Кро́вию.

Непло́дная душе́ и безча́дная, / стяжи́ плод благосла́вный, / веселя́щися, возопи́й: / утверди́хся Тобо́ю, Бо́же, / несть свят, несть пра́веден, / па́че Тебе́, Го́споди.

Лук сокруши́л еси́ вра́жий / и щиты́ стерл еси́ кре́постию, Влады́ко Христе́, / утвержде́ние на́ше, / Свят еси́, Го́споди.

Основа́вый зе́млю на тве́рди ея́ / и Небеса́ утвержде́й кре́постию, / утверди́ вся ны, хва́лящия Тя ве́рно.

Утверди́, Го́споди, сердца́ на́ша / и просвети́ к Твоему́ песнопе́нию, / е́же сла́вити Тя, Спа́се, во век ве́ка.

Утверди́ мене́, Го́споди, / Еди́не Многоми́лостиве, / и простри́ ми ру́ку, я́ко Петро́ви, и спаси́ мя.

Утверди́ся се́рдце мое́ в Го́споде, / вознесе́ся рог мой в Бо́зе мое́м, / я́ко несть свят, па́че Тебе́, Го́споди.

Утвержда́йся, душе́, в Го́споде Бо́зе / и возопи́й, хваля́щися: / несть свят, па́че Тебе́, Го́споди.

Утвержде́ние и очище́ние / пода́ждь нам, Сы́не Бо́жий, / и спаси́ ны, я́ко Человеколю́бец.

Положи́л еси́ к нам тве́рдую любо́вь, Го́споди: / Единоро́днаго бо Твоего́ Сы́на / за ны на смерть дал еси́. / Те́мже Ти зове́м, благодаря́ще: / сла́ва си́ле Твое́й, Го́споди.

Покры́ла есть Небеса́ доброде́тель Твоя́, Христе́, / из Киво́та бо проше́д святы́ни, Твоея́ Нетле́нныя Ма́тере, / в хра́ме Сла́вы Твоея́ яви́лся еси́, / я́ко Младе́нец руконоси́мь, / и испо́лнишася вся Твоего́ хвале́ния.

Приосене́нную го́ру Авваку́м прозря́ше, / пречи́стую Твою́ утро́бу, Чи́стая. / Тем взыва́ше: от ю́га прии́дет Бог / и Святы́й от горы́ приосене́нныя ча́щи.

Гора́ приосене́нная яви́ся утро́ба Де́вы, / Ру́чка и Трапе́за есть Ма́ти Госпо́дня: / из Нея́ бо про́йде я́ве, / и Симео́н объя́тьми подъя́т. / Сла́ва си́ле Твое́й, Го́споди.

Еда́ 8 в река́х прогне́ваешися, Го́споди, / еда́ в река́х я́рость Твоя́ / или́ в мо́ри устремле́ние Твое́?

Стра́нна и неизрече́нна Рождества́ Твоего́ та́йна! / услы́шах слух Твой, и убоя́хся, / и, веселя́ся, вопию́ Ти: / си́ле Твое́й сла́ва, Человеколю́бче.

Что ужа́слся еси́, Авваку́ме? / Кому́ зове́ши и вопие́ши: от ю́га прии́дет Бог? / Сло́во Плоть бысть и всели́ся в ны, и ви́дехом, / во хвале́нии пою́ще ди́вному Бо́гу на́шему, / я́ко просла́вися.

К Тебе́ у́тренюю, всех Творцу́, / преиму́щему всяк ум ми́рови, / зане́ свет повеле́ния Твоя́, / в ни́хже наста́ви мя.

Я́ко ви́де Иса́ия обра́зно / на Престо́ле превознесе́на Бо́га, / от А́нгел Сла́вы дориноси́ма, / о, окая́нный, – вопия́ше, – аз! / прови́дех бо воплоща́ема Бо́га, / Све́та Невече́рня, / и ми́ром вла́дычествующа.

Све́том Твои́м Невече́рним, Христе́, / озари́, Бо́же, смире́нную мою ду́шу / и наста́ви на страх Твой, / зане́ свет повеле́ния Твоя́.

Во тьме пою́ща возста́ви, Благода́телю, / и души́ моея́ мглу́ просвети́ Све́том Лица́ Твоего́, / Человеколю́бче, / и Твой мир пода́ждь ми, / я́ко иногда́ ста́рцу, Неизме́нне.

Вопие́т Ти, Христе́, песнь немо́лчную, / от но́щи у́тренюя, дух мой, / Ты бо Свет и́стинный и незаходя́й, / просвеща́яй вся́каго челове́ка, / в мир гряду́ща.

Души́ моея́ мглу разори́в Све́том Твои́м, Христе́, / приими́ мя, Еди́не Благоутро́бне, / от но́щи Тебе́ зову́: / озари́ мою́ мысль.

К Тебе́ у́тренюем, Христе́ Бо́же, / у́треннюю и́стину, / возсия́вшу нам от Де́вы / и Богоразу́мием озари́вшу, / су́щим во мра́це неве́дения.

К Тебе́ у́тренюю, / от Отца́ пре́жде денни́цы 9 возсия́вшему, У́тро ми́рови, / помраче́нна согреше́нь ми, Спа́се, / предвари́в, озари́, Бо́же.

На земли́ Неви́димый яви́лся еси́ / и челове́ком во́лею сожи́л еси́, Непостижи́мый, / и, к Тебе́ у́тренююще, / воспева́ем Тя, Человеколю́бче.

Началобы́тную тьму Све́том разруши́в, / мрак се́рдца моего́ заре́ю повеле́ний Твои́х отжени́ Христе́, / да у́тренюю Ти све́тло, / Неприкоснове́нному Све́ту.

Твой мир даждь нам, Сы́не Бо́жий, / ино́го бо, ра́зве Тебе́, Бо́га не ве́мы, / в Вы́шних со Отце́м и Ду́хом сла́вимаго.

У́тренююще, воспева́ем Тя, Сло́ве, / Сы́не Бо́жий Единоро́дне: / Твой мир даждь нам и поми́луй ны, / пою́щия Тя и ве́рно покланя́ющияся.

Бе́здна после́дняя грехо́в обы́де мя, / и исчеза́ет дух мой; / но простры́й, Влады́ко, высо́кую Твою́ мы́шцу, / я́ко Петра́, мя, Упра́вителю, спаси́.

Возопи́ к Тебе́, ви́дев ста́рец очи́ма спасе́ние, / е́же лю́дем прии́де от Бо́га: / Христе́, Ты – Бог мой.

Глубина́ страсте́й воста́ на мя / и бу́ря проти́вных ве́тров, / но, предвари́в, мя Ты спаси́, Спа́се, / и изба́ви от тли, / я́ко спасл еси́ от зве́ря проро́ка.

Во глубину́ се́рдца морска́го беззако́ний отве́ржен бых, / я́ко Ио́на, вопию́ Ти: / возведи́ мя от тли, / да воз да́м Ти моли́твы моя́, Го́споди.

Возведи́ от тли мя, Го́споди Бо́же мой, / Ио́на вопия́ше, / и аз вопию́ Ти: / из глубины́ изба́ви мя, Спа́се, мно́гих мои́х зол / и к Све́ту Твоему́, молю́ся, наста́ви.

Воззва́х воздыха́нии немо́лчными к Ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой.

Глубина́ грехо́в воста́ на мя, Спа́се, / и бу́ря отча́яния. / Те́мже ве́рно вопию́ Ти, / я́ко от ки́та Ио́на: / возведи́ живо́т мой от тли, / мене́ ра́ди младе́нствовавый / и во объя́тиих Симео́на днесь / в храм приведы́йся.

И́же в концы́ веко́в доше́дшия, Человеколю́бче, / и треволне́ньми напа́стей поги́бнути бе́дствующия, / вопию́щия не пре́зри: / спаси́, Спа́се, / я́коже спасл еси́ от зве́ря проро́ка.

Селе́ния Ио́на е́же в преиспо́днем а́де / есте́ственный о́браз быв, вопия́ше: / возведи́ от тли живо́т мой, / Чело веколю́бче.

Я́коже дре́вле благочести́выя три о́троки / ороси́л еси́ в пла́мени халде́йстем, / све́тлым Божества́ огне́м и нас озари́, / благослове́н еси́, взыва́ющия, / Бо́же оте́ц на́ших.

Тебе́, во огни́ ороси́вшаго о́троки Богосло́вившия / и в Де́ву нетле́нну все́льшагося, /Бо́га Сло́ва пои́м, / благоче́стно пою́ще: / благослове́н Бог оте́ц на́ших.

Пла́мень ороси́вый пе́щный / и о́троки неопали́мы спасы́й, / благослове́н еси́ во ве́ки, / Го́споди, Бо́же оте́ц на́ших.

В пещи́ пла́мень угаси́ша о́троцы / и Небе́сную ро́су прия́ша ве́рою: / благослове́н еси́, Бо́же оте́ц на́ших.

Го́рдый мучи́тель, но дете́й бысть игра́лище, / я́ко же бо пе́рсть, попра́вше седмери́чный пла́мень, поя́ху: / благослове́н еси́, Го́споди, / Бо́же оте́ц на́ших.

Пещь горя́щая не обре́теся ороша́ющая, / то́кмо вавило́нская; / безму́жная ина́я ма́ти и де́ва не яви́ся. / О́ва у́бо о́троки сохрани́ неопали́мы, / Сия́ же носи́ во объя́тиих, / Его́же воспева́юще, глаго́лем: / благослове́н еси́, Бо́же оте́ц на́ших.

Пре́жде о́бразу злато́му, перси́дскому чти́лищу, / о́троцы не поклони́шася, / трие́ пою́ще посреде́ пе́щи: / отце́в Бо́же, благослове́н еси́.

Прохлажде́й пла́мень пе́щный / и Де́ву сохрани́ ро́ждшую Тя, Богоро́дицу: / благослове́н еси́, Го́споди, / Бо́же оте́ц на́ших.

Трие́ о́троцы в пещи́, Тро́ицу прообрази́вше, / преще́ние о́гненное попра́ша / и, пою́ще, вопия́ху: / благослове́н еси́, Бо́же оте́ц на́ших.

Я́ко зла́то в горни́ле, / о́троки искуша́хуся в пещи́ / и показа́шася све́тли, / не внегда́ слия́тися, / но внегда́ храни́тися, / не внегда́ горе́ти, / но внегда́ пе́ти непреста́нно: / благослове́н еси́, Бо́же оте́ц на́ших.

Воскресен и Сретения:

Нестерпи́мому огню́ соедини́вшеся, / Богоче́стия пред стоя́ще, ю́ноши, / пла́менем же неврежде́ни, Боже́ственную песнь поя́ху: / благослови́те, вся дела́ Госпо́д ня, Го́спода / и превозноси́те во вся ве́ки.

А́нгельми немо́лчно в Вы́шних сла́вимаго Бо́га, / Небеса́ небе́с, земля́, и го́ры, и хо́лми, и глубина́, / и весь род челове́ческий, / пе́сньми Того́, я́ко Созда́теля и Изба́вителя, благослови́те / и превозноси́те во вся ве́ки.

Благоде́теля, и Бо́га, и Изба́вителя всех, / и Творца́ всего́ ми́ра, / свяще́нницы, по́йте, / лю́дие, превозноси́те во вся ве́ки.

В пла́мень ко отроко́м евре́йским / снизше́дшаго Бо́жиею си́лою и я́вльшагося Го́спода, / свяще́нницы, благослови́те / и превозноси́те во вся ве́ки.

Веще́ственнаго огня́ пла́мень / Невеще́ственным увяди́ша Богозри́мии о́троцы и поя́ху: / благослови́те, вся дела́ Госпо́дня, Го́спода.

Вавило́нская пещь о́троки не опали́, / ниже́ Божества́ огнь Де́ву растли́. / Тем со о́троки, ве́рнии, возопие́м: / благослови́те, дела́ Госпо́дня, Го́спода.

Из Безнача́льнаго Отца́ рожде́ннаго пре́жде век Бо́га / и в после́дняя от Богоро́дицы в плоть обле́кшася, / я́ко соверше́нна Челове́ка и Бо́га и́стинна, / по́йте, благослови́те / и превозноси́те во вся ве́ки.

На Престо́ле Херуви́мсте Носи́маго, / свяще́нницы, по́йте, / лю́дие, превозноси́те во вся ве́ки.

Обра́зно во А́нгельстем я́вльшася зра́це / и де́ти прохла́ждша посреде́ горя́щия пе́щи, / благослови ́те, дела́ Госпо́дня, Го́спода.

Покланя́емаго от святы́х А́нгел / и Сла́вимаго непреста́нно, / свяще́нницы, по́йте, / лю́дие, превозноси́те во вся ве́ки.

Служи́ти Живо́му Бо́гу / в Вавило́не о́троцы претерпе́вше, / о мусики́йских орга́нех неради́ша / и, посреде́ пла́мене стоя́ще, Боголе́пную песнь воспева́ху, глаго́люще: / благослови́те, вся дела́ Госпо́дня, Го́спода.

Я́ко пещь дре́вле, прие́мшая, о́троки не опали́, / та́ко и Де́ва, заче́нши Зижди́теля, не опали́ся Утро́бою. / О́ле чудесе́! Неизме́нный ви́дится пло́тию и во храм приво́дится. / Сего́ ра́ди, ве́рою пою́ще, глаго́лем: / благослови́те, дела́, Го́спода.

Но́вое чу́до и Боголе́пное: / деви́ческую бо дверь затворе́нную / я́ве прохо́дит Госпо́дь, / наг во вхо́де, / и плотоно́сец яви́ся во исхо́де Бог, / и пребыва́ет Дверь затворе́на; / Сию́ неизрече́нно / я́ко Богома́терь велича́ем.

В зако́не се́ни и писа́ний / о́браз ви́дим, ве́рнии: / всяк му́жеский пол, ложесна́ разверза́я, / свят Бо́гу. / Тем Перворожде́нное Сло́во / Отца́ Безнача́льна, / Сы́на, первородя́щася Ма́терию неискусому́жно, / велича́ем.

На Сина́йстей горе́ ви́де Тя в купине́ Моисе́й, / неопа́льно Огнь Божества́ заче́ншую во чре́ве; / Дании́л же Тя ви́де Го́ру несеко́мую; / Жезл прозя́бший, Иса́ия взыва́ше, / от ко́рене Дави́дова.

Благода́тная, ра́дуйся, Госпо́дь с Тобо́ю, / благослове́на Ты в жена́х, / и Тя велича́ем.

Благослове́н Госпо́дь, Бог Изра́илев, / воздви́гнувый рог спасе́ния нам / в дому́ Дави́да, о́трока Своего́, / милосе́рдия ра́ди ми́лости, / в ни́хже посети́ нас Восто́к с высоты́ / и напра́вил ны есть на путь ми́ра.

Купино́ю и огне́м пропи́санную в Сина́и / законополо́жнику Моисе́ю / и Бо́жий во чре́ве неопа́льно заче́ншую Огнь, / Всесве́тлую и Негаси́мую Свещу́, / су́щую Богоро́дицу пе́сньми, чту́ще, велича́ем.

Ма́терь Све́та, и по Рождестве́ Де́ву, / и душ на́ших спасе́ния Приста́нище, / ве́рнии, единому́дренно пе́снь ми велича́ем.

Несеко́мую Го́ру, Краесеко́мый Ка́мень, / его́же ви́де Дании́л проро́к, / Богоро́дицу Мари́ю пе́сньми велича́ем.

Пречи́стая Богоро́дице, Ма́ти Безневе́стная, / пра́ведно Тя пою́т Чи́нове А́нгелов, / и ста́рец Симео́н, Рождество́ Твое́ зря, взыва́ше: / Ны́не отпуща́еши раба́ Твоего́, Влады́ко, / по глаго́лу Твоему́, / я́ко да спасе́ши, Христе́, / Тя с Ро́ждшею велича́ющия.

Сла́дкою Пречи́стаго Твоего́ Рождества́ / стрело́ю уязвле́ни, Чи́стая, / Твое́й достожела́нней добро́те дивя́щеся, / пе́сньми А́нгельскими / досто́йно Тя я́ко Ма́терь Бо́жию велича́ем.

Тебе́, Безсме́ртный Исто́чник, / и святы́х исцеле́ния челове́чу ро́ду подаю́щу, / при́сно велича́ем, / я́ко спаса́еши ду́ши на́ша.

Тебе́, Неопали́мую Купину́ и Святу́ю Де́ву, / Ма́терь Све́та и Богоро́дицу, / Наде́жду всех нас, велича́ем.

Тя живопису́ющий ассири́йский пла́мень, / Де́во Ма́ти Мари́е: / Огнь бо Божества́, во утро́бу Твою́ всели́вся, Чи́стая, / неопа́льно соблюде́ пречи́стая ложесна́ Твоя́. / Те́мже и Христо́с, Тобо́ю в храм святы́й / объя́тьми приведы́йся, / нас обнови́, велича́ющия Твое́ Рождество́.

Тя, Неискусобра́чную Богоро́дицу, / в па́мяти святы́х велича́ем, / я́ко ро́ждшую Спасе́ние душ на́ших.

Ирмосы 4-го гласа

Мо́ря чермну́ю пучи́ну / невла́жными стопа́ми / дре́вний пешеше́ствовав, Изра́иль / крестообра́зныма Моисе́овыма рука́ма / Амали́кову си́лу в пусты́ни победи́л есть.

Благовещения, Вознесения (ин канон) и на Богородичные праздники:

Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / *и воспою́, ра́дуяся, Тоя́ чудеса́*.

Успения: *и воспою́, ра́дуяся, Тоя́ успе́ние*.

Введения: *и воспою́, ра́дуяся, Тоя́ вхожде́ние*.

Яви́шася исто́чницы бе́здны / вла́ги неприча́стны, / и откры́шася мо́ря / волну́ющася основа́ния бу́рею: / ма́нием бо запрети́л еси́ ему́, / изря́дныя же лю́ди спасл еси́, / пою́щия побе́дную песнь Тебе́, Го́споди.

В неделю самаряныни:

Порази́вый Еги́пта / и фарао́на мучи́теля погрузи́вый в мо́ри, / лю́ди спасл еси́ из рабо́ты, / Моисе́йски пою́щия песнь побе́дную, / я́ко просла́вися.

В неделю Пятидесятницы:

Боже́ственным покрове́н / медленноязы́чный мра́ком, / извити́йствова Богопи́санный зако́н: / ти́ну бо оттря́с очесе́ у́мнаго, / ви́дит Су́щаго / и науча́ется Ду́ха ра́зуму, / хваля́ Боже́ственными пе́сньми.

Ли́цы изра́ильтестии, / невла́жными стопа́ми / понт Чермны́й и вла́жную глубину́ прогна́вше, / вса́дники триста́ты, враги́, ви́дяще в ней погруже́ны, / с весе́лием поя́ху: / пои́м Бо́гу на́шему, / я́ко просла́вися.

Воспою́ Тебе́, Го́споди Бо́же мой, / я́ко изве́л еси́ лю́ди из рабо́ты еги́петския, / покры́л же еси́ колесни́цы фарао́новы и си́лу.

Колесни́цы фарао́новы и си́лу его́ / вве́рже в мо́ре Кре́пкий в бра́нех, / воспое́м песнь но́вую, я́ко просла́вися.

Наста́вльшему дре́вле Изра́иля, / бежа́щаго от рабо́ты фарао́новы, / и в пусты́ни пита́вшему, / пои́м Изба́вителю, Бо́гу на́шему, / я́ко просла́вися.

Несть Тебе́ подо́бен, / Препросла́вленный Го́споди: / руко́ю бо кре́пкою изба́вил еси́ лю́ди, / я́же стяжа́л еси́, / Человеколю́бче.

Под о́блаком све́тлым / и столпо́м о́гненным наставля́емый, / проше́д мо́ре су́шею / и сие́ пешеше́ствуяй, я́ко в пусты́ни, / избра́нный Твой Изра́иль, Христе́, / побе́дную песнь пое́т Тебе́, Го́споди.

Пое́м песнь побе́дную / Еди́ному Бо́гу, / сотво́ршему пресла́вная: / дре́вле бо фарао́на / со всево́инством в мо́ри погрузи́.

Пои́м Го́сподеви, / пресла́вно погрузи́вшему фарао́на в мо́ри, / песнь побе́дную, я́ко просла́вися.

Пои́м, лю́дие, ди́вно чудоде́йствовавшему / в Чермне́м мо́ри Христу́ Бо́гу: / я́ко дре́вле Изра́иля всевооруже́на / стопа́ми пешеше́ствовати непрохо́дную сотвори́ / и зло́бы делода́теля фарао́на во глубине́ потопи́.

Пои́м песнь но́вую / Царю́ веко́в, / я́ко просла́вися.

Предели́в пучи́ну чермну́ю Бог, / фарао́на погрузи́вый в ней, / прове́д Моисе́я немо́кренно в пусты́ню / и одожди́в ма́нну в снедь лю́дем Изра́илевым, / я́ко си́лен.

Пресла́вная сотвори́вый чудеса́ Госпо́дь руко́ю Моисе́овою, / рука́ма ста́рца днесь объе́млется / я́ко Младе́нец во хра́ме. / Тому́ ве́рно возопии́м, лю́дие, песнь побе́дную: / сла́вно бо просла́вися.

Триста́ты кре́пкия, / Рожде́йся от Де́вы, / без стра́стия во глубине́ / души́ трича́стное потопи́, молю́ ся, / да Тебе́, я́ко в тимпа́не, / во умерщвле́нии телесе́ / побе́дное воспою́ пе́ние.

Чудоде́йствовавшему высо́кою мы́шцею Бо́гу / в мо́ри Чермне́м А́нгельским предпутетворе́нием, / и спа́сшему Изра́иля в конце́ бе́здны, / и конегони́телей связа́вшему о́си, / побе́дную песнь пои́м Тому́, я́ко просла́вися.

Ви́дите, ви́дите, я́ко Аз есмь Бог, / умерщвля́я и животворя́й, / дарова́вый во́ду из ка́мене несеко́ма / и одожди́вый ма́нну на пи́щу лю́дем Изра́илевым, / я́ко си́лен.

Ви́дите, ви́дите, я́ко Аз есмь Сло́во, / во утро́бу Ма́тере неопи́санно вшед, / не разлучи́вся от Отца́ я́ко Бог же, / соисполня́я с Го́рними ни́жняя / и подава́я ве́лию ми́лость.

Дади́м вели́чие Христу́ Бо́гу на́шему, / воздви́женому на Крест / на спасе́ние всего́ ми́ра.

Дади́те, лю́дие, вели́чие Христу́ Бо́гу на́шему, / от Де́вы ро́ждшемуся / во спасе́ние челове́ком.

Весели́тся о Тебе́ Це́рковь Твоя́, Христе́, зову́щи: / Ты моя́ кре́пость, Го́споди, / и прибе́жище, и утвержде́ние.

Благовещения, Вознесения и на Богородичные праздники:

Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшыя, духо́вно утверди́, / *в Боже́ственней Твое́й сла́ве / венце́в сла́вы сподо́би *.

Успения: *в Боже́ственней па́мяти Твое́й / венце́в сла́вы сподо́би *.

Введения: *в честне́м вхожде́нии Твое́м / венце́в сла́вы сподо́би *.

Лук си́льных изнемо́же, / и немощству́ющии препоя́сашася си́лою, / сего́ ра́ди утверди́ся в Го́споде се́рдце мое́.

Точа́щий, краесеко́мый повеле́нием Твои́м, / тве́рдый сса́ша Ка́мень изра́ильтестии лю́дие, / Ка́мень же Ты еси́, Христе́, и Жизнь, / на не́мже утверди́ся Це́рковь, зову́щая: / Оса́нна, благослове́н еси́, гряды́й.

В неделю самаряныни:

Утверди́ся се́рдце мое́ в Го́споде, / даю́щем моли́тву моля́щемуся, / я́ко лук си́льных изнемо́же / и немощству́ющии препоя́сашася си́лою.

В неделю Пятидесятницы:

Разве́рзе утро́бы неча́дствовавшия у́зы, / доса́ду же неудоботерпи́му благоча́дствующия, / еди́на моли́тва проро́чицы дре́вле А́нны, / нося́щия дух сокруше́н, / к Си́льному и Бо́гу ра́зумов.

А́нна, пре́жде безча́дная и непло́дная, / обеща́ния имя́ше плод – Саму́ила; / ны́не же А́нна проро́чица, в храм прише́дши, / благодаря́ше нас ра́ди младе́нствовавшаго Бо́га / и ста́рческими объя́тии прие́млемаго.

В Го́споде Бо́зе мое́м / се́рдце мое́ утверди́ся, / тем немощству́ющии препоя́сашася си́лою.

Вы́шний Спа́се сил, / коле́блемую ду́шу мою́ / утверди́ в во́ли Твое́й, / да и аз сла́влю Твое́ / со Безпло́тными Боже́ственное благоле́пие.

Да не хва́лится мудр, хваля́йся, / но о сем, е́же разумева́ти, / я́ко несть свят, я́ко Бог наш, / вознося́й рог наш, / дая́й кре́пость царе́м на́шим.

Не му́дростию, и си́лою, / и бога́тством хва́лим ся, / но Тобо́ю, О́тчею Ипоста́сною Му́дростию, Христе́, / несть бо свят, па́че Тебе́, / Человеколю́бче.

С высоты́ снизше́л еси́ во́лею на зе́млю / превы́шше вся́каго нача́ла / и смире́нное возне́сл еси́ / из а́да преиспо́дняго / естество́ челове́ческое, / несть бо свят, па́че Тебе́, / Человеколю́бче.

Свят еси́, Го́споди Бо́же наш, / утверди́ и на́ша сердца́ непреста́нно вопи́ти Тебе́: / пра́веден несть, па́че Тебе́, Го́споди.

Утверди́ся се́рдце мое в Го́споде, / вознесе́ся рог мой в Бо́зе мое́м, / я́ко несть свят, па́че Тебе́, Го́споди.

Утвержда́яй гром и созида́яй дух, / утверди́ мене́, Го́споди, / да Тя пою́ и́стинно / и творю́ во́лю Твою́, / я́ко несть свят, я́ко Ты, Бо́же наш.

Утвержде́ние ве́рных, и похвало́, / и нетле́ния исто́чниче, / и благи́х прошениода́вче Христе́, / в любви́ Твое́й утверди́ мя.

Утвержде́ние на Тя наде́ющихся, / утверди́, Го́споди, в ве́ре Правосла́вней Твое́й, / утверди́ нас, я́ко Человеколю́бец.

Я́ко непло́ды роди́ от язы́к Це́рковь, / и мно́гое в ча́дех / изнемо́же со́нмище, / чу́дному Бо́гу на́шему возопии́м: / Свят еси́, Го́споди.

Вознесе́на Тя ви́девши Це́рковь на Кресте́, / Со́лнце Пра́ведное, / ста в чи́не свое́м, / досто́йно взыва́ющи: / сла́ва си́ле Твое́й, Го́споди.

Благовещения, Вознесения и на Богородичные праздники:

Седя́й в Сла́ве на Престо́ле Божества́ / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

Успения и Введения:

Неизсле́дный Бо́жий Сове́т, / е́же от Де́вы, воплоще́ния / Тебе́, Вы́шняго, / проро́к Авваку́м усмотря́я, зовя́ше: / сла́ва си́ле Твое́й, Го́споди.

Услы́шах сла́вное смотре́ние Твое́, / Христе́ Бо́же, / я́ко роди́лся еси́ от Де́вы, / да от ле́сти изба́виши зову́щия: / сла́ва си́ле Твое́й, Го́споди.

Христо́с гряды́й – я́вственно Бог наш, /прии́дет и не закосни́т / от горы́ приосене́нныя ча́щи, / Отрокови́цы ражда́ющия, Неискусому́жныя, / проро́к дре́вле глаго́лет. / Тем вси вопие́м: / сла́ва си́ле Твое́й, Го́споди.

В неделю самаряныни:

Услы́шах, Бо́же, слух Твой и убоя́хся, / разуме́х дела́ Твоя́ и ужасо́хся, Го́споди, / я́ко Твоего́ хвале́ния испо́лнь земля́.

В неделю Пятидесятницы:

Царю́ царе́й, / Яковы́й от Якова́го, / Еди́н, Сло́ве, произше́дый, / от Отца́ Безви́новнаго Равномо́щнаго Твоего́ Ду́ха / апо́столом и́стинно посла́л еси́ / я́ко Благо де́теля, пою́щим: / сла́ва держа́ве Твое́й, Го́споди.

Ве́лие и Боголе́пное, Спа́се, слы́шах, / я́ко Безсме́ртен сый и Бог, / уподо́бился еси́ челове́ком / и пребы́́́́л еси́, е́же был еси́, / и сего́ ра́ди Твою́ сла́влю си́лу.

Внегда́ прибли́житися ле́том – позна́ешися; / внегда́ приити́ вре́мени – яви́шися, / внегда́ смути́тися души́ мое́й – / во гне́ве ми́лости помяне́ши: / Го́споди, сла́ва Тебе́.

Гла́сом Богоглаго́ливым предразуме́в, Авваку́м / зря́ще Сло́ва воплоще́ние и взыва́ше я́ве: / слух услы́шах Бо́жия Сове́та, / Бог бо непрело́жно челове́ком возбесе́дует, / из горы́ гряды́й, де́вственнаго чре́ва, / и мир избавля́я / началоро́дныя кля́твы.

Его́же проро́к Авваку́м предзри́тельныма очи́ма усмотря́, / пропове́даше Бо́га, / ста́рец днесь во хра́ме прие́млет, вопия́: / ны́не отпуща́еши раба́ Твоего́, Влады́ко, в ми́ре, / по глаго́лу Твоему́.

Любве́ ра́ди, Ще́дре, Твоего́ о́браза / на Кресте́ Твое́м стал еси́, / и раста́яшася язы́цы: / Ты бо еси́, Человеколю́бче, / кре́пость моя́ и хвале́ние.

Небеса́ доброде́тель Твоя́ покры́ла есть, / и земля́ испо́лнися / сла́вы Твоея́, Христе́. / Те́мже ве́рно вопие́м: / сла́ва си́ле Твое́й, Го́споди.

Приклони́л еси́, Христе́, снизхожде́нием Твои́м / Небеса́ в ра́зуме / и яви́лся еси́, воплоще́н на земли́. / Тем вси вопие́м: / си́ле Твое́й сла́ва, Человеколю́бче.

Сей Бог наш, / от Де́вы вопло́щся / и естество́ обожи́в, / Его́же воспева́юще, вопие́м: / сла́ва си́ле Твое́й, Го́споди.

Слух услы́шах, глаго́лет Авваку́м, / я́ко Бог из горы́, / из чре́ва де́вственнаго про́йде неизрече́нно, / и, ужа́сся, взыва́ше: / сла́ва си́ле Твое́й, Го́споди.

Среде́ двою́ разбо́йнику / позна́лся еси́ на Кресте́, Христе́ Бо́же, / взя́тся со́лнце стра́хом, / и луна́ ста в чи́не свое́м: / сла́ва си́ле Твое́й, Го́споди.

Твоего́ на земли́ явле́ния, / Христе́ Бо́же, / пропове́дая проро́к прише́ствие, / с весе́лием вопия́ше: / сла́ва си́ле Твое́й, Го́споди.

Тя, возсия́вша от Неискусому́жныя Ма́тере, / проро́к Авваку́м, прови́дя, вопия́ше: / в после́дняя времена́ / спасти́ пома́занныя Твоя́ прише́л еси́, / сла́ва си́ле Твое́й, Го́споди.

Услы́шах слух Твоего́ смотре́ния, / я́ко от Де́вы роди́лся еси́, ро́ждшую не опали́в, / и прославих, Спа́се, снизхожде́ние Твое́.

Услы́шах слух Твой, Го́споди, / я́ко яви́лся еси́ на земли́, / и просла́вих Твою́ си́лу.

Услы́шах слух Твой и убоя́хся, / разуме́х дела́ Твоя́ / и ужасо́хся, Го́споди.

Услы́шах Твое́, Христе́, вои́стинну пресла́вное, / я́ко безсме́ртен сый Бог / уподо́бися сме́ртным челове́ком / и пребы́сть, е́же бе, / и того́ ра́ди Твою́ сла́влю си́лу.

Ты, Го́споди, мой Свет, / в мир прише́л еси́, / Свет Святы́й, обраща́яй / из мра́чна неве́дения / ве́рою воспева́ющия Тя.

Благовещения, Вознесения и в Богородичные праздники:

Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Ужасо́шася вся́ческая / о честне́м Успе́нии Твое́м: / Ты бо, Неискусобра́чная Де́во, / от земли́ преста́вилася еси́ к Ве́чным Оби́телем / и к Безконе́чней Жи́зни, / всем воспева́ющим Тя / спасе́ние подава́ющая.

Ужасо́шася вся́ческая / в честне́м вхожде́нии Твое́м: / Ты бо, Неискусобра́чная Де́во, / внутрь вошла́ еси́ в храм Бо́жий, / я́коже чисте́йший храм, / всем воспева́ющим Тя / мир подава́ющая.

От све́та пресеки́й перворо́дный свет, / я́ко во све́те дела́ пою́т Тя, Христе́, Соде́теля, / во Све́те Твое́м пути́ на́ша напра́ви.

На го́ру Сио́н взы́ди, благовеству́яй / и Иерусали́му пропове́дуяй, / в кре́пости вознести́ глас: / пресла́вная глаго́лашася о Тебе́, Гра́де Бо́жий, / мир на Изра́иля и спасе́ние язы́ков.

В неделю самаряныни:

Возсия́й ми, Го́споди, / свет повеле́ний Твои́х, / я́ко к Тебе́ дух мой у́тренюет и пое́т Тя: / Ты бо еси́ Бог наш, / и к Тебе́ прибега́ю, Царю́ ми́ра.

В неделю Пятидесятницы:

Реши́тельное очище́ние грехо́в, / огнедохнове́нную приими́те Ду́ха ро́су, / о ча́да светообра́зная церко́вная! / Ны́не от Сио́на бо изы́де Зако́н, / языкоогнеобра́зная Ду́ха благода́ть.

Возсия́вый Свет, / и просвети́вый у́тро, / и показа́вый день, / сла́ва Тебе́, сла́ва Тебе́, / Иису́се, Сы́не Бо́жий.

Зако́ном за́поведей Твои́х, Еди́не Человеколю́бче, / просвети́ се́рдце мое́, / молю́ся, Го́споди, и поми́луй мя.

Из но́щи у́тренююще, / просвети́ нас, Животво́рче Кре́сте Христо́в, / со стра́хом покланя́ющияся тебе́, / и день спаси́тельный / при́сно возсия́й нам.

Мрак разреши́ греха́ моего́, / внегда́ возсия́ти Ти, / у́тро све́тлое / за́поведей Твои́х, Го́споди, / Непристу́пный Све́те.

Нечести́вии не у́зрят сла́вы Твоея́, Христе́, / но мы Тя, Единоро́дне, / Оте́ческия Сла́вы Сия́ние Божества́, / от но́щи у́тренююще, / воспева́ем Тя, Человеколю́бче.

Нощебори́мых страсте́й тиме́нием / к Тебе́ у́тренюю, / Еди́ному Благоутро́бному: / души́ моея́ мглу просвети́ / и ю́зы пресеки́ долго́в мои́х, / я́ко да Твои́м Со присносу́щным Ду́хом просвеща́емь, / пра́вды путь нетле́нный обря́щу повеле́ний Твои́х.

Ны́не воста́ну, проро́чески рече́ Бог, / ны́не просла́влюся, ны́не вознесу́ся, / па́дшаго прие́м от Де́вы / и к све́ту у́мному / вознося́й Моего́ Божества́.

От но́щи у́тренююще, / вси немо́лчно Тя, Непристу́пный – мо́лим – Свет: / Бо́же ще́дрый, мир Твой, Христе́, да́руй нам.

Просвеще́ние Твое́, Го́споди, низпосли́ нам / и от мглы прегреше́ний разреши́ ны, Бла́же, / Твой мир да́руяй.

Ре́вность прии́мет лю́ди ненака́занныя, / законопресту́пныя евре́и, / и огнь поя́ст супоста́ты Твоя́, / я́ко Тя, Распя́таго, / лестца́ именова́ша.

Све́те и́стинный, / просвеща́яй вся́каго челове́ка, / возсия́й в нас заре́ю за́поведей Твои́х / и отжени́ от нас нощь страсте́й, / я́ко, ра́зве Тебе́, ино́го бо́га не ве́мы.

Стяжа́вый ны, избра́нныя лю́ди, Кро́вию Твое́ю, Го́споди, / Твой мир даждь нам, / во единомы́слии сохраня́я ста́до Твое́.

Угль о́гненный клеща́ми прие́млет Иса́ия иногда́, / устна́ма очища́яйся; / ны́не же Де́ва во хра́ме, / нося́щи Бо́га, воплоще́нна нас ра́ди, / рука́ма, а́ки клеща́ми, ста́рцу дае́т, / ми́ра Вино́внаго / и всех Пода́теля.

У́тро све́тлое / нам поcли́, я́ко Благ, / и наста́ви ны в страх Твой, Влады́ко.

Часть моя́ еси́, Го́споди, / и сла́ва лица́ моего́: / Ты бо мя из тьмы неве́дения / еди́н изба́вил еси́ Богоразу́мием, / и Тебе́ молю́ся, Христе́: / да́руй рабу́ Твоему́ мир, / я́ко Человеколю́бец.

Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися / ра́ди ми́лости от ребр Твои́х / исте́кшею Кро́вию.

Успения, Введения, Вознесения и в Богородичные праздники:

Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Возопи́, прообразу́я погребе́ние тридне́вное, / проро́к Ио́на, в ки́те моля́ся: / от тли изба́ви мя, Иису́се, Царю́ сил.

Внегда́ скорбе́ти ми, / возопи́х ко Го́споду, / и услы́ша мя Бог спасе́ния моего́.

Возопи́ша с весе́лием пра́ведных ду́си: / ны́не ми́ру Заве́т Но́вый завеща́ется, / и кропле́нием да обновя́тся лю́дие Бо́жия Кро́ве.

В неделю самаряныни:

Да не погрузи́т мене́ бу́ря водна́я, / ниже́ пожре́т мене́ глубина́, / отве́ржен бо есмь / во глубины́ се́рдца морска́го зол мои́х. / Тем зову́, я́ко Ио́на: / да взы́дет от тли зол живо́т мой / к Тебе́, Бо́же.

В неделю Пятидесятницы:

Очище́ние нам, Христе́, / и спасе́ние, Влады́ко, / воз сия́л еси́ от Де́вы, / да, я́ко проро́ка от зве́ря морска́го пе́рсей Ио́ну, / от тли исхити́ши всего́ Ада́ма всеро́дна па́дшаго.

Бу́рею грехо́вною погружа́емь, / я́ко во чре́ве ки́тове содержи́мь, / с проро́ком зову́ Ти: / возведи́ от тли живо́т мой, / Го́споди, и спаси́ мя.

Бу́рею содержи́мь прегреше́ний, / человеколю́бия сподобля́яйся, не разуме́ю, / я́ко Ио́ну проро́ка, и мене́ спаси́, Спа́се.

Бу́ря мя мно́гих согреше́ний мои́х потопля́ет, / и изнемога́ет дух мой; / но Ты, Го́споди, / я́ко ми́лостив, сшед, / возведи́ живо́т мой.

Бу́ря мя помышле́ний, пости́гши, / во глубину́ низвлачи́т мя безме́рных грехо́в, / но Ты, Упра́вителю Благи́й, / предвари́в, упра́ви, / я́ко проро́ка, и спаси́ мя.

В ки́те, Христе́, тридне́вновав, Ио́на / прописа́ Тя, Безсме́ртнаго, я́ко ме́ртва во́лею / в се́рдце земне́м тридне́вновавша.

Ве́чер, и у́тро, и полу́дне / хва́лим Тя, Го́споди Бо́же наш, / услы́ши глас наш.

Из чре́ва а́дова во́пля моего́ / услы́шал еси́ глас мой / и возве́л еси́ от тли бу́ри прегреше́ний, / обдержи́т бо, Спа́се, / и погружа́ти искуша́ет, Бла́же, / но, я́коже пре́жде Ио́ну возве́л еси́ от тли, / и мене́, молю́ся, Го́споди, предвари́в, спаси́.

Ио́на проро́к во чре́ве ки́тове / от ско́рби возопи́: / глава́ моя́ понре́ 10 в разсе́лины гор, Го́споди. / Симео́н же, подъе́м Тя, ра́достно взыва́ше: / ны́не отпуща́еши раба́ Твоего́ по глаго́лу Твоему́.

Морско́е рыда́ние, Христе́, Ио́нино / подража́яй, зову́ Ти: / живо́т мой от а́да прегреше́ний возведи́, / да во хра́ме сла́вы Твоея́ / со гла́сом хвале́ния пожру́ Ти.

Обурева́ему мне, Ще́дре, / бу́рею волн мои́х, молю́ся: / воззови́ мя и спаси́, Го́споди, / я́ко Ио́ну / от зве́ря у́мнаго.

Приидо́х во глубины́ морски́я, / и потопи́ла мя есть бу́ря мно́гих грехо́в, / но, я́ко Бог, из глубины́ / возведи́ живо́т мой, / Многоми́лостиве.

Проро́ка во чре́ве ки́тове сохрани́вый, / Святы́й Го́споди, / помози́ ми.

Пучи́ною жите́йскою / дея́ньми мои́ми снидо́х во ад, / но, я́ко от ки́та Ио́на, та́ко вопию́: / из глубины́ зол возведи́, молю́ся, / Сы́не Бо́жий и Сло́ве.

Твоего́ Ио́на погребе́ния о́браз / предписа́в я́ве, / и сего́ вои́стинну извле́кл от зве́ря, / и мене́, Спа́се, из глубины́ греха́ возведи́ / и к животу́ я́ве, молю́ся, наста́ви.

Я́ко проро́ка из глубины́ и тли возве́л еси́, / живо́т мой, Бла́же, от прегреше́ний изба́ви / благоутро́бием Твои́м.

Я́коже проро́ка Ио́ну / от ки́та изба́вил еси́, Христе́ Бо́же, / и мене́ из глубины́ прегреше́ний / возведи́ и спаси́ мя, / Еди́не Человеколю́бче.

В пещи́ авраа́мстии / о́троцы перси́дстей, / любо́вию благоче́стия па́че, / не́жели пла́менем, опаля́еми, взыва́ху: / благослове́н еси́ в хра́ме сла́вы Твоея́, Го́споди.

Вознесения и на вся Богородичные праздники:

Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Авраа́мстии иногда́ в Вавило́не о́троцы / пе́щный пла́мень попра́ша, / пе́сньми взыва́юще: / оте́ц на́ших Бо́же, / благослове́н еси́.

Спасы́й во огни́ авраа́мския Твоя́ о́троки / и халде́и уби́в, / я́же Пра́вда пра́ведно уловля́ше, / препе́тый Го́споди, Бо́же оте́ц на́ших, / благослове́н еси́.

В неделю самаряныни:

Не преда́ждь нас до конца́ И́мене Твоего́ ра́ди, / и не разори́ Заве́та Твоего́, / и не отста́ви ми́лости Твоея́ от нас, / Го́споди Бо́же оте́ц на́ших, / препе́тый во ве́ки.

В неделю Пятидесятницы:

Согла́сная возшуме́ орга́нская песнь / почита́ти златосотворе́нный безду́шный истука́н; / Уте́шителева же Светоно́сная Благода́ть почеству́ет, / е́же вопи́ти: / Тро́ице Еди́ная, Равноси́льная, Безнача́льная, благослове́на еси́.

Авраа́мстии о́троцы вавило́нский пла́мень попра́ша, / прообразу́юще в нем Де́вы чу́до, / Его́же Симео́н прие́м, возра́довася, вопия́: / ны́не отпуща́еши раба́ Твоего́, / отце́в Бо́же.

Благослове́н еси́, Бо́же, / в пещи́ о́троцы испове́даху, / А́нгела же слы́шаху, / вопию́ща к ним: / се услы́шася моле́ние ва́ше.

В нача́ле Безнача́льное Сло́во, / со Отце́м и Ду́хом / Сын Единоро́дный, / благослове́н еси́, / и превозноси́мый Бо́же оте́ц на́ших.

В пещи́ о́троки неопа́льны соблю́дшаго / и огнь угаси́вшаго, воспое́м, глаго́люще: / благослове́н еси́, Бо́же оте́ц на́ших.

Глаго́лавый на горе́ с Моисе́ом / и о́браз де́вства явле́й в купине́, / благослове́н еси́, Бо́же оте́ц на́ших.

Заве́т Твой помяну́вый, / Христе́ Бо́же, / о́троки из пла́мене изба́вил еси́ / А́нгеловым снизхожде́нием, /Еди́не и́стинно Препросла́вленный.

О́бразу злато́му не поклони́вшеся, о́троцы авраа́мстии / искуша́хуся, я́ко зла́то в горни́ле, / в пещи́ о́гненней, я́ко в черто́зе све́тлем, / ликова́ху, пою́ще: / благослове́н еси́, Бо́же оте́ц на́ших.

Огнь, паля́ в пещи́, истряса́шеся, / о́троцы ороша́хуся / и, пою́ще, глаго́лаху: / благослове́н еси́, Еди́н Сый / Бо́же оте́ц на́ших.

Оте́ц на́ших Бо́же, не посрами́ нас, / но да́руй нам со дерзнове́нием вопи́ти Тебе́: / благослове́н еси́, Бо́же оте́ц на́ших.

Тя, живопису́ющий ассири́йский пла́мень / ю́ноши три спасе́, Го́споди, / я́коже и Де́ву не опали́, Отрокови́цу, / в Боже́ственном Рождестве́ Твое́м Боже́ственная Искра́, / препе́тый отце́в Бо́же, благослове́н еси́.

Халде́йския пе́щи о́троцы небрего́ша, / И́мене ра́ди Твоего́, Спа́се, / и, игра́юще, взыва́ху: / благо слове́н еси́, / Бо́же оте́ц на́ших.

Халде́йскую пещь дре́вле А́нгел, снизше́д, ороси́, / в Вавило́не о́троцы сего́ ра́ди поя́ху: / оте́ц на́ших Бо́же, благослове́н еси́.

Ю́ноши три в Вавило́не, / веле́ние мучи́телево на бу́йство прело́жше, / посреде́ пла́мене вопия́ху: / благослове́н еси́, Го́споди, / Бо́же оте́ц на́ших.

Ру́це распросте́р, Дании́л / львов зия́ния в ро́ве затче́; / о́гненную же си́лу угаси́ша, / доброде́телию препоя́савшеся, / благоче́стия рачи́тели, / о́троцы, взыва́юще: / благослови́те, вся дела́ Госпо́дня, Го́спода.

Вознесения, Успения, Введения и Богородичные праздники:

О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Слы́ши, Отрокови́це, Де́во Чи́стая, / да рече́т у́бо Гаврии́л / сове́т Вы́шняго дре́вний, и́стинный: / бу́ди к прия́тию гото́ва Бо́жию, / Тобо́ю бо Невмести́мый с челове́ки поживе́. / Тем и, ра́дуяся, вопию́: / благослови́те, вся дела́ Госпо́дня, Го́спода.

В Вавило́не о́троцы, / Боже́ственною распала́еми ре́вностию, / мучи́теля и пла́мене преще́ние му́жески попра́ша / и, посреде́ огня́ вве́ржени, ороша́еми, поя́ху: / благослови́те, вся дела́ Госпо́дня, Го́спода.

Весели́ся, Иерусали́ме, / торжеству́йте, лю́бящии Сио́на: / ца́рствуяй бо во ве́ки Госпо́дь Сил прии́де. / Да благогове́ет вся земля́ от лица́ Его́ и да вопие́т: / благослови́те, вся дела́ Госпо́дня, Го́спода.

В неделю самаряныни:

Вся́ческая, Влады́ко, прему́дростию соста́вил еси́, / земли́ же па́ки утверди́л еси́, я́коже ве́си, дно, / основа́нием водрузи́вый на вода́х безме́рных. / Тем вси вопие́м, воспева́юще: / благослови́те, дела́ Госпо́дня, непреста́нно Го́спода.

В неделю Пятидесятницы:

Разреша́ет у́зы и ороша́ет пла́мень / Трисве́тлый Богонача́лия о́браз, пою́т о́троцы, / благослови́т же еди́наго Спа́са и Вседе́теля / я́ко Благоде́теля / сотворе́нная вся́ческая тварь.

В пещи́ о́гненней в Вавило́не / о́троки евре́йския спа́сшаго Бо́га, свяще́нницы, благослови́те, / лю́дие, превозноси́те Его́ во ве́ки.

В пла́мень снизше́дшаго / песносло́вцем Сио́нским зра́ком а́нгельским, / о́троцы, превозноси́те Христа́ Бо́га на́шего во ве́ки.

Великоимени́тый пла́мень, / плене́нных чи́стым соедини́вшийся телесе́м, / росода́тельный показа́ся, / мучи́тельнаго злохуле́ния сопротивобо́жный истука́н указа́вше, / Боже́ственным снизхожде́нием / ю́ношам пою́щим: / созда́нная, созда́вшаго Бо́га благослови́те, / я́ко Зижди́теля всех, / непреста́нно во ве́ки.

Во о́бразе А́нгела, / я́вльшагося в пещи́ о́гненней песносло́вцем, / Христа́ Бо́га по́йте, о́троцы, / свяще́н ницы, благослови́те, / лю́дие, превозноси́те во вся ве́ки.

Во огни́ пла́меннем предстоя́т Тебе́ / Херуви́ми, Серафи́ми, Го́споди, / и вся тварь песнь Тебе́ пое́т кра́сную: / по́йте, благослови́те, лю́дие, превозноси́те Христа́, / Еди́наго Соде́теля, во вся ве́ки.

Вся дела́ Бо́жия и вся тварь, благослови́те Го́спода, / преподо́бнии и смире́ннии се́рдцем, по́й те Его́ / и превозноси́те во вся ве́ки.

Вся дела́ Бо́жия и вся тварь, / благослови́те Го́спода, / я́ко челове́ком от земли́ возсия́ Свет, / и вселе́нную всю просвети́, / и жизнь ве́чную ми́ру дарова́, / по́йте, лю́дие, / и превозноси́те Его́ во ве́ки.

Вся́ческая нося́й непристу́пною Твое́ю си́лою, Христе́, / преподо́бныя Твоя́ о́троки в пла́мени ороси́л еси́, зову́щия: / благослови́те, вся дела́ Госпо́дня, Го́спода.

Земля́, и вся, я́же на ней, / мо́ре и вси исто́чницы, / Небеса́ небе́с, / свет и тьма, мраз и зной, / сы́нове челове́честии, / свяще́нницы, благослови́ те Го́спода / и превозноси́те Его́ во ве́ки.

Изба́вителю всех, Всеси́льне, / посреде́ пла́мене благоче́ствовавшия, / снизше́д, ороси́л еси́ / и на учи́л еси́ пе́ти: / вся дела́, благослови́те, по́йте Го́спода.

На Кресте́ пло́тию пригвожде́ннаго / и показа́вшаго нам ору́жие во спасе́ние, / о́троцы, превозноси́те Христа́, Бо́га на́шего, во ве́ки.

На Престо́ле Херуви́мстем носи́маго Бо́га / и призира́ющаго на смире́нныя / Симео́н я́ко Младе́нца / во объя́тиих но́сит во хра́ме; / Его́же благословя́т творе́ния вся во ве́ки.

Находя́щия в пла́мени / беззако́ннаго мучи́теля веле́нием о́троки подража́юще, / немо́лчными устна́ми / в Вы́шних похва́льно возопии́м: / Бла́же, преесте́ственно сый Пресвяты́й, / пою́щия Тя / све́том у́мным Твои́м озари́.

Песнь но́вую пои́м, лю́дие, / соше́дшему на зе́млю спасти́ ны, / во́лею бо на Кресте́ пригвозди́ся Госпо́дь, / показа́вый язы́ком, / я́ко Ада́ма ра́ди / в ра́бий о́браз облече́ся / в Вы́шних Живы́й во ве́ки.

Просте́ршаго Бо́га Не́бо, я́ко ко́жу, / и основа́вшаго зе́млю на утвержде́нии ея́, / свяще́нницы Госпо́дни и раби́ Госпо́дни, / Го́спода по́йте / и превозноси́те во вся ве́ки.

Ра́дующеся по осужде́нии мучи́тельском о́троцы, / я́ко да не бого́м скве́рным послу́жат всем, / но живо́му Бо́гу, / на огнь дерзну́ша, / от А́нгела же ороша́еми, песнь поя́ху: / дела́ Госпо́дня, Го́спода по́йте / и превозноси́те во вся ве́ки.

Царя́ Христа́, Его́же испове́даша плене́ннии о́троцы, / в пещи́ глаго́люще ве́лиим гла́сом: / вся дела́, по́йте Го́спода.

Ка́мень нерукосе́чный / от несеко́мыя горы́, Тебе́, Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем, веселя́щеся, Тя, Богоро́дице, велича́ем.

Вознесения и на праздники Богородичные:

Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / *почита́ющее свяще́нное торжество́ Богома́тере *, / и да вопие́т: / ра́дуйся, Всеблаже́нная, Богоро́дице, / Чи́стая Присноде́во.

Успения: *почита́ющее свяще́нное преставле́ние Богома́тере *

Я́ко одушевле́нному Бо́жию Киво́ту, / да ника́коже ко́снется рука́ скве́рных, / устне́ же ве́рных Богоро́дице немо́лчно, / глас А́нгела воспева́юще, с ра́достию да вопию́т: / *ра́дуйся, Благода́тная, Госпо́дь с Тобо́ю *.

Введения ирмос тойже: *и́стинно вы́шши всех еси́, Де́во Чи́стая *.

Рождество́ Твое́ нетле́нно яви́ся: / Бог из боку́ Твое́ю про́йде, / я́ко Плотоно́сец яви́ся на земли́ / и с челове́ки поживе́. / Тя, Богоро́дице, тем вси велича́ем.

Бог Госпо́дь и яви́ся нам, / соста́вите пра́здник / и, веселя́щеся, приди́те, возвели́чим Христа́, / с ва́иами и ве́твьми пе́сньми зову́ще: / благослове́н гряды́й во И́мя Го́спода, Спа́са на́шего.

В неделю самаряныни:

Сотвори́ держа́ву мы́шцею Свое́ю, / низложи́ бо си́льныя со престо́л / и вознесе́ смире́нныя Бог Изра́илев. / В ни́хже посети́ нас Восто́к с высоты́ / и напра́вил ны есть на путь ми́ра.

В неделю Пятидесятницы:

Ра́дуйся, Цари́це, / матероде́вственная Сла́во, / вся́ка бо удобообраща́тельная благоглаго́ливая уста́ / вити́йствовати не мо́гут, / Тебе́ пе́ти досто́йно, / изумева́ет же ум всяк Твое́ Рождество́ разуме́ти. / Те́мже Тя согла́сно сла́вим.

Безсе́менное Рождество́ Твое́, Богоро́дице Чи́стая, / Христа́ Бо́га на́шего / пе́сньми немо́лчными велича́ем.

В Тебе́, Богоро́дице, на́ше умале́ние преста́, / неви́димое бо Сло́во / во утро́бе Твое́й прие́мшая, / сугу́ба Того́ родила́ еси́, / Бо́га вку́пе и Челове́ка, / на Него́же Херуви́ми воззре́ти не дерза́ют; / те́мже Тя велича́ем, Пречи́стая.

Велича́ем вси человеколю́бие Твое́, / Христе́, Спа́се наш, / Сла́во раб Твои́х / и Ве́нче ве́рных, / возвели́чивый па́мять Ро́ждшия Тя.

Го́рнейшая преми́рных умо́в / и многообра́зных Херуви́мов вы́шшая, / Пречи́стая Ма́ти Бо́жия, / Созда́теля зачала́ еси́, / Ты бо во тва́ри влады́чествуеши все́ми. / Те́мже пе́сньми Богоро́дицу, / ве́рнии, Тя велича́ем.

Де́ва, му́ченица многострада́льческая, / де́вы Ма́терь многопе́тую, / днесь в Ея́ черто́г приходя́щую, учрежда́ет: / невестокраси́тели вси, лику́им оте́ческая, / благоче́стно Цари́цу велича́юще.

Е́вa у́бо неду́гом преслуша́ния / кля́тву всели́ла есть; / Ты же, Де́во Богоро́дице, / прозябе́нием чревоноше́ния ми́рови Благослове́ние процвела́ еси́. / Тем Тя вси велича́ем.

Моисе́й на горе́ неопали́мую купину́ ви́де, / Ио́сиф в верте́пе неизрече́нное Рождество́ слы́ша, / Нескве́рная Де́во, / Безму́жная Ма́ти, / пе́снь ми Тя, Богоро́дице, велича́ем.

Непостижи́мое Рождество́ рожде́ния Твоего́, / несказа́нное бога́тство чистоты́ Твоея́, / по Рождестве́ бо де́вствуеши еди́на от жен, / я́ко ро́ждшая Творца́ Своего́ / и рог спаси́тельный ве́рным возвы́сившаго – честны́й Крест, / в Не́мже спа́сшеся Тобо́ю, / Богоро́дицу вои́стинну велича́ем.

Огнеро́сную дре́вле пещь халде́йскую / и огне́м неопа́льным купину́ в Сина́и, / Богоро́дицу вси пе́сньми велича́ем.

От земноро́дных ро́ждшися и Творца́ ро́ждшая, / на́ша похвало́, Богоро́дице Чи́стая: / Тя я́ко влады́чествующую тва́рьми, велича́ем.

По Рождестве́ Тя, Чи́стая, / и пре́жде Рождества́, /и в Рождестве́ пречи́стая, / вся тварь, пропове́дающи, / я́ко Богоро́дицу и́стинную велича́ем.

Пое́м Тя, Пресвята́я Де́во / Ма́ти сла́вная, / я́ко прозябла́ еси́ Небе́сный Клас – Христа́ Бо́га / па́че вся́кия мы́сли, / от Тебе ́ Хлеб бысть Живоно́сный ве́рным. / Тем Ти зове́м: ра́дуйся, Непоро́чная, / пребы́вшая Де́ва по Рождестве́ Чи́стая.

Сокрове́нное Бо́жие неизрече́нное / в Тебе́ соверша́ется я́вственное та́инство, / Де́во Пречи́стая, / и́бо Бог из Тебе́ воплоти́ся за милосе́рдие. / Те́мже Тя я́ко Богоро́дицу велича́ем.

Твою́ пречи́стую и нетле́нную утро́бу, / Де́во Богоро́дице, / Бо́жие Бог Сло́во / освяти́вый це́лу со блюде́, / из нея́же, проше́д, четыредесятодне́вный Младе́нец яви́ся, / И́же прино́сится я́ко Зако́на Творе́ц и Законода́тель, / Его́же велича́ем.

Тя, Невмести́мое Сло́во во утро́бу вмести́вшую, / Небе́с простра́ннейшую / и Херуви́мов сла́внейшую, / Богоро́дице Чи́стая, / пе́сньми велича́ем.

Тя, Неискусобра́чную Богоро́дицу, Небе́сный черто́г, / ро́ждшую Нача́льника спасе́ния на́шего, / пе́снь ми велича́ем.

Тя, па́че вся́кия мы́сли / Ма́терь, Де́ву, Отрокови́цу, Безневе́стная, / Спа́са и Бо́га неизрече́нным сло́вом ро́ждшую, / по до́лгу, ве́рнии вси, / благоче́стно велича́ем.

Тя, Пресла́вную Неве́сту / и Всесвяту́ю Богоро́дицу, / Зижди́теля ро́ждшую / неви́димых же и всех ви́димых, / пе́сньми велича́ем.

Тя, я́ко село́ Пречи́стаго Сло́ва, / и прия́телище Ду́ха, / и Благоволе́ния де́лателище пое́м, / в Тебе́ бо соизмене́ние / спасе́ния на́шего соде́лася.

Я́ко сотвори́ мне вели́чия Си́льный, / и свя́то И́мя Его́, / и ми́лость Его́ в род и род боя́щимся Его́.

Ирмосы 5-го гласа

Коня́ и вса́дника в мо́ре Чермно́е / сокруша́яй бра́ни мы́шцею высо́кою / Христо́с истрясе́, Изра́иля же спасе́, / побе́дную песнь пою́ща.

Спаси́телю Бо́гу, / в мо́ри лю́ди немо́крыми нога́ ми наста́вльшему / и фарао́на со всево́инством пото́пльшему, / Тому́ Еди́ному пои́м, я́ко просла́вися.

В неделю о слепом:

Зе́млю, на ню́же не возсия́, ни ви́де со́лнце когда́, / бе́здну, ю́же не ви́де на́гу широта́ Небе́сная, / Изра́иль про́йде невла́жно, Го́споди, / и ввел еси́ его́ в го́ру святы́ни Твоея́, / хва́ляща и пою́ща побе́дную песнь.

Велича́ваго фарао́на в мо́ри потопи́вша / со ору́жием и вса́дники, / Изра́иля же пресла́вно спа́сша и по су́ху прове́дша, / пое́м Христа́, я́ко просла́вися.

Песнь побе́дную принесе́м, лю́дие, / изба́вльшему Бо́гу / из рабо́ты фарао́новы Моисе́йския лю́ди, / сла́вно бо просла́вися.

Пешеше́ствуяй Изра́иль непроходи́мую стезю́ / повеле́нием Влады́чним, / ра́дуяся, поя́ше: / Го́сподеви пои́м, сла́вно бо просла́вися.

Пои́м Го́сподеви ди́вному, / я́ко от го́рькия / свободи́вый рабо́ты Изра́иля, / фарао́на со всево́инством погрузи́.

Пои́м Го́сподеви, / сотво́ршему ди́вная чудеса́ в Чермне́м мо́ри, / песнь побе́дную, / я́ко просла́вися.

Пои́м Спаси́телю всех, / во́льным хоте́нием / на Дре́ве пригвозди́вшемуся / и мир просвети́вшему.

Христо́с яви́ся на земли́, / изба́вивый род наш от идоло неи́стовства: / Тому́ Еди́ному пои́м, / я́ко просла́вися.

Вонми́, не́бо, и возглаго́лю, / и воспою́ Христа́, / нас ра́ди от Де́вы воплоти́вшагося / и тлю и смерть стра́стию разори́вшаго.

Ви́дите, ви́дите, я́ко Аз есмь Бог, / в плоть облеки́йся во́лею Свое́ю, / да спасу́ Ада́ма, / от ле́сти па́дшаго в преступле́ние зми́ем.

Ви́дите, ви́дите, я́ко Аз есмь Бог ваш, / в мо́ри спасы́й лю́ди и в пусты́ни препита́вый я́, / и Челове́к быв, / да спасу́ род челове́ческий.

Ви́дите, ви́дите, я́ко Аз есмь Бог, / об он пол Иорда́на обходя́й, / услы́шав, я́ко Ла́зарь боли́т, и рек: / я́ко не умира́ет, но есть сие́ о сла́ве Мое́й.

Водрузи́вый на ничесо́мже зе́млю повеле́нием Твои́м / и пове́сивый неодержи́мо тяготе́ющую / на недви́жимем, Христе́, ка́мени за́поведей Твои́х, / Це́рковь Твою́ утверди́, Еди́не Бла́же и Человеколю́бче.

Си́лою Креста́ Твоего́, Христе́, / утверди́ мое́ помышле́ние, / во е́же пе́ти и сла́вити / спаси́тельное Твое́ Вознесе́ние.

В неделю слепаго:

Дви́жимое се́рдце мое́, Го́споди, / волна́ми жите́йскими, / утверди́ в приста́нище ти́хое, / наставля́я я́ко Бог.

Держа́вною руко́ю и си́льным сло́вом / Не́бо и зе́млю сотвори́л еси́, / ю́же Твое́ю Кро́вию искупи́л еси́, Це́рковь Твою́, / я́же о Тебе́ утвержда́ется, зову́щи: / я́ко несть свят, ра́зве Тебе́, Го́споди.

На ка́мени за́поведей Твои́х коле́блющагося мя утверди́, / вознеси́ рог мой в ра́зуме повеле́ний Твои́х, / да, хваля́ся, вопию́ Тебе́: / несть свят, па́че Тебе́, Го́споди Сил.

Над язы́ки Бог воцари́ся, / Бог седи́т на Престо́ле Святе́м Свое́м, / и пое́м Ему́ разу́мно / я́ко Царю́ и Бо́гу.

Несть свят, я́ко Госпо́дь, / и несть пра́веден, я́ко Бог мой, / вознесы́й рог наш / и дая́й кре́пость царе́м на́шим.

Утверди́ ны, Бо́же Спа́се, / Твое́ю си́лою / и воздви́г ни рог Твоея́ Це́ркве, / правове́рно хва́лящих Тя.

Утверди́ ны, Бо́же, / Твое́ю си́лою, / и низложи́ ерети́ческая шата́ния, / и вознеси́ рог наш.

Утверди́ мя, Го́споди, / в житии́ обурева́ема, / и ру́ку мне простри́, / я́ко Всеси́лен.

Утверди́ мя, Еди́не Ще́дре, / си́лою Креста́ Твоего́, им бо хвалю́ся, / я́ко несть свят, па́че Тебе́, Го́споди.

Утвержде́ние мое́ бу́ди и прибе́жище, Спа́се, / и Ца́рствия Твоего́ сподо́би, Сло́ве, / и́стинным се́рдцем испове́дающия, Влады́ко, / Боже́ственное Твое́ воплоще́ние.

Утвержде́ние притека́ющих к Тебе́, Христе́ Бо ́же, / мою́ мысль утверди́ / Твои́м человеколю́бием / и к позна́нию возведи́ за́поведей Твои́х, Всеси́льне.

Боже́ственное Твое́ разуме́в истоща́ние прозорли́во, / Авваку́м, Христе́, со тре́петом вопия́ше Тебе́: / во спасе́ние люде́й Твои́х / спасти́ пома́занныя Твоя́ прише́л еси́.

Услы́шах слух си́лы Креста́, / я́ко рай отве́рзеся им, / и возопи́х: / сла́ва си́ле Твое́й, Го́споди.

В неделю слепаго:

Услы́шах, Го́споди, / слух Твой и убоя́хся; / разуме́х смотре́ние Твое́ / и просла́вих Тя, / Еди́не Человеколю́бче.

Боже́ственную явле́ния Твоего́ добро́ту проро́к прови́дя / и снизхожде́нию ужаса́яся воплоще́ния, Христе́, предвозгласи́: / от ю́га прии́дет Госпо́дь, / очище́ние ми́рови да́руяй.

Дела́ смотре́ния Твоего́, Го́споди, / ужаси́ша проро́ка Авваку́ма, / изше́л бо еси́ на спасе́ние люде́й Твои́х, / спасти́ пома́занныя Твоя́ прише́л еси́.

Ду́хом Бо́жиим очи́щся проро́к, / дыха́ющим в нем, Авваку́м Боже́ственный, боя́ся, глаго́лаше: / внегда́ прибли́жатся ле́та, позна́н бу́деши, Бо́же, / на спасе́ние челове́ков.

От горы́ ча́щныя прише́ствие Твое́ услы́шав, / проро́к вопия́ше: / сла́ва неизрече́нному воплоще́нию Твоему́.

Проро́к Авваку́м, прови́дя Тя, Христе́, / благода́рным гла́сом воспропове́даше, вопия́: / слух Твой услы́шах и убоя́хся, / дела́ Твоя́ вся разуме́х и ужасо́хся, Го́споди.

Смотре́ния Твоего́ та́инство разуме́в Авваку́м, / та́йно схожде́ние прише́ствия Твоего́ напису́яй, взыва́ше: / внегда́ прии́дет вре́мя, Го́споди, яви́шися.

Услы́шах, Го́споди, / из Гро́ба Твое́ воста́ние / и просла́вих Твою́ непобеди́мую си́лу.

Услы́шах слух / си́лы Госпо́дни / и просла́вих, Чело веколю́бче, / непостижи́мую Твою́ си́лу.

Услы́шах слух Твой и убоя́хся; / разуме́х дела́ Твоя́ / и диви́хся, Го́споди.

Одея́йся Све́том, я́ко ри́зою, / к Тебе́ у́тренюю и Тебе́ зову́: / ду́шу мою́ просвети́ омраче́нную, Христе́, / я́ко Еди́н Благоутро́бен.

У́тренююще, вопие́м Ти: / Го́споди, спаси́ ны, / Ты бо еси́ Бог наш, / ра́зве бо Тебе́, ино́го не зна́ем.

В неделю слепаго:

Окая́нную ду́шу мою́, нощеборю́щуюся со тьмо́ю страсте́й, / предвари́в, уще́дри / и возсия́й мы́сленное со́лнце днесве́тлыя звезды́ во мне, / во е́же раздели́ти нощь от све́та.

Возсия́й, Христе́ Бо́же, / свет ра́зума Твоего́, / и просвети́ сердца́ на́ша, / и спаси́ ду́ши на́ша.

Го́споди Бо́же наш, стяжи́ ны, / Го́споди, ра́зве Тебе́, ино́го не ве́мы, / И́мя Твое́ имену́ем, / возсия́й на вся Свет.

Не паде́м, но паду́т в паде́нии о́браза Твоего́, Богоро́дице, укори́телие, / да во́змутся от среды́ нас, / да не ви́дят сла́ву Твою́ неразуме́ющии, / зане́ свет и мир Твоего́ Сы́на повеле́ния.

От но́щи покланя́ющияся Тебе́, Христе́, / поми́луй и мир да́руй, / зане́, свет, повеле́ния Твоя́ / бы́ша исцеле́ния рабо́м Твои́м, Человеколю́бче.

Пра́вде научи́теся, живу́щии на земли́, / и ум очи́стим, воздви́женным се́рдцем / к ще́дрому Бо́гу / от но́щи у́тренююще.

Пра́вды Со́лнце У́мное, просвети́ мя, / но́щию страсте́й содержи́маго, / и наста́ви к Боже́ственней стези́, / я́ко Еди́н еси́ ми́ра Царь.

Све́та Непристу́пнаго, Христе́, Живота́ Ве́чнаго, / от но́щи у́тренююще, / пое́м Тя, еди́наго Светода́вца Бо́га.

Све́те И́стинный, Христе́ Бо́же, / к Тебе́ у́тренюет дух мой от но́щи, / яви́ на мя лице́ Твое́.

Сло́во Бо́жие Всеси́льное, / мир всему́ ми́ру посли́ / и све́том и́стинным освеща́я и просвеща́я вся, / из но́щи Тя сла́вящия.

Неи́стовствующееся бу́рею душетле́нною, / Влады́ко Христе́, страсте́й мо́ре укроти́ / и от тли возведи́ мя, / я́ко Благоутро́бен.

Обы́де мя бе́здна, / гроб мне кит бысть, / аз же возопи́х к Тебе́, Человеколю́бцу, / и спасе́ мя десни́ца Твоя́, Го́споди.

В неделю слепаго:

Я́коже проро́ка от зве́ря изба́вил еси́, Го́споди, / и мене́ из глубины́ несодержи́мых страсте́й / возведи́, молю́ся, / да приложу́ призре́ти ми ко хра́му свято́му Твоему́.

Бу́ря содержа́ мя, Спа́се, грехо́вная, / и ду́шу мою́ низво́дит в душетли́тельную глубину́, / но, я́ко дре́вле Ио́ну, Христе́, возведи́, / я́ко да пожру́ Ти и аз со гла́сом хвале́ния.

В ки́тово чре́во подше́дый, Ио́на / не растле́ся, Влады́ко, Твои́м повеле́нием, / но проображе́ние бысть тридне́внаго Твоего́ погребе́ния, / тем Ти взыва́ше: / да взы́дет от тли живо́т мой к Тебе́, Го́споди.

В Це́рковь Небе́сную Святу́ю Твою́ да прии́дет моли́тва моя́, / вопию́ Ти, я́ко Ио́на, из глубины́ се́рдца морска́го: / от грех мои́х возведи́ мя, / молю́ся Тебе́, Го́споди.

Во глубины́ отве́ргся морски́я, / от нужд мои́х изба́ви мя, / я́коже от ки́та возве́л еси́ проро́ка Ио́ну, / та́ко и мене́, молю́ся, / предвар́ив, спаси́ от жите́йских зол.

Возопи́ от после́дних Ада́м: / Бо́же мой, изба́ви мя, па́дшаго, / и, уподо́бився, прииди́, / во е́же спасти́ ны.

Возопи́х в печа́ли мое́й, Спа́се мой, молю́ся: / изба́ви мя от обдержа́щия мя боле́зни и озлобле́ния, / я́ко Ми́лостив, / помяну́в Твою́ ми́лость.

Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой.

От ки́та проро́ка изба́вил еси́, / мене́ же из глубины́ грехо́в / возведи́, Го́споди, и спаси́ мя.

От чре́ва а́дова / во́пля моего́ услы́шал еси́ глас мой / и изба́вил еси́ от тли живо́т мой, / Многоми́лостиве.

Превозноси́мый отце́в Госпо́дь / пла́мень угаси́, о́троки ороси́, / согла́сно пою́щия: / Бо́же, благослове́н еси́.

В пещи́ о́гненней / песносло́вцы спасы́й о́троки, / благослове́н Бог оте́ц на́ших.

В неделю слепаго:

Огня́ гаси́лище – отроко́в моли́тва, / ороша́ющая пещь, пропове́дница чудесе́, / не опаля́ющи, ниже́ сожига́ющи / песносло́вцы Бо́га оте́ц на́ших.

А́нгелом о́троки спасы́й / и гремя́щую пещь преложи́вый в ро́су, / благослове́н еси́, Го́споди.

Благослове́н еси́, Бо́же, / ви́дяй бе́здны / и на Престо́ле Сла́вы седя́й, / препе́тый и пресла́вный.

Ороша́емая пещь и я́рость мучи́тельная / благочести́выя не устраши́ о́троки, / де́рзостно вопию́щия: / благослове́н еси́, Бо́же оте́ц на́ших.

О́троки в пещи́ А́нгелом сохрани́вый, / провозвеща́я и́ми ро́ждшую Тя / нетле́нную Де́ву, / благослове́н еси́, Бо́же оте́ц на́ших.

Пещь угаси́вый в Вавило́не о́гненную /и о́троки в ней, я́ко в черто́зе, сохрани́вый, / благослове́н еси́, Бо́же оте́ц на́ших.

Пла́мень пе́щный порабо́тиша благочести́вии о́троцы, / тем свы́ше ороси́ я́, гото́вы пали́мы по естеству́, / но па́че естества́ му́жески поя́ху: / благослове́н еси́, Го́споди, / на Престо́ле Сла́вы Ца́рствия Твоего́.

Прехва́льно есть и препросла́влено И́мя Твое́, / Го́споди, Бо́же оте́ц на́ших, во вся ве́ки, / и препросла́влен, я́ко пра́веден еси́ о всех, / я́же сотвори́л еси́ нам.

Тро́ицы сла́ву Богочести́вии изобрази́вше, / о́троцы пещь, дре́вле огне́м пали́мую, в ро́су преложи́ша / и, пою́ще, поя́ху: / благослове́н еси́, Бо́же оте́ц на́ших.

Тебе́, Вседе́телю, / в пещи́ о́троцы, всеми́рный лик спле́тше, поя́ху: / дела́ вся́кая, Го́спода по́йте / и превозноси́те во вся ве́ки.

Из Отца́ пре́жде век рожде́ннаго Сы́на и Бо́га / и в после́дняя ле́та воплоще́ннаго от Де́вы Ма́тере, / свяще́нницы, по́йте, / лю́дие, превозноси́те во вся ве́ки.

В неделю слепаго:

А́нгелов сонм, челове́ков собо́р, / Царя́ и Зижди́теля всех, / свяще́нницы, по́йте, благослови́те, леви́ти, / лю́дие, превозноси́те во вся ве́ки.

Всех Соде́теля / и Спа́са душ на́ших, / свяще́н ницы, благослови́те, / лю́дие, превозноси́те Его́ во ве́ки.

Зижди́телю всех Богоно́снии о́троцы / в пещи́ песнь приноша́ху / и, пою́ще, вопия́ху: / благослови́те, вся дела́ Госпо́дня, Го́спода.

Кре́пции о́троцы трие́ су́ще, / си́лою обо́лкшеся Святы́я Тро́ицы, / улови́ша и победи́ша халде́и, / и ди́вно измени́ся естество́: / ка́ко огнь в ро́су прелага́шеся? / Без туги́ я сохрани́, я́ко пелена́ми, / о пролия́вый му́дрость на всех де́лех Твои́х, Бо́же, / Тя превозно́сим во ве́ки.

Оте́ческое веле́ние му́дрствующе ю́ноши три в Вавило́не, / безбо́жному веле́нию благоче́стно не покаря́ющеся, / посреде́ осужде́ния о́гненнаго стоя́ще, вопия́ху: / благослови́те, вся дела́ Госпо́дня, Го́спода.

Ороси́вшаго пещь и о́троки Сохра́ншаго посреде́ горя́щаго пла́мене, / о́троцы, славосло́вите, / свяще́нницы, благослови́те, / лю́дие, превозноси́те во вся ве́ки.

От Отца́ рожде́ннаго пре́жде век / Бо́га Сло́ва / по́йте, свяще́нницы, / лю́дие, превозноси́те во вся ве́ки.

Преподо́бнии Твои о́троцы в пещи́, Христе́, / воспева́юще, глаго́лаху: / благослови́те, вся дела́ Госпо́дня, Го́спода.

Творца́ тва́ри, / Его́же ужаса́ются А́нгели, / по́йте, лю́дие, / и превозноси́те во вся ве́ки.

Царя́ Христа́, Его́же пою́т Херуви́ми / и сла́вят Серафи́ми, / по́йте, лю́дие, / и превозноси́те во вся ве́ки.

Иса́ие, лику́й, Де́ва име́ во чре́ве / и роди́ Сы́на Емману́ила, / Бо́га же и Челове́ка, Восто́к и́мя Ему́, / Его́же велича́юще, Де́ву ублажа́ем.

Тя, па́че ума́ и словесе́ Ма́терь Бо́жию, / в ле́то Безле́тнаго / неизрече́нно ро́ждшую, / ве́рнии, единому́дренно велича́ем.

В неделю слепаго:

Я́ко сотвори́ Тебе́ вели́чия Си́льный, / Де́ву явль Тя чи́сту по рождестве́, / я́ко ро́ждшую без се́мене Своего́ Творца́, / тем Тя, Богоро́дице, велича́ем.

Велича́ем, Христе́, / Твою́ Всенепоро́чную Ма́терь Чи́стую, / я́ко роди́ Тя преесте́ственно пло́тию, / от вся́кия льсти и тли нас избавля́яй.

Жезл, прозя́бший от ко́рене Дави́дова, Богоро́дице Всепе́тая, / Цвет красне́йший нам возсия́ла еси́, / дре́вняго вино́вный блаже́нства. / Тем Тя вси пе́сньми велича́ем.

Из Еде́ма изы́де род наш пра́бабы ради Е́вы, / при́зван же Тобо́ю, ро́ждшею нам но́ваго Ада́ма – Христа́, / во двою́ естеству́, Де́во Чи́стая. / Взыгра́ся Ада́м пра́дед, / я́ко избы́в пе́рвыя кля́твы, / мы же, Тобо́ю хва́лящеся, / я́ко Тебе́ ра́ди Бо́га позна́хом, / и Тебе́ велича́ем.

О, чу́до! / и́бо чу́до, соверша́емое в Тебе́, Богоро́дице: / обновля́ется естество́, и Бог Челове́к быва́ет, / и во дву естеству́, Богосло́вяще, велича́ем.

Тя, блаже́нную в жена́х / и благослове́нную Бо́гом, / челове́ческий род, / пе́сньми велича́ем.

Тя, Бо́жию Ма́терь, и Де́ву Чи́стую, / и Херуви́мов сла́вншую, / во гла́сех пе́сней велича́ем.

Тя, неизрече́нным сло́вом / Созда́теля заче́ншую во чре́ве, велича́ем, / Ра́дость бо ро́ждшая, / Живо́т всем дарова́ла еси́, Всеблаже́нная.

Тя, Неискусому́жную Неве́сту, / Ма́терь Сло́ва, / Святу́ю Де́ву, велича́ем.

Тя, рабу́ и Ма́терь / Христа́ Бо́га на́шего, / Богоро́дице, / досто́йно велича́ем.

Чре́во Твое́ яви́ся ши́ршее Небе́с, / и сла́вншая еди́на яви́лася еси́, / чуде́с превы́шшая еди́на показа́лася еси́, Богоро́дице, / ро́ждшая Невмести́маго и Присносу́щнаго Бо́га, / по до́лгу Тя, челове́ческий род, / непреста́нно велича́ем.

Ирмосы 6-го гласа

Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на ви́дя потопля́ема, / Бо́гу побе́дную песнь пои́м, вопия́ше.

В Великий Четверток:

Се́ченное, сече́тся / мо́ре Чермно́е, / волнопита́емая же изсуша́ется глубина́, / та́яжде ку́пно безору́жным бы́вши проходи́ма и всеору́жным гроб. / Песнь же Богокра́сная воспева́шеся: / сла́вно просла́вися Христо́с, Бог наш.

В Великую Субботу:

Волно́ю морско́ю / Скры́вшаго дре́вле / гони́теля мучи́теля – / под земле́ю скры́ша спасе́нных о́троцы; / но мы, я́ко отрокови́цы, / Го́сподеви пои́м, сла́вно бо просла́вися.

Великаго покаянного канона:

Помо́щник и Покрови́тель / бысть мне во спасе́ние, / Сей мой Бог, / и просла́влю Его́, Бог отца́ моего́, / и вознесу́ Его́, / сла́вно бо просла́вися.

Воздвиза́емое мо́ре / немо́крыми нога́ми прохо дя́ дре́вле Изра́иль, / егда́ ви́дяше погружа́ема го́рдаго фарао́на, / ра́достно взыва́ше: / пои́м Го́сподеви, / сотво́ршему сла́вная чудеса́.

Колесни́цы фарао́новы и си́лу его́ / высо́кою мы́шцею Христо́с потопи́, / Изра́иля же спасе́, воспева́юща: / ди́вному Бо́гу на́шему пои́м.

Пои́м Го́сподеви, / от рабо́ты Изра́иля свободи́вшему еги́петския Моисее́м, / песнь непреста́нно, / Христу́, Царю́ и Бо́гу на́шему.

Проше́дше мо́ре сы́нове Изра́илевы / и ви́дяще фарао́на, погруже́на в нем, / благода́рно поя́ху: / Го́сподеви пои́м, сла́вно бо просла́вися.

Чу́вственный фарао́н потопле́н бысть со всево́инством, / Изра́иль же, проше́д посреде́ мо́ря, вопия́ше: / Го́сподеви Бо́гу на́шему / пои́м, я́ко просла́вися.

Покаяннаго канона в понедельник, вторник, среду:

Вонми́, не́бо, / и возглаго́лю, / и воспою́ Христа́, / от Де́вы пло́тию прише́дшаго.

Покаяннаго канона в среду и четверток:

Ви́дите, ви́дите, я́ко Аз есмь Бог, / ма́нну одожди́вый / и во́ду из ка́мене источи́вый / дре́вле в пусты́ни лю́дем Мои́м / десни́цею еди́ною / и кре́постию Мое́ю.

Ви́дите, ви́дите, / я́ко Аз есмь Бог ваш, / Кресто́м ад разори́вый, я́ко си́лен, / и безстра́стия стра́стию пло́ти Свое́й источи́вый земны́м.

Вонми́, не́бо, / и возглаго́лю, / и восхвалю́ Христа́, / Еди́наго Человеколю́бца.

Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Госпо́дь, Сый, всех и Зижди́тель Бог, / созда́н ное, Безстра́стный, обнища́в, Себе́ соедини́, / и Па́сха, за я́же хотя́ше умре́ти, / Сам, Сый, Себе́ предпожре́: / яди́те,– вопия́,– Те́ло Мое́ / и ве́рою утверди́теся.

В Великую Субботу:

Тебе́, на вода́х / пове́сившаго всю зе́млю неодержи́мо, / тварь, ви́девши на ло́бнем ви́сима, / у́жасом мно́гим содрога́шеся, / несть свят, / ра́зве Тебе́, Го́с поди, взыва́ющи.

Покаяннаго канона в понедельник:

На недвижи́мом, Христе́, ка́мени за́поведей Твои́х / утверди́ мое́ помышле́ние.

Покаяннаго канона во вторник, среду и четверток:

Утверди́, Го́споди, / на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь.

В пе́рсех се́рдца и души́ моея́ зову́ Тебе́, / я́ко проро́чица А́нна, / я́коже о́ной дал еси́ моли́твою Саму́ила, / и мне да́руй, Го́споди, плод покая́ния.

Возвесели́ся непло́ды неражда́ющая, / я́ко прии́де / Изба́витель мой и Бог, / от де́монския пре́лести избавля́яй.

Го́споди, Спа́се мой и Зижди́телю, Бо́же всех, / зе́млю на ничесо́м повеле́нием в нача́ле тя́жестну утверди́вый, / утверди́ и мене́ в ве́ре, / е́же вопи́ти Тебе́ в весе́лии: / Ты моя́ кре́пость и си́ла, / ору́жие и прибе́жище.

На тве́рдем ве́ры Твоея́ ка́мени / помышле́ние утверди́в души́ моея́, / утверди́, Го́споди, Тя бо и́мам, Бла́же, / прибе́жище и утвержде́ние.

Неизрече́нныя Твоея́ си́лы / и содержи́тельныя всех прему́дрости Твоея́ / устраша́юся, помышля́яй, и вопию́ Ти, Бла́же: / на враги́ да вознесе́тся, Христе́, рог мой.

Разшири́шася на враги́ моя́ уста́ моя́, / я́ко утверди́ся о Го́споде се́рдце мое́.

Тобо́ю, Христе́, Небеса́ утвержда́ема вся, / Сло́во Бо́жие и Си́ла, / испове́дуют сла́ву неизрече́нну / и вседе́тельныя руки́ Твоея́ сотворе́ния, / несть бо пресвя́т, ра́зве Тебе́, Го́споди.

Утверди́, Го́споди, Це́рковь Твою́, / ра́зумом возвы́сивый Небеса́, / во е́же пе́ти пречи́стое Твое́ смотре́ние, / Еди́не Человеколю́бче.

Утверди́ мене́, Христе́, / и извести́ мя к Тебе́, / и просвеще́нием ра́зума Твоего́ / научи́ мя.

Христо́с моя́ си́ла, / Бог и Госпо́дь, / честна́я Це́рковь / Боголе́пно пое́т, взыва́ющи, / от смы́сла чи́ста о Го́споде пра́зднующи.

В Великий Четверток:

Прови́дев проро́к / та́йну Твою́ неизрече́нную, Христе́, провозгласи́: / положи́л еси́ тве́рдую любо́вь кре́пости, / О́тче Ще́дрый, / Единоро́днаго бо Сы́на, Благи́й, / очище́ние в мир посла́л еси́.

В Великую Субботу:

На Кресте́ Твое́ Боже́ственное истоща́ние / прови́дя, Авваку́м, ужа́сся, вопия́ше: / Ты си́льных пресе́кл еси́ держа́ву, Бла́же, / приобща́яся су́щим во а́де, я́ко Всеси́лен.

Услы́ша проро́к прише́ствие Твое́, Го́споди, / и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся; / сла́ва си́ле Твое́й, Го́споди.

Взы́ду на высоту́ хвале́ния Твоего́ / и лю́дем избра́нным благовещу́ упокое́ние от осужде́ния сне́ди, – / проро́к глаго́лаше, / Сло́во бо одебеле́вшее от Де́вы нам яви́ся.

Обнови́л еси́ добро́ту Твоего́ о́браза, / к сему́ бо от Оте́ческих соше́л еси́ не́др, / и вопие́м Ти: / сла́ва си́ле Твое́й, Человеколю́бче.

Покры́ла есть Небеса́ / доброде́тель Твоя́, Христе́, / и Твоего́ хвале́ния, Го́споди, / вся испо́лнишася.

Твоего́ неизрече́ннаго воплоще́ния, Изба́вителю всех, / проро́к Авваку́м очи́стився Ду́хом, / та́инству ужа́с ся, вопия́ше: / внегда́ прибли́жатся ле́та, позна́н бу́деши, / безма́терен от Отца́ / в после́дняя времена́ воплоща́яйся.

Удиви́ся Твой ра́зум от Мене ́, / услы́шавшу пресла́вная веле́ния смотре́ния Твоего́, / укрепи́ся же воз любле́нием Твоего́ схожде́ния, / Ты бо моея́ нищеты́ не отве́рглся еси́.

Услы́шах повеле́ния, / презре́х, Го́споди, и, пути́ Твоего́ не сохрани́в, умертви́хся: / Ты мя возста́ви, / Спа́се, наде́ждо моя́, / мене́ ра́ди обнища́вый, / плоть челове́ческую прии́м.

Услы́шах слух Твой / и убоя́хся, / разуме́х дела́ Твоя́ / и ужасо́хся, Го́споди.

Услы́шах слух Твой / и убоя́хся, / разуме́х дела́ Твоя́ и ужасо́хся: / сла́ва си́ле Твое́й, Го́споди.

Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, и́стиннаго Бо́га, / от мра́ка грехо́внаго взыва́юща.

В Великий Четверток:

Сою́зом любве́ связу́еми, апо́столи, / влады́чествующему все́ми себе́ Христу́ возло́жше, / кра́сны но́ги очища́ху, / благовеству́юще всем мир.

В Великий Пяток:

К Тебе́ у́тренюю, / милосе́рдия ра́ди Себе́ истощи́вшему непрело́жно / и до страсте́й безстра́стно прекло́ншемуся, / Сло́ве Бо́жий: / мир пода́ждь ми, па́дшему, / Человеколю́бче.

В Великую Субботу:

Богоявле́ния Твоего́, Христе́, / к нам ми́лостивно бы́вшаго, / Иса́ия, Свет ви́дев Невече́рний, / из но́щи у́треневав, взыва́ше: / воскре́снут ме́ртвии, и воста́нут су́щии во гробе́х, / и вси земноро́днии возра́дуются.

От но́щи у́тренююща, Человеколю́бче, / про свети́, молю́ся, / и наста́ви и мене́ на повеле́ния Твоя́, / и научи́ мя, Спа́се, твори́ти во́лю Твою́.

Мир мног лю́бящим Тя, Христе́, / и нощь просвеще́ния в пи́щи слове́с Твои́х, / сего́ ра́ди, от но́щи у́тренююще, / про́сим ми́лости от Тебе ́, Человеколю́бче.

Мрак тя, душе́ моя́, / поя́т беззако́нных дея́ний, / я́же соде́лала еси́ в житии́ сем, / но не преста́ни, зову́щи: / Наста́вниче Све́та и Изба́вителю всех, / омраче́нную ду́шу мою́ светово́дствуй к Све́ту Невече́рнему.

На Тя упова́х, Го́споди, / и к Тебе́ у́тренюю, Пребоже́ственней Добро́те, / ду́шу мою́ возвесели́ / во све́те Богове́дения Твоего́ и спаси́ мя.

От но́щи песнь возсыла́ем Тебе́: / возниспосли́ нам ми́лость Твою́, Го́споди, / Ты бо еси́ Бог наш, / ра́зве Тебе́, ино́го не ве́мы.

Положи́ на стопы́ моя́ мглу / всезле́йший враг, Го́споди, / но Ты озари́, Светода́вче Сло́ве, / и сего́ мя изба́ви осужде́ния.

Прозорли́вый Иса́ия, / разуме́яй безсе́менное рожде́ние Твое́, Де́во, вопия́ше: / се во чре́ве прии́мет Де́ва, / ро́ждшая Сло́ва Единоро́днаго, / Сы́на же О́тча, / со Ду́хом Боже́ственным славосло́вима.

Свет возсия́й ми́ру, Христе́, / просвети́ се́рдце мое́, / от но́щи Тебе́ зову́ща, / и спаси́ мя.

Свет и мир Твой, Христе́, / рабо́м Твои́м пода́ждь, Бла́же: / Ты бо еси́ всех мир / и сою́з любве́, Человеколю́бче, / Тя позна́вшим, у́тро све́тлое, / и Влады́ку вои́стинну, и Го́спода.

Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, Многоми́лостиве.

В Великий Четверток:

Бе́здна после́дняя грехо́в обы́де мя, / и, волне́ния не ктому́ терпя́, / я́ко Ио́на Влады́це, вопию́ Ти: / от тли мя возведи́.

В Великую Субботу:

Ят бысть, / но не удержа́н в пе́рсех ки́товых Ио́на: / Твой бо о́браз нося́, / Страда́вшаго и погребе́нию да́вшагося, / я́ко от черто́га, от зве́ря изы́де. / Приглаша́ше же кустоди́и: / храня́щии су́етная и ло́жная, / ми́лость сию́ оста́вили есте́.

Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой

Возопи́х всем се́рдцем, Го́споди, / злы́ми де́лы одержи́мь, / возведи́, молю́ся, / изринове́на от тли, / Тя бо помяну́х, Спа́се, / и возвесели́ся се́рдце мое́.

Зве́рю бе́здны предае́тся проро́к Ио́на, / глубине́ морско́й, / прообразу́я Твое́, Сло́ве, тридне́вное воста́ние. / Тем и взыва́ше: / из глубины́ преиспо́дния возведи́ живо́т мой, / Благоутро́бне.

Ки́том пожре́н грехо́вным, / вопию́ Тебе́, Христе́: / я́ко проро́ка, / из нетле́ния мя свободи́.

Ки́том содержи́мь прегреше́ний, / вопию́ Ти, Христе́ мой, со проро́ком: / возведи́ от тли живо́т мой / и спаси́ мя.

Обы́де мя бе́здна после́дняя грехо́вная, / пожре́ мя мно́жество зол мои́х, / и, стеня́, вопию́ Ти, Бо́же мой: / я́ко проро́ка Ио́ну, изба́ви, Многоми́лостиве.

Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее веле́ние Бо́жие / мучи́теля увеща́ вопи́ти: / благослове́н еси́, Бо́же оте́ц на́ших.

В Великий Четверток:

О́троцы в Вавило́не / пе́щнаго пла́мене не убоя́шася, / но, посреде́ пла́мене вве́ржени, ороша́еми, поя́ху: / благослове́н еси́, Го́споди, Бо́же оте́ц на́ших.

В Великую Субботу:

Неизрече́нное чу́до: / в пещи́ Изба́вивый преподо́бныя о́троки из пла́мене / во Гро́бе мертв, бездыха́нен полага́ется / во спасе́ние нас, пою́щих: / Изба́вителю Бо́же, / благослове́н еси́.

Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам, / но не преда́ждь нас до конца́, / отце́в Бо́же.

В Вавило́не плене́ннии тричи́сленнии / числе́нием царю́ беззако́нному проти́вишася, / поклоне́нию о́браза душетли́тельнаго позлаще́ннаго. / Те́мже, не покори́вшеся, / в пещь о́гненную вве́ржени бы́ша и, пою́ще, поя́ху: / оте́ц Бо́же, благослове́н еси́.

В пусты́ни купину́, неопа́льно горя́щую, / обра́зно евре́йскую пещь пропису́ющу показа́, / и Де́вы о́браз явля́яй, / чуде́с Бо́же и Препросла́вленный.

Преподо́бных Твои́х отроко́в моли́тву услы́шавый / и пещь горя́щую ороси́вый, / благослове́н еси́, Го́споди, / Бо́же оте́ц на́ших.

Преподо́бных Твои́х отроко́в песнь услы́шавый / и пещь горя́щую ороси́вый, / благослове́н еси́, Го́споди, / Бо́же оте́ц на́ших.

Три ю́ноши / не опали́ дре́вле возвыша́емый пла́мень, / неща́дно мя зной к тле́нию положи́. / Но, я́ко о́ныя изба́вил еси́ сия́нием Твои́м, / пою́щаго с ни́ми спаси́ мя: / благослове́н еси́, Бо́же оте́ц на́ших.

Ты о́троки в пещи́, Жизнода́вче, / А́нгелом ороси́л еси́, глаго́лющия: / благослове́н еси́, Го́споди, / Бо́же оте́ц на́ших.

Яви́ся на ны благода́ть Твоя́, Спа́се, / и свет Креста́ Твоего́ возсия́ ми́рови: / благослове́н еси́, Го́споди, / Бо́же оте́ц на́ших.

Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

В Великий Четверток:

За зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша повеле́ние безу́мное / и, совоку́плени, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, и превозноси́те во вся ве́ки.

В Великий Пяток:

Столп зло́бы богопроти́вныя / Боже́ственнии о́троцы обличи́ша, / на Христа́ же шата́ющееся беззако́нных собо́рище / сове́тует тще́тная, / уби́ти поуча́ется / Живо́т держа́щаго дла́нию. / Его́же вся тварь благослови́т, / сла́вящи во ве́ки.

В Великую Субботу:

Ужасни́ся, боя́йся, Не́бо, / и да подви́жатся основа́ния земли́: / се бо в мертвеце́х вменя́ется в Вы́шних Живы́й / и во Гроб мал странноприе́млется. / Его́же, о́троцы благослови́те, свяще́нницы, воспо́йте, / лю́дие, превозноси́те во вся ве́ки.

Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те и превозноси́те во вся ве́ки.

Бо́га Отца́ Соде́теля, / Единосу́щна Сы́на и Бо́жия Ду́ха / в пла́мени ю́ноши / пе́ти повелева́ются: / да благослови́т Го́спода вся тварь / и превозно́сит во вся ве́ки.

Мусики́йскаго согла́сия небре́гше, о́троцы / песнь Боже́ственную из пла́мене воспева́ху, глаго́люще: / свяще́нницы, благослови́те, лю́дие, коле́на и язы́цы, / превозноси́те Го́спода.

Мучи́телеву златослия́нному столпу́, я́ко сопротивобо́жному истука́ну, / не поклони́шася о́троцы Сио́нстии, / но, Богохрани́ми, перси́йскую пещь я́ко травни́к, непщева́ху / и пла́мень, я́ко ороша́ющий о́блак, / и, лику́юще, поя́ху: / благослови́те, творе́ния вся, Го́спода.

Отроко́в песнь воспои́м Христу́, / пою́ще с ни́ми: / да благослови́т вся тварь Го́спода / и превозно́сит во вся ве́ки.

Преподо́бнии Твои́ о́троцы / в пещи́ Херуви́мы подража́ху, / Трисвяту́ю песнь воспева́юще: / благослови́те, по́йте и превозноси́те во вся ве́ки.

Прохлажде́й горя́щую пещь, Бо́же, / и о́троки же невреди́мы сохрани́в, / Тебе́ воспева́ющия: / свяще́нницы, по́йте и превозноси́те Его́ во ве́ки.

Си́ла та́инственная / в Вавило́не явля́ется, / о́троки в пла́мени Боже́ственным Ду́хом ороша́ющи / и мучи́телеву горды́ню попаля́ющи. / Те́мже вопия́ху благоче́стно: / благослови́те, дела́ Госпо́дня, Го́спода.

Угрожа́яй царь иногда́ ю́ношам / пещь угото́ва / и непови́нным повеле́ вве́рженным бы́ти, / испове́дающим Бо́га препросла́вленнаго, / Его́же благословя́т творе́ния / всея́ тва́ри во ве́ки.

Царю́ веко́в, Христу́, / песнь рцем отроко́в, ве́рнии: / благослови́те, / вся дела́ Госпо́дня, Го́спода.

Бо́га челове́ком невозмо́жно ви́дети, / на Него ́же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и Тя ублажа́ем.

В Великий Четверток:

Стра́нствия Влады́чня / и Безсме́ртныя Трапе́зы / на Го́рнем ме́сте высо́кими умы́, / ве́рнии, прииди́те, наслади́мся, / возше́дша Сло́ва, от Сло́ва научи́вшеся, / Его́же велича́ем.

В Великий Пяток:

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

В Великую Субботу:

Не рыда́й Мене́, Ма́ти, / зря́щи во Гро́бе, / Его́же во чре́ве без се́мене зачала́ еси́, Сы́на: / воста́ну бо, и просла́влюся, / и вознесу́ со сла́вою непреста́нно я́ко Бог, / ве́рою и любо́вию Тя велича́ющия.

Безсе́меннаго зача́тия рождество́ несказа́нное, / Ма́тере безму́жныя Нетле́нен Плод, / Бо́жие бо рожде́ние обновля́ет естества́. / Те́мже Тя, вси ро́ди, / я́ко Богоневе́стную Ма́терь, / правосла́вно велича́ем.

Безсе́менно ро́ждшую Еди́наго от Тро́ицы, / на́ше все без нетле́ния взе́мша, / Ему́же оте́чества язы́ков покланя́ются, / Де́во, Тя велича́ем.

Велича́ем Тя, вси ро́ди, / Богоро́дице Де́во, / исто́чник живота́ на́шего.

Ве́чное обре́тше избавле́ние, / от пра́отца Ада́ма свы́ше рожде́нное, / ро́ду стра́шнаго изрече́ния, / рождество́ со Безпло́тными / непостижи́мое славосло́вим, / Богоро́дицу Тя пе́сньми велича́юще.

Е́же ра́дуйся / от А́нгела прии́мшая / и ро́ждшая Созда́теля Своего́, / Де́во, спаси́ Тя велича́ющия.

Купину́ у́мную, / дре́вле на горе́ я́вльшуюся Моисе́ю, неопа́льно горя́щу, / Пречи́стую и Святу́ю Де́ву / согла́сно пе́сньми велича́ем.

Ма́терними объя́тии, Честна́я, / носи́ла еси́ Седя́щаго на Херуви́мех / и Сего́ сосцепита́еши, / за кра́йнюю вся́кую бла́гость во Ада́мов о́браз вообразу́ющася. / Те́мже, соше́дшеся, челове́ческое собра́ние, / и Тя, ро́ждшую Свет ми́ра, велича́ем.

Ра́дуйся, Честна́я Всесвята́я Ма́ти Де́во, / Еди́ на Всепе́тая, / Тя сла́вит вся тварь, / Ма́терь Све́та.

Се врата́, / се гора́ свята́я, / се де́вствующая Ма́ти, / Ю́же велича́ем.

Сло́вом Сло́во Еди́на ро́ждшая / ерети́ческая уста́ загради́ злоре́чивая: / и́но но́во Не́бо, неокра́домый рай, Пречи́стая, / Тя велича́ем.

Слы́ши, Дщи, и виждь, и приклони́ у́хо Твое́, / и возжела́ет Царь добро́ты Твое́й: / и́бо вся сла́ва Твоя́, Де́во, отвну́трь, / я́ко заче́нши Созда́теля Твоего́. / Те́мже, бога́тии лю́дстии, лицу́ Твоему́ моля́щеся, / Тя велича́ем.

Ирмосы 7-го гласа

Ма́нием 11 Твои́м на земны́й о́браз преложи́ся / пре́жде удоборазлива́емое водно́е естество́, Го́споди. / Те́мже, немо́кренно пешеше́ствовав, Изра́иль / пое́т Тебе́ песнь побе́дную.

В неделю Пятидесятницы:

По́нтом покры́ фарао́на с колесни́цами / Сокруша́яй бра́ни мы́шцею высо́кою, / пои́м Ему́, я́ко просла́вися.

Изме́ншему Бо́гу Изра́иля / от мо́ря Чермна́го / побе́дную песнь пои́м, / я́ко просла́вися.

Истря́сшему Бо́гу / фарао́на в мо́ри Чермне́м / песнь побе́дную пои́м, / я́ко просла́вися.

Моисе́йский жезл Боже́ственною си́лою / Чермно́е про́йде мо́ре / и проведе́ лю́ди, пою́щия и глаго́лющия: / пои́м Ди́вному Бо́гу на́шему побе́дную песнь, / я́ко просла́вися.

От струй Чермна́го / сте́ну сотво́ршему лю́дем / и покры́вшему глубино́ю фарао́на со всево́инством, / пои́м Го́сподеви, сла́вно бо просла́вися.

Погрузи́вшему фарао́на / в Чермне́м мо́ри / побе́дную песнь пои́м, / я́ко просла́вися.

Пои́м Го́сподеви, / погрузи́вшему всю си́лу фарао́нову в мо́ри, / побе́дную песнь, / я́ко просла́вися.

Поспе́шествовавшему Бо́гу во Еги́пте Моисе́ови, / извести́ Изра́иля, / Тому́ Еди́ному пои́м, / я́ко просла́вися.

Сокруши́вшему бра́ни мы́шцею Свое́ю / и вса́дники триста́ты погрузи́вшему, / пои́м Ему́, я́ко Изба́вителю на́шему Бо́гу, / я́ко просла́вися.

Ви́дите, ви́дите, я́ко Аз есмь Бог ваш, / две́ри Небе́сныя отверзы́й / и одожди́вый ма́нну лю́дем избра́нным, / я́ко возмо́жна Мне вся: / творю́ бо, ели́ка хощу́.

Вонми́, Не́бо, и возглаго́лю, / и воспою́ Христа́, / Спа́са ми́ра, Еди́наго Человеколю́бца.

Лю́дие, внемли́те Бо́жию снизхожде́нию, / я́ко от Де́вы Святы́я роди́ся, я́ко благоволи́, / Тому́ дади́м сла́ву и хвале́ние.

В нача́ле Небеса́ всеси́льным сло́вом Твои́м / утвержде́й, Го́споди Спа́се, / и Вседе́тельным и Бо́жиим Ду́хом всю си́лу их, / на недви́жимем мя ка́мени испове́дания Твоего́ утверди́.

В неделю Пятидесятницы:

С высоты́ Си́лою, ученико́м, Христе́, / до́ндеже облеце́теся, рекл еси́, / седи́те во Иерусали́ме: / Аз же я́ко Мене́, Уте́шителя ино́го, / Ду́ха Моего́ же и О́тча послю́, / в Не́мже утвердите́ся.

В мокрота́х тя́жестну зе́млю укрепи́вый, Всеси́льне, водны́х / и Небеса́ на ничесо́м сло́вом воздрузи́вый, / вну́тренняго сляче́наго 12 моего́ страстьми́ челове́ка возвлеки́й, Христе́, / на недви́жимом Твоея́ ве́ры ка́мени утверди́.

В Правосла́вной ве́ре испове́дания / утверди́ мя, Го́споди, / да не подви́гнет мя враг до конца́.

И́же от Безнача́льнаго Отца́, Сло́ве, / Сы́не Единоро́дный, / просвети́ сердца́ на́ша.

На вода́х зе́млю основа́вый, / Сло́ве, Христе́ Бо́же, / и на́ша сердца́ сла́вити Тя утверди́.

Небеса́ утверди́вый сло́вом / и земно́е основа́ние укрепи́вый на вода́х мно́гих, / утверди́ мой ум в во́лю Твою́, / Человеколю́бче.

Утверди́ мя, Христе́, к Твоему́ славосло́вию / и укрепи́ пе́ти А́ннину песнь Тебе́, поя́ во всех: / Свят еси́, Го́споди, содержа́й вся.

Утверди́ся се́рдце мое́ в Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́, / возвесели́хся о спасе́нии Твое́м.

Утверди́ся ве́рою Христо́ва Це́рковь, / и́бо непреста́нно пе́сньми вопие́т, пою́щи: / Свят еси́, Го́споди, / и Тя пое́т дух мой.

Утвержде́ние мне бу́ди, / сло́вом утверди́вый Небеса́ / и укрепи́вый зе́млю на вода́х, / и изба́ви, я́ко Бог, от вся́каго обстоя́ния.

О́тча не́дра не оста́вль / и соше́д на зе́млю, Христе́ Бо́же, / та́йну услы́шах смотре́ния Твоего́ / и просла́вих Тя, Еди́не Человеколю́бче.

В неделю Пятидесятницы:

Смотря́яй проро́к в после́дняя / Твое́, Христе́, прише́ствие, вопия́ше: / Твою́ услы́шах, Го́споди, си́лу, / я́ко вся спасти́ пома́занныя Твоя́ прише́л еси́.

Боже́ственным предъявле́нне Авваку́м очи́стився Ду́хом, / между́ двою́ живо́тну прише́ствие Твое́ пропове́да; / тре́петом же содержи́мь, Христе́ мой, / слух ди́вных Твои́х услы́шав, / взыва́ше, убоя́хся.

Небеса́ покры́ла есть / доброде́тель Твоя́, Го́споди, / и Твоего́ хвале́ния вся испо́лнил еси́: / сла́ва си́ле Твое́й, Человеколю́бче.

Плотско́е прише́ствие Твое́, Христе́, уверя́я, / проро́к Авваку́м взыва́ше: / сла́ва си́ле Твое́й, Го́споди.

Покры́ла есть Небеса́, Христе́ Бо́же, / смотре́нием Твои́м доброде́тель неизрече́нныя му́дрости Твоея́, / Человеколю́бче.

Услы́шах слух Твой / и убоя́хся, / разуме́х дела́ Твоя́ / и ужасо́хся, Го́споди.

Услы́шах слух Твой, Го́споди, / я́ко яви́лся еси́ на земли́, / за е́же спасти́ ны, / тем вопие́м: сла́ва си́ле Твое́й, Го́споди.

Услы́шах слух Твой и убоя́хся, Го́споди, / разуме́х дела́ Твоя́ и ужасо́хся, / я́ко Кресто́м Твои́м разруши́л еси́ смерть, / Живо́т нам дарова́вый.

Нощь не светла́ неве́рным, Христе́, / ве́рным же просвеще́ние в сла́дости слове́с Твои́х. / Сего́ ра́ди к Тебе́ у́тренюю / и воспева́ю Твое́ Божество́.

В неделю Пятидесятницы:

Стра́ха ра́ди Твоего́ зача́тый, Го́споди, / во чре́ве проро́ков / и рожде́нный на земли́ Дух спасе́ния / апо́стольская сердца́ созида́ет чи́ста, /и в ве́рных пра́вый обновля́ется, / свет бо и мир зане́ Твоя́ повеле́ния.

Го́споди Бо́же мой, / от но́щи у́треневав, Тебе́ молю́ся: / пода́ждь ми оставле́ние прегреше́ний мои́х / и к све́ту Твои́х повеле́ний / пути́ моя́ напра́ви, молю́ся.

К Тебе́ у́тренюю / и Тебе́ вопию́, Благоутро́бне Го́споди: / омраче́нную грехми́ ду́шу мою́, / све́том озари́в за́поведей Твои́х, наста́ви.

Но́щию мя страсте́й помраче́ннаго, / озари́, Све́те Непристу́пный, воздви́жима, / да, у́тренюя, зову́ Ти: / свет и мир повеле́ния Твоя́.

Разгна́вый нощь страстну́ю, / возсия́й ми Свет у́мный, / началоро́дную тьму отгна́в бе́здны / и первозда́нный Свет возсия́вый ми́ру, Соде́телю всех.

Роса́, я́же от Тебе ́, Христе́ Бо́же, / исцеле́ние ве́рным нам яви́ся: / земли́ же нече́ствующих злочести́во паде́ние обеща́ется, / те́мже, от но́щи у́тренююще, / песнь Ти прино́сим.

Све́та мне́нием / ко тьме низри́нувшая помрачи́ся пре́лесть: / Свет бо, вои́стинну Непристу́пный и И́стинный, Богоявле́ния возсия́. / Те́мже Боже́ствен не, от но́щи у́тренююще, / песнь воспева́ем.

У́тренюет дух мой к Тебе́, Бо́же, / зане́ Свет еси́ и Твоя́ повеле́ния бы́ша / исцеле́ния рабо́м Твои́м, / Человеколю́бче.

У́тренююще, Сло́ве, в сла́ву Твою́ и хвалу́, / восхваля́ем непреста́нно о́браз Креста́ Твоего́, / его́же дал еси́ нам / ору́жие в по́мощь.

Воскресен и в неделю Пятидесятницы:

Пла́вающаго в молве́ жите́йских попече́ний, / с корабле́м потопля́ема грехи́ / и душетле́нному зве́рю примета́ема, / я́ко Ио́на, Христе́, вопию́ Ти: / из смертоно́сныя глубины́ возведи́ мя.

Во глубину́ грехо́вную впа́дся, Бла́же, / я́ко Ио́на от ки́та, вопию́ Ти: / возведи́ от тли живо́т мой / и спаси́ мя, Человеколю́бче.

Возопи́х, Го́споди, / внегда́ скорбе́ти ми к Тебе́, / и возве́л еси́ живо́т мой, / Многоми́лостиве.

Возопи́х, Го́споди, / внегда́ скорбе́ти ми к Тебе́, / углебо́х бо в тиме́нии / глубины́ прегреше́ний мно́гих, / и, я́влься, возведи́ мя от тли.

Возопи́х, Го́споди, / внегда́ скорбе́ти ми, / и спасо́хся, и воспою́ Тя, / Спа́са моего́.

Из глубины́ возве́л еси́ Ио́ну, проро́ка Твоего́, Го́споди, / и мене́, вопию́ща / из глубины́ безме́рных мои́х прегреше́ний, / возведи́, Ми́лостиве, я́ко Человеколю́бец.

Ио́на из чре́ва а́дова вопия́ше: / возведи́ от тли живо́т мой. / Мы же Тебе́ вопие́м: / Всеси́льне Спа́се, поми́луй нас.

От мно́жества прегреше́ний мои́х, / я́ко Ио́ну от ки́та, изба́ви мя, / Еди́не Человеколю́бче.

Пещь о́троцы огнепа́льну, / дре́вле росоточа́щу, показа́ша, / Еди́наго Бо́га воспева́юще и глаго́люще: / превозноси́мый отце́в Бог и препросла́влен.

В неделю Пятидесятницы:

В пещь о́гненную вве́ржени, преподо́бнии о́троцы / огнь в ро́су преложи́ша, / воспева́нием си́це вопию́ще: / благослове́н еси́, Го́споди / Бо́же оте́ц на́ших.

А́нгелом о́троки в пещи́ спасы́й / и пла́мень в ро́су им преложи́вый, / благослове́н еси́, Го́споди, / Бо́же оте́ц на́ших.

В пещи́ обличи́л еси́, я́влься, / перси́йское безу́мное златотво́рное игра́ние. / Те́мже о́троцы, позна́вше Тя, неизме́ннаго о́браза О́тча, / благослове́н еси́, зовя́ху, / Бо́же оте́ц на́ших.

В пещи́ су́ще халде́йстей / авраа́мстии о́троцы / ликова́ху со А́нгелом, глаго́люще: / оте́ц на́ших Бо́же, благо слове́н еси́.

Мучи́телева повеле́ния о́троцы не послу́шаша, / пе́щи не убоя́шася, Бо́гу же воспева́ху: / отце́в Бо́же, благослове́н еси́.

Пещь горя́щую ороси́л еси́, Спа́се, / о́троки спасл еси́, пою́щия и глаго́лющия: / благослове́н еси́ во ве́ки, Го́споди, / Бо́же оте́ц на́ших.

Су́щим в пещи́ отроко́м Твои́м, Спа́се, / не прикосну́ся, ниже́ стужи́ огнь, / тогда́ трие́, я́ко еди́неми усты́, поя́ху / и благословля́ху, глаго́люще: / благослове́н еси́, Бо́же оте́ц на́ших.

Херуви́мов Обузда́телю и Созда́телю всех, / о́троки в пещи́ спасы́й, / благослове́н еси́ во ве́ки, Го́споди, / Бо́же оте́ц на́ших.

Воскресен и в неделю Пятидесятницы:

Неопа́льная огню́ в Сина́и / прича́щшаяся купи на́ Бо́га яви́ / медленноязы́чному и гугни́вому Моисе́ови, / и о́троки ре́вность Бо́жия три непребори́мыя во огни́ певцы́ показа́: / вся дела́ Госпо́дня, Го́спода по́йте / и превозноси́те во вся ве́ки.

А́нгельми немо́лчно в Вы́шних сла́вимаго Бо́га, / Небеса́ небе́с, земля́, и го́ры, и хо́лми, и глубина́, / и весь род челове́ческий, / пе́сньми Того́, я́ко Созда ́теля и Изба́вителя, благослови́те.

В пещи́ о́троки подража́юще, / духо́вную ро́су прие́мшии, ве́рою зове́м: / благослови́те, дела́ Госпо́д ня, Го́спода.

Вои́стинну Су́щаго Бо́га / и всех существа́ Вино́в на го, / Христа́ превозно́сим / и славосло́вим во вся ве́ки.

Всех Зижди́теля / и Спа́са душ на́ших, / по́йте, лю́дие, Христа́ Бо́га на́шего / и превозноси́те Его́ во ве́ки.

Го́спода, вся дела́, благослови́те, / я́ко Зижди́те ля и Творца́ всех.

Еди́наго Безнача́льнаго Царя́ Сла́вы, / Его́же благословя́т Небе́сныя Си́лы / и трепе́щут Чи́ни А́нгельстии, / по́йте, свяще́нницы, / лю́дие, превозноси́те Его́ во ве́ки.

О́троцы зовя́ху, в пещи́ ороше́ни: / тварь да благослови́т вся́ческая / сло́вом Созда́вшаго / и превозно́сит Его́ во ве́ки.

Пещь, дре́вле огне́м опаля́емую, / Богочести́вии попра́ша о́троцы, / не бо стра́ху мучи́телеву покори́шася, / но, любо́вию же, па́че Богоче́стия, пали́ми, глаго́лаху: / благослови́те, вся дела́ Госпо́дня, Го́спода.

Стра́шнаго Херуви́мом, / и чу́днаго Серафи́мом, и ми́ру Творца́, / свяще́нницы, и раби́, и ду́си пра́ведных, / по́йте, благослови́те / и превозноси́те Его́ во ве́ки.

Воскресен и в неделю Пятидесятницы:

Нетле́ния искуше́нием ро́ждшая / и всехитрецу́ Сло́ву плоть взаимода́вшая, / Ма́ти Неискусому́жная, Де́во Богоро́дице, / Прия́телище Нестерпи́маго, / Село́ Невмести́маго Зижди́теля Твоего́, / Тя велича́ем.

Безсе́менно Рождества́ зача́тие кто ска́жет от челове́к? / Нетле́ннаго Рождества́ рожде́нию кто не почуди́тся от земноро́дных? / Тем Тя, племена́ земна́я, / Богоро́дице, велича́ем.

Воплоще́ннаго Сло́ва безсе́менно от Тебе ́ / Боголе́пно родила́ еси́, / Де́во Богоро́дице, / и Тя велича́ем.

Всепе́тая, Небе́с превы́шшая, / Безнача́льное Сло́во безсе́менно заче́ншая / и Воплоще́ннаго Бо́га ро́ждшая челове́ком, / тем Тя вси велича́ем.

Ма́ти Бо́жия и Де́ва, / ро́ждшая и де́вствующая па́ки, / не естества́ де́ло, но Бо́жия снизхожде́ния: / тем, я́ко Еди́ну, Бо́жиих чуде́с сподо́бльшуюся, / Тя при́сно велича́ем.

Па́че естества́ Ма́терь и по естеству́ Де́ву, / Еди́ну в жена́х Благослове́нную, / пе́сньми, ве́рнии, Богоро́дицу велича́ем.

Ра́дуйся, Неве́сто све́тлая, / Ма́ти Светода́вца; / ра́дуйся, вмести́вшая Невмести́маго во утро́бе Твое́й; / ра́дуйся, саме́х Херуви́мов Честне́йшая, / ро́ждшая Спа́са душ на́ших.

Тя, Пречи́стую Ма́терь и Де́ву, / Невмести́мое Сло́во во утро́бу вмести́вшую / и Роди́вшую пло́тию, / пе́сньми велича́ем.

Тя, Ски́нию Святу́ю, Одушевле́нный Ковче́г, / Ю́же Прему́дрость Бо́жия созда́, / И́стинную Богоро́дицу, / пе́сньми велича́ем.

Ирмосы 8-го гласа

Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца спасе́, / песнь Бо́гови воспева́юща.

В Воздвижение Честнаго Креста:

Крест начерта́́в, Моисе́й / впря́мо жезло́м Чермно́е пресече́ / Изра́илю пешеходя́щу; / то́же обра́тно фарао́новым колесни́цам, уда́рив, совокупи́, / вопреки́ написа́в непобеди́мое ору́жие. / Тем Христу́ пои́м, Бо́гу на́шему, я́ко просла́вися.

Преображения и Богородичного канона:

Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

На Рождество Богородицы:

Сокруши́вшему бра́ни мы́шцею Свое́ю / и прове́дшему Изра́иля сквозе́ Чермно́е мо́ре, / пои́м Ему́, я́ко Изба́вителю на́шему Бо́гу, / я́ко просла́вися.

В среду Преполовения Пятидесятницы:

Мо́ре огусти́л еси́, / погрузи́вый со ору́жием го́рдаго фарао́на, / и лю́ди спасл еси́ немо́кренно, Го́споди, / и ввел еси́ я́ в Го́ру Святы́ни, вопию́щия: / пои́м Тебе́, Бо́гу на́шему, / песнь побе́дную, я́ко просла́вися.

Во вселенскую заупокойную субботу:

Песнь возсле́м, лю́дие, / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще, / пои́м Тебе́, Еди́ному Влады́це.

В Чермне́м фарао́на с колесни́цами погрузи́л еси́ / и лю́ди Моисе́ом спасл еси́, / пою́щия Тебе́, Го́споди, песнь побе́дную, / я́ко Изба́вителю на́шему Бо́гу.

Внеза́пу дре́вле мо́ре Изра́иль, / я́ко в пусты́ни, ного́ю пра́шною 13 проше́д, вопия́ше: / Го́сподеви Бо́гу на́шему, кре́пкому в бра́нех, / пои́м песнь но́вую.

Ди́вному Бо́гу вели́чия принесе́м, / и великоле́пно с на́ми / да воспое́т земля́ и не́бо я́сно сла́ву Его́.

Изра́иля от рабо́ты изба́вил еси́, Го́споди, / десни́цею Твое́ю держа́вною, / я́ко о́наго спасл еси́, / ны́не нас спаси́.

Истря́сшему в мо́ри мучи́тельство фарао́не / и Изра́иля су́шею наста́вльшему, / пои́м Христу́, я́ко просла́вися во ве́ки.

Пои́м Бо́гу, от го́рькия рабо́ты фарао́новы изба́вльшему Изра́иля / и о́гненным столпо́м и све́тлым о́блаком наста́вльшему, / я́ко просла́вися.

Пои́м Го́сподеви, вси лю́дие, / в мо́ри Чермне́м фарао́на погрузи́вшему, / побе́дную песнь пою́ще, я́ко просла́вися.

Пои́м Го́сподеви, / прове́дшему лю́ди Своя́ сквозе́ Чермно́е мо́ре, / я́ко Еди́н сла́вно просла́вися.

Посече́нный несеко́маго пресече́, / и ви́де со́лнце зе́млю, ю́же не ви́де; / лю́таго врага́ вода́ потопи́, / и не проходи́мое про́йде Изра́иль. / Песнь же воспева́шеся: / Го́сподеви пои́м, сла́вно бо просла́вися.

Пресла́вный в мо́ри устро́ивый лю́дем путь, / Небе́с ное нам ше́ствие проходи́мо сотвори́, / да но́вую песнь пои́м Тебе́, Го́споди.

Проро́чески Богови́дец Богоро́дицы о́браз зряй, / немо́кренными нога́ми Чермну́ю про́йде пучи́ну / и, игра́я, вопия́ше: / пои́м побе́дную песнь Го́сподеви, я́ко просла́вися.

В заупокойную субботу:

Ви́дите, ви́дите, / я́ко Аз есмь Бог ваш, / пре́жде век рожде́нный от Отца́, / и от Де́вы в после́дняя без му́жа заче́ншийся, / и разруши́вый грех пра́отца Ада́ма, / я́ко Человеколю́бец.

Ви́дите, ви́дите, / я́ко Аз есмь Бог ваш, / в ми́лости Бога́тый / и Благи́й в щедро́тах, / изба́вивый лю́ди от пре́лести / и рабо́ты безбо́жных враго́в.

Ви́дите, ви́дите, / я́ко Аз есмь Бог ваш, / освяти́вый нача́ток вам прия́тен, / от дней всего́ ле́та одеся́тствование, / и сие́ дав лю́дем Мои́м во избавле́ние страсте́й, / во спасе́ния нача́ло.

Ви́дите, ви́дите, / я́ко Аз есмь Бог, / дре́вле Изра́иля сквозе́ Чермно́е мо́ре проведы́й, / и пита́вый, и спасы́й, / и от го́рькия рабо́ты свободи́вый фарао́новы.

Ви́дите, ви́дите, / я́ко Аз есмь Бог, / расто́ргнувый Чермно́е мо́ре жезло́м Моисе́овым, / и проведы́й лю́ди, и наста́вивый я́, / и пита́вый в пусты́ни Сина́йстей, / и введы́й в Го́ру Святы́ни.

Вонми́, Не́бо, и возглаго́лю, / и воспою́ Христа́, / Еди́наго Человеколю́бца.

Вонми́, Не́бо, и возглаго́лю, / и воспою́ Христа́, / от Де́вы пло́тию прише́дшаго.

Вонми́, Не́бо, и возглаго́лю, / и воспою́ Христа́, / от Де́вы ро́ждшагося во спасе́ние на́ше.

Небеса́ простры́й и зе́млю основа́вый, Христе́, / вонми́ моле́нию моему́, / я́ко И́мя Твое́ ди́вное призва́х, / Человеколю́бче.

Па́че ме́да и со́та / сла́ждшая словеса́ уст Мои́х, / научи́теся вопи́ти, глаго́лет Госпо́дь.

Утвержде́й в нача́ле Небеса́ ра́зумом / и зе́млю на вода́х основа́вый, / на ка́мени мя, Христе́, за́поведей Твои́х утверди́, / я́ко несть свят, па́че Тебе́, / Еди́не Человеколю́бче.

Жезл во о́браз та́йны прие́млется, / прозябе́нием бо предразсужда́ет свяще́нника; / неплодя́щей же пре́жде Це́ркви ны́не процвете́ / Дре́во Креста́ / в держа́ву и утвержде́ние.

Преображения и Богородичного канона:

Небе́снаго кру́га / Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

На Рождество Богородицы и в Преполовение:

Утверди́ся се́рдце мое́ во Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́ / возвесели́хся о спасе́нии Твое́м.

В заупокойную субботу:

Утвержде́й руко́ю Твое́ю, Сло́ве Бо́жий, Небеса́ / просвеще́нием Твоего́ и́стиннаго позна́ния, / утверди́ и нас, на Тя наде́ющихся сердца́.

В Го́споде Бо́зе мое́м утверди́ся душа́ моя́ / и да хва́лится, глаго́лющи: / несть свят, несть пра́веден, / па́че Тебе́, Го́споди.

Лук си́льных изнемо́же, / и немощству́ющии препоя́сашася си́лою, / сего́ ра́ди утверди́ся в Го́споде се́рдце мое́.

Несть свят, я́ко Госпо́дь, / и несть пра́веден, я́ко Бог наш, / Его́же пое́т вся тварь: / несть пра́веден, па́че Тебе́, Го́споди.

Сочини́ мя, Го́споди, / си́льным люде́й Твои́х, / опоясу́я си́лою, / и лу́ки ра́тников сокруши́, / и нищеты́ мое́й рог возвы́си.

Страх Твой, Го́споди, / всади́ в сердца́ раб Твои́х / и бу́ди нам утвержде́ние, / Тя во и́стине призыва́ющим.

Ты еси́ утвержде́ние / притека́ющих к Тебе́, Го́споди, / Ты еси́ Свет омраче́нных, / и пое́т Тя дух мой.

Уподо́би мя, Христе́, у́мно горе́ Сио́нстей, / возвы́сивый и утверди́вый в наде́жди о Тебе́ / и иска́павый ро́су благода́ти, / Человеколю́бче.

Утверди́ мя, Го́споди, / не́мощь мою́ ве́дый, / и ру́ку мне простри́, я́ко Всеси́лен.

Утверди́ мя, Го́споди, си́лою Кре́стною / и да́руй мне се́рдце чи́стое, / да о Тебе́ хвалю́ся, Бла́же.

Утверди́ наш ум и сердца́, / Небеса́ сло́вом утвержде́й, / во е́же пе́ти и сла́вити Тя / во спасе́ние душ на́ших.

Утвержде́й на ка́мени ве́ры, / на сем сози́жду Мою́ Це́рковь, реки́й, Го́споди, / спаси́ мя, вопию́ща: / Ты еси́, Христе́, Сын Бо́га Жива́го, / и в Тебе́ утверди́ся дух мой.

Утвержде́й, Сло́ве, Небеса́ сло́вом, / утверди́ наш ум и се́рдце, / во е́же сла́вити Тя, Спа́са душ на́ших.

Утвержде́й сло́вом Небеса́ 14 / и зе́млю основа́вый на вода́х мно́гих, / утверди́ мя к пе́нию славосло́вия Твоего́, Го́споди.

Утвержде́ние мое́, Спа́се, еси́, / прибе́жище мое́ и си́ла, / поколеба́вшееся се́рдце мое́ утверди́ в стра́се Твое́м, / я́ко несть свят, я́коже Ты, Бог наш.

Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Честнаго Креста и Богородичного канона:

Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Из пло́ти Твоея́ лучи́ Божества́ / исхожда́ху проро́ком и апо́столом. / Тем нача́льницы, пою́ще, взыва́ху: / сла́ва си́ле Твое́й, Го́споди.

На Рождество Богородицы и Преполовение:

Проро́к Авваку́м у́мныма очи́ма / прови́де, Го́споди, прише́ствие Твое́, / тем и вопия́ше: / от ю́га при и́дет Бог. / Сла́ва си́ле Твое́й, / сла́ва снизхожде́нию Твоему́.

В заупокойную субботу:

Из горы́ приосене́нныя, Сло́ве, проро́к, / еди́ныя Богоро́дицы, / хотя́ща воплоти́тися Богови́дно усмотри́ / и со стра́хом славосло́вяше си́лу Твою́.

Авваку́ме проро́че, что зове́ши? / Что ви́дев, ужа́слся еси́? / От ю́га Тя, гряду́ща Бо́га, ви́дя, убоя́хся.

Богоно́сный Ду́хом Святы́м просвети́вся проро́к Авваку́м, / в после́дняя Твое́ прише́ствие прови́дев, вопия́ше: / внегда́ прибли́житися ле́том, позна́ешися, / внегда́ приити́ вре́мени, яви́шися. / Сла́ва си́ле Твое́й, Го́споди.

Всел еси́ на ко́ни, апо́столы Твоя́, Го́споди, / и прия́л еси́ рука́ма Твои́ма узды́ их, / и спасе́ние бысть ежде́ние Твое́ / ве́рно пою́щим: / сла́ва си́ле Твое́й, Го́споди.

Покры́ Небеса́ доброде́тель Твоя́, Го́споди, / и вся́ческая, Спа́се, / хвале́ния Твоего́ испо́лнишася.

Та́йно проро́к предзря́ от Де́вы Тя, Сло́ве, во площа́ема, / пе́сненно вопия́ше: / сла́ва си́ле Твое́й, Го́споди.

Твое́ вочелове́чение, / е́же пре́жде век предо предели́л еси́, / в после́дняя благоволи́л еси́ соверши́ти, Го́споди, / услы́шах и стра́хом воспева́х.

Твое́ пречи́стое прише́ствие, Христе́, / прови́дяй проро́к Авваку́м / вопия́ше Тебе́ с тре́петом: / услы́шах слух Твой и убоя́хся, / разуме́х дела́ Твоя́ и ужасо́хся, Го́споди.

Услы́шах, Го́споди, слух Твой и убоя́хся, / разуме́х дела́ Твоя́ / и просла́вих держа́ву Твою́, Го́споди.

Услы́шах, Го́споди, слух Твой и убоя́хся, / разуме́х неизрече́нное Твое́ смотре́ние / и просла́вих, Сло́ве, снизхожде́ние Твое́.

Услы́шах, Го́споди, слух Твой и убоя́хся, / я́ко неизрече́нным Сове́том, / Бог сый Присносу́щный, / от Де́вы проше́л еси́, вопло́щся. / Сла́ва снизхожде́нию Твоему́, Христе́, / сла́ва си́ле Твое́й.

Услы́шах слух си́лы Твоея́, / и возвесели́ся се́рдце мое́ о Го́споде.

Услы́шах слух Твой, Го́споди, и убоя́хся, /разуме́х дела́ Твоя́ и ужасо́хся, / я́ко посреде́ двою́ живо́тну позна́ешися / во спасе́ние душ на́ших.

Я́ко Петру́, ру́ку простры́й в по́мощь, / и мене́ поми́луй / и спаси́, я́ко Человеколю́бец.

Воскресен и Преображения:

Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго, / но обрати мя́ и к све́ту за́поведей Твои́х / пути́ моя́ напра́ви, молю́ся.

О треблаже́нное Дре́во, / на не́мже распя́ся Христо́с, Царь и Госпо́дь! / и́мже паде́ дре́вом прельсти́вый, / Тобо́ю прельсти́вся, / Бо́гу пригвозди́вшуся пло́тию, / подаю́щему мир душа́м на́шим.

На Рождество Богородицы и Преполовение:

Го́споди Бо́же наш, мир даждь нам, / Го́споди Бо́же наш, стяжи́ ны, / Го́споди, ра́зве Тебе́, ино́го не ве́мы, / И́мя Твое́ имену́ем.

В заупокойную субботу:

У́тренюет дух мой к Тебе́, Бо́же, / зане́ свет повеле́ния прише́ствия Твоего́, / и́миже у́бо озари́ ум наш, Влады́ко, / и наста́ви на стезю́ жи́зни.

Просвети́ нас повеле́нии Твои́ми, Го́споди, / и мы́шцею Твое́ю высо́кою / Твой мир пода́ждь нам, Человеколю́бче.

Бла́же, Све́та и Ми́ра Пода́телю, / от тьмы мя и бра́ни страсте́й изба́ви, у́тренююща, Христе́, / к Твоему́ хвале́нию.

Мрак души́ моея́ разжени́, Светода́вче Христе́ Бо́же, / началоро́дную тьму изгна́в бе́здны, / и да́руй ми Свет повеле́ний Твои́х, Сло́ве, / да, у́тренюя, сла́влю Тя.

От но́щи неве́дения / Богове́дением просвети́вый концы́, / просвети́ мя у́тром человеколю́бия Твоего́, Го́споди.

От но́щи неве́дения / Богове́дения день во Све́те Лица́ Твоего́, Христе́, да возсия́ет, / ко у́тру хвале́ние Твое́ в сердца́х на́ших.

От но́щи неве́дения / по душелови́тельному пути́ при́сно блудя́щаго, / Све́том ра́зума Твоего́, Го́споди, преднаставля́я мя, / на стезю́ за́поведей Твои́х напра́ви.

От но́щи у́тренюет дух мой / к Твоему́ песнопе́нию, / зане́ свет и мир повеле́ния Твоя́.

От но́щи у́тренюет дух мой / к Тебе́, Бо́же, / ми́лость пода́ждь ми.

Повеле́ния Твоя́ просвеще́нием, Христе́ Бо́же, / я́ко Благ, показа́л еси́, / зане́, Светода́вче, / от но́щи у́тренююще, сла́ву возсыла́ем.

Страсте́й мя мглы, / я́ко от глубо́кия но́щи, избавля́яй, / у́треневати сподо́би дух мой, молю́ся, / во све́те дне повеле́ний Твои́х, Христе́.

Твои́м Све́том озари́ мой ум, Бо́же, молю́ся, / да мно́гую Твою́ воспою́, / от но́щи у́тренюя, бла́гость.

Твои́м Све́том озари́ мой ум, / Бо́же, молю́ся Тебе́, / да мно́гую Твою́ воспою́, / от но́щи у́треневав, благосты́ню.

У́тренюет дух мой к Тебе́, Бо́же, / от Отца́ рожде́нному неизрече́нно / и воздви́гнувшему рог спасе́ния нам.

У́тренююще, вопие́м Ти: / Го́споди, спаси́ ны, / Ты бо еси́ Бог наш, / ра́зве Тебе́, ино́го не ве́мы.

У́тренююще к Тебе́, Человеколю́бцу, / воспева́ем Тя, Христе́ Бо́же, / да́руй нам ми́лости Твоя́.

Я́ко Бо́га ино́го, Бла́же, / па́че Тебе́, не зна́ем, / к Тебе́, Све́ту Незаходи́мому, от но́щи у́тренююще, / воспева́ем Тя, Человеколю́бче.

Воскресен и Преображения:

Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, и услы́ши мя, / Бо́же спасе́ния моего́.

Во́днаго зве́ря во утро́бе / дла́ни Ио́на крестови́дно распросте́р, / спаси́тельную страсть прообража́ше я́ве; / тем, тридне́вен изше́д, / преми́рное Воскресе́ние прописа́ше / пло́тию пригвожде́ннаго Христа́ Бо́га / и тридне́вным Воскресе́нием мир просве́щшаго.

На Рождество Богородицы и Преполовение:

Я́ко во́ды морски́я, Человеколю́бче, / волна́ми жите́йскими обурева́юся. / Те́мже, я́ко Ио́на, та́ко вопию́ Ти: / возведи́ от тли живо́т мой, / Благоутро́бне Го́споди.

В заупокойную субботу:

Содержи́ма мя, приими́, Человеколю́бче, / грехи́ мно́гими, / и припа́дающа щедро́там Твои́м, / я́ко проро́ка, Го́споди, и спаси́ мя.

Моли́тву пролию́ ко Го́споду / и Тому́ возвещу́ печа́ли моя́, / я́ко зол душа́ моя́ испо́лнися / и живо́т мой а́ду прибли́жися, / и молю́ся, я́ко Ио́на: / от тли, Бо́же, возведи́ мя.

Бе́здна грехо́в и прегреше́ний бу́ря мя смуща́ет / и во глубину́ ну́жднаго ре́ет мя отча́яния, / но Твою́ кре́пкую ру́ку мне простри́, я́ко Петро́ви, / о Упра́вителю! и спаси́.

Во Исаа́це страсть прописа́вый, / и во Ио́не погребе́ние прообразова́вый, / и Воскресе́ние всем подая́й, / Тебе́ вопие́м с проро́ком: / от тли нас возведи́, Благоутро́бне Го́споди.

Из чре́ва а́дова / во́пля моего́ услы́шал еси́ глас мой / и изба́вил еси́ от тли живо́т мой, Многоми́лостиве.

Ио́ну в ки́те, Го́споди, / еди́наго всели́л еси́, / мене́ же, свя́заннаго мре́жами вра́жиями, / я́ко от тли о́наго спаси́.

К могу́щему мя спасти́ Го́споду / из глубины́ грехо́вныя возопи́х, / и от тли возведе́ живо́т мой, / я́ко Человеколю́бец.

Отве́ргл мя еси́ / во глубины́ се́рдца морска́го, / и ви́дех чудеса́ Твоя́, Го́споди.

Превзыдо́ша главу́ мою́ беззако́ния моя́, / я́ко тя́жкое бре́мя на мя обремени́вшаяся, / во отча́яния глубины́ низвлача́т мя, / но пре́жде да́же погря́знути ми, Го́споди, спаси́ мя.

Ри́зу мне пода́ждь све́тлу, / одея́йся све́том, я́ко ри́зою, / Многоми́лостиве Христе́ Бо́же наш.

Я́ко Ио́ну проро́ка от ки́та возве́л еси́, Го́споди, / из ба́ви мя от лови́твы чужда́го / и спаси́ мя, Ще́дре, я́ко Многоми́лостив.

Я́ко от ки́та изба́вил еси́ проро́ка Твоего́, / и мене́, Спа́се наш, / от мно́жества прегреше́ний мои́х изба́ви.

Я́коже проро́ка изба́вил еси́ / из глубины́ преиспо́дняя, Христе́ Бо́же, / и мене́ от грехо́в мои́х изба́ви, я́ко Человеколю́бец, / и упра́ви живо́т мой, молю́ся.

Бо́жия снизхожде́ния / огнь устыде́ся в Вавило́не иногда́. / Сего́ ра́ди о́троцы в пещи́, ра́дованною ного́ю, / я́ко во цве́тнице, лику́юще, поя́ху: / благо слове́н еси́, Бо́же оте́ц на́ших.

Безу́мное веле́ние / мучи́теля злочести́ваго лю́ди поколеба́, / ды́шущее преще́ние и злохуле́ние богоме́рзкое, / оба́че три о́троки не устраши́ я́рость зве́рская, / ни огнь снеда́яй, / но противоды́шущу росоно́сному ду́ху, / со огне́м су́ще, поя́ху: / препе́тый отце́в и нас Бо́же, благослове́н еси́.

О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

На Рождество Богородицы и Преполовение:

Халде́йская пещь, огне́м распала́емая, / ороша́шеся Ду́хом, / Бо́жиим предстоя́нием, от́роцы поя́ху: / благослове́н еси́, Бо́же оте́ц на́ших.

В заупокойную субботу:

В нача́ле зе́млю основа́вый / и Небеса́ сло́вом утверди́вый, / благослове́н еси́ во ве́ки, / Го́споди, Бо́же оте́ц на́ших.

От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

А́нгелом о́троки из огня́ спасы́й / и гремя́щую пещь преложи́вый на ро́су, / благослове́н еси́, Бо́же оте́ц на́ших.

В пещи́ о́гненней о́троки спасы́й, / благослове́н еси́ во ве́ки, / Го́споди, Бо́же оте́ц на́ших.

Ви́дев мучи́тель Четве́ртаго зрак, / глаго́лаше су́щим с ним: / три вверго́хом в пла́мень, / ны́не же четы́ре ви́жу, / Еди́наго зрак ужаса́ет мой ум, / удивля́ет мое́ помышле́ние. / Трие́х лик пое́т Тя во ве́ки.

На по́ле Деи́ре / иногда́ мучи́тель пещь поста́ви на муче́ние Богоно́сных, / в не́йже три о́троки песносло́вяху Еди́наго Бо́га, / тро́ично воспева́ху, глаго́люще: / отце́в Бо́же, благослове́н еси́.

О́троки ороси́вый в пещи́ / и Де́ву сохрани́вый ро́ждшую Тя по Рождестве́, / благослове́н еси́, Бо́же оте́ц на́ших.

Отроко́м, в пещь вве́рженным, / ви́дев мучи́тель Четве́ртаго зрак / в ви́де Сы́на Бо́жия, / с ни́ми зовя́ше: / благослове́н еси́, Бо́же во ве́ки.

О́троцы Богочести́вии в Вавило́не / о́бразу злато́му не поклони́шася, / но посреде́ пе́щи о́гненныя, ороша́еми, / песнь воспева́ху, глаго́люще: / превозноси́мый отце́в и нас Бо́же, благослове́н еси́.

Подража́тели трие́х Твои́х, Го́споди, отроко́в сотвори́ ны, / сопротивля́ющияся греху́, /и огнь страсте́й попира́ющия, и пою́щия: / благослове́н еси́, Бо́же оте́ц на́ших.

Халде́йския пе́щи / всепа́губную си́лу угаси́вше / о́бразом А́нгела снизше́дшаго, / Зижди́телю ю́ноши взыва́ху: / благослове́н еси́ и хва́льный, Бо́же отец на́ших.

Воскресен и Преображения:

Седмери́цею пещь / халде́йский мучитель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Благослови́те, о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во / и огнь в ро́су претво́ршее / и превозноси́те всем жизнь подава́ющаго / Ду́ха Всесвята́го во ве́ки.

На Рождество Богородицы:

Покрыва́яй вода́ми превы́спренняя Своя́, / полага́яй мо́рю преде́л песо́к / и содержа́й вся, / Тя пое́т со́лнце, Тя сла́вит луна́, / Тебе́ прино́сит песнь вся тварь, / я́ко Соде́телю всех во ве́ки.

А́нгели и Небеса́, на Престо́ле Сла́вы Седя́щаго / и я́ко Бо́га непреста́нно Сла́вимаго, / благослови́те, по́йте / и превозноси́те Его́ во ве́ки.

В заупокойную субботу:

На горе́ святе́й просла́вльшася / и в купине́ огне́м Присноде́вы Моисе́ови та́йну я́вльшаго, / Го́спода по́йте / и превозноси́те во вся ве́ки.

Царя́ Небе́снаго, / Его́же пою́т во́и А́нгельстии, / хвали́те и превозноси́те во вся ве́ки.

Безнача́льнаго Царя́ Сла́вы, / Его́же трепе́щут Небе́с ныя Си́лы, / по́йте, свяще́нницы, / лю́дие, превозноси́те во вся ве́ки.

Безнача́льный Бог Сло́во, / прише́дый на Креще́ние, / соверша́ше та́инство смотре́ния во Иорда́не / и Предте́чи глаго́лаше: / ты Мя креща́еши водо́ю, / Аз же тя Ду́хом / с вопию́щими Мне ве́рою: / благослови́те, дела́ Госпо́дня, Го́спода.

Благослови́т Тя вся тварь, Го́споди, / славосло́виша Тя Небе́сныя Си́лы со о́троки, / и мы воспева́ем и превозно́сим во вся ве́ки.

Богоглаго́ливии о́троцы, в пещи́ / со огне́м пла́мень попира́юще, поя́ху: / благослови́те, дела́ Госпо́дня, Го́спода.

В пещи́ ликова́ние поста́виша о́троцы, / сочине́нный чин прии́мше, / тва́ри повелева́юще сла́ви ти Вседе́тельную Прему́дрость, / Христа́ воспева́юще: / благослови́те, вся дела́ Госпо́дня, Го́спода.

Иерусали́ме освяще́нный, / благоро́днии су́ще о́троцы яви́шася, / в нем Боже́ственных зако́ нов не прие́мше забве́ния всегуби́тельнаго, / но вавило́нский огнь в себе́ благоче́ствующих ходата́йствовавше, / в нем ороше́ни, поя́ху: / благослови́те творе́ния, Го́спода.

Мусики́йским орга́ном согласу́ющим / и лю́дем безчи́сленным, покланя́ющимся о́бразу в Деи́ре, / три о́троцы не повину́вшеся, / Го́спода воспева́ху / и славосло́вяху во вся ве́ки.

Нече́стия орга́ны ину́ю песнь, / благоче́стия же благовеща́ннии поя́ху гу́сли: / благослови́те, дела́ Госпо́дня, Христа́ во ве́ки.

От Отца́ пре́жде век рожде́ннаго / и от Ма́тере в после́дняя воплоще́ннаго, / свяще́нницы, благослови́те, / лю́дие, превозноси́те во вся ве́ки.

Отрица́ющеся златослуже́ния о́троцы, / царя́ небрего́ша, / яви́ бо я́ огнь преложе́нный рабы́ Бо́жия, вопию́щия: / да пое́т тварь Го́спода / и превозно́сит во вся ве́ки.

Победи́тели мучи́теля и пла́мене / благода́тию Твое́ю бы́вше, / за́поведем Твои́м зело́ прилежа́ще, / о́троцы вопия́ху: / благослови́те, вся дела́ Госпо́дня, Го́спода.

Преподо́бнии Твои́ о́троцы, / в пещь вве́ржени, поя́ху: / благослови́те, дела́ Госпо́дня, Го́спода.

Разжжи́те пещь седмери́цею, / до́ндеже до конца́ разгори́тся, / мучи́тель рече́ халде́ом, / Ана́нию, Аза́рию и Мисаи́ла, вложи́те я́ в ню, / и́же о́бразу зла то́му не поклони́шася, но глаго́лаху: / мы Бо́га и́мамы на Небесе́х, / Ему́же слу́жим и покланя́емся во ве́ки.

Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинона́чалия велича́ют.

Та́ин еси́, Богоро́дице, рай, / невозде́ланно возрасти́вший Христа́, / И́мже Кре́стное Живоно́сное на земли́ насади́ся Дре́во; / тем, ны́не возноси́му, / покланя́ющеся Ему́, Тя велича́ем.

Ин ирмос Креста:

Сне́дию дре́ва ро́ду прибы́вшая смерть / Кресто́м упраздни́ся днесь, / и́бо прама́терняя всеро́дная кля́тва разруши́ся прозябе́нием / Чи́стыя Богома́тере, / Ю́же вся си́лы Небе́сный велича́ют.

Устраши́ся всяк слух / неизрече́нна Бо́жия снизхожде́ния, / я́ко Вы́шний во́лею сни́де да́же и до пло́ти, / от деви́ческаго чре́ва быв Челове́к. / Те́мже Пречи́стую Богоро́дицу, ве́рнии, велича́ем.

На Рождество Богородицы и в Преполовение:

Чу́жде ма́терем де́вство, / и стра́нно де́вам деторожде́ние: / на Тебе́, Богоро́дице, / обоя́ устро́ишася. / Тем Тя, вся племена́ земна́я, / непреста́нно велича́ем.

В заупокойную субботу:

Проявле́нное на горе́ законополо́жнику во огни́ и купине́ / Рождество́ Присноде́вы / в на́ше, ве́рных, спасе́ние / пе́сньми немо́лчными велича́ем.

Вои́стинну Богоро́дицу / Тя испове́дуем, / спасе́ннии Тобо́ю, Де́во Чи́стая, / с Безпло́тными ли́ки Тя велича́юще.

Благослове́н Госпо́дь, Бог Изра́илев, / воздви́гнувый рог спасе́ния нам / в дому́ Дави́дове, о́трока Своего́, / в ни́хже посети́ нас Восто́к с высоты́ / и напра́вил ны есть на путь ми́ра.

Велича́ем Тя, Всенепоро́чную / Ма́терь Христа́ Бо́га на́шего, / Ю́же осени́ Дух Святы́й.

Велича́ем Тя, Ма́терь Бо́жию, / и сла́вим Тя, Богоро́дице Де́во, / я́ко Спа́са ро́ждшую душ на́ших.

Весе́лием вси Де́ве, е́же ра́дуйся, возопии́м, / Благода́тная Мари́е, Богоневе́сто, / Тя, я́ко Ма́терь Бо́жию, / ве́рнии, единому́дренно велича́ем.

Воплоще́ния Бо́жия Орга́н, Де́во, была́ еси́, / и смеше́ния Сло́ва в пло́ти е́же от Тебе ́ Черто́г, / соедине́нома бо Существо́ма, / сугу́быма де́йствома и хоте́ньма показу́ема, / Его́же пою́ще, Тя, Богоро́дице, велича́ем.

Воспита́нная во свята́я святы́х / и ро́ждшая Свет вселе́нныя, / Благода́тная, ра́дуйся, / пе́сньми Рождество́ Твое́ велича́ем.

Да умолча́т еретико́в собра́ния, / не и́стинно Богоро́дицу испове́дающих Тя, / и́бо свы́ше Тя проро́цы препропове́даша / Ма́терь бы́ти Бо́жию / и Хода́таицу ро́да на́шего. / Тем Тя, Де́во, велича́ем.

Неви́димаго зра́ком Боже́ственным прие́мшая, / Неискусобра́чная Де́во и Ма́ти, / пе́сньми Рождество́ Твое́ велича́ем.

О, де́вства край, Богоро́дице! / пе́сньми же сла́вными / пра́здники возвыша́ющая благода́тей Твои́х / и ны́не де́вственною Сло́ва Твоего́ па́мятию / наи́тием та́йным украша́ющая в ней Тя велича́ющия.

Разбо́йника подража́яй, окая́нный аз, / испове́даяй Тя, зову́ Тебе́, / Еди́наго от Отца́, и от Де́вы неизрече́нно воплоще́нна, / и мене́ ра́ди бы́вша по мне, / но я́ко Свет у́мный, Со́лнце, / не воспомяну́в зол, во Ца́рствии Твое́м помяни́ мя, / егда́ Судия́, Го́споди, ся́деши на Престо́ле.

Тя, Богоро́дицу, / Ма́терь Све́та, / в пе́снех велича́ем.

Тя, Небесе́ и земли́ Хода́таицу, / вси ро́ди, ублажа́ем, / пло́тски бо всели́ся / в Тя исполне́ние, Де́во, Божества́.

Тя, Неискусобра́чную Ма́терь Бо́га Вы́шняго, / Тя, па́че ума́ ро́ждшую сло́вом вои́стинну Бо́га, / вы́шшую пречи́стых Сил, / немо́лчными славословле́нии велича́ем.

Тя, Неопа́льную, / Ю́же прови́дяше Моисе́й, / неопа́льно горя́щу иногда́ огне́м Божества́, / я́ко неопа́льно ро́ждшую Го́спода, / Воплоще́ннаго Бо́га, / пе́сньми немо́лчными велича́ем.

Тя, ши́ршую Небе́с, Богоро́дице, / и све́тльшую со́лнца, / пе́сньми велича́ем.

Уста́вы прешла́ еси́ естества́, / Соде́теля заче́нши и Го́спода, / и дверь спасе́ния ми́рови была́ еси́. / Тем Тя, Богоро́дице, / непреста́нно велича́ем.

Чи́стую сла́вно почти́м, / лю́дие, Богоро́дицу, / огнь Божества́ прии́мшую во чре́ве неопа́льно, / пе́сньми велича́ем.

Ирмосы в предпразднство Рождества Христова

Месяца декабря в 22-й день на повечерии канон, глас 6.

Песнь 1: С е́ченное, сече́тся / мо́ре Чермно́е, / волнопита́емая же изсуша́ется глубина́, / та́яжде ку́пно безору́жным бы́вши проходи́ма и всеору́жным гроб. / Песнь же Богокра́сная воспева́шеся: / сла́вно просла́вися Христо́с, Бог наш.

Песнь 3: Г оспо́дь, Сый, всех и Зижди́тель Бог, / созда́нное, Безстра́стный, обнища́в, Себе́ соедини́ / и я́ко Младе́нец, носи́мь пло́тию, / в я́слех убо́гих покланя́емь быва́ет: / яди́те,– вопия́,– Те́ло Мое́ / и ве́рою утверди́теся.

Песнь 4: П рови́дев проро́к / та́йну Твою́ неизрече́нную, Христе́, провозгласи́: / положи́л еси́ тве́рдую любо́вь кре́пости, / О́тче Ще́дрый, / Единоро́днаго бо Сы́на, Благи́й, / очище́ние в мир посла́л еси́.

Песнь 5: С ою́зом любве́ связу́еми, я́ко братолю́бцы, / Владу́щему все́ми, мир зело́ Возлюби́вшему / и да́вшему избавле́ние Сы́на Возлю́бленнаго, / дади́м сла́ву Даю́щему всем мир.

Песнь 6: Б е́здна после́дняя грехо́в обы́де мя, / и, волне́ния не ктому́ терпя́, / я́ко Ио́на Влады́це, вопию́ Ти: / от тли мя возведи́.

Песнь 7: О́ троцы в Вавило́не / пе́щнаго пла́мене не убоя́шася, / но, посреде́ пла́мене вве́ржени, ороша́еми, поя́ху: / благослове́н еси́, Го́споди, Бо́же оте́ц на́ших.

Песнь 8: З а зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша по веле́ние безу́мное / и, совоку́плени, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, и превозноси́те во вся ве́ки.

Песнь 9: С тра́нствия Влады́чня / и Безсме́ртныя Трапе́зы / во убо́зем верте́пе высо́кими умы́, / ве́рнии, прииди́ те, наслади́мся, / воплоти́вшееся Сло́во неизрече́нно уве́девше, / Его́же велича́ем.

В 23-й день на повечерии трипеснец, глас 6.

Песнь 5: К Тебе́ у́тренюю, / благоутро́бия ра́ди Себе́ истощи́вшему непрело́жно / и зрак раба́ от Де́вы носи́вшему, / Сло́ве Бо́жий, / мир пода́ждь ми, па́дшему, / Человеколю́бче.

Песнь 8: С толп зло́бы противобо́жныя / о́троцы Боже́ственнии обличи́ша, / на Христа́ же, шата́яся, И́род свире́пеет, / сове́тует тще́тная, / уби́ти поучава́ется Живота́, держа́щаго дла́нию, / Его́же вся тварь благослови́т, сла́вящи во ве́ки.

Песнь 9: Ч естне́йшую Херуви́м / и сла́внейшую без сравне́ния Серафи́м, / без иcтле́ния Бо́га Сло́ва ро́ждшую, / су́щую Богоро́дицу, Тя велича́ем.

В 24-й день на повечерии канон, глас 6.

Песнь 1: В олно́ю морско́ю / Скры́вшаго дре́вле / гони́теля мучи́теля, / в я́слех Сокрыва́емого, уби́ти и́щет И́род. / Но мы с волхвы́ пои́м: / Го́сподеви воспои́м, сла́вно бо просла́вися.

Песнь 3: Т ебе́, на вода́х / пове́сившаго всю зе́млю неодержи́мо, / тварь, ви́девши в верте́пе ражда́ющася, / ужа́сно содрага́шеся, / несть свят, / па́че Тебе́, Го́споди, зову́щи.

Песнь 4: О т Де́вы прише́ствие Твое́ / прови́дя, Авваку́м, ужа́сся, вопия́ше: / Ты, от ю́га воплоща́яся, при ше́л еси́, Изба́вителю, / Ада́ма отринове́ннаго воззва́ти.

Песнь 5: Б огоявле́ния Твоего́, Христе́, / е́же к нам ми́лостивно бы́вшаго, / Иса́ия, Свет ви́дев Невече́рний, / от но́щи у́треневав, взыва́ше: / се Де́ва во чре́ве прии́мет и породи́т воплоща́емое Сло́во, / и вси земноро́днии возра́дуются.

Песнь 6: Я т бысть, / но не удержа́н в пе́рсех ки́товых Ио́на: / Твой бо о́браз нося́, / ро́ждшагося и пло́тию я́вльшагося, / я́ко от черто́га, от зве́ря изы́де. / Рожде́нный бо ны́не пло́тию / во гроб и смерть хоте́л еси́ вни́ти / и па́ки воскре́снути тридне́вен.

Песнь 7: Н еизрече́нное чу́до: / в пещи́ Изба́вивый преподо́бныя о́троки из пла́мене, / в я́слех убо́гих Младе́нец возлежа́ / во спасе́ние нас, пою́щих: / Изба́вителю Бо́же, / благослове́н еси́.

Песнь 8: У жасни́ся, боя́йся, Не́бо, / и да подви́жатся основа́ния земли́: / се бо пелена́ми повива́ется вся нося́й дла́нию / и во я́слех ма́лех странноприе́млется. / Его́же, о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

Песнь 9: Н е диви́ся ны́не, о Ма́ти! / ви́дящи я́ко Младе́нца, / Его́же из чре́ва пре́жде денни́цы роди́ Оте́ц, / возста́вити бо и сопросла́вити / челове́ческое па́дшее естество́ приидо́х я́вственно, / ве́рою и любо́вию Тя велича́ющее.

Ирмосы в предпразднство Святых Богоявлений

Месяца января в 3-й день на повечерии трипеснец, глас 6.

Песнь 5: К Тебе́ у́тренюю, / благоутро́бия ра́ди Себе́ истощи́вшему непрело́жно / и раба́ руко́ю крести́тися восхоте́вшему, / Сло́ве Бо́жий, / мир пода́ждь ми, па́дшему, / Человеколю́бче.

Песнь 8: С толпу́ зло́бы лю́таго И́рода вси поруга́вшеся, / на Иорда́н прииди́те. / И́дем, ве́рнии, да у́зрим Христа́ Изба́вителя, / от Предте́чи креща́емаго пло́тию во струя́х, / Его́же вся тварь благослови́т, / сла́вящи во ве́ки.

Песнь 9: Ч естне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

В 4-й день на повечерии канон, глас 6.

Песнь 1: С е́ченное, сече́тся / мо́ре Чермно́е, / волнопита́емая же изсуша́ется глубина́, / та́яжде ку́пно безору́жным бы́вши проходи́ма и всеору́жным гроб. / Песнь же Богокра́сная воспева́шеся: / сла́вно просла́вися Христо́с, Бог наш.

Песнь 3: Г оспо́дь, Сый, всех и Зижди́тель Бог, / созда́нное Безстра́стный, обнища́в, Себе́ соедини́л еси́ / и струя́ми, и́миже хоте́л еси́ приити́, / Сам, Сый, лю́дем провозглаша́л еси́: / во́ду Жи́зни почерпи́те / и ве́рою утверди́теся.

Песнь 4: П рови́дя проро́к / та́йны Твоея́ неизрече́нное, Христе́, провозгласи́: / положи́л еси́ кре́пкую Креще́ния благода́ть / ве́рою сие́ прие́млющим всем во избавле́ние грехо́в.

Песнь 5: С ою́зом боя́зни содержи́мь, ны́не Предте́ча / отрица́ется крести́ти, / благогове́йно Христа́ ви́дев, на́га стоя́ща на воде́, / водо́ю покрыва́юща превы́спренняя.

Песнь 6: Б е́здна после́дняя грехо́в обы́де мя, / и, волне́ния не ктому́ терпя́, / я́ко Ио́на Влады́це, вопию́ Ти: / от тли мя возведи́.

Песнь 7: О́ троцы в Вавило́не / пе́щнаго пла́мене не убоя́шася, / но, посреде́ пла́мене вве́ржени, ороша́еми, поя́ху: / благослове́н еси́, Го́споди, Бо́же оте́ц на́ших.

Песнь 8: З а зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша по веле́ние безу́мное / и, совоку́плени, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, и превозноси́те во вся ве́ки.

Песнь 9: С тра́нствия Влады́чня / и Безсме́ртныя Трапе́зы / во убо́зем верте́пе пре́жде наслади́вшеся, / ны́не на Иорда́н теце́м, / та́йну зря́ще стра́нну, / Го́рния све́тлости хода́тайственну.

В 5-й день на повечерии канон, глас 6.

Песнь 1: В олно́ю морско́ю / Покры́вшаго дре́вле / гони́теля мучи́теля – / Иорда́нския струи́ спря́товают и кры́ют, / мое́ ны́не очища́я челове́ческим очище́нием, / сла́вно бо просла́вися.

Песнь 3: Т ебе́, на вода́х / основа́вшаго всю зе́млю неодержи́мо, / тварь, ви́девши пло́тию кры́емаго в вода́х, / у́жасом мно́гим содержа́шеся, / несть свят, / па́че Тебе́, Го́споди, взыва́ющи.

Песнь 4: Е́ же ко Креще́нию Твое́ прише́ствие / прови́дя, Авваку́м, ужа́сся, вопия́ше: / на мо́ре ко́ни Твоя́, / во́ды мно́ги наве́л еси́, Спа́се, смуща́ющия.

Песнь 5: Б огоявле́ния Твоего́, Христе́, / к нам ми́лостивно бы́вшаго, / Иса́ия, Свет ви́дев Невече́рний, / из но́щи у́треневав, взыва́ше: / просвеще́ннии, прииди́те, омы́йтеся водо́ю Боже́ственною / и Ду́хом я́ве и ду́шу и те́ло очи́стите.

Песнь 6: Я т бысть, / но не удержа́н стра́хом Боже́ственный Крести́тель. / А́ще бо и спря́товается / прибли́житися огню́ се́но, / но, слы́шав: оста́ви ны́ не,– / тече́, повеле́ние исполня́я я́ко раб, / Боже́ственному же, свы́ше свиде́тельствующему гла́су, / услы́ша Сы́на Преве́чнаго.

Песнь 7: Н еизрече́нное чу́до: / в пещи́ Изба́вивый преподо́бныя о́троки из пла́мене преклоня́ет верх / и про́сит креще́ния от раба́, / очища́я вопию́щия: / Изба́вителю Бо́же, / благослове́н еси́.

Песнь 8: У жасни́ся, боя́йся, Не́бо, / и да подви́жатся основа́ния земли́: / се бо водо́ю облачи́тся / Опали́вый водо́ю пре́жде пра́веднаго же́ртву пресла́вно. / Его́же, о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

Песнь 9: Н е рыда́йте всу́е, / отча́яния тенета́ми удавля́еми челове́цы, пови́ннии злых, / но во умиле́нии души́ / присту́пим Очища́ющему вся, / я́ко Еди́ному чи́стому / и даю́щему проще́ние Креще́нием.

Ирмосы певаемые на Святей горе Афонстей на Покров Божией Матери месяца октября в 1-й день

Песнь 1: О тве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ Покро́в честны́й́.

Песнь 3: Т воя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшыя, духо́в но утверди́, / и Святы́м Покро́вом Твои́м / сла́вящия покры́й.

Песнь 4: С едя́й в Сла́ве на Престо́ле Божества́ / во о́блаце ле́гце, / прии́де Иису́с Пребоже́ственный / нетле́нною Де́вою и спасе́ пою́щия / Покро́в Ея́ честны́й.

Песнь 5: У жасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / во Влахе́рнстем хра́ме Твое́м / распросте́рла еси́ омофо́р Свой / и моля́щихся покры́ла еси́, / мир и спасе́ние подава́ющи.

Песнь 6: Б оже́ственное сие́ и всечестно́е / соверша́юще пра́зднество / Покро́ва Бо́жия Ма́тере, / прииди́те, рука́ ми воспле́щим, / от Нея́ ро́ждшагося Бо́га сла́вим.

Песнь 7: Н е послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Песнь 8: О́ троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Песнь 9: В сяк земноро́дный / да взыгра́ется, Ду́хом просве ща́емь, / да торжеству́ет же ве́рных собра́ние, / почи та́ющее Покро́в Бо́жия Ма́тере / покрыва́ющия вся богому́дрыя / и избавля́ющия от вся́каго зла.

Источник