Избранный псалом ноты для

Рождество Божией Матери

Величаем Тя, / Пресвятая Дево, / и чтим святых Твоих родителей,/ и всеславное славим / рождество Твое.

1. Помяни, Господи, Давида и всю кротость его.
2. Преславная глаголашася о тебе, граде Божий.
3. Свят храм Твой, дивен в правде.
Слава, и ныне: Аллилуйя (3), слава Тебе, Боже. (2 раза)

Покров

Величаем Тя, / Пресвятая Дево, / и чтим покров Твой честный:/ Тя бо виде святый Андрей на воздусе, // за ны Христу молящуюся.

Введение во храм Божией Матери

Величаем Тя, / Пресвятая Дево, / Богоизбранная Отроковице, / и чтим еже в храм Господень // вхождение Твое.

1. Велий Господь и хвален зело, во граде Бога нашего, в горе святей Его.
2. Преславная глаголашая о тебе, граде Божий.
3. Освятил есть селение свое Вышний.
Слава, и ныне: Аллилуйя (3), слава Тебе, Боже. (2 раза)

Архангельский глас / вопием Ти, Чистая: / радуйся Благодатная, // Господь с Тобою.

1. Благовестите день от дне спасение Бога нашего.
2. Клятся Господь Давиду истиною, и не отвержеся ея.
3. Освятил есть селение свое Вышний.
Слава, и ныне: Аллилуйя (3), слава Тебе, Боже. (2 раза)

Успение Божией Матери

Величаем Тя, / Пренепорочная / Мати Христа Бога нашего, / и всеславное славим // успение Твое.

1. Воскликните Господеви вся земля, пойте же имени Его.
2. Преславная глаголашася о тебе, граде Божий.
3. Воскресни, Господи, в покой Твой, Ты и кивот святыни Твоея.
Слава, и ныне: Аллилуйя (3), слава Тебе, Боже. (2 раза)

Иконе Божией Матери

Величаем Тя, / Пресвятая Дево, / Богоизбранная отроковице, / и чтим образ Твой святый, / имже точиши исцеления // всем, с верою прибегающим.

1. Боже, суд Твой цареви даждь, и правду Твою сыну цареву.
2. Судити людем Твоим в правде, и нищим Твоим в суде.
Слава, и ныне: Аллилуйя (3), слава Тебе, Боже. (2 раза)

Величаем Тя, / Живодавче Христе, / и чтим Крест Твой Святый, / имже нас спасл еси // от работы вражия.

1. Суди, Господи, обидящие мя, побори борющия мя.
2. Знаменася на нас свет лица Твоего, Господи.
3. Яко оружием благоволения венчал еси нас.
Слава, и ныне: Аллилуйя (3), слава Тебе, Боже. (2 раза)

Величаем Тя, / Живодавче Христе, / нас ради ныне плотию рождшагося / от Безневестныя // и Пречистыя Девы Марии.

1. Воскликните Господеви вся земля, пойте же имени Его.
2. Дадите славу хвале Его. Поведите чудеса Его.
3. Да возвеселятся небеса и возрадуется земля.
4. Избавление посла людем Своим.
Слава, и ныне: Аллилуйя (3), слава Тебе, Боже. (2 раза)

Величаем Тя, / Живодавче Христе, / нас ради ныне плотию крестившагося / от Иоанна // в водах Иорданских.

1. Боже, ущедри ны и благослови ны.
2. Просвети лице Твое на ны, и помилуй ны.
3. Приступите к Нему, и просветитеся, и лица ваша не постыдятся.
4. Море виде и побеже, Иордан возратися вспять.
Слава, и ныне: Аллилуйя (3), слава Тебе, Боже. (2 раза)

Величаем Тя, / Живодавче Христе, / и чтим Пречистую Матерь Твою, / Еюже по закону ныне // принеслся еси в храм Господень.

1. Отрыгну сердце мое слово благо, глаголю дела моя цареви.
2. Возлюбил еси правду, и возненавидел еси беззаконие.
3. Господь во храме святем Своем: Господь на небеси престол Его.
Слава, и ныне: Аллилуйя (3), слава Тебе, Боже. (2 раза)

Величаем Тя, / Живодавче Христе, / и почитаем пречистыя плоти Твоея // преславное преображение.

1. Велий Господь и хвален зело, во граде Бога нашего, в горе святей Его.
2. Посли свет Твой и истину Твою.
3. Господи, во свете лица Твоего пойдут; и о имени Твоем возрадуются весь день.
Слава, и ныне: Аллилуйя (3), слава Тебе, Боже. (2 раза)

Причастен: Господи, во свете лица Твоего пойдем, и о имени Твоем возрадуемся во веки.

Величаем Тя, / Живодавче Христе, / и почитаем еже на небеса / с пречистою Твоею плотию // Божественное вознесение.

1. Вси языцы восплещите руками, воскликните Богу гласом радования.
2. Взыде Бог в воскликновении, Гоподь во гласе трубне.
3. Поклонитеся Ему вси ангели Его.
Слава, и ныне: Аллилуйя (3), слава Тебе, Боже. (2 раза)

Величаем Тя, / Живодавче Христе, / и чтим Всесвятаго Духа Твоего, / ЕГоже от Отца послал еси // Божественным учеником Твоим.

1. Небеса поведают славу Божию, творение же руку Его возвещает твердь.
2. Послеши Духа Твоего, и созиждутся, и обновиши лице земли.
3. Дух Твой Благий наставит мя на зелю праву.
Слава, и ныне: Аллилуйя (3), слава Тебе, Боже. (2 раза)

Ублажаем тя, / преподобне отче наш (имя), / и чтем святую память твою, / наставниче монахов, // и собеседниче ангелов.

1. Терпя, потерпех Господа, и внят ми, и услыша молитву мою.
2. Постави на камени нозе мои, и исправи стопы моя.
3. Се удалихся бегая, и водворихся в пустыни.
Слава, и ныне: Аллилуйя (3), слава Тебе, Боже. (2 раза)

Величаем тя, / святителю отче наш (имя), / и чтим святую память твою, / ты бо молиши о нас // Христа Бога нашего.

1. Благовестих правду в церкви велицей: истину и спасение Твое рех.
2. Уста праведнаго поучатся премудрости, и язык его возглаголет суд.
3. Правда Его пребывает в век века.
Слава, и ныне: Аллилуйя (3), слава Тебе, Боже. (2 раза)

Величам вас, / апостоли Христовы Петре и Павле, / весь мир ученьми вашими просветившия, // и вся концы ко Христу приведшия.

Величаем тя, / апостоле Христов (имя), / и чтем болезни и труды твоя, / имиже трудился ест // во благовести Христове.

1. Небеса поведают славу Божию, творение же руку Его возвещает твердь.
2. Возвестите во языцех славу Его, во всех людех чудеса Его.
3. Во Всю землю изыде вещание их, и в концы вселенныя глаголы их.
Слава, и ныне: Аллилуйя (3), слава Тебе, Боже. (2 раза)

Апостолу Иоанну Богослову

Величаем тя, / апостоле Христов Иоанне, / и чтем болезни и труды твоя, / имиже трудился ест // во благовести Христове.

1. Небеса поведают славу Божию, творение же руку Его возвещает твердь.
2. Исповедят небеса чудеса Твоя, Господи.
3. Бог прославляемь в совете святых.
Слава, и ныне: Аллилуйя (3), слава Тебе, Боже. (2 раза)

Крестителю Спасову Иоанну

Величаем тя, / Крестителю Спасов Иоанне, / и почитаем вси честныя твоея главы // усекновение (обретение).

1. Блажен муж, бояйся Господа: в заповедех Его восхощет зело.
2. В память вечную будет праведник.
3. Праведник яко финикс процветет, яко кедр, иже в Ливане, умножися.
Слава, и ныне: Аллилуйя (3), слава Тебе, Боже. (2 раза)

Величаем вас, / Архангели, и Ангели, и вся воинства, / Херувими и Серафими // славящие Господа.

1. Исповемся Тебе, Господи, всем сердцем моим, и пред ангелы воспою Тебе.
2. Творяй ангелы своя духи, и слуги своя пламень огненный.
3. Благословите Господа вси ангели Его.
Слава, и ныне: Аллилуйя (3), слава Тебе, Боже. (2 раза)

Величаем тя, / великомучениче (имя), / и чтем честная страдания твоя, // яже за Христа претерпел еси.

Величаем тя, / страстотерптче святый (имя), / и чтем честная страдания твоя, // яже за Христа претерпел еси.
1. Бог нам прибежище и сила.
2. Помощник в скорбех, обретших ны зело.
3. Сего ради не убоимся, внегда смущается земля.
Слава, и ныне: Аллилуйя (3), слава Тебе, Боже. (2 раза)

Тропари и кондаки воскресные восьми гласов

Камени запечатану от иудей / и воином стерегущим Пречистое Тело Твое, воскресл если тридневный. Спасе, / даруяй мирови жизнь. / Сего ради силы небесныя вопияху Ти, Жизнодавче: / слава воскресению Твоему, Христе, / слава Царствию Твоему, // слава смотрению Твоему, едине Человеколюбче.

Гавриилу, вещавшу Тебе Дево, радуйся,/ со гласом воплощашеся всех Владыка,/ в Тебе, Святем Кивоте,/ якоже рече праведный Давид:/ явилася еси ширшая небес,/ поносивши Зиждителя Твоего./ Слава всельшемуся в Тя,/ слава прошедшему из Тебе, // слава свободившему нас Рождеством Твоим.

Воскресл еси яко Бог из гроба во славе,/ и мир совоскресил еси;/ и естество человеческое яко Бога воспевает Тя, / и смерть исчезе; Адам же ликует, Владыко; / Ева ныне от уз избавляема радуется, зовущи:// Ты еси, Иже всем подая, Христе, воскресение.

Егда снизшел еси к смерти, Животе Безсмертный, / тогда ад умертвил еси блистанием Божества: / егда же и умершия от преисподних воскресил еси, / вся силы небесныя взываху: // Жизнодавче, Христе Боже наш, слава Тебе.

Вся паче смысла,/ Вся преславная Твоя, Богородице, таинства,/ чистоте запечатанной, и девству храниму,/ Мати позналася еси неложна,/ Бога рождши истиннаго;// Того моли спастися душам нашим.

Воскресл еси от гроба, Всесильне Спасе,/ и ад видев чудо, ужасеся,/ и мертвии восташа;/ тварь же видящи срадуется Тебе,/ и Адам свеселится,// и мир, Спасе мой, воспевает Тя присно.

Да веселятся небесная, / да радуются земная, / яко сотвори державу / мышцею Своею Господь, / попра смертию смерть, / первенец мертвых бысть; из чрева адова избави нас, // и подаде мирови велию милость.

Тя Ходатайствовавшую спасение рода нашего,/ воспеваем, Богородице Дево:/ плотию бо от Тебе восприятую Сын Твой и Бог наш,/ Крестом восприим страсть,// избави нас от тли яко Человеколюбец.

Воскресл еси днесь из гроба, Щедре,/ и нас возвел еси от врат смертных;/ днесь Адам ликует, и радуется Ева,/ вкупе же и пророцы с патриархи воспевают непрестанно// Божественную державу власти Твоея.

Светлую воскресения проповедь / от Ангела уведевша Господни ученицы и прадеднее осуждение отвергша, / апостолом хвалящася глаголаху: / испровержеся смерть, / воскресе Христос Бог, // даруяй мирови велию милость.

Еже от века утаенное,/ и Ангелом несведомое таинство,/ Тобою, Богородице, сущим на земли явися Бог,/ в неслитном соединении воплощаемь,/ и Крест волею нас ради восприим,/ Имже воскресив первозданнаго,// спасе от смерти душы наша.

Спас и Избавитель мой/ из гроба, яко Бог,/ воскреси от уз земнородныя,/ и врата адова сокруши, // и яко Владыка воскресе тридневен.

Собезначальное Слово Отцу и Духови, / от Девы рождшееся на спасение наше, / воспоим, вернии, и поклонимся, / яко благоволи плотию взыти на крест, / и смерть претерпети, / и воскресити умершия // славным воскресением Своим.

Радуйся, двере Господня непроходимая./ Радуйся, стено и покрове притекающих к Тебе./ Радуйся, необуреваемое пристанище и неискусобрачная,/ рождшая плотию Творца Твоего и Бога, / молящи не оскудевай от воспевающих,/ и кланяющихся рождеству Твоему.

Ко аду, Спасе мой, сошел еси,/ и врата сокрушивый яко Всесилен,/ умерших яко Создатель совоскресил еси,/ и смерти жало сокрушил еси,/ и Адам от клятвы избавлен бысть, Человеколюбче, / темже вси зовем:// спаси нас, Господи.

Ангельския силы на гробе Твоем / и стрегущии омертвеша, / и стояше Мария во гробе, / ищущи Пречистаго Тела Твоего. / Пленил еси ад, не искусйвся от него; / сретил есй Деву, даруяй живот. // Воскресый из мертвых. Господи, слава Тебе.

Благословенную нарекий Твою Матерь,/ пришел еси на страсть вольным хотением,/ возсияв на Кресте, взыскати хотя Адама,/ глаголя Ангелом:/ срадуйтеся Мне, яко обретеся погибшая драхма./ Вся мудре устроивый, Боже наш, слава Тебе.

Живоначальною дланию/ умершия от мрачных удолий/ Жизнодавец воскресив всех Христос Бог,/ воскресение подаде человеческому роду:/ есть бо всех Спаситель,// воскресение и живот, и Бог всех.

Разрушил еси Крестом Твоим смерть, / отверзл еси разбойнику рай, / мироносицам плач преложил еси, / и апостолом проповедати повелел еси, / яко воскресл еси, Христе Боже, // даруяй мирови велию милость.

Яко нашего воскресения сокровище,/ на Тя надеющияся, Всепетая,/ от рова и глубины прегрешений возведи;/ Ты бо повинныя греху спасла еси,/ рождши Спасение наше; / яже прежде рождества Дева, / и в рождестве Дева,// и по рождестве паки пребываеши Дева.

Не ктому держава смертная/ возможет держати человеки:/ Христос бо сниде, сокрушая и разоряя силы ея;/ связуемь бывает ад, пророцы согласно радуются,/ предста, глаголюще, Спас сущим в вере:// изыдите, вернии, в воскресение.

С высоты снизшел еси, Благоутробне, / погребение приял еси тридневное, / да нас свободиши страстей, // Животе и воскресение наше. Господи, слава Тебе.

Иже нас ради рождейся от Девы,/ и распятие претерпев, Благий,/ испровергий смертию смерть, и воскресение явлей яко Бог,/ не презри, яже создал еси рукою Твоею;/ яви человеколюбие Твое, Милостиве,/ приими рождшую Тя Богородицу молящуюся за ны; / и спаси, Спасе наш, люди отчаянныя.

Воскрес из гроба, умершия воздвигл еси,/ и Адама воскресил еси,/ и Ева ликует во Твоем воскресении,/ и мирстии концы торжествуют // еже из мертвых востанием Твоим, Многомилостиве.

Догматик: Всемирную славу, / от человек прозябшую, / и Владыку рождшую / небесную дверь воспоим Марию Деву, / бесплотных песнь и верных удобрение: / Сия боя явися небо и храм Божества, / Сия преграждение вражды разрушивши, / мир введе и Царствие отверзе, / Сию убо имуще веры утверждение, / поборника имамы, из Нея рождшагося Господа. / Дерзайте убо, дерзайте, людие Божии: / ибо Той победит враги, // яко Всесилен.

Богородичн: Се исполнися Исаиино проречение, / Дева бо родила еси, / и по рождестве яко прежде рождества пребыла еси:/ Бог бо бе рождейся, / темже и естества новопресече. / Но, о Богомати, / моления Твоих рабов, в Твоем храме приносимая Тебе, не презри, / но яко Благоутробнаго Твоима рукама носящи, / на Твоя рабы умилосердися, // и моли спастися душам нашим.

Богородичен тропарный: Гавриилу вещавшу Тебе, Дево, радуйся, / со гласом воплощашеся всех Владыка, / в Тебе, святем кивоте, / якоже рече праведный Давид, / явилася еси ширшая небес, / поносивши Зиждителя Твоего. / Слава всельшемуся в Тя, / слава прошедшему из Тебе, // слава свободившему нас рождеством Твоим.

Догматик: Прейде сень законная, благодати пришедши: / якоже бо купина не сгораше опаляема, / тако Дево родила еси, / и Дева пребыла еси: / вместо столпа огненнаго, / праведное возсия солнце; / вместо Моисея — Христос, // спасение душ наших.

Богородичен: О чудесе новаго всех древних чудес! / Кто бо позна матерь без мужа рождшую, / и на руку носящую всю тварь Содержащего? / Божие есть изволение Рождшееся. / Егоже яко Младенца, Пречистая, Твоима рукама носившая, / и матернее дерзновение к Нему имущая, / не престай молящи о чтущих Тя, // ущедрити и спасти души наша.

Богородичен тропарный: Вся паче смысла, / вся преславная Твоя, Богородице, таинства: / чистоте запечатанной и девству храниму, / Мати позналася еси неложна, / Бога рождши истиннаго, // Того моли спастися душам нашим.

Догматик: Како не дивимся / богомужному рождеству Твоему, Пречестная; / искушения бо мужеского не приемши, Всенепорочная, / родила еси без Отца Сына плотию, / прежде век от Отца рожденнаго без матере, / никакоже претерпевшего изменения, или смешения, или разделения, / но обою существу свойство цело сохраншаго. / Темже, Мати Дево Владычице, / Того моли спастися душам, // православно Богородицу исповедающих Тя.

Богородичен: Без семене от Божественнаго Духа, / волею же Отчею зачала еси Сына Божия, / от Отча без матерее прежде век суща: / нас же ради из Тебе без отча бывша, / плотию родила еси, / и Младенца млеком питала еси. / Темже не престай молити, // избавитися от бед душам нашим.

Богородичен тропарный: Тя, ходатайствовавшую спасение рода нашего, / воспеваем, Богородице Дево, / плотию бо от Тебе восприятою Сын Твой и Бог наш, / крестом восприим страсть, // избави нас от тли, яко Человеколюбец.

Догматик: Иже Тебе ради Богоотец пророк Давид / песненно о Тебе провозгласи, / величия Тебе сотворшему: / предста Царица одесную Тебе, / Тя бо Матерь ходатайцу живота показа, / без Отца из Тебе вочеловечитися благоволивый Бог, / да свой паки обновит образ, истлевший страстьми, / и заблудшее горохищное обрет овча, / на рамо восприим ко Отцу принесет и Своему хотению, / с небесными совокупит силами, / и спасет, Богородице, мир, // Христос имеяй велию и богатую милость.

Богородичен: Призри на моление Твоих раб, Всенепорочная, / утоляющи лютая на ны восстания, / всякия скорби нас изменяющи; / Тя бо едину твердое и известное утверждение имамы, / и Твое предстательство стяжахом, / да не постыдимся, Владычице, / Тя призывающи, / потщися на умоление Тебе верно вопиющих: / радуйся, Владычице, всех помоще, / радосте и покрове, // и спасение душ наших.

Богородичен тропарный: Еже от века утаенное / и ангелом несведомое таинство, / Тобою, Богородице, сущим на земли явися Бог, / в неслитном соединении воплощаем, / и крест волею нас ради восприим, / имже воскресив первозданнаго, // спасе от смерти души наша.

Догматик: В Чермнем мори, / неискусобрачныя Невесты образ написася иногда. / Тамо Моисей, разделитель воды; / зде же Гавриил, служитель чудесе. / Тогда глубину шествова немокренно Израиль: / ныне же Христа роди безсеменно Дева. / Море по прошествии Израилеве пребысть непроходно: / Непорочная по рождестве Еммануилеве пребысть нетленна. / Сый и прежде сый, / явлейся яко человек, // Боже, помилуй нас.

Богородичен: Храм и дверь еси, / палата и престол Царев, / Дево всечестная, / Еюже Избавитель мой, / Христос Господь во тьме спящим явися, / Солнце сый правды, / просветити хотя, яже созда по образу Своему рукою Своею. / Темже, Всепетая, / яко матернее дерзновение к Нему стяжавшая, // непрестанно моли спастися душам нашим.

Богородичен тропарный: Радуйся, двере Господня непроходимая, / радуйся, стено и покрове притекающих к Тебе, / радуйся, необуреваемое пристанище и неискусобрачная, / рождшая плотию Творца Твоего и Бога; / молящи не оскудевай о воспевающих Тя // и кланяющихся рождеству Твоему.

Догматик: Кто Тебе не ублажит, Пресвятая Дево; / кто ли не воспоет Твоего пречистого рождества; / безлетно бо от Отца возсиявый Сын Единородный; / Тойже от Тебе, Чистыя, пройде, / неизреченно воплощься / естеством Бог сый, / и естеством быв человек нас ради, / не во двою лицу разделяемый, / но во двою естеству / неслитно познаваемый. / Того моли Чистая, Всеблаженная, // помиловатися душам нашим.

Богородичен: Творец и Избавитель мой, Пречистая, Христос Господь / из Твоих ложесн прошед, в мя оболкийся, / первыя клятвы Адама свободи. / Темже Ти, Всечистая, / яко Божии Матери же и Деве воистинну / вопием немолчно: / радуйся ангельски, радуйся, Владычице, / предстательство и покрове, // и спасение душ наших.

Богородичен тропарный: Благословенную нарекий Твою Матерь, / пришел еси на страсть вольным хотением, / возсияв на кресте, взыскати хотя Адама, / глаголя ангелом: / срадуйтеся мне, яко обретеся погибшая драхма. // Вся мудре устроивый, Боже наш, слава Тебе.

Догматик: Мати убо позналася еси, / паче естества, Богородице: / пребыла же еси Дева, / паче слова и разума; / и чудесе рождества Твоего сказати язык не может. / преславну бо сущу зачатию, Чистая, / непостижен есть образ рождения:/ идеже бо хощет Бог, побеждается естества чин. / Темже Тя вси, Матерь Божию ведуще, / молимтися прилежно, // моли спастися душам нашим.

Богородичен: Под кров Твой, Владычице, / вси земнороднии прибегающе, вопием Ти: / Богородице, упование наше, / избави ны от безмерных прегрешений, // и спаси души наша.

Богородичен тропарный: Яко нашего спасения сокровище, / на Тя надеющиися, Всепетая, / от рова и глубины прегрешений возведи; / Ты бо повинныя греху спасла еси, / рождшая спасение наше, / яже прежде рождества Дева, / и рождестве Дева, // и по рождестве паки пребываеши Дева.

Догматик: Царь небесный за человеколюбие на земли явися / и с человеки поживе: / от Девы бо чистыя плоть приемый, / и из Нея прошедый с восприятием: / един есть Сын, сугуб естеством, / но н ипостасию. / Тем же совершенна Того Бога / и совершенна человека воистинну проповедающе, / исповедуем Христа Бога нашего: / Егоже моли, Мати Безневестная, // помиловатися душам нашим.

Богородичен: Безневестная Дево, / яже Бога неизреченно заченши плотию, / Мати Бога Вышняго, / Твоих рабов мольбы прими, Всенепорочная, / всем подающи очищение прегрешений: / ныне наша моления приемлющи, // моли спастися всем нам.

Богородичен тропарный: Иже нас ради рождейся от Девы / и распятие претерпев, Благий, / испровергий смертию смерть и воскресение явлей, яко Бог,/ не презри яже создал еси рукою Твоею, / яви человеколюбие Твое, Милостиве, / приими рождшую Тя Богородицу, молящуюся за ны, // и спаси, Спасе наш, люди отчаянныя.

Источник