Ноты акафиста иисусу сладчайшему

Церковные хоры. Часть I: Песнопения Всенощного бдения/Сост. А. В. Касторский. Изд. 5-е.

«Благослови, душе моя, Господа. » Обычного напева
Великая ектения. Киевского роспева
«Блажен муж. » Обычного напева
«Блажен муж. »
«Свете тихий. » Киевского роспева
Ектении сугубая и просительная. Киевского роспева
Ектения на литии. Обычного напева
«Ныне отпущаеши. » Киевского роспева
«Богородице Дево. » Греческого роспева
На кафизмах. Обычного напева
«Хвалите имя Господне. » №1
«Хвалите имя Господне. » №2
«Хвалите имя Господне. » №3
«Хвалите имя Господне. » №4
«Хвалите имя Господне . » №5 А. К.
Тропари по Непорочнах
«От юности моея. ». Сокращенного греческого роспева
Прокимны воскресные на утрене. Знаменного роспева
После Евангелия. Обычного напева
«Отверзу уста моя. » Сокращенного греческого роспева
«Величит душа моя Господа. » Сокращенного греческого роспева (гл.4)
«Величит душа моя Господа. »
«Преблагословенна еси. » Киевского роспева
Великое славословие. «Феофановское»
Ектении сугубая и просительная
«Взбранной Воеводе. » Греческого роспева (гл.8)
Тропари Господских и иных праздников и святых:
Рождества Пресвятой Богородицы
Воздвижения Честного Креста
Св. ап. Иоанна Богослова
Покрова Пресвятой Богородицы
Казанской иконы Божией Матери
Архангела Михаила
Введения во храм Пресвятой Богородицы
Свт. Николая Чудотворца
Рождества Христова (тропарь и кондак)
Обрезания Господня и свт. Василия Великого
Богоявления (тропарь и кондак)
Сретения Господня
Благовещения Пресвятой Богородицы
Недели Ваий
Недели Фоминой
Вознесения Господня
Пятидесятницы
Свв. равноапп. Мефодия и Кирилла, учителей Словенских
Рождества св. Иоанна Предтечи
Свв. первоверховных апп. Петра и Павла
Пророка Божия Илии
Преображения Господня
Успения Пресвятой Богородицы
Усекновения главы св. Иоанна Предтечи
Общий апостола
Общий преподобного и преподобной
Общий мученика
Общий мученицы
Общий пророков
Общий святителя
Прп. Сергия Радонежского
Вмч. Георгия Победоносца
Св. равноап. кн. Владимира
Нерукотворенного Образа
Спасителя («С вышних призирая. »)
Величания. Знаменного роспева:
На Рождество Богородицы
На Воздвижение Креста
Св. ап. Иоанна Богослова
На Покров
В Праздник Казанской иконы Божией Матери
Архангела Михаила
На Введение во храм Пресвятой Богородицы
Свт. Николая Чудотворца, то же и свт. Василия Великого
На Рождество Христово
На Обрезание Господне
На Богоявление
На Сретение Господне
На Благовещение Пресвятой Богородицы
На Вознесение Господне
В день Пятидесятницы
Свв. равноапп. Мефодия и Кирилла, учителей Словенских
Свв. первоверховных апп. Петра и Павла
На Рождество Иоанна Предтечи
Св. равноап. кн. Владимира
На Преображение Господне
На Успение Пресвятой Богородицы
На Усекновение главы св. Иоанна Предтечи
Общее апостола
Общее преподобного
Общее преподобной
Общее мученика
Общее мученицы
В Неделю Ваий
В Неделю Фомину
Ирмосы Рождества Христова. Греческого роспева
Ирмосы Воздвижения Честного Креста, «Кресту Твоему. »
«С нами Бог. » Киевского роспева

Церковные хоры. Часть II: Песнопения Божественной Литургии/Сост. А. В. Касторский. Изд. 3-е. СПб., 1914.

Ектения великая или мирная
«Благослови, душе моя, Господа. » Греческого роспева
«Единородный Сыне. » Обычного напева
Блаженны. Греческого роспева
«Приидите поклонимся. » Обычного напева
«Господи, спаси благочестивыя. »
«Елицы во Христа крестистеся. » Обычного напева
Прокимны воскресные. Знаменного роспева
Прокимны из служб бесплотным, святым и об усопших
Перед чтением Евангелия
Херувимская песнь №1. Из церковного обихода (ми минор)
Херувимская песнь №2. (ре минор)
Херувимская песнь №3. Старинного роспева (фа минор)
Херувимская песнь №4. Д. С. Бортнянского (фа мажор)
Херувимская песнь №5. Греческого роспева (фа мажор)
Херувимская песнь №6. «Софрониевская» (ре минор)
Херувимская песнь №7. Обиходная мелодия (ми минор)
Херувимская песнь №8. Болгарского напева (ми минор)
Херувимская песнь №9. «Симоновская» (ре мажор)
«Отца и Сына. », Символ веры
«Милость мира. » №1. Киевского роспева
«Милость мира. » №2. Иного роспева
«Милость мира. » №3. (фа мажор)
«Милость мира. » №4. «Феофановское»
«Милость мира. » №5. «Симоновское»
«Милость мира. » №6. Иеромонаха Виктора
«Милость мира. » №7. Сербская мелодия
«Милость мира. » №8. (соль мажор)
«Милость мира. » №9. На Литургии свт. Василия Великого
«О тебе радуется. » Греческого роспева
«Достойно есть. » Киевского роспева
«Достойно есть. » Греческого роспева
«Достойно есть. » Сербская мелодия
«Отче наш. »
«Един Свят. »
«Отче наш. » №2
«Хвалите Господа с небес. »
«Благословен грядый. »
«Тело Христово приимите. »
«Видехом Свет истинный. »
«Да исполнятся уста наша. »
Отпуст Литургии
«Не имамы иныя помощи. »
«Пречистому Твоему образу. »
«Не ввери мя. »
«Моление теплое. »
«В память вечную. »
«Исхити мя, Владычице. »
«Совет превечный. »
«В молитвах неусыпающую Богородицу. » Киевского напева
«Под Твою милость. »
«Заступнице усердная. »
«Дивное имя Твое, Иисусе. »
«Радуйтеся праведнии о Господе. »
«Молитву пролию ко Господу. »
«Блаженни, яже избрал. »
«Вышшую небес. »

Источник

Акафист Иисусу Сладчайшему

Одобрен в досинодальный период.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Возбра́нный Воево́до и Го́споди, а́да победи́телю, я́ко изба́влься от ве́чныя сме́рти, похва́льная воспису́ю Ти́, созда́ние и ра́б Тво́й; но, я́ко име́яй милосе́рдие неизрече́нное, от вся́ких мя́ бе́д свободи́, зову́ща:

Иису́се, Сы́не Бо́жий, поми́луй мя́.

А́нгелов Тво́рче и Го́споди си́л, отве́рзи ми́ недоуме́нный у́м и язы́к на похвалу́ пречи́стаго Твоего́ и́мене, я́коже глухо́му и гугни́вому дре́вле слу́х и язы́к отве́рзл еси́, и, глаго́лаше зовы́й такова́я:

Иису́се пречу́дный, а́нгелов удивле́ние; Иису́се преси́льный, прароди́телей избавле́ние.

Иису́се пресла́дкий, патриа́рхов велича́ние; Иису́се пресла́вный, царе́й укрепле́ние.

Иису́се прелюби́мый, проро́ков исполне́ние; Иису́се преди́вный, му́чеников кре́посте.

Иису́се прети́хий, мона́хов ра́досте; Иису́се преми́лостивый, пресви́теров сла́досте.

Иису́се премилосе́рдый, по́стников воздержа́ние; Иису́се пресла́достный, преподо́бных ра́дование.

Иису́се пречестны́й, де́вственных целому́дрие; Иису́се предве́чный, гре́шников спасе́ние.

Иису́се, Сы́не Бо́жий, поми́луй мя́.

Ви́дя вдови́цу зе́льне пла́чущу, Го́споди, я́коже бо тогда́ умилосе́рдився, сы́на ея́ на погребе́ние несо́ма воскреси́л еси́; си́це и о мне́ умилосе́рдися, Человеколю́бче, и грехми́ умерщвле́нную мою́ ду́шу воскреси́, зову́щую: Аллилу́иа.

Ра́зум неуразуме́нный разуме́ти Фили́пп ища́, Го́споди, покажи́ на́м Отца́, глаго́лаше; Ты́ же к нему́: толи́кое вре́мя сы́й со Мно́ю, не позна́л ли еси́, я́ко Оте́ц во Мне́, и А́з во Отце́ е́смь? Те́мже, Неизсле́дованне, со стра́хом зову́ Ти́:

Иису́се, Бо́же предве́чный; Иису́се, Царю́ преси́льный.

Иису́се, Влады́ко долготерпели́вый; Иису́се, Спа́се преми́лостивый.

Иису́се, храни́телю мо́й преблаги́й; Иису́се, очи́сти грехи́ моя́.

Иису́се, отыми́ беззако́ния моя́; Иису́се, отпусти́ непра́вды моя́.

Иису́се, наде́ждо моя́, не оста́ви мене́; Иису́се, помо́щниче мо́й, не отри́ни мене́.

Иису́се, Созда́телю мо́й, не забу́ди мене́; Иису́се, Па́стырю мо́й, не погуби́ мене́.

Иису́се, Сы́не Бо́жий, поми́луй мя́.

Си́лою свы́ше апо́столы облеки́й, Иису́се, во Иерусали́ме седя́щия, облецы́ и мене́, обнаже́ннаго от вся́каго благотворе́ния, теплото́ю Ду́ха Свята́го Твоего́ и да́ждь ми́ с любо́вию пе́ти Тебе́: Аллилу́иа.

Име́яй бога́тство милосе́рдия, мытари́ и гре́шники, и неве́рныя призва́л еси́, Иису́се; не пре́зри и мене́ ны́не, подо́бнаго и́м, но, я́ко многоце́нное ми́ро, приими́ пе́снь сию́:

Иису́се, си́ло непобеди́мая; Иису́се, ми́лосте безконе́чная.

Иису́се, красото́ пресве́тлая; Иису́се, любы́ неизрече́нная.

Иису́се, Сы́не Бо́га Жива́го; Иису́се, поми́луй мя́ гре́шнаго.

Иису́се, услы́ши мя́ в беззако́ниих зача́таго; Иису́се, очи́сти мя́ во гресе́х рожде́ннаго.

Иису́се, научи́ мя́ непотре́бнаго; Иису́се, освети́ мя́ те́мнаго.

Иису́се, очи́сти мя́ скве́рнаго; Иису́се, возведи́ мя́ блу́днаго.

Иису́се, Сы́не Бо́жий, поми́луй мя́.

Бу́рю вну́трь име́яй помышле́ний сумни́тельных, Пе́тр утопа́ше; узре́в же во пло́ти Тя́ су́ща, Иису́се, и по вода́м ходя́ща, позна́ Тя́ Бо́га и́стиннаго и, ру́ку спасе́ния получи́в, рече́: Аллилу́иа.

Слы́ша слепы́й мимоходя́ща Тя́, Го́споди, путе́м вопия́ше: Иису́се, Сы́не Дави́дов, поми́луй мя́! И, призва́в, отве́рзл еси́ о́чи его́. Просвети́ у́бо ми́лостию Твое́ю о́чи мы́сленныя се́рдца и мене́, вопию́ща Ти́ и глаго́люща:

Иису́се, вы́шних Созда́телю; Иису́се, ни́жних Искупи́телю.

Иису́се, преиспо́дних потреби́телю; Иису́се, всея́ тва́ри украси́телю.

Иису́се, души́ моея́ уте́шителю; Иису́се, ума́ моего́ просвети́телю.

Иису́се, се́рдца моего́ весе́лие; Иису́се, те́ла моего́ здра́вие.

Иису́се, Спа́се мо́й, спаси́ мя́; Иису́се, све́те мо́й, просвети́ мя́.

Иису́се, му́ки вся́кия изба́ви мя́; Иису́се, спаси́ мя́, недосто́йнаго.

Иису́се, Сы́не Бо́жий, поми́луй мя́.

Богото́чною Кро́вию я́коже искупи́л еси́ на́с дре́вле от зако́нныя кля́твы, Иису́се, си́це изми́ на́с от се́ти, е́юже зми́й запя́т ны́ страстьми́ плотски́ми, и блу́дным наважде́нием, и злы́м уны́нием, вопию́щия Ти́: Аллилу́иа.

Ви́девше о́троцы евре́йстии во о́бразе челове́честем Созда́вшаго руко́ю челове́ка, и Влады́ку разуме́вше Его́, потща́шася ве́твьми угоди́ти Ему́, оса́нна вопию́ще. Мы́ же пе́снь прино́сим Ти́, глаго́люще:

Иису́се, Бо́же и́стинный; Иису́се, Сы́не Дави́дов.

Иису́се, Царю́ пресла́вный; Иису́се, А́гнче непоро́чный.

Иису́се, Па́стырю преди́вный; Иису́се, храни́телю во мла́дости мое́й.

Иису́се, корми́телю во ю́ности мое́й; Иису́се, похвало́ в ста́рости мое́й.

Иису́се, наде́ждо в сме́рти мое́й; Иису́се, животе́ по сме́рти мое́й.

Иису́се, утеше́ние мое́ на суде́ Твое́м; Иису́се, жела́ние мое́, не посрами́ мене́ тогда́.

Иису́се, Сы́не Бо́жий, поми́луй мя́.

Пропове́дник богоно́сных веща́ние и глаго́лы исполня́я, Иису́се, на земли́ я́влься и с челове́ки Невмести́мый пожи́л еси́, и боле́зни на́ша подъя́л еси́, отню́дуже ра́нами Твои́ми мы́ исцеле́вше, пе́ти навыко́хом: Аллилу́иа.

Возсия́ вселе́нней просвеще́ние и́стины Твоея́, и отгна́ся ле́сть бесо́вская: и́доли бо, Спа́се на́ш, не терпя́ще Твоея́ кре́пости, падо́ша. Мы́ же, спасе́ние получи́вше, вопие́м Ти́:

Иису́се, и́стино, ле́сть отгоня́щая; Иису́се, све́те, превы́шший все́х све́тлостей.

Иису́се, Царю́, премога́яй все́х кре́пости; Иису́се, Бо́же, пребыва́яй в ми́лости.

Иису́се, Хле́бе Живо́тный, насы́ти мя́ а́лчущаго; Иису́се, исто́чниче ра́зума, напо́й мя́ жа́ждущаго.

Иису́се, оде́ждо весе́лия, оде́й мя́ тле́ннаго; Иису́се, покро́ве ра́дости, покры́й мя́ недосто́йнаго.

Иису́се, пода́телю прося́щим, да́ждь ми́ пла́ч за грехи́ моя́; Иису́се, обре́тение и́щущих, обря́щи ду́шу мою́.

Иису́се, отве́рзителю толку́щим, отве́рзи се́рдце мое́ окая́нное; Иису́се, Искупи́телю гре́шных, очи́сти беззако́ния моя́.

Иису́се, Сы́не Бо́жий, поми́луй мя́.

Хотя́ сокрове́нную та́йну от ве́ка откры́ти, я́ко овча́ на заколе́ние веде́н бы́л еси́, Иису́се, и я́ко а́гнец пря́мо стригу́щаго его́ безгла́сен, и я́ко Бо́г из ме́ртвых воскре́сл еси́, и со сла́вою на небеса́ возне́слся еси́, и на́с совоздви́гл еси́, зову́щих: Аллилу́иа.

Ди́вную показа́ тва́рь, явле́йся Творе́ц на́м: без се́мене от Де́вы воплоти́ся, из гро́ба, печа́ти не руши́в, воскре́се, и ко апо́столом, две́рем затворе́нным, с пло́тию вни́де. Те́мже чудя́щеся, воспои́м:

Иису́се, Сло́ве необыме́нный; Иису́се, Сло́ве несогляда́емый.

Иису́се, си́ло непостижи́мая; Иису́се, му́дросте недомы́слимая.

Иису́се, Божество́ неопи́санное; Иису́се, госпо́дство неисче́тное.

Иису́се, ца́рство непобеди́мое; Иису́се, влады́чество безконе́чное.

Иису́се, кре́посте высоча́йшая; Иису́се, вла́сте ве́чная.

Иису́се, Тво́рче мо́й, уще́дри мя́; Иису́се, Спа́се мо́й, спаси́ мя́.

Иису́се, Сы́не Бо́жий, поми́луй мя́.

Стра́нно Бо́га вочелове́чшася ви́дяще, устрани́мся су́етнаго ми́ра и у́м на Боже́ственная возложи́м. Сего́ бо ра́ди Бо́г на зе́млю сни́де, да на́с на небеса́ возведе́т, вопию́щих Ему́: Аллилу́иа.

Ве́сь бе́ в ни́жних, и вы́шних ника́коже отступи́ Неисче́тный, егда́ во́лею на́с ра́ди пострада́, и сме́ртию Свое́ю на́шу сме́рть умертви́, и воскресе́нием живо́т дарова́ пою́щим:

Иису́се, сла́досте серде́чная; Иису́се, кре́посте теле́сная.

Иису́се, све́тлосте душе́вная; Иису́се, быстрото́ у́мная.

Иису́се, ра́досте со́вестная; Иису́се, наде́ждо изве́стная.

Иису́се, па́мяте предве́чная; Иису́се, похвало́ высо́кая.

Иису́се, сла́во моя́ превознесе́нная; Иису́се, жела́ние мое́, не отри́ни мене́.

Иису́се, Па́стырю мо́й, взыщи́ мене́; Иису́се, Спа́се мо́й, спаси́ мене́.

Иису́се, Сы́не Бо́жий, поми́луй мя́.

Все́ естество́ а́нгельское безпреста́ни сла́вит пресвято́е и́мя Твое́, Иису́се, на небеси́: Свя́т, Свя́т, Свя́т, вопию́ще; мы́ же, гре́шнии на земли́ бре́нными устна́ми вопие́м: Аллилу́иа.

Вети́я многовеща́нныя я́коже ры́бы безгла́сныя ви́дим о Тебе́, Иису́се, Спа́се на́ш: недоуме́ют бо глаго́лати, ка́ко Бо́г непрело́жный и челове́к соверше́нный пребыва́еши? Мы́ же та́инству дивя́щеся, вопие́м ве́рно:

Иису́се, Бо́же предве́чный; Иису́се, Царю́ ца́рствующих.

Иису́се, Влады́ко владе́ющих; Иису́се, Судие́ живы́х и ме́ртвых.

Иису́се, наде́ждо ненаде́жных; Иису́се, утеше́ние пла́чущих.

Иису́се, сла́во ни́щих; Иису́се, не осуди́ мя́ по дело́м мои́м.

Иису́се, очи́сти мя́ по ми́лости Твое́й; Иису́се, отжени́ от мене́ уны́ние.

Иису́се, просвети́ моя́ мы́сли серде́чныя; Иису́се, да́ждь ми́ па́мять сме́ртную.

Иису́се, Сы́не Бо́жий, поми́луй мя́.

Спасти́ хотя́ ми́р, Восто́че восто́ком, к те́мному за́паду – естеству́ на́шему прише́д, смири́лся еси́ до сме́рти; те́мже превознесе́ся и́мя Твое́ па́че вся́каго и́мене, и от все́х коле́н небе́сных и земны́х слы́шиши: Аллилу́иа.

Царю́ Преве́чный, Уте́шителю, Христе́ и́стинный, очи́сти ны́ от вся́кия скве́рны, я́коже очи́стил еси́ де́сять прокаже́нных, и исцели́ ны́, я́коже исцели́л еси́ сребролюби́вую ду́шу Закхе́а мытаря́, да вопие́м Ти́, во умиле́нии зову́ще:

Иису́се, сокро́вище нетле́нное; Иису́се, бога́тство неистощи́мое.

Иису́се, пи́ще кре́пкая; Иису́се, питие́ неисчерпа́емое.

Иису́се, ни́щих одея́ние; Иису́се, вдо́в заступле́ние.

Иису́се, си́рых защи́тниче; Иису́се, тружда́ющихся по́моще.

Иису́се, стра́нных наста́вниче; Иису́се, пла́вающих ко́рмчий.

Иису́се, бу́рных оти́шие; Иису́се Бо́же, воздви́гни мя́ па́дшаго.

Иису́се, Сы́не Бо́жий, поми́луй мя́.

Пе́ние всеумиле́нное приношу́ Ти́ недосто́йный, вопию́ Ти́ я́ко ханане́а: Иису́се, поми́луй мя́; не дще́рь бо, но пло́ть и́мам страстьми́ лю́те беся́щуюся и я́ростию пали́мую, и исцеле́ние да́ждь вопию́щу Ти́: Аллилу́иа.

Светопода́тельна свети́льника су́щим во тьме́ неразу́мия, пре́жде гоня́й Тя́ Па́вел, богоразу́мнаго гла́са си́лу внуши́ и душе́вную быстроту́ уясни́; си́це и мене́ те́мныя зе́ницы душе́вныя просвети́, зову́ща:

Иису́се, Царю́ мо́й прекре́пкий; Иису́се, Бо́же мо́й преси́льный.

Иису́се, Го́споди мо́й пребезсме́ртный; Иису́се, Созда́телю мо́й пресла́вный.

Иису́се, Наста́вниче мо́й предо́брый; Иису́се, Па́стырю мо́й преще́дрый.

Иису́се, Влады́ко мо́й преми́лостивый; Иису́се, Спа́се мо́й премилосе́рдый.

Иису́се, просвети́ моя́ чу́вствия, потемне́нная страстьми́; Иису́се, исцели́ мое́ те́ло, острупле́нное грехми́.

Иису́се, очи́сти мо́й у́м от по́мыслов су́етных; Иису́се, сохрани́ се́рдце мое́ от по́хотей лука́вых.

Иису́се, Сы́не Бо́жий, поми́луй мя́.

Благода́ть пода́ждь ми́, все́х долго́в реши́телю, Иису́се, и приими́ мя́ ка́ющася, я́коже прия́л еси́ Петра́, отве́ргшагося Тебе́, и призови́ мя́ уныва́ющаго, я́коже дре́вле Па́вла, гоня́ща Тя́, и услы́ши мя́, вопию́ща Ти́: Аллилу́иа.

Пою́ще Твое́ вочелове́чение, восхваля́ем Тя́ вси́, и ве́руем со Фомо́ю, я́ко Госпо́дь и Бо́г еси́, седя́й со Отце́м и хотя́й суди́ти живы́м и ме́ртвым. Тогда́ у́бо сподо́би мя́ десна́го стоя́ния, вопию́щаго:

Иису́се, Царю́ предве́чный, поми́луй мя́; Иису́се, цве́те благово́нный, облагоуха́й мя́.

Иису́се, теплото́ люби́мая, огре́й мя́; Иису́се, хра́ме предве́чный, покры́й мя́.

Иису́се, оде́ждо све́тлая, украси́ мя́; Иису́се, би́сере честны́й, осия́й мя́.

Иису́се, ка́меню драги́й, просвети́ мя́; Иису́се, со́лнце пра́вды, освети́ мя́.

Иису́се, све́те святы́й, облиста́й мя́; Иису́се, боле́зни душе́вныя и теле́сныя изба́ви мя́.

Иису́се, из руки́ сопроти́вныя изми́ мя́; Иису́се, огня́ неугаси́маго и про́чих ве́чных му́к свободи́ мя́.

Иису́се, Сы́не Бо́жий, поми́луй мя́.

О, пресла́дкий и всеще́дрый Иису́се! Приими́ ны́не ма́лое моле́ние сие́ на́ше, я́коже прия́л еси́ вдови́цы две́ ле́пте, и сохрани́ достоя́ние Твое́ от вра́г ви́димых и неви́димых, от наше́ствия иноплеме́нник, от неду́га и гла́да, от вся́кия ско́рби и смертоно́сныя ра́ны, и гряду́щия изми́ му́ки все́х, вопию́щих Ти́: Аллилу́иа.

Этот кондак читается трижды, зате́м икос 1-й и кондак 1-й.

Иису́се пречу́дный, а́нгелов удивле́ние; Иису́се преси́льный, прароди́телей избавле́ние.

Иису́се пресла́дкий, патриа́рхов велича́ние; Иису́се пресла́вный, царе́й укрепле́ние.

Иису́се прелюби́мый, проро́ков исполне́ние; Иису́се преди́вный, му́чеников кре́посте.

Иису́се прети́хий, мона́хов ра́досте; Иису́се преми́лостивый, пресви́теров сла́досте.

Иису́се премилосе́рдый, по́стников воздержа́ние; Иису́се пресла́достный, преподо́бных ра́дование.

Иису́се пречестны́й, де́вственных целому́дрие; Иису́се предве́чный, гре́шников спасе́ние.

Иису́се, Сы́не Бо́жий, поми́луй мя́.

Влады́ко Го́споди Иису́се Христе́ Бо́же мо́й, и́же неизрече́ннаго ра́ди Твоего́ человеколю́бия на коне́ц веко́в во пло́ть оболки́йся от Присноде́вы Мари́и, сла́влю о мне́ Твое́ спаси́тельное промышле́ние, ра́б Тво́й, Влады́ко; песносло́влю Тя́, я́ко Тебе́ ра́ди Отца́ позна́х; благословлю́ Тя́, Его́же ра́ди и Ду́х Святы́й в ми́р прии́де; покланя́юся Твое́й по пло́ти Пречи́стей Ма́тери, такове́й стра́шней та́йне послужи́вшей; восхваля́ю Твоя́ А́нгельская ликостоя́ния, я́ко воспева́тели и служи́тели Твоего́ вели́чествия; ублажа́ю Предте́чу Иоа́нна, Тебе́ крести́вшаго, Го́споди; почита́ю и провозвести́вшия Тя́ проро́ки, прославля́ю апо́столы Твоя́ святы́я; торжеству́ю же и му́ченики, свяще́нники же Твоя́ сла́влю; покланя́юся преподо́бным Твои́м, и вся́ Твоя́ пра́ведники пе́стунствую. Такова́го и толи́ко мно́гаго и неизрече́ннаго ли́ка Боже́ственнаго в моли́тву привожду́ Тебе́, всеще́дрому Бо́гу, ра́б Тво́й, и сего́ ра́ди прошу́ мои́м согреше́нием проще́ния, е́же да́руй ми́ все́х Твои́х ра́ди святы́х, изря́днее же святы́х Твои́х щедро́т, я́ко благослове́н еси́ во ве́ки. Ами́нь.

А҆ка́ѳїстъ сладча́йшемꙋ гдⷭ҇ꙋ на́шемꙋ і҆и҃сꙋ хрⷭ҇тꙋ̀.

Конда́къ а҃, гла́съ и҃.

Возбра́нный воево́до и҆ гдⷭ҇и, а҆́да побѣди́телю, ꙗ҆́кѡ и҆зба́вльсѧ ѿ вѣ́чныѧ сме́рти, похва̑льнаѧ, восписꙋ́ю тѝ, созда́нїе и҆ ра́бъ тво́й: но ꙗ҆́кѡ и҆мѣ́ѧй млⷭ҇рдїе неизрече́нное, ѿ всѧ́кихъ мѧ̀ бѣ́дъ свободѝ, зовꙋ́ща:

І҆и҃се сн҃е бж҃їй, поми́лꙋй мѧ̀.

А҆́гг҃лѡвъ тво́рче, и҆ гдⷭ҇и си́лъ, ѿве́рзи мѝ недоꙋмѣ́нный ᲂу҆́мъ и҆ ѧ҆зы́къ, на похвалꙋ̀ пречⷭ҇тагѡ твоегѡ̀ и҆́мене, ꙗ҆́коже глꙋхо́мꙋ и҆ гꙋгни́вомꙋ дре́вле слꙋ́хъ и҆ ѧ҆зы́къ ѿве́рзлъ є҆сѝ, и҆ глаго́лаше зовы́й такова̑ѧ:

І҆и҃се пречꙋ́дный, а҆́гг҃лѡвъ ᲂу҆дивле́нїе: і҆и҃се преси́льный, прароди́телей и҆збавле́нїе.

І҆и҃се пресла́дкїй, патрїа́рхѡвъ велича́нїе: і҆и҃се пресла́вный, царе́й ᲂу҆крѣпле́нїе.

І҆и҃се прелюби́мый, прⷪ҇ро́кѡвъ и҆сполне́нїе: і҆и҃се преди́вный, мч҃нкѡвъ крѣ́посте.

І҆и҃се прети́хїй, мона́хѡвъ ра́досте: і҆и҃се премлⷭ҇тивый, пресвѵ́терѡвъ сла́досте.

І҆и҃се премлⷭ҇рдый, по́стникѡвъ воздержа́нїе: і҆и҃се пресла́достный, прпⷣбныхъ ра́дованїе.

І҆и҃се пречⷭ҇тны́й, дѣ́вственныхъ цѣломꙋ́дрїе: і҆и҃се предвѣ́чный, грѣ́шникѡвъ сп҃се́нїе.

І҆и҃се сн҃е бж҃їй, поми́лꙋй мѧ̀.

Ви́дѧ вдови́цꙋ ѕѣ́льнѣ пла́чꙋщꙋ гдⷭ҇и, ꙗ҆́коже бо тогда̀ ᲂу҆млⷭ҇рдивсѧ, сы́на є҆ѧ̀ на погребе́нїе несо́ма воскр҃си́лъ є҆сѝ: си́це и҆ ѡ҆ мнѣ̀ ᲂу҆млⷭ҇рдисѧ, чл҃вѣколю́бче, и҆ грѣхмѝ ᲂу҆мерщвле́ннꙋю мою̀ дꙋ́шꙋ воскр҃сѝ, зовꙋ́щꙋю: А҆ллилꙋ́їа.

Ра́зꙋмъ неꙋразꙋмѣ́нный разꙋмѣ́ти фїлі́ппъ и҆щѧ̀, гдⷭ҇и покажѝ на́мъ ѻ҆ц҃а̀, глаго́лаше. ты́ же къ немꙋ̀: толи́кое вре́мѧ сы́й со мно́ю, не позна́лъ ли є҆сѝ, ꙗ҆́кѡ ѻ҆ц҃ъ во мнѣ̀, и҆ а҆́зъ во ѻ҆ц҃ѣ̀ є҆́смь; тѣ́мже неизслѣ́дованне, со стра́хомъ зовꙋ́ ти:

І҆и҃се, бж҃е предвѣ́чный: і҆и҃се, цр҃ю̀ преси́льный.

І҆и҃се, влⷣко долготерпѣли́вый: і҆и҃се, сп҃се премлⷭ҇тивый.

І҆и҃се, храни́телю мо́й пребл҃гі́й: і҆и҃се, ѡ҆чи́сти грѣхѝ моѧ̑.

І҆и҃се, ѿимѝ беззакѡ́нїѧ моѧ̑: і҆и҃се, ѿпꙋстѝ непра̑вды моѧ̑.

І҆и҃се, наде́ждо моѧ̀, не ѡ҆ста́ви менє̀: і҆и҃се помо́щниче мо́й, не ѿри́ни менє̀.

І҆и҃се, созда́телю мо́й, не забꙋ́ди менє̀: і҆и҃се, па́стырю мо́й; не погꙋбѝ менє̀.

І҆и҃се сн҃е бж҃їй, поми́лꙋй мѧ̀.

Си́лою свы́ше а҆пⷭ҇лы ѡ҆блекі́й і҆и҃се, во і҆ерⷭ҇ли́мѣ сѣдѧ́щыѧ, ѡ҆блецы̀ и҆ менѐ ѡ҆бнаже́ннаго ѿ всѧ́кагѡ бл҃готворе́нїѧ, теплото́ю дх҃а ст҃а́гѡ твоегѡ̀, и҆ да́ждь мѝ съ любо́вїю пѣ́ти тебѣ̀: А҆ллилꙋ́їа.

И҆мѣ́ѧй бога́тство млⷭ҇рдїѧ, мытарѝ и҆ грѣ́шники, и҆ невѣ̑рныѧ призва́лъ є҆сѝ і҆и҃се: не пре́зри и҆ менє̀ ны́нѣ, подо́бнагѡ и҆̀мъ, но ꙗ҆́кѡ многоцѣ́нное мѵ́ро, прїимѝ пѣ́снь сїю̀:

І҆и҃се, си́ло непобѣди́маѧ: і҆и҃се, млⷭ҇те безконе́чнаѧ.

І҆и҃се, красото̀ пресвѣ́тлаѧ: і҆и҃се, любы̀ неизрече́ннаѧ.

І҆и҃се, сн҃е бг҃а жива́гѡ: і҆и҃се, поми́лꙋй мѧ̀ грѣ́шнаго.

І҆и҃се, ᲂу҆слы́ши мѧ̀ въ беззако́нїихъ зача́таго: і҆и҃се, ѡ҆чи́сти мѧ̀ во грѣсѣ́хъ рожде́ннаго.

І҆и҃се, наꙋчи́ мѧ непотре́бнаго: і҆и҃се, ѡ҆свѣти́ мѧ те́мнаго.

І҆и҃се, ѡ҆чи́сти мѧ̀ скве́рнаго: і҆и҃се, возведи́ мѧ блꙋ́днаго.

І҆и҃се сн҃е бж҃їй, поми́лꙋй мѧ̀.

Бꙋ́рю внꙋ́трь и҆мѣ́ѧй помышле́нїй сꙋмни́тельныхъ, пе́тръ ᲂу҆топа́ше: ᲂу҆зрѣ́въ же во пло́ти тѧ̀ сꙋ́ща і҆и҃се, и҆ по вода́мъ ходѧ́ща, позна́ тѧ бг҃а и҆́стиннаго, и҆ рꙋ́кꙋ сп҃се́нїѧ полꙋчи́въ, речѐ: А҆ллилꙋ́їа.

Слы́ша слѣпы́й, гдⷭ҇и, мимоходѧ́ща тѧ̀ пꙋте́мъ, вопїѧ́ше: і҆и҃се сн҃е дв҃довъ, поми́лꙋй мѧ̀: и҆ призва́въ ѿве́рзлъ є҆сѝ ѻ҆́чи є҆гѡ̀. просвѣтѝ ᲂу҆́бѡ млⷭ҇тїю твое́ю ѻ҆́чи мы́слєнныѧ се́рдца, и҆ менє̀ вопїю́ща тѝ, и҆ глаго́люща:

І҆и҃се, вы́шнихъ созда́телю: і҆и҃се, ни́жнихъ и҆скꙋпи́телю.

І҆и҃се, преиспо́днихъ потреби́телю: і҆и҃се, всеѧ̀ тва́ри ᲂу҆краси́телю.

І҆и҃се, дꙋшѝ моеѧ̀ ᲂу҆тѣ́шителю: і҆и҃се, ᲂу҆ма̀ моегѡ̀ просвѣти́телю.

І҆и҃се, се́рдца моегѡ̀ весе́лїе: і҆и҃се, тѣ́ла моегѡ̀ здра́вїе.

І҆и҃се сп҃се мо́й, сп҃си́ мѧ: і҆и҃се, свѣ́те мо́й просвѣти́ мѧ.

І҆и҃се, мꙋ́ки всѧ́кїѧ и҆зба́ви мѧ̀: і҆и҃се, сп҃си́ мѧ недосто́йнаго.

І҆и҃се сн҃е бж҃їй, поми́лꙋй мѧ̀.

Бг҃ото́чною кро́вїю, ꙗ҆́коже и҆скꙋпи́лъ є҆сѝ на́съ дре́вле ѿ зако́нныѧ клѧ́твы і҆и҃се, си́це и҆змѝ на́съ ѿ сѣ́ти, є҆́юже ѕмі́й запѧ́тъ ны̀ страстьмѝ плотски́ми, и҆ блꙋ́днымъ наважде́нїемъ, и҆ ѕлы́мъ ᲂу҆ны́нїемъ, вопїю́щыѧ тѝ: А҆ллилꙋ́їа.

Ви́дѣвше ѻ҆́троцы є҆вре́йстїи во ѡ҆́бразѣ человѣ́честѣмъ созда́вшаго рꙋко́ю человѣ́ка, и҆ влⷣкꙋ разꙋмѣ́вше є҆го̀, потща́шасѧ вѣ́твьми ᲂу҆годи́ти є҆мꙋ̀ ѡ҆са́нна вопїю́ще, мы́ же пѣ́снь прино́симъ тѝ глаго́люще:

І҆и҃се, бж҃е и҆́стинный: і҆и҃се, сн҃е дв҃довъ.

І҆и҃се, цр҃ю̀ пресла́вный: і҆и҃се, а҆́гнче непоро́чный.

І҆и҃се, па́стырю преди́вный: і҆и҃се, храни́телю во мла́дости мое́й.

І҆и҃се, корми́телю во ю҆́ности мое́й: і҆и҃се, похвало̀ въ ста́рости мое́й.

І҆и҃се, наде́ждо въ сме́рти мое́й: і҆и҃се, животѐ по сме́рти мое́й.

І҆и҃се, ᲂу҆тѣше́нїе моѐ на сꙋдѣ̀ твое́мъ: і҆и҃се, жела́нїе моѐ, не посрамѝ менє̀ тогда̀.

І҆и҃се сн҃е бж҃їй, поми́лꙋй мѧ̀.

Проповѣ̑дникъ бг҃оно́сныхъ вѣща́нїе и҆ глаго́лы и҆сполнѧ́ѧ і҆и҃се, на землѝ ꙗ҆́вльсѧ, и҆ съ человѣ́ки невмѣсти́мый пожи́лъ є҆сѝ, и҆ болѣ̑зни на́шѧ под̾ѧ́лъ є҆сѝ. ѿню́дꙋже ра́нами твои́ми мы̀ и҆сцѣлѣ́вше, пѣ́ти навыко́хомъ: А҆ллилꙋ́їа.

Возсїѧ̀ вселе́ннѣй просвѣще́нїе и҆́стины твоеѧ̀, и҆ ѿгна́сѧ ле́сть бѣсо́вскаѧ: і҆́дѡли бо, сп҃се на́шъ, не терпѧ́ще твоеѧ̀ крѣ́пости, падо́ша. мы́ же сп҃се́нїе полꙋчи́вше, вопїе́мъ тѝ:

І҆и҃се, и҆́стино, ле́сть ѿгонѧ́щаѧ: і҆и҃се, свѣ́те превы́шшїй всѣ́хъ свѣ́тлостей.

І҆и҃се цр҃ю̀, премога́ѧй всѣ́хъ крѣ́пѡсти: і҆и҃се бж҃е, пребыва́ѧй въ млⷭ҇ти.

І҆и҃се, хлѣ́бе живо́тный, насы́ти мѧ̀ а҆́лчꙋщаго: і҆и҃се, и҆сто́чниче ра́зꙋма, напо́й мѧ̀ жа́ждꙋщаго.

І҆и҃се, ѻ҆де́ждо весе́лїѧ, ѡ҆дѣ́й мѧ̀ тлѣ́ннаго: і҆и҃се, покро́ве ра́дости, покры́й мѧ̀ недосто́йнаго.

І҆и҃се, пода́телю просѧ́щымъ, да́ждь мѝ пла́чь за грѣхѝ моѧ̑: і҆и҃се, ѡ҆брѣ́тенїе и҆́щꙋщихъ ѡ҆брѧ́щи дꙋ́шꙋ мою̀.

І҆и҃се, ѿве́рзителю толкꙋ́щымъ, ѿве́рзи се́рдце моѐ ѻ҆каѧ́нное: і҆и҃се, и҆скꙋпи́телю грѣ́шныхъ, ѡ҆чи́сти беззакѡ́нїѧ моѧ̑.

І҆и҃се сн҃е бж҃їй, поми́лꙋй мѧ̀.

Хотѧ̀ сокрове́ннꙋю та́йнꙋ ѿ вѣ́ка ѿкры́ти, ꙗ҆́кѡ ѻ҆вча̀ на заколе́нїе веде́нъ бы́лъ є҆сѝ і҆и҃се, и҆ ꙗ҆́кѡ а҆́гнецъ прѧ́мѡ стригꙋ́щаго є҆го̀ безгла́сенъ, и҆ ꙗ҆́кѡ бг҃ъ и҆з̾ ме́ртвыхъ воскрⷭ҇лъ є҆сѝ, и҆ со сла́вою на нб҃са̀ возне́слсѧ є҆сѝ, и҆ на́съ совоздви́глъ є҆сѝ, зовꙋ́щихъ: А҆ллилꙋ́їа.

Ди́внꙋю показа̀ тва́рь, ꙗ҆вле́йсѧ творе́цъ на́мъ, без̾ сѣ́мене ѿ дв҃ы воплоти́сѧ, и҆з̾ гро́ба печа̑ти не рꙋши́въ воскр҃се, и҆ ко а҆пⷭ҇лѡмъ две́ремъ затворє́ннымъ съ пло́тїю вни́де. тѣ́мже чꙋдѧ́щесѧ, воспои́мъ:

І҆и҃се, сло́ве неѡб̾име́нный: і҆и҃се, сло́ве несоглѧда́емый.

І҆и҃се, си́ло непостижи́маѧ: і҆и҃се, мꙋ́дросте недомы́слимаѧ.

І҆и҃се, бж҃ество̀ неѡпи́санное: і҆и҃се, гдⷭ҇ьство неисче́тное.

І҆и҃се, црⷭ҇тво непобѣди́мое: і҆и҃се, влⷣчество безконе́чное.

І҆и҃се, крѣ́посте высоча́йшаѧ, і҆и҃се, вла́сте вѣ́чнаѧ.

І҆и҃се, тво́рче мо́й, ᲂу҆ще́дри мѧ̀: і҆и҃се сп҃се мо́й, сп҃си́ мѧ.

І҆и҃се сн҃е бж҃їй, поми́лꙋй мѧ̀.

Стра́ннѡ бг҃а вочл҃вѣ́чшасѧ ви́дѧще, ᲂу҆страни́мсѧ сꙋ́етнагѡ мі́ра, и҆ ᲂу҆́мъ на бжⷭ҇твєннаѧ возложи́мъ: сегѡ́ бо ра́ди бг҃ъ на зе́млю сни́де, да на́съ на нб҃са̀ возведе́тъ, вопїю́щихъ є҆мꙋ̀: А҆ллилꙋ́їа.

Ве́сь бѣ̀ въ ни́жнихъ, и҆ вы́шнихъ ника́коже ѿстꙋпѝ неисче́тный: є҆гда̀ во́лею на́съ ра́ди пострада̀, и҆ сме́ртїю свое́ю на́шꙋ сме́рть ᲂу҆мертвѝ, и҆ воскрⷭ҇нїемъ живо́тъ дарова̀, пою́щымъ:

І҆и҃се, сла́досте серде́чнаѧ: і҆и҃се, крѣ́посте тѣле́снаѧ.

І҆и҃се, свѣ́тлосте дꙋше́внаѧ: і҆и҃се, быстрото̀ ᲂу҆́мнаѧ.

І҆и҃се, ра́досте со́вѣстнаѧ: і҆и҃се, наде́ждо и҆звѣ́стнаѧ.

І҆и҃се, па́мѧте предвѣ́чнаѧ: і҆и҃се, похвало̀ высо́каѧ.

І҆и҃се, сла́во моѧ̀ превознесе́ннаѧ: і҆и҃се, жела́нїе моѐ, не ѿри́ни менє̀.

І҆и҃се, па́стырю мо́й, взыщѝ менѐ: і҆и҃се, сп҃се мо́й, сп҃сѝ менѐ.

І҆и҃се сн҃е бж҃їй, поми́лꙋй мѧ̀.

Всѐ є҆стество̀ а҆́гг҃льское, безпреста́ни сла́витъ прест҃о́е и҆́мѧ твоѐ і҆и҃се на нб҃сѝ, ст҃ъ, ст҃ъ, ст҃ъ, вопїю́ще: мы́ же грѣ́шнїи на землѝ бре́нными ᲂу҆стна́ми вопїе́мъ: А҆ллилꙋ́їа.

Вѣті̑ѧ многовѣща̑нныѧ, ꙗ҆́коже ры̑бы безгла̑сныѧ ви́димъ ѡ҆ тебѣ̀ і҆и҃се сп҃се на́шъ: недоꙋмѣ́ютъ бо глаго́лати, ка́кѡ бг҃ъ непрело́жный, и҆ чл҃вѣ́къ соверше́нный пребыва́еши; мы́ же та́инствꙋ дивѧ́щесѧ, вопїе́мъ вѣ́рнѡ:

І҆и҃се, бж҃е предвѣ́чный: і҆и҃се, цр҃ю̀ ца́рствꙋющихъ.

І҆и҃се, влⷣко владѣ́ющихъ: і҆и҃се, сꙋдїѐ живы́хъ и҆ ме́ртвыхъ.

І҆и҃се, наде́ждо ненаде́жныхъ: і҆и҃се, ᲂу҆тѣше́нїе пла́чꙋщихъ.

І҆и҃се, сла́во ни́щихъ: і҆и҃се, не ѡ҆сꙋди́ мѧ по дѣлѡ́мъ мои̑мъ.

І҆и҃се, ѡ҆чи́сти мѧ̀ по млⷭ҇ти твое́й: і҆и҃се, ѿженѝ ѿ менє̀ ᲂу҆ны́нїе.

І҆и҃се, просвѣтѝ моѧ̑ мы̑сли сердє́чныѧ: і҆и҃се, да́ждь мѝ па́мѧть сме́ртнꙋю.

І҆и҃се сн҃е бж҃їй, поми́лꙋй мѧ̀.

Сп҃стѝ хотѧ̀ мі́ръ восто́че восто́кѡмъ, къ те́мномꙋ за́падꙋ є҆стествꙋ̀ на́шемꙋ прише́дъ, смири́лсѧ є҆сѝ до сме́рти. тѣ́мже превознесе́сѧ и҆́мѧ твоѐ, па́че всѧ́кагѡ и҆́мене, и҆ ѿ всѣ́хъ колѣ́нъ нбⷭ҇ныхъ и҆ земны́хъ слы́шиши: А҆ллилꙋ́їа.

Цр҃ю̀ превѣ́чный, ᲂу҆тѣ́шителю хрⷭ҇тѐ и҆́стинный, ѡ҆чи́сти ны̀ ѿ всѧ́кїѧ скве́рны, ꙗ҆́коже ѡ҆чи́стилъ є҆сѝ де́сѧть прокаже́нныхъ, и҆ и҆сцѣли́ ны, ꙗ҆́коже и҆сцѣли́лъ є҆сѝ сребролюби́вꙋю дꙋ́шꙋ закхе́а мытарѧ̀, да вопїе́мъ тѝ во ᲂу҆миле́нїи, зовꙋ́ще:

І҆и҃се, сокро́вище нетлѣ́нное: і҆и҃се, бога́тство неистощи́мое.

І҆и҃се, пи́ще крѣ́пкаѧ: і҆и҃се, питїѐ неисчерпа́емое.

І҆и҃се, ни́щихъ ѡ҆дѣѧ́нїе: і҆и҃се, вдѡ́въ застꙋпле́нїе.

І҆и҃се, си́рыхъ защи́тниче: і҆и҃се, трꙋжда́ющихсѧ по́моще.

І҆и҃се, стра́нныхъ наста́вниче: і҆и҃се, пла́вающихъ ко́рмчїй.

І҆и҃се, бꙋ́рныхъ ѡ҆ти́шїе: і҆и҃се бж҃е, воздви́гни мѧ̀ па́дшаго.

І҆и҃се сн҃е бж҃їй, поми́лꙋй мѧ̀.

Пѣ́нїе всеꙋмиле́нное приношꙋ́ ти недосто́йный, вопїю́ ти ꙗ҆́кѡ ханане́а: і҆и҃се поми́лꙋй мѧ̀. не дще́рь бо, но пло́ть и҆́мамъ страстьмѝ лю́тѣ бѣсѧ́щꙋюсѧ, и҆ ꙗ҆́ростїю пали́мꙋю, и҆ и҆сцѣле́нїе да́ждь вопїю́щꙋ тѝ: А҆ллилꙋ́їа.

Свѣтопода́тельна свѣти́льника сꙋ́щымъ во тьмѣ̀ неразꙋ́мїѧ, пре́жде гонѧ́й тѧ̀ па́ѵелъ, бг҃оразꙋ́мнагѡ гла́са си́лꙋ внꙋшѝ, и҆ дꙋше́внꙋю быстротꙋ̀ ᲂу҆ѧснѝ: си́це и҆ менє̀ тє́мныѧ зѣ̑ницы дꙋшє́вныѧ просвѣтѝ, зовꙋ́ща:

І҆и҃се, цр҃ю̀ мо́й прекрѣ́пкїй: і҆и҃се, бж҃е мо́й преси́льный.

І҆и҃се, гдⷭ҇и мо́й пребезсме́ртный. і҆и҃се, созда́телю мо́й пресла́вный.

І҆и҃се, наста́вниче мо́й предо́брый: і҆и҃се, па́стырю мо́й преще́дрый.

І҆и҃се, влⷣко мо́й премлⷭ҇тивый: і҆и҃се, сп҃се мо́й премлⷭ҇рдый.

І҆и҃се просвѣтѝ моѧ̑ чꙋ̑вствїѧ потемнє́ннаѧ страстьмѝ: і҆и҃се, и҆сцѣлѝ моѐ тѣ́ло ѡ҆стрꙋпле́нное грѣхмѝ.

І҆и҃се, ѡ҆чи́сти мо́й ᲂу҆́мъ ѿ по́мыслѡвъ сꙋ́етныхъ: і҆и҃се, сохранѝ се́рдце моѐ ѿ по́хотей лꙋка́выхъ.

І҆и҃се сн҃е бж҃їй, поми́лꙋй мѧ̀.

Бл҃года́ть пода́ждь мѝ всѣ́хъ долгѡ́въ рѣши́телю, і҆и҃се, и҆ прїими́ мѧ ка́ющасѧ, ꙗ҆́коже прїѧ́лъ є҆сѝ петра̀ ѿве́ргшагосѧ тебє̀, и҆ призови́ мѧ ᲂу҆ныва́ющаго, ꙗ҆́коже дре́вле па́ѵла гонѧ́ща тѧ̀, и҆ ᲂу҆слы́ши мѧ̀ вопїю́ща тѝ: А҆ллилꙋ́їа.

Пою́ще твоѐ вочл҃вѣ́ченїе, восхвалѧ́емъ тѧ̀ всѝ, и҆ вѣ́рꙋемъ со ѳѡмо́ю, ꙗ҆́кѡ гдⷭ҇ь и҆ бг҃ъ є҆сѝ сѣдѧ́й со ѻ҆ц҃е́мъ, и҆ хотѧ́й сꙋди́ти живы̑мъ и҆ мє́ртвымъ. тогда̀ ᲂу҆́бѡ сподо́би мѧ̀ десна́гѡ стоѧ́нїѧ вопїю́щаго:

І҆и҃се, цр҃ю̀ предвѣ́чный, поми́лꙋй мѧ̀: і҆и҃се, цвѣ́те бл҃гово́нный, ѡ҆бл҃гоꙋха́й мѧ̀.

І҆и҃се, теплото̀ люби́маѧ, ѡ҆грѣ́й мѧ̀: і҆и҃се, хра́ме предвѣ́чный, покры́й мѧ̀.

І҆и҃се, ѻ҆де́ждо свѣ́тлаѧ, ᲂу҆краси́ мѧ: і҆и҃се, би́сере чⷭ҇тны́й, ѡ҆сїѧ́й мѧ̀.

І҆и҃се, ка́меню драгі́й, просвѣти́ мѧ: і҆и҃се, сл҃нце пра́вды, ѡ҆свѣти́ мѧ.

І҆и҃се, свѣ́те ст҃ы́й, ѡ҆блиста́й мѧ̀: і҆и҃се, болѣ́зни дꙋше́вныѧ и҆ тѣле́сныѧ и҆зба́ви мѧ̀.

І҆и҃се, и҆з̾ рꙋкѝ сопроти́вныѧ и҆зми́ мѧ: і҆и҃се, ѻ҆гнѧ̀ неꙋгаси́магѡ, и҆ про́чихъ вѣ́чныхъ мꙋ́къ свободи́ мѧ.

І҆и҃се сн҃е бж҃їй, поми́лꙋй мѧ̀.

Ѽ пресла́дкїй и҆ всеще́дрый і҆и҃се! прїимѝ ны́нѣ ма́лое моле́нїе сїѐ на́ше, ꙗ҆́коже прїѧ́лъ є҆сѝ вдови́цы двѣ̀ лє́птѣ: и҆ сохранѝ достоѧ́нїе твоѐ ѿ вра̑гъ ви́димыхъ и҆ неви́димыхъ, ѿ наше́ствїѧ и҆ноплемє́нникъ, ѿ недꙋ́га и҆ гла́да, ѿ всѧ́кїѧ ско́рби, и҆ смертоно́сныѧ ра́ны, и҆ грѧдꙋ́щїѧ и҆змѝ мꙋ́ки всѣ́хъ, вопїю́щихъ тѝ: А҆ллилꙋ́їа.

Се́й конда́къ глаго́ли три́жды. И҆ па́ки чте́тсѧ а҃-й і҆́косъ, и҆ па́ки конда́къ а҃-й.

Мл҃тва ко гдⷭ҇ꙋ на́шемꙋ і҆и҃сꙋ хрⷭ҇тꙋ̀:

Влⷣко гдⷭ҇и і҆и҃се хрⷭ҇тѐ бж҃е мо́й, и҆́же неизрече́ннагѡ ра́ди твоегѡ̀ чл҃вѣколю́бїѧ на коне́цъ вѣкѡ́въ во пло́ть ѡ҆болкі́йсѧ ѿ приснодв҃ы мр҃і́и! Сла́влю ѡ҆ мнѣ̀ твоѐ сп҃си́тельное промышле́нїе ра́бъ тво́й, влⷣко: пѣсносло́влю тѧ̀, ꙗ҆́кѡ тебє̀ ра́ди ѻ҆ц҃а̀ позна́хъ: бл҃гословлю̀ тѧ̀, є҆гѡ́же ра́ди и҆ дх҃ъ ст҃ы́й въ мі́ръ прїи́де: покланѧ́юсѧ твое́й по пло́ти пречⷭ҇тѣй мт҃ри, таковѣ́й стра́шнѣй та́йнѣ послꙋжи́вшей: восхвалѧ́ю твоѧ̑ а҆́гг҃льскаѧ ликостоѧ̑нїѧ, ꙗ҆́кѡ воспѣва́тели и҆ слꙋжи́тели твоегѡ̀ вели́чествїѧ: ᲂу҆бл҃жа́ю прⷣте́чꙋ і҆ѡа́нна, тебѐ крести́вшаго, гдⷭ҇и: почита́ю и҆ провозвѣсти́вшыѧ тѧ̀ прⷪ҇ро́ки: прославлѧ́ю а҆пⷭ҇лы твоѧ̑ ст҃ы̑ѧ: торжествꙋ́ю же и҆ мч҃нки, сщ҃е́нники же твоѧ̑ сла́влю: покланѧ́юсѧ прпⷣбнымъ твои̑мъ, и҆ всѧ̑ твоѧ̑ првⷣники пѣ́стꙋнствꙋю. Такова́го и҆ толи́кѡ мно́гаго и҆ неизрече́ннаго ли́ка бжⷭ҇твеннаго въ мл҃твꙋ привождꙋ̀ тебѣ̀ всеще́дромꙋ бг҃ꙋ ра́бъ тво́й, и҆ сегѡ̀ ра́ди прошꙋ̀ мои̑мъ согрѣше́нїємъ проще́нїѧ, є҆́же да́рꙋй мѝ всѣ́хъ твои́хъ ра́ди ст҃ы́хъ, и҆зрѧ́днѣе же ст҃ы́хъ твои́хъ щедро́тъ: ꙗ҆́кѡ бл҃гослове́нъ є҆сѝ во вѣ́ки. А҆ми́нь.

Источник