Прокимен воскресни господи помози нам ноты

Глава 53. Отпустительнии тропари воскреснии осми гласов, с Богородичны их, ипакои, и кондаки. И прокимени на утрени пред Евангелием, и на литургии, и аллилуиаре

Камени запечатану от иудей, и воином стрегущим Пречистое Тело Твое, воскресл еси тридневный Спасе, даруяй мирови жизнь. Сего ради силы небесныя вопияху Ти Жизнодавче: слава Воскреснию Твоему Христе, слава царствию Твоему, слава смотрению Твоему, едине Человеколюбче.

Гавриилу вещавшу Тебе Дево, радуйся, со гласом воплощашеся всех Владыка, в Тебе святем Кивоте, якоже рече праведный Давид, явилася еси ширшая небес, поносивши Зиждителя Твоего. Слава всельшемуся в Тя, слава Прошедшему из Тебе. Слава свободившему нас Рождеством Твоим.

Разбойничо покаяние рай окраде, плачь же мироносиц радость возвести, яко воскресл еси Христе Боже, подаяй мирови велию милость.

На утрени прокимен, глас 1: Ныне воскресну, глаголет Господь, положуся во спасение, не обинюся о нем.

Стих: Словеса Господня, словеса чиста:

Таже, Всякое дыхание:

Стих: Хвалите Бога во святых Его: Евангелие воскресное, ряд. По 7-й песни,

Кондак, Подобен: Егда приидеши:

Воскресл еси яко Бог из гроба во славе, и мир совоскресил еси, и естество человеческое яко Бога воспевает Тя, и смерть исчезе. Адам же ликует, Владыко: Ева ныне от уз избавляема, радуется зовущи: Ты еси иже всем подая Христе воскресение.

На хвалитех стихиры воскресны по обычаю. Слава, стихира евангельская. И ныне, поем во вся недели,

Настоящий Богородичен, глас 2:

Преблагословенна еси Богородице Дево, воплощшим бо ся из Тебе ад пленися, Адам воззвася, клятва потребися, Ева свободися, смерть умертвися, и мы ожихом. Тем воспевающе вопием: благословен Христос Бог благоволивый тако, слава Тебе.

Славословие великое, и по скончании славословия, и трисвятаго, глаголем тропарь воскресный:

И в 1-й убо глас, и 3-й, 5-й, 7-й, глаголем сей:

Днесь спасение миру бысть, поем воскресшему из гроба и Начальнику жизни нашея: разрушив бо смертию смерть, победу даде нам, и велию милость.

Во глас же, 2-й, 4-й, 7-й, 8-й, глаголем сей:

Воскрес из гроба, и узы растерзал еси ада, разрушил еси осуждение смерти Господи, вся от сетей врага избавивый, явивый же себе апостолом твоим, послал еси я на проповедь, и теми мир Твой подал еси вселенней, едине Многомилостиве.

На литургии прокимен: Буди Господи милость Твоя на нас, якоже уповахом на Тя.

Стих: Радуйтеся праведнии о Господе, правым подобает похвала. Апостол, ряд.

Аллилуиа: Бог даяй отмщение мне, и покоривый люди под мя.

Стих: Величаяй спасения царева, и творяй милость Христу своему Давиду, и семени его до века.

Егда снизшел еси к смерти, Животе безсмертный, тогда ад умертвил еси блистанием Божества. Егда же и умершия от преисподних воскресил еси, вся силы небесныя взываху: Жизнодавче Христе Боже наш, слава Тебе.

Вся паче смысла, вся преславная Твоя Богородице таинства, чистоте запечатанной, и девству храниму, мати позналася еси неложна, Бога рождши истиннаго. Того моли спастися душам нашим.

По страсти шедше во гроб жены, во еже помазати тело Твое Христе Боже, видеша ангелы во гробе, и ужасошася: глас бо слышаху от них, яко воскресе Господь, даруяй мирови велию милость.

На утрени, прокимен: Востани Господи Боже мой повелением, имже заповедал еси, и сонм людей обыдет тя.

Стих: Господи Боже мой на Тя уповах, спаси мя.

Таже Евангелие воскресно, ряд.

Воскресл еси от гроба всесильне Спасе, и ад видев чудо ужасеся, и мертвии восташа: тварь же видящи, срадуется Тебе, и Адам свеселится, и мир Спасе мой воспевает Тя присно.

На литургии прокимен: Крепость моя и пение мое Господь, и бысть мне во спасение.

Стих: Наказуя наказа мя Господь, смерти же не предаде мя. Апостол, ряд.

Аллилуиа: Услышит тя Господь в день печали, защитит тя имя Бога Иаковля.

Стих: Господи спаси царя, и услыши ны, воньже Аще день призовем тя. Евангелие, ряд.

Да веселятся небесная, да радуются земная, яко сотвори державу мышцею Своею Господь, попра смертию смерть, первенец мертвых бысть: из чрева адова избави нас, и подаде мирови велию милость.

Тя ходатайствовавшую спасение рода нашего, воспеваем Богородице Дево: плотию бо от Тебе восприятою Сын Твой, и Бог наш, Крестом восприим страсть, избави нас от тли, яко Человеколюбец.

Удивляя видением, орошая глаголании, блистаяйся ангел, мироносицам глаголаше: что живаго ищете во гробе? Воста истощивый гробы, тли пременителя разумейте непременнаго. Рцыте Богови: коль страшна дела Твоя, яко род спасл еси человеческий.

На утрени прокимен: Рцыте во языцех , яко Господь воцарися: ибо исправи вселенную, яже не подвижится.

Стих: Воспойте Господеви песнь нову, воспойте Господеви вся земля. Евангелие воскресно, ряд.

Кондак. Подобен: Дева Днесь :

Воскресл еси Днесь из гроба Щедре, и нас возвел еси от врат смертных. Днесь Адам ликует, и радуется Ева: вкупе же и пророцы с патриархи воспевают непрестанно божественную державу власти Твоея.

На литургии прокимен: Пойте Богу нашему, пойте, пойте Цареви нашему, пойте.

Стих: Вси язы́цы восплещите руками, воскликните Богу гласом радования. Апостол, ряд.

Аллилуиа: На Тя Господи уповах, да не постыжуся во век.

Стих: Буди ми в Бога защитителя, и в дом прибежища, еже спасти мя. Евангелие рядовое.

Светлую воскресния проповедь, от ангела уведевше Господни ученицы, и прадеднее осуждение отвергше, апостолом хвалящеся глаголаху : испровержеся смерть, воскресе Христос Бог, даруяй мирови велию милость.

Еже от века утаеное, и ангелом несведомое таинство, Тобою Богородице сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Яже Твоего преславнаго востания, предтекшия мироносицы, апостолом проповедаху Христе, яко воскресл еси яко Бог, подаяй мирови велию милость.

На утрени прокимен: Воскресни Господи, помози нам, и избави нас имене Твоего ради.

Стих: Боже, ушима нашима услышахом, и отцы наши возвестиша нам.

Кондак. Подобен: Явился еси днесь :

Спас и Избавитель мой, из гроба яко Бог, воскреси от уз земнородныя: и врата адова сокруши, и яко Владыка воскресе тридневен.

На литургии прокимен: Яко возвеличишася дела Твоя Господи, вся премудростию сотворил еси.

Стих: Благослови душе моя Господа, Господи Боже мой возвеличился еси зело.

Аллилуиа: Наляцы, и успевай, и царствуй истины ради, и кротости, и правды.

Стих: Возлюбил еси правду, и возненавидел еси беззаконие.

Собезначальное Слово Отцу и Духови, от Девы рождшееся на спасение наше, воспоим вернии, и поклонимся: яко благоволи плотию взыти на Крест, и смерть претерпети, и воскресити умершия славным Воскресением Своим.

Радуйся, Двере Господня непроходимая. Радуйся, Стено и Покрове притекающих к Тебе. Радуйся необуреваемое Пристанище, и неискусобрачная, рождшая плотию Творца Твоего и Бога: молящи не оскудевай о воспевающих, и кланяющихся Рождеству Твоему.

Ангельским зраком ум смущающия, и божественным востанием душею просвещаемыя, мироносицы апостолом благовествоваху: возвестите во языцех воскресение, Господу содействующу чудесы, подающему нам велию милость.

На утрени прокимен: Воскресни Господи Боже мой, да вознесется рука Твоя, яко Ты царствуеши во веки.

Стих: Исповемся Тебе Господи всем сердцем моим, повем вся чудеса Твоя.

Кондак. Подобен: Собезначальное Слово:

Ко аду Спасе мой сошел еси, и врата сокрушивый яко всесилен, умерших яко Создатель, совоскресил еси, и смерти жало сокрушил еси: и Адам от клятвы избавлен бысть Человеколюбче. Темже вси зовем: спаси нас Господи.

На литургии прокимен: Ты Господи сохраниши ны, и соблюдеши ны от рода сего, и во век.

Стих: Спаси мя Господи, яко оскуде преподобный.

Аллилуиа: Милости Твоя Господи во век воспою, в род и род возвещу истину Твою усты моими.

Стих: Зане рекл еси: во век милость созиждется, на небесех уготовится истина Твоя.

Ангельския силы на гробе Твоем, и стрегущии омертвеша, и стояше Мариа во гробе, ищущи пречистаго тела Твоего. Пленил еси ад, не искусився от него: сретил еси Деву, даруяй живот. Воскресый из мертвых Господи, слава Тебе.

Благословенную нарекий Твою Матерь, пришел еси на страсть вольным хотением, возсияв на Кресте, взыскати хотя Адама, глаголя ангелом: срадуйтеся Мне, яко обретеся погибшая драхма. Вся мудре устроивый Боже наш, слава Тебе.

Вольною и животворящею Твоею смертию Христе, врата адова сокрушив яко Бог: отверзл еси нам древний рай, и воскрес, из мертвых, избавил еси от тления живот наш.

На утрени прокимен: Господи воздвигни силу Твою, и прииди во еже спасти нас.

Стих: Пасый Израиля вонми, наставляяй яко овча Иосифа.

Живоначальною дланию, умершия от мрачных удолий, Жизнодавец воскресив всех Христос Бог, воскресение подаде человеческому роду: есть бо всех Спаситель, воскресение, и Живот и Бог всех.

На литургии прокимен: Спаси Господи люди Твоя, и благослови достояние Твое.

Стих: К Тебе Господи воззову, Боже мой, да не премолчиши от Мене .

Аллилуиа: Живый в помощи вышняго, в крове Бога небеснаго водворится.

Стих: Речет Господеви: Заступник мой еси, и прибежище мое, Бог мой, и уповаю на него.

Разрушил еси Крестом Твоим смерть, отверзл еси разбойнику рай, мироносицам плачь преложил еси, и апостолом проповедати повелел еси, яко воскресл еси Христе Боже, даруяй мирови велию милость.

Яко нашего воскресния сокровище, на Тя надеющияся Всепетая, от рова и глубины прегрешений возведи. Ты бо повинныя греху спасла еси, рождшая спасение наше: яже прежде Рождества Дева, и в Рождестве Дева, и по Рождестве паки пребываеши Дева.

Иже наш зрак восприемый, и претерпевый Крест плотски, спаси мя воскресением Твоим Христе Боже, яко Человеколюбец.

На утрени прокимен: Воскресни Господи Боже мой, да вознесется рука Твоя, не забуди убогих Твоих до конца.

Стих: Исповемся Тебе Господи всем сердцем моим: повем вся чудеса Твоя.

Не ктому держава смертная возможет держати человеки, Христос бо сниде сокрушая и разоряя силы ея. Связуем бывает ад, пророцы согласно радуются, предста, глаголюще Спас сущим в вере: изыдите вернии в воскресение.

На литургии прокимен: Господь крепость людем своим даст, Господь благословит люди своя миром.

Стих: Принесите Господеви сынове Божии: принесите Господеви сыны овни.

Аллилуиа: Благо есть исповедатися Господеви, и пети имени Твоему вышний.

Стих: Возвещати заутра милость Твою, и истину Твою на всяку нощь.

С высоты снизшел еси Благоутробне, погребение приял еси тридневное, да нас свободиши страстей, Животе и Воскресение наше, Господи слава Тебе.

Иже нас ради рождейся от Девы, и распятие претерпев Благий, испровергий смертию смерть, и воскресение явлей яко Бог, не презри яже создал еси рукою Твоею. Яви человеколюбие Твое милостиве, приими рождшую Тя Богородицу молящуюся за ны, и спаси Спасе наш люди отчаянныя.

Мироносицы жизнодавца предстоящия гробу, Владыку искаху в мертвых безсмертнаго, и радость благовещения от ангела приемшия, апостолом возвещаху: яко воскресе Христос Бог, подаяй мирови велию милость.

На утрени прокимен: Воцарится Господь во век, Бог твой Сионе в род и род.

Стих: Хвали душе моя Господа, восхвалю Господа в животе моем.

Кондак. Подобен: Яко начатки:

Воскрес из гроба, умершия воздвигл еси, и Адама воскресил еси, и Ева ликует во Твоем воскреснии: и мирстии концы торжествуют: еже из мертвых востанием Твоим, Многомилостиве.

На литургии прокимен: Помолитеся, и воздадите Господеви Богу нашему.

Стих: Ведом во Иудеи Бог, во Израили велие имя Его.

Аллилуиа: Приидите возрадуемся Господеви, воскликнем Богу Спасителю нашему.

Стих: Предварим лице Его во исповедании, и во псалмех воскликнем Ему.

Источник: Типикон сиесть устав. — М.: Издательский Совет Русской Православной Церкви 2002. — 1200 с. ISBN 5-94625-037-Х

Поделиться ссылкой на выделенное

Нажмите правой клавишей мыши и выберите «Копировать ссылку»

Источник

I. Песнопения на Всенощном бдении

Из псалма 103

Благослови, душе моя, Господа! | Благословен еси Господи, | Благослови, душе моя, Господа, | Господи, Боже мой, | возвеличился еси зело. | Благословен еси Господи! | Во исповедание | и в велелепоту | облеклся еси. | Благословен еси Господи! – | Творяии ангелы Своя духи и слуги Своя пламень огненный. | Дивна дела Твоя, Господи! | На горах станут воды. | Посреде гор пройдут воды. | Дивна дела Твоя, Господи. | Вся премудростию сотворил еси. | Слава Те Господи, сотворившему вся.

Слава Отцу, и Сыну, и Святому Духу, и ныне и присно и во веки веков. Аминь.

Аллилуия, аллилуия, аллилуия, слава Тебе Боже. (3-жды).

Блажен муж

иже не иде на совет нечестивых. Аллилуия (3-жды).

Яко весть Господь путь праведных и путь нечестивых погибнет.

Работайте Господеви со страхом, и радуйтеся Ему с трепетом.

Блажени вси надеющиися нань.

Воскресни Господи, спаси мя, Боже мой.

Господне есть спасение, и на людех Твоих благословение Твое.

Слава и ныне. Аллилуия (3-жды). Слава Тебе, Боже.

Господи, воззвах к Тебе, услыши мя.

Услыши мя, Господи. | Господи, воззвах к Тебе, услыши мя; | вонми гласу моления моего, | внегда воззвати ми к Тебе. | Услыши мя, Господи.

Да исправится молитва моя, | яко кадило пред Тобою: | воздеяние руку моею, | жертва вечерняя. | Услыши мя, Господи.

На 10 стихов. – Изведи из темницы душу мою | исповедатися имени Твоему.

Мене ждут праведницы, | дóндеже воздаси ми.

На 8 – Из глубины воззвах к Тебе Господи, | Господи, услыши глас мой.

Да будут уши Твои, | внемлюще гласу моления моего.

На 6 – Аше беззакония назриши Господи, Господи, кто постоит; | яко у тебе очищение есть.

Имене ради Твоего, потерпех Тя Господи, потерпе душа моя в слово Твое, | упова душа моя на Господа.

На 4 – От стражи утренния до нощи, от стражи утренния | да уповает Израиль на Господа.

Яко у Господа милость, и многое у Него избавление, | и Той избавит Израиля от всех беззаконий его.

Хвалите Господа вси язы́цы , | похвалите Его вси людие.

Яко утвердися милость Его на нас, | и истина Господня пребывает во век.

Стихиры воскресны на Господи воззвах: см. стран. 11.

Свете тихий

святыя славы Бессмертнаго Отца Небеснаго, Святаго, Блаженнаго, Иисусе Христе! Пришедше на запад солнца, видевше свет вечерний, | поем Отца, Сына и Святаго Духа, Бога. | Достоин еси во вся времена петь быти гласы преподобными, | Сыне Божий, живот даяй; | тем же мир Тя славит.

Прокимны

В Субботу, гл. 6. Господь воцарися, в лепоту облечеся.

В Воскресенье, гл. 8. Се ныне благословите Господа вси раби Господни.

В Понедельник, гл. 4. Господь услышит мя, внегда воззвати ми к Нему.

Во Вторник, гл. 1. Милость Твоя, Господи, поженет мя вся дни живота моего.

В Среду, гл. 5. Боже, во имя Твое спаси мя, и в силе Твоей суди мя, и в силе Твоей суди ми.

В Четверг, гл. 6. Помощь моя от Господа, сотворшаго небо и землю.

В Пятницу, гл. 7. Боже, заступник мой еси Ты, и милость Твоя предварит мя.

Ныне отпушаеши

раба Твоего, Владыко, | по глаголу Твоему с миром; | яко видеста очи мои | спасение Твое, | еже еси уготовал | пред лицем всех людей, | свет во откровение языков, | и славу людей Твоих | Израиля.

Песнь Пресвятой Богородице.

Гл. 4. Богородице Дево, | радуйся. Благодатная Марие, Господь с Тобою: | Благословенна Ты в женах | и благословен плод чрева Твоего, | яко Спаса родила еси душ наших.

Полиелей. Хвалите Имя Господне

хвалите раби Господа. Аллилуия.

Благословен Господь от Сиона, живый во Иерусалиме. Аллилуия.

Исповедайтеся Господеви, яко благ, яко в век милость Его. Аллилуия.

Исповедайтеся Богу Небесному, яко в век милость Его. Аллилуия.

Тропари воскресны

Гл. 5. Благословен еси Господи, | научи мя оправданием Твоим.

– Ангельский собор удивися, | зря Тебе в мертвых вменившася, | смертную же, Спасе, крепость разоривша, | и с Собою Адама воздвигша, | и от ада вся свобождша.

– Почто мира с милостивыми слезами, | о ученицы, растворяете? | блистаяйся во гробе Ангел мироносицам вешание: | видите вы гроб и уразумейте, | Спас бо воскресе от гроба.

– Зело рано мироносицы течаху | ко гробу Твоему рыдающия, | но предста к ним Ангел и рече: | рыдания время преста, не плачите, | воскресение же Апостолом рцыте.

– Мироносицы жены, с миры пришедшия | ко гробу Твоему, Спасе, рыдаху; | Ангел же к ним рече, глаголя: | что с мертвыми Живаго помышляете? | яко Бог бо воскресе от гроба.

Слава: Поклонимся Отцу, | и Его Сынови, и Святому Духу, | Святей Троице во едином существе | с Серафимы зовуще: | Свят, Свят, Свят еси Господи.

И ныне: Жизнодавца рождши, | греха, Дево, Адама избавила еси, | радость же Еве в печали место подала еси, | падшия же от жизни | к сей направи, | из Тебе воплотивыйся Бог и человек. – Аллилуия, аллилуия, аллилуия, слава Тебе Боже (3-жды).

Антифоны воскресны

Гл. 1. Внегда скорбети ми, | услыши моя болезни, | Господи, Тебе зову.

– Пустынным непрестанное Божественное желание бывает, | мира сущим суетнаго кроме.

Слава и ныне. Святому Духу честь и слава, | яко же Отцу подобает, | купно же и Сыну: | сего ради да поим Троице единодержавие.

Гл. 2. На небо очи пущаю моего сердца | к Тебе Спасе, | спаси мя Твоим осиянием.

Помилуй нас согрешающих Тебе много, на всякий час, | о Христе мой, | и даждь образ прежде конца покаятися Тебе.

Слава и ныне. Святому Духу, | еже царствовати подобает, | освящати подвизати тварь: | Бог бо есть, единосущен Отцу и Слову.

Гл, 3. Плен Сион Ты изъял еси от Вавилона | и мене от страстей | к животу привлецы, Слове.

В юг сеющий слезами Божественными, | жнут класы | радостию присноживотия.

Слава и ныне. Святому Духу всякое благодарение, | яко же Отцу и Сыну сооблистает, | в Нем же вся живут и движутся.

Гл. 4. От юности моея | мнози борют мя страсти, | ко Сам мя заступи | и спаси, Спасе мой.

Ненавидящии Сиона, | посрамитеся от Господа: | яко трава бо огнем | будете изсохше.

Слава и ныне. Святым Духом | всяка душа живится | и чистотою возвышается, | светлеется Троичсским единством священнотайне.

Гл 5. Внегда скорбити мне, | Давидски пою Тебе, Спасе мой: | избави душу мою от языка льстиваго.

Пустынным живот блажен есть: | Божественным рачением воскриляющимся.

Слава и ныне. Святым Духом одержатся вся, | видимая же с невинимыми: | самодержавен бо сый | Троицы един есть не ложно.

Гл. 6. На небо очи мои возвожу, к Тебе, Слове: | ущедри мя, да живу Тебе.

Помилуй нас уничиженных, | устрояя благопотребныя Твоя сосуды, Слове.

Слава и ныне. Святому Духу всякая всеспасательная вина, | аще коему Сей по достоянию дхнет, | скоро вземлет от земных: | восперяет, возращает, устрояет горе.

Гл. 7. Плен Сион от лести обратив, и мене Спасе оживи, изимая от работныя страсти.

В юг сеяй скорби постныя со слезами, | сей радостныя пожнет рукояти | присноживопитания.

Слава и ныне. Святым Духом источник Божественных сокровищ, | от Него же премудрость, разум, страх, | Тому хвала и слава, | честь и держава.

Гл. 8. От юности моея враг ми искушает, | сластми палит мя, | аз же надеяся на Тя, Господи, побеждаю сего.

Ненавидящий Сиона | да будут убо прежде исторжения яко трава: | ссечет бо Христос выя их усечением мук.

Слава и ныне. Святым Духом, еже жити всяческим: Свет от Света Бог велик: | со Отцем поем Ему и с Словом.

Прокимны воскресны

Гл. 1. Ныне воскресну, глаголет Господь, положуся в спасение, не обинюся о Нем.

Гл. 2. Востани Господи Боже мой повелением, им же заповедал еси, и сонм людей обыдет Тя.

Гл. 3. Рцыте во языцех , яко Господь воцарися, ибо исправи вселенную яже не подвижится.

Гл. 4. Воскресни, Господи, помози нам и избави нас имени Твоего ради.

Гл. 5. Воскресни, Господи Боже мой, да вознесется рука Твоя, яко Ты царствуеши во веки.

Гл. 6. Господи, воздвигни силу Твою, и прииди во еже спасти нас.

Гл. 7. Воскресни, Господи Боже мой, да вознесется рука Твоя, нс забуди убогих Твоих до конца.

Гл. 8. Воцарится Господь во век, Бог твой, Сионе, в род и род.

Гл. 6. Воскресение Христово видевше

поклонимся Святому Господу Иисусу, | Единому безгрешному, | Кресту Твоему покланяемся Христе, | и святое воскресение Твое поем и славим, | Ты бо еси Бог наш, | разве Тебе иного не знаем, | имя Твое именуем. | Приидите вси вернин, | поклонимся святому Христову воскресению: | се бо прииде Крестом радость всему миру, | всегда благословяще Господа, | поем воскресение Его; | распятие бо претерпев, | смертию смерть разруши.

Слава. Молитвами Апостолов, | Милостиве, очисти | множество согрешений наших.

И ныне. Молитвами Богородицы, | Милостиве, очисти | множество согрешений наших.

– Помилуй мя, Боже, | по велицей милости Твоей | и по множеству щедрот Твоих | очисти беззаконие мое.

– Воскрес Иисус от гроба, | якоже прорече, | даде нам живот вечный | и велию милость.

Ирмосы смотри в «Песнопениях воскресной службы»

Песнь Пресвятой Богородицы

Величит душа Моя Господа | и возрадовася дух Мой о Бозе Спасе Моем.

– Яко призре на смирение рабы Своея, | се бо от ныне ублажат Мя вси роди.

– Яко сотвори Мне величие Сильный, | и свято имя Его, и милость Его в роды родов боящимся Его.

– Сотвори державу мышцею Своею, | расточи гордыя мыслию сердца их.

– Низложи сильныя со престол, и вознесе смиренныя: | алчущия исполни благ, и богатящияся отпусти тщы.

– Восприят Израиля отрока Своего, | помянути милости, | яко же глагола ко отцем нашим, | Аврааму и семени его даже до века.

К каждому стиху припеваем:

– Честнейшую Херувим | и славнейшую без сравнения Серафим, | без истления Бога Слова рождшую, | сущую Богородицу Тя величаем.

Всякое дыхание да хвалит Господа, | хвалите Господа с небес, | хвалите Его в вышних, | Тебе подобает песнь Богу.

– Хвалите Его вси ангели Его, | хвалите Его вся силы Его. | Тебе подобает песнь Богу.

Слава и ныне. Гл.2. Преблагословенна еси Богородице Дево

Воплотим бо ся из Тебе ад пленися, | Адам воззвася, клятва потребися, | Ева свободней, смерть умертвися и мы ожихом. | Тем воспеваюше вопием: | благословен Христос Бог благоволивый тако, слава Тебе.

Славословие великое

Слава в вышних Богу, | и на земли мир, | в человецех благоволение. | Хвалим Тя, благословим Тя, | кланяем Ти ся, славословим Тя, благодарим Тя | великия ради славы Твоея. | Господи Царю Небесный, | Боже Отче Вседержителю, | Господи Сыне Единродный Иисусе Христе и Святый Душе. | Господи Боже, Агнче Божий, Сыне Отечь, | вземляй грех мира помилуй нас: | вземляй грехи мира приими молитву нашу. | Седяй одесную Отца, помилуй нас: | яко Ты еси един Свят, | Ты еси един Господь, | Иисус Христос, в славу Бога Отца. Аминь. | На всяк день благословлю Тя, и восхвалю имя Твое во веки и в век века. | Сподоби, Господи, в день сей без греха сохранитися нам. | Благословен еси, Господи, Боже отец наших, | и хвально и прославленно имя Твое во веки. Аминь. | Буди, Господи, милость Твоя на нас, яко же уповахом на Тя. | Благословен еси Господи, научи мя оправданием Твоем! | (Трижды). Господи, прибежище был еси нам в род и род. | Аз рех: Господи, помилуй мя, исцели душу мою, яко согреших Тебе. | Господи, к Тебе прибегох, | научи мя творити волю Твою, яко Ты еси Бог мой; | яко у тебе источник живота, | во свете Твоем узрим свет. | Пробави милость Твою ведущим Тя.

Святый Боже, Святый Крепкий, Святый Безсмертный, помилуй нас. (3-жды).

Слава и ныне. Святый Бессмертный. И потом: Святый Боже и т. д.

По славословии тропари воскресны

1, 3, 5 и 7 гл. Днесь спасение миру бысть, | поем Воскресшему из гроба | и Начальнику жизни нашея: | разрушив бо смертию смерть, | победу даде нам и велию милость.

2, 4, 6 и 8 гл. Воскрес из гроба, | и узы растерзал еси ада, | разрушил еси осуждение смерти Господи, | вся от сетей врага избавивый, | явивый же Себе Апостолом Твоим, | послал еси я на проповедь | и теми мир Твой подал еси вселенней, | Едине Многомилостиве.

Утверди, Боже

Благочестивейшаго, Самодержавнейшаго Великаго Государя нашего Императора Николая Александровича, | и Святую Православную Веру, православных христиан | во век века.

Кондак гл. 8. Взбранной Воеводе победительная, | яко избавльшеся от злых | благодарственная восписуем Ти раби Твои, Богородице: | но яко имущая державу непобедимую, | от всяких нас бед свободи, да зовем Ти: | радуйся, Невесто Неневестная.

Источник: И.Г. Айвазов. Для клира и народа. – С.-Петербург: Тип. «Колокол», 1914г.

Вам может быть интересно:

1. Церковное пение, как предмет преподавания в народной школе – протоиерей Василий Металлов
2. Церковное пение в России – протоиерей Димитрий Разумовский
3. Ноты-буквы. Книга 1 – Порфирий Петрович Мироносицкий
4. Знаменный распев и крюковая нотация как основа русского православного церковного пения – протоиерей Борис Николаев
5. Песни св. Романа Сладкопевца на Страстную седмицу в русском переводе – преподобный Роман Сладкопевец
6. Избранные песнопения из Октоиха – святитель Феофан Затворник
7. Осмогласные роспевы трех последних веков Православной Русской Церкви. Часть I – протоиерей Иоанн Вознесенский
8. Стихотворения об истинном счастье христианина (на Новый год) и о силе Божией совершающейся в немощи – архимандрит Порфирий (Виноградов)
9. Религиозные скитания русской интеллигенции нашего времени – Иван Георгиевич Айвазов
10. Устав пения тропарей и кондаков по входе на Литургии – профессор Николай Дмитриевич Успенский

Поделиться ссылкой на выделенное

Нажмите правой клавишей мыши и выберите «Копировать ссылку»

Источник