Жен мироносиц ноты для

ПАСХА. Мироносицы

скачать ноты здесь>>

Слова В. Городецкого
Музыка прот. Игоря Лепишинского

1 вариант

1. Солнце плыло из-за утренней земли,

Мироносицы ко гробу тихо шли,

Скорбь овеяла их облаком седым.

Кто у входа тяжкий камень сдвинет им?

2. Ароматы держат в трепетных руках.

Выплывает солнце в медленных лучах.

Озаряет солнце тёмный, низкий вход.

Камня нет! Отвален камень. Ангел ждёт.

3. Ангел белый над гробницей Божьей встал,

Мироносицам испуганным сказал:

– Не ищите Иисуса: Он воскрес.

Он на небе и опять сойдёт с небес.

4. Тихий ужас, сладкий трепет и восторг

Вестник чуда из сердец двух жен исторг.

Лобызают ткани праздные пелен.

Солнце всплыло. В небе светлый, вечный звон.

2 вариант

1. Солнце плыло из-за утренней земли,

Мироносицы ко гробу тихо шли,

Скорбь овеяла их облаком седым.

Кто от входа тяжкий камень сдвинет им?

2. Ароматы держат в трепетных руках.

Выплывает солнце в медленных лучах.

Озаряет солнце тёмный, низкий вход.

Камня нет! Отвален камень. Ангел ждёт.

3. Ангел белый над гробницей Божьей встал,

Мироносицам испуганным сказал:

– Не ищите Иисуса: Он воскрес.

Он на небе и опять сойдёт с небес.

4. Тихий ужас, сладкий трепет и восторг

Вестник чуда из сердец двух жен исторг.

Лобызают ткани праздные пелен.

Кончен тяжкий, страшный плен.

Все материалы, размещенные на данном сайте были взяты из абсолютно открытых источников в Интернете и представлены здесь только для ознакомления.
Входя на сайт вы автоматически соглашаетесь с данными условиями.

Источник

Триодь Цветная. Песнопения Недели Жен-Мироносиц.

Стихиры:

Глас 1.

Мироно́сицы жены́, ко гро́бу что приидо́сте; / что и́щете жива́го в ме́ртвых? / Воскре́се Госпо́дь, дерза́йте, вопие́т А́нгел.

Со стра́хом приидо́ша жены́ на гроб, / арома́ты те́ло Твое́ пома́зати тща́щияся, / и сие́ не обре́тше, / недоумева́хуся друга́ ко друзе́й, не ве́дуще Воскресе́ния. / Но предста́ им А́нгел, и рече́: / воскре́се Христо́с, / да́руяй нам ве́лию ми́лость.

Приидо́ша на гроб Магдали́на / и друга́я Мари́я и́щуще Го́спода, / и А́нгела ви́деша, я́ко мо́лнию, / седя́ща на ка́мени и глаго́люща им: / что и́щете жива́го с ме́ртвыми; / воскре́се, я́коже рече́: / в Галиле́и Его́ обря́щете. / К Нему́ же возопии́м: / воскресы́й из ме́ртвых, Го́споди, сла́ва Тебе́.

Глас 2.

Почто́ ми́ра со слеза́ми, о учени́цы растворя́ете, / ка́мень отвали́ся, гроб истощи́ся, / ви́дите тлю живото́м попра́нную, / печа́ти свиде́тельствующя я́вственно, / спя́щия лю́те стра́жники непокори́вых, / сме́ртное спасе́ся пло́тию Бо́жиею, ад рыда́ет. / Те́кша ра́достию рцы́те апо́столом: / умертви́вый смерть Христо́с, перворожде́н из ме́ртвых, / вас предваря́ет в Галиле́и.

Воскресе́ние Твое́, Христе́ Спа́се, / всю просвети́ вселе́нную, / и призва́л еси́ Твое́ созда́ние, / Всеси́льне Го́споди, сла́ва Тебе́.

Стих: Помяну́ и́мя Твое́ во вся́ком ро́де и ро́де.

Всех скорбя́щих ра́досте и оби́димых предста́тельнице, / и убо́гих пита́тельнице, стра́нных же утеше́ние, / и же́зле слепы́х, немощны́х посеще́ние, / тружда́ющихся покро́ве и засту́пнице, и си́рых помо́щнице, / Ма́ти Бо́га Вы́шняго Ты еси́, Пречи́стая, / потщи́ся, мо́лимся, спасти́ся рабо́м Твои́м.

Стих: Слы́ши Дщи и виждь, и приклони́ у́хо Твое́.

Вся́кое беззако́ние неща́дно, / вся́кий грех невозде́ржно окая́нный соде́лах, / вся́каго осужде́ния досто́ин есмь, / вины́ покая́ния мне пода́ждь, Де́во, / я́ко да не осужде́н та́мо явлю́ся. / Тя бо напису́ю моли́твенницу, / Тя призыва́ю предста́тельницу, / да мя не посрами́ши, Богоневе́стная.

Стих: Лицу́ Твоему́ помо́лятся бога́тии лю́дстии.

Ино́го прибе́жища, Чи́стая, к Творцу́ и Влады́це мы не и́мамы, / ра́зве Тебе́, Богоневе́сто, / да не отри́неши нас те́плым Твои́м предста́тельством, / ниже́ посрами́ши любо́вию притека́ющих под кров Твой, / Ма́ти Бо́га на́шего, / потщи́ся и Твою́ по́мощь даждь, / и ны́нешняго гне́ва нас спаси́.

Мироно́сицы ра́но бы́вша, / и гроб Твой со тща́нием дости́гша, / иска́ху Тебе́, Христе́, во е́же пома́зати пречи́стое те́ло Твое́. / И а́нгеловыми глаго́лы огласи́вшеся, / радостотво́рныя о́бразы апо́столом пропове́даху, / я́ко воскре́се Нача́льник спасе́ния на́шего, плени́вый смерть, / ми́рови же да́руяй живо́т ве́чный / и ве́лию ми́лость.

Стих: Изведи́ из темни́цы ду́шу мою́, / испове́датися И́мене Твоему́.

Пре́жде век от Отца́ ро́ждшемуся Бо́жию Сло́ву, / вопло́щшемуся от Де́вы Мари́и, / прииди́те поклони́мся: / Крест бо претерпе́в, / погребе́нию предаде́ся, я́ко Сам восхоте́: / и воскре́с из ме́ртвых, / спасе́ мя заблужда́ющаго челове́ка.

Стих: Мене́ ждут пра́ведницы, / до́ндеже возда́си мне.

Христо́с Спас наш, / е́же на ны рукописа́ние пригвозди́в на Кресте́ загла́ди, / и сме́ртную держа́ву упраздни́: / покланя́емся Его́ тридне́вному Воскресе́нию.

Стих: Из глубины́ воззва́х к Тебе́, Го́споди, / Го́споди, услы́ши глас мой.

Со арха́нгелы воспои́м Христо́во Воскресе́ние: / Той бо есть Изба́витель и Спас душ на́ших, / и в сла́ве стра́шной, и кре́пцей си́ле, / па́ки гряде́т суди́ти ми́ру, его́же созда́.

Стих: Да бу́дут у́ши Твои́ / вне́млюще гла́су моле́ния моего́.

Тебе́ распе́ншагося и погребе́ннаго, / А́нгел пропове́да Влады́ку, и глаго́лаше жена́м: / прииди́те ви́дите, иде́же лежа́ше Госпо́дь: / воскре́се бо, я́коже рече́, я́ко всеси́лен. / Те́мже Тебе́ покланя́емся еди́ному безсме́ртному, / Жизнода́вче Христе́, поми́луй нас.

Стих: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.

Кресто́м Твои́м упраздни́л еси́, ю́же от дре́ва кля́тву, / погребе́нием Твои́м умертви́л еси́ сме́рти держа́ву: / воста́нием же Твои́м просвети́л еси́ род челове́ческий. / Сего́ ра́ди вопие́м Ти: / благоде́телю Христе́ Бо́же наш, сла́ва Тебе́.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Отверзо́шася Тебе́ Го́споди, стра́хом врата́ сме́ртная, / вра́тницы же а́довы ви́девше Тя, убоя́шася: / врата́ бо ме́дная сокруши́л еси́, / и вереи́ желе́зныя стерл еси́, / и изве́л еси́ нас от тьмы и се́ни сме́ртныя, / и у́зы на́ша растерза́л еси́.

Стих: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Спаси́тельную песнь пою́ще, от уст возсле́м: / прииди́те вси, в дому́ Госпо́днем припаде́м, глаго́люще: / на Дре́ве распны́йся, и из ме́ртвых воскресы́й, / и сый в не́дрех О́тчих, / очи́сти грехи́ на́ша.

Стих: Я́ко у Го́спода ми́лость, и мно́гое у Него́ избавле́ние, / и Той изба́вит Изра́иля от всех беззако́ний его́.

Мироно́сицы жены́, у́тру глубоку́, / арома́ты взе́мша, Госпо́дня гро́ба достиго́ша, / я́же не наде́яхуся обре́тша / помышля́ху благогове́юще ка́менному отвале́нию, / и друга́ ко друзе́й глаго́лаху: / где суть печа́ти гро́ба; / где есть Пила́това кустоди́а и опа́сное утверже́ние? / Бысть же возвести́тель не разумева́ющим жена́м, / блиста́яйся А́нгел, и глаго́ляй к ним: / что с рыда́нием и́щете жива́го и оживотвори́вшаго род челове́ческий? / Воста́ Христо́с Бог наш из ме́ртвых, я́ко всеси́лен, / подая́й всем нам нетле́ние и жизнь, / просвеще́ние и ве́лию ми́лость.

Стих: Хвали́те Го́спода вси язы́цы, / похвали́те Его́ вси лю́дие.

Почто́ ми́ра со слеза́ми, о учени́цы растворя́ете, / ка́мень отвали́ся, гроб истощи́ся: / ви́дите тлю живото́м попра́нную, / печа́ти свиде́тельствующя я́вственно, / спя́щия лю́те стра́жники непокори́вых, / сме́ртное спасе́ся пло́тию Бо́жиею, ад рыда́ет. / Те́кша ра́достию рцы́те апо́столом: / умертви́вый смерть Христо́с, перворожде́н из ме́ртвых, / вас предваря́ет в Галиле́и.

Стих: Я́ко утвердися милость Его́ на нас, / и истина Госпо́дня пребывает во век.

Мироно́сицы ра́но бы́вша, / и гроб Твой со тща́нием дости́гша, / иска́ху Тебе́, Христе́, во е́же пома́зати пречи́стое те́ло Твое́. / И а́нгеловыми глаго́лы огласи́вшеся, / радостотво́рныя о́бразы апо́столом пропове́даху, / я́ко воскре́се Нача́льник спасе́ния на́шего, плени́вый смерть, / ми́рови же да́руяй живо́т ве́чный / и ве́лию ми́лость.

О вои́стинну беззако́ннии, / печа́тавше ка́мень, бо́льших нас чуде́с сподо́бисте! / И́мут ра́зум стра́жие, / днесь про́йде из гро́ба, и глаго́лаху: / рцы́те, я́ко нам спя́щим, / приидо́ша ученицы́, и украдо́ша Его́. / И кто кра́дет мертвеца́, па́че же и на́га; / Сам воскре́се самовла́стно, я́ко Бог, / оста́вль во гро́бе и погреба́тельная Своя́. / Прииди́те, ви́дите, иуде́е, / ка́ко не расто́рже печа́ти, смерть попра́вый / и ро́ду челове́ческому безконе́чную жизнь да́руяй, / и ве́лию ми́лость.

Пре́йде сень зако́нная, / благода́ти прише́дши, / я́коже бо купина́ не сгара́ше опаля́ема, / та́ко Де́во родила́ еси́, / и Де́ва пребыла́ еси́. / Вме́сто столпа́ о́гненнаго, пра́ведное возсия́ Со́лнце: / вме́сто Моисе́я, Христо́с, / спасе́ние душ на́ших.

Глас 6:

Мироно́сицы жены́, гро́ба Твоего́ дости́гша, / и печа́ти гро́бныя ви́девша, / не обре́тша же пречи́стаго те́ла Твоего́, / рыда́юща со тща́нием приидо́ша, глаго́люща: / кто укра́де на́ше упова́ние; / кто взят ме́ртва на́га сми́рною пома́зана, / Ма́тери еди́но утеше́ние? / О ка́ко ме́ртвыя оживи́вый умертви́ся; / ад плени́вый, ка́ко погребе́ся? / Но воскресни́, Спа́се, самовла́стно, / я́коже рекл еси́, / тридне́вен, спаса́яй ду́ши на́ша.

Слава: Проси́ Ио́сиф те́ло Иису́сово, / и положи́ е́ в но́вом свое́м гро́бе, / подоба́ше бо Ему́ из гро́ба, / я́ко от черто́га проити́. / Сокруши́вый держа́ву сме́рти, / и отве́рзый врата́ ра́йская челове́ком, / Го́споди, сла́ва Тебе́.

И ныне, Богородичен, глас тойже: Творе́ц и Изба́витель мой, Пречи́стая, / Христо́с Госпо́дь из Твои́х ложе́сн проше́д, / в мя оболки́йся, / пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся а́нгельски, ра́дуйся, Влады́чице, / предста́тельство и покро́ве, / и спасе́ние душ на́ших.

Тропарь, кондак, величание.

Тропарь, глас 2:

Егда́ снизше́л еси́ к сме́рти, Животе́ Безсме́ртный, / тогда́ ад умертви́л еси́ блиста́нием Божества́; / егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: / Жизнода́вче, Христе́ Бо́же наш, сла́ва Тебе́.

Слава: Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и благоуха́ньми, / во гро́бе но́ве, закры́в, положи́, / но тридне́вен воскре́сл еси́, Го́споди, / подая́й ми́рови ве́лию ми́лость.

И ныне: Мироно́сицам жена́м, при гро́бе предста́в А́нгел, вопия́ше: / ми́ра ме́ртвым суть прили́чна, / Христо́с же истле́ния яви́ся чуждь. / Но возопи́йте: воскре́се Госпо́дь, / подая́й ми́рови ве́лию ми́лость.

Кондак, глас 2:

Ра́доватися мироно́сицам повеле́л еси́, / плачь прама́тере Е́вы утоли́л еси́ / воскресе́нием Твои́м, Христе́ Бо́же, / апо́столом же Твои́м пропове́дати повеле́л еси́: / Спас воскре́се от гро́ба.

Величание

Велича́ем вас / святы́я мироно́сицы, / и чтем святу́ю па́мять ва́шу, / вы бо мо́лите о нас / Христа́ Бо́га на́шего.

Источник

Неделя третия по Пасхе, святых жен мироносиц и Иосифа Праведнаго

В субботу вечера на малей вечерни

Стихиры воскресны 3. Глас 2 : Пре́жде век от Отца́ ро́ждшемуся: Христо́с Спас наш: Со Арха́нгелы воспои́м Христо́во Воскресе́ние:

И восточен един, глас тойже : Тебе́, распе́ншагося и погребе́ннаго:

Сла́ва : Почто́ ми́ра со слеза́ми: ( Вся сия стихиры ищи на велицей вечерни .)

И ны́не, догматик, глас 2 :

О , преве́лия та́инства!/ Зря́ чудеса́, пропове́дую Божество́:/ Емману́ил бо естества́ у́бо врата́ отве́рзе, я́ко Человеколю́бец;/ де́вства же заключе́ния не разруши́, я́ко Бо́г;/ но си́це от утро́бы про́йде, я́коже слу́хом вни́де;/ та́ко воплоти́ся, я́коже зача́тся./Безстра́стно вни́де, несказа́нно изы́де,/ по проро́ку, глаго́лющему:/ сия́ врата́ заключе́на бу́дут,/ никто́же про́йдет и́ми,/ то́кмо Еди́н Госпо́дь, Бо́г Изра́илев,// име́яй ве́лию ми́лость.

Све́те ти́хий: Прокимен : Госпо́дь воцари́ся:

На стиховне стихира воскресна .

И Богородицы, глас 2 .

Подобен : Егда́ от Дре́ва:

Стих : Помяну́ и́мя Твое́/ во вся́ком ро́де и ро́де.

Всех скорбя́щих Ра́досте,/ и оби́димых Предста́тельнице,/ и убо́гих Пита́тельнице,/ стра́нных же Утеше́ние,/ и Же́зле слепы́х, немощны́х Посеще́ние,/ тружда́ющихся Покро́ве и Засту́пнице,/ и си́рых Помо́щнице,/ Ма́ти Бо́га вы́шняго Ты еси́, Пречи́стая,// потщи́ся, мо́лимся, спасти́ся рабо́м Твои́м.

Стих : Слы́ши, Дщи, и виждь,/ и приклони́ у́хо Твое́.

Вся́кое беззако́ние неща́дно,/ вся́кий гре́х невозде́ржно окая́нный соде́лах,/ вся́каго осужде́ния досто́ин е́смь:/ вины́ покая́ния мне́ пода́ждь, Де́во,/ я́ко да не осужде́н та́мо явлю́ся./ Тя́ бо напису́ю Моли́твенницу,/ Тя́ призыва́ю Предста́тельницу,/ да мя́ не посрами́ши,// Богоневе́стная.

Стих : Лицу́ Твоему́ помо́лятся/ бога́тии лю́дстии.

Ина́го прибе́жища, Чи́стая,/ к Творцу́ и Влады́це/ мы не и́мамы,/ ра́зве Тебе́, Богоневе́сто,/ да не отри́неши нас те́плым Твои́м предста́тельством,/ ниже́ посрами́ши любо́вию притека́ющих под кров Твой,/ Ма́ти Бо́га на́шего:/ потщи́ся, и Твою́ по́мощь даждь,// и ны́нешняго гне́ва нас спаси́.

Сла́ва, и ны́не, глас 2 : Мироно́сицы, ра́но бы́вша: ( Ищи на велицей вечерни .)

Таже : Ны́не отпуща́еши: Трисвятое. По О́тче наш: тропарь, глас 2:

Благообра́зный Ио́сиф,/ с Дре́ва сне́м пречи́стое Твое́ Те́ло,/ плащани́цею чи́стою обви́в/ и благоуха́ньми, во гро́бе но́ве закры́в положи́:/ но тридне́вен воскре́сл еси́, Го́споди,// подая́й ми́рови ве́лию ми́лость.

На велицей вечерни

Христо́с воскре́се: как обычно. Таже псалом предначинательный: Благослови́, душе́ моя́, Го́спода: И кафисма 1-я.

На Го́споди, воззва́х: поставим стихов 10 и поем :

Стихиры воскресны 3, глас 2 .

Стих : Изведи́ из темни́цы ду́шу мою́/ испове́датися и́мени Твоему́.

Пре́жде ве́к от Отца́ ро́ждшемуся Бо́жию Сло́ву,/ вопло́щшемуся от Де́вы Мари́и,/ прииди́те, поклони́мся:/ Кре́ст бо претерпе́в,/ погребе́нию предаде́ся, я́ко Са́м восхоте́,/ и, воскре́с из ме́ртвых,// спасе́ мя́, заблужда́ющаго челове́ка.

Стих : Мене́ ждут пра́ведницы,/ до́ндеже возда́си мне.

Христо́с Спас наш,/ е́же на ны рукописа́ние,/ пригвозди́в на Кресте́, загла́ди/ и сме́ртную держа́ву упраздни́:// покланя́емся Его́ тридне́вному Воскресе́нию.

Стих : Из глубины́ воззва́х к Тебе́, Го́споди,/ Го́споди, услы́ши гла́с мо́й.

Со Арха́нгелы воспои́м Христо́во Воскресе́ние,/ Той бо есть Изба́витель и Спас душ на́ших/ и в сла́ве стра́шной и кре́пцей си́ле// па́ки гряде́т суди́ти ми́ру, его́же созда́.

И восточны 4, глас тойже .

Стих : Да бу́дут у́ши Твои́/ вне́млюще гла́су моле́ния моего́.

Тебе́, распе́ншагося и погребе́ннаго,/ А́нгел пропове́да Влады́ку и глаго́лаше жена́м:/ прииди́те, ви́дите, иде́же лежа́ше Госпо́дь,/ воскре́се бо, я́коже рече́, я́ко Всеси́лен./ Те́мже Тебе́ покланя́емся, Еди́ному Безсме́ртному:// Жизнода́вче Христе́, поми́луй нас.

Стих : А́ще беззако́ния на́зриши, Го́споди, Го́споди, кто́ постои́т?/ Я́ко у тебе ́ очище́ние е́сть.

Кресто́м Твои́м упраздни́л еси́/ ю́же от дре́ва кля́тву,/ погребе́нием Твои́м умертви́л еси́ сме́рти держа́ву,/ воста́нием же Твои́м просвети́л еси́ ро́д челове́ческий./ Сего́ ра́ди вопие́м Ти́:// Благоде́телю Христе́ Бо́же на́ш, сла́ва Тебе́.

Стих : И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Отверзо́шася Тебе́, Го́споди,/ стра́хом врата́ сме́ртная,/ вра́тницы же а́довы, ви́девше Тя, убоя́шася:/ врата́ бо ме́дная сокруши́л еси́,/ и вереи́ желе́зныя стерл еси́,/ и изве́л еси́ нас от тьмы и се́ни сме́ртныя,// и у́зы на́ша растерза́л еси́.

Стих : От стра́жи у́тренния до но́щи, от стра́жи у́тренния,/ да упова́ет Изра́иль на Го́спода.

Спаси́тельную песнь, пою́ще, от уст возсле́м:/ прииди́те, вси в дому́ Госпо́днем припаде́м, глаго́люще:/ на Дре́ве Распны́йся, и из ме́ртвых Воскресы́й,/ и Сый в не́дрех О́тчих,// очи́сти грехи́ на́ша.

Таже стихиры мироносиц самогласны 3, глас 2 .

Стих : Я́ко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

Мироно́сицы жены́ у́тру глубоку́,/ арома́ты взе́мша,/ Госпо́дня гро́ба достиго́ша,/ я́же не наде́яхуся обре́тша,/ помышля́ху, благогове́юще ка́менному отвале́нию,/ и друга́ ко друзе́й глаго́лаху:/ где́ су́ть печа́ти гро́ба?/ Где́ е́сть Пила́това кустоди́я/ и опа́сное утвержде́ние?/ Бы́сть же возвести́тель не разумева́ющим жена́м/ блиста́яйся А́нгел и глаго́ляй к ни́м:/ что́ с рыда́нием и́щете Жива́го/ и оживотвори́вшаго ро́д челове́ческий?/ Воста́ Христо́с Бог наш из ме́ртвых, я́ко Всеси́лен,/ подая́й всем нам нетле́ние и жизнь,// просвеще́ние и ве́лию ми́лость.

Стих : Хвали́те Го́спода, вси́ язы́цы,/ похвали́те Его́, вси́ лю́дие.

Почто́ ми́ра со слеза́ми,/ о учени́цы растворя́ете?/ Ка́мень отвали́ся, гро́б истощи́ся:/ ви́дите тлю́ живото́м попра́нную,/ печа́ти, свиде́тельствующа я́вственно,/ спя́щия лю́те стра́жники непокори́вых,/ сме́ртное спасе́ся Пло́тию Бо́жиею,/ а́д рыда́ет./ Те́кша ра́достию, рцы́те апо́столом:/ умертви́вый сме́рть Христо́с,/ перворожде́н из ме́ртвых,// ва́с предваря́ет в Галиле́и.

Стих : Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Мироно́сицы, ра́но бы́вша/ и гро́б Тво́й со тща́нием дости́гша,/ иска́ху Тебе́, Христе́,/ во е́же пома́зати пречи́стое Те́ло Твое́./ И А́нгеловыми глаго́лы огласи́вшеся,/ радостотво́рныя о́бразы апо́столом пропове́даху,/ я́ко воскре́се Нача́льник спасе́ния на́шего, плени́вый сме́рть,/ ми́рови же да́руяй живо́т ве́чный// и ве́лию ми́лость.

Мироно́сицы жены́, гро́ба Твоего́ дости́гша/ и печа́ти гро́бныя ви́девша,/ не обре́тша же пречи́стаго Те́ла Твоего́,/ рыда́юща, со тща́нием приидо́ша, глаго́люща:/ кто́ укра́де на́ше упова́ние?/ Кто́ взя́т ме́ртва, на́га, сми́рною пома́занна,/ Ма́тере еди́но утеше́ние?/ О, ка́ко ме́ртвыя оживи́вый умертви́ся?/ А́д плени́вый, ка́ко погребе́ся?/ Но воскресни́, Спа́се, самовла́стно,/ я́коже ре́кл еси́, тридне́вен,// спаса́яй ду́ши на́ша.

И ныне, Богородичен, глас 2 :

Пре́йде сень зако́нная,/ благода́ти прише́дши:/ я́коже бо купина́ не сгара́ше опаля́ема,/ та́ко Де́ва родила́ еси́/ и Де́ва пребыла́ еси́./ Вме́сто столпа́ о́гненнаго/ пра́ведное возсия́ Со́лнце:/ вме́сто Моисе́я, Христо́с,// Спасе́ние душ на́ших.

Вход. Све́те ти́хий : Прокимен : Госпо́дь воцари́ся:

На литии стихиры самогласны, глас 1 :

Мироно́сицы жены́, ко гро́бу что приидо́сте?/ Что и́щете Жива́го в ме́ртвых?/ Воскре́се Госпо́дь, дерза́йте,// вопие́т А́нгел.

Со стра́хом приидо́ша жены́ на гро́б,/ арома́ты Те́ло Твое́ пома́зати тща́щияся,/ и сие́ не обре́тше,/ недоумева́хуся друга́ ко друзе́й, не ве́дуще Воскресе́ния./ Но предста́ и́м А́нгел и рече́:// воскре́се Христо́с, да́руяй на́м ве́лию ми́лость.

Приидо́ша на гро́б Магдали́на и друга́я Мари́я,/ и́щуще Го́спода,/ и А́нгела ви́девша, я́ко мо́лнию,/ седя́ща на ка́мени и глаго́люща и́м:/ что́ и́щете Жива́го с ме́ртвыми?/ Воскре́се, я́коже рече́,/ в Галиле́и Его́ обря́щете./ К Нему́ же возопии́м:// воскресы́й из ме́ртвых Го́споди, сла́ва Тебе́.

Проси́ Ио́сиф Те́ло Иису́сово/ и положи́ е в но́вом свое́м гро́бе:/ подоба́ше бо Ему́ из гро́ба, я́ко от черто́га, проити́./ Сокруши́вый держа́ву сме́рти/ и отве́рзый врата́ ра́йская челове́ком// Го́споди, сла́ва Тебе́.

И ныне, Богородичен, глас тойже :

Творе́ц и Изба́витель мо́й, Пречи́стая,/ Христо́с Госпо́дь, из Твои́х ложе́сн проше́д,/ в мя́ оболки́йся,/ пе́рвыя кля́твы Ада́ма свободи́./ Те́мже Ти́, Всечи́стая,/ я́ко Бо́жии Ма́тери же и Де́ве вои́стину,/ вопие́м немо́лчно:/ ра́дуйся а́нгельски, ра́дуйся, Влады́чице,/ Предста́тельство, и Покро́ве,// и Спасе́ние ду́ш на́ших.

На стиховне стихира воскресна, глас 2 :

Воскресе́ние Твое́, Христе́ Спа́се,/ всю просвети́ вселе́нную,/ и призва́л еси́ Твое́ созда́ние,// Всеси́льне Го́споди, сла́ва Тебе́.

Таже стихиры Пасхи с припевы их .

Тебе́, оде́ющагося све́том я́ко ри́зою,/ сне́м Ио́сиф с Дре́ва с Никоди́мом,/ и ви́дев ме́ртва, на́га, непогребе́на,/ благосе́рдный пла́ч восприи́м, рыда́я глаго́лаше:/ увы́ мне́, сладча́йший Иису́се,/ Его́же вма́ле со́лнце на Кресте́ ви́сима узре́вше,/ мра́ком облага́шеся,/ и земля́ стра́хом колеба́шеся,/ и раздира́шеся церко́вная заве́са:/ но се́ ны́не ви́жду Тя́,/ мене́ ра́ди во́лею подъе́мша сме́рть./ Ка́ко погребу́ Тя́, Бо́же мо́й?/ Или́ ка́ко плащани́цею обвию́?/ Ко́има ли рука́ма прикосну́ся нетле́нному Твоему́ Те́лу?/ Или́ ки́я пе́сни/ воспою́ Твоему́ исхо́ду, Ще́дре?/ Велича́ю Стра́сти Твоя́,/ песносло́влю и погребе́ние Твое́ со Воскресе́нием,// зовы́й: Го́споди, сла́ва Тебе́.

И ныне : Воскресе́ния день: и Христо́с воскре́се: единожды .

Таже : Ны́не отпуща́еши: Трисвятое. По Отче наш: Богоро́дице Де́во: трижды .

Аще ли случится не быти бдению : поются на Го́споди, воззва́х : стихиры воскресны 4 и мироносиц с литийными на 6. Вход. Прокимен. На стиховне стихиры Пасхи. Слава, и ныне, глас 5 : Тебе́, оде́ющагося све́том : На полунощнице канон Троичен поется по обычаю .

На утрени

На Бог Госпо́дь: тропарь, глас 2 :

Егда́ снизше́л еси́ к сме́рти, Животе́ безсме́ртный,/ тогда́ ад умертви́л еси́ блиста́нием Божества́:/ егда́ же и уме́ршия от преиспо́дних воскреси́л еси́,/ вся Си́лы Небе́сныя взыва́ху:// Жизнода́вче Христе́, Бо́же наш, сла́ва Тебе́. ( Дважды .)

Благообра́зный Ио́сиф,/ с Дре́ва снем пречи́стое Твое́ Те́ло,/ плащани́цею чи́стою обви́в/ и благоуха́ньми, во гро́бе но́ве закры́в положи́:/ но тридне́вен воскре́сл еси́, Го́споди,// подая́й ми́рови ве́лию ми́лость.

Мироно́сицам жена́м, при гро́бе предста́в, А́нгел вопия́ше:/ ми́ра ме́ртвым су́ть прили́чна,// Христо́с же истле́ния яви́ся чу́ждь./ Но возопи́йте: воскре́се Госпо́дь,// подая́й ми́рови ве́лию ми́лость.

По 1 – м стихословии седальны, глас 2 :

Ка́мень гро́бный запеча́тати не возбрани́в, ка́мень ве́ры, воскресы́й, по́дал еси́ всем: Го́споди, сла́ва Тебе́.

Стих : Воскресни́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

Не́дро пречи́стое в вы́шних не истощи́вый, погребе́ние и Воскресе́ние о всех прия́л еси́: Го́споди, сла́ва Тебе́.

Слава, и ныне, Богородичен :

Вся́ па́че смы́сла, вся́ пресла́вная Твоя́, Богоро́дице, та́инства: чистоте́ запеча́танней и де́вству храни́му, Ма́ти позна́лася еси́ нело́жна, Бо́га ро́ждши и́стиннаго. Того́ моли́ спасти́ся душа́м на́шим.

По 2 – м стихословии седальны, глас 2 :

Мироно́сицы, у́тро прише́дшия и гроб тощ уви́девшия, апо́столом глаго́лаху: тле́ние низложи́ Держа́вный и су́щия во а́де исхити́ уз; пропове́дите дерзнове́нием, я́ко воскре́се Христо́с Бог, да́руяй ми́рови ве́лию ми́лость.

Стих : Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Ми́ры погребе́ния Твоего́ жены́ нося́ща, тай ко гро́бу приидо́ша ура́нше, иуде́йския боя́щеся де́рзости и во́инов предзря́ще утвержде́ние. Но естество́ немощно́е му́жество победи́: я́ко наме́рение ми́лостивное Бо́гу угоди́. Прили́чно у́бо взыва́ху: воскресни́, Го́споди, помози́ нам и изба́ви нас, сла́вы ра́ди и́мене Твоего́.

Сла́ва, и ны́не, Богородичен :

Препросла́влена еси́, Богоро́дице Де́во! Пое́м Тя, Кресто́м бо Сы́на Твоего́ низложи́ся ад, и сме́рть умертви́ся, умерщвле́ннии воста́хом и живота́ сподо́бихомся, рай восприя́хом, дре́внее наслажде́ние. Тем благодаря́ще, славосло́вим, я́ко Держа́внаго, Христа́, Бо́га на́шего, и Еди́наго Многоми́лостиваго.

По непорочнах тропари : А́нгельский собо́р :

Ектения малая. Ипакои, глас 2 :

По Стра́сти ше́дше во гроб жены́, во е́же пома́зати Те́ло Твое́, Христе́ Бо́же, ви́деша А́нгелы во гро́бе и ужасо́шася, глас бо слы́шаху от них: я́ко воскре́се Госпо́дь, да́руяй ми́рови ве́лию ми́лость.

И абие степенны, глас 2 .

На Не́бо о́чи пуща́ю/ моего́ се́рдца,/ к Тебе́, Спа́се:// спаси́ мя Твои́м осия́нием.

Поми́луй на́с, согреша́ющих Тебе́/ мно́го на вся́кий ча́с,/ о Христе́ мо́й,// и да́ждь ми́ о́браз пре́жде конца́ пока́ятися Тебе́.

Сла́ва : Свято́му Ду́ху/ е́же ца́рствовати подоба́ет,/ освяща́ти, подвиза́ти тварь:// Бог бо есть, Единосу́щен Отцу́ и Сло́ву.

А́ще не Госпо́дь бы был в нас,/ кто дово́лен цел сохране́н бы́ти от врага́,// ку́пно и человекоуби́йцы?

Зубо́м и́х не преда́ждь, Спа́се, Твоего́ раба́,/ и́бо льво́вым о́бразом// на мя подвиза́ются врази́ мои́.

Сла́ва : Свято́му Ду́ху/ живонача́лие и честь:/ вся бо созда́нная, я́ко Бог сый,// си́лою соблюда́ет во Отце́, Сы́ном же.

Наде́ющиися на Го́спода/ уподо́бишася горе́ святе́й:// и́же ника́коже дви́жутся прило́ги вра́жиими.

В беззако́ния рук свои́х/ да не про́струт боже́ственне живу́щии:// не оставля́ет бо Христо́с жезла́ на жре́бии Свое́м.

Слава : Святы́м Ду́хом/ то́чится вся́ка прему́дрость:/ отсю́ду благода́ть апо́столом,/ и страда́льчествы венча́ются му́ченицы,// и проро́цы зрят.

Прокимен, глас 2 : Воста́ни, Го́споди Бо́же мой, повеле́нием, и́мже запове́дал еси́,/ и сонм люде́й обы́дет Тя.

Стих : Го́споди Бо́же мой, на Тя упова́х, спаси́ мя.

Евангелие утреннее воскресно 3 – е, от Марка, зачало 71 : Воскре́с Иису́с зау́тра в пе́рвую суббо́ту: Таже : Воскресе́ние Христо́во: трижды. Псалом 50, и прочее .

Канон Пасхи со ирмосом и с Богородичны на 6. И мироносиц на 8, творение господина Андрея Критскаго .

Ирмос : Воскресе́ния день:

Очи́стим чу́вствия: Небеса́ у́бо досто́йно:

Богородичны : Умерщвле́ния преде́л: Воскре́сшаго ви́девши Сы́на:

Ин канон, мироносиц, глас 2 .

Ирмос : Моисе́йскую пе́снь восприи́мши, возопи́й, душе́:/ Помо́щник и Покрови́тель бы́сть мне́ во спасе́ние,/ Се́й мо́й Бо́г,// и просла́влю Его́.

Распя́лся еси́ Пло́тию, Безстра́стный естество́м О́тчим, прободе́н бы́л еси́ в ре́бра, Источи́вый ми́рови Кро́вь и во́ду: Ты́ Бо́г на́ш, и прославля́ем Тя́.

Кре́ст Тво́й почита́ю, и погребе́ние сла́влю, Бла́же, и пою́, и покланя́юся воста́нию Твоему́, и взыва́ю: Ты́ Бо́г на́ш, и прославля́ем Тя́.

А́ще и вкуси́л еси́ же́лчи, Сла́досте церко́вная, но источи́л еси́ нам нетле́ние от ребр Твои́х: Ты Бог наш, и прославля́ем Тя.

Вмени́лся еси́, Спа́се, с ме́ртвыми, ме́ртвыя воздви́гнувый, вкуси́л еси́ тли́, истле́ния бо вся́ко не позна́л еси́: Ты́ Бо́г на́ш, и прославля́ем Тя́.

Да весели́тся Сио́н, да ра́дуется и Не́бо, воскре́се Христо́с, ме́ртвыя воздви́гнувый, песносло́вящия: Ты́ Бо́г на́ш, и прославля́ем Тя́.

Плащани́цами обви́в Ио́сиф Те́ло Твое́, Христе́, во гро́бе но́ве положи́ Тя, Спасе́ние: Ты же ме́ртвыя, я́ко Бог, воскреси́л еси́.

Предвари́вшия у́тро жены́ ви́деша Христа́ и боже́ственным вопия́ху ученико́м: вои́стину Христо́с воскре́се, прииди́те, с на́ми воспо́йте Его́.

Слава, Троичен : Всесвята́я Тро́ице, Еди́но Божество́, Безнача́льная Еди́нице, О́тче и Сы́не и Боже́ственный Ду́ше, спаса́й мир: Ты Бог наш, и прославля́ем Тя.

И ныне, Богородичен : Дре́внюю кля́тву разреши́вши, Чи́стая, во утро́бе Твое́й возрасти́ла еси́ нам благослове́ние, Младе́нца роди́вши: Сей бо Бог наш, а́ще и Плоть но́сит.

Катавасия : Воскресе́ния день:

Ирмос : Прииди́те, пи́во пие́м но́вое:

Ны́не вся испо́лнишася све́та: Вчера́ спогребо́хся Тебе́, Христе́:

Богородичны : На нетле́нную жизнь: Бо́га, Его́же родила́ еси́:

Ирмос : Непло́дствовавший мой ум/ плодоно́сен, Бо́же, покажи́ ми,/ Де́лателю до́брых, Насади́телю благи́х,// благоутро́бием Твои́м.

Дла́ни на Кресте́ просте́рл еси́, Иису́се, язы́ки вся, от пре́лести собра́в, к позна́нию Твоему́ созва́л еси́, Спа́се.

Иуде́йстии лю́дие Пила́ту вопию́т: отпусти́ нам злоде́йственнаго разбо́йника, возьми́, возьми́, распни́ Безгре́шнаго.

Распе́ншуся Тебе́, Христе́, помрачи́ся све́т, земля́ потрясе́ся, и из гробо́в ме́ртвии воста́ша мно́зи, стра́хом держа́вы Твоея́.

Предстоя́щи Кресту́, А́гница Твоя́, Иису́се, пла́чем вопия́ше: ка́мо и́деши, Сы́не? Ка́мо гряде́ши, А́гнче, за все́х закла́выйся?

Покланя́юся Твоему́ Кресту́, воспева́ю и погребе́ние, почита́ю Стра́сти, и гво́здия руку́, и копие́, Иису́се, и Воскресе́ние Твое́.

Воскре́сл еси́, Иису́се, плене́н бысть враг, Ада́м изба́вися и Е́ва с ним от уз и тли Воскресе́нием Твои́м.

Воскре́сшу Тебе́, Христе́, сокруши́шася вереи́ и врата́ а́дова, и сме́ртныя у́зы разруши́шася а́бие стра́хом держа́вы Твоея́.

Богоприе́мче Ио́сифе, гряди́, ста́ни с на́ми: воскре́се, зовы́й, Иису́с Изба́витель, воздви́гнувый Ада́ма благоутро́бием Свои́м.

Да ра́дуется с на́ми ученико́в двоенадеся́тица, с мироно́сицами жена́ми, и Ио́сифом, и со други́ми ученики́ и учени́цами Христо́выми.

Слава, Троичен : Со Отце́м и Сы́ну и Ду́ху Пра́вому, Еди́ному Естеству́ покланя́юся и воспева́ю, Ли́цы разделя́я, и Существо́м соединя́я.

И ныне, Богородичен : Блаже́нна еси́, Чи́стая, из ко́рене Иессе́ова су́щая, из него́же Же́зл и Цве́т, Христа́, по пло́ти на́с ра́ди возрасти́вшая.

Катавасия : Прииди́те, пи́во пие́м но́вое:

Кондак Пасхи, глас 8 : А́ще и во гроб снизше́л еси́:

Таже седален, глас 2 .

Подобен : Вы́шних ища́:

Ми́ра те́пле гро́бу прино́сят жены́, Спа́се, А́нгела све́тлостию ду́ши веселя́ху, и Бо́га Тя всех пропове́даху, и ученико́м вопия́ху: вои́стину воскре́се из гро́ба всех Жизнь.

Слава, и ныне, глас тойже :

Ученико́в Твои́х лик с мироно́сицами жена́ми ра́дуется согла́сно: о́бщий бо пра́здник с ни́ми пра́зднуют, в сла́ву и честь Твоего́ Воскресе́ния. И те́ми вопие́м Ти, Человеколю́бче Го́споди: лю́дем Твои́м пода́ждь ве́лию ми́лость.

Ирмос : На боже́ственней стра́жи:

Му́жеский у́бо пол: Я́ко единоле́тный А́гнец: Богооте́ц у́бо Дави́д:

Богородичны : Созда́вый Ада́ма: Его́же родила́ еси́:

Ирмос : Е́же от Де́вы Твое́ Рождество́ проро́к предзря́,/ воспропове́даше вопия́:/ слух Твой услы́шах и убоя́хся,/ я́ко от ю́га и из горы́ святы́я приосене́нныя// прише́л еси́, Христе́.

Кресто́м плени́л еси́ а́дово чре́во, и совоздви́гл еси́ ме́ртвыя, и сме́рти разруши́л еси́ мучи́тельство: те́мже и́же от Ада́ма покланя́ющиися, пое́м погребе́ние Твое́ и воста́ние, Христе́.

Благоволи́вый, Спа́се на́ш, за благоутро́бие ми́лости пригвозди́тися на Кресте́, и от пра́отчия изба́вити ны́ кля́твы, разреши́ у́зы мно́гих мои́х согреше́ний: мо́жеши бо, ели́ка хо́щеши, твори́ти.

На Кресте́ пригвозди́вый мою́ дре́внюю кля́тву и источи́вый мне, Спа́се, благослове́ние Кро́вию от ребр Твои́х, разреши́ у́зы мно́гих мои́х согреше́ний: мо́жеши бо, ели́ка хо́щеши, твори́ти.

Ад, Спа́се, срет Тя в преиспо́дних, огорчи́ся, помышля́я, я́ко я́же дре́вле пожре́ти возмоги́й, ны́не нево́лею отда́в, истязу́ется в до́льних, и пленя́емь и обнажа́емь быва́ет ме́ртвых.

А́ще и ка́мень запеча́тася с кустоди́ею, о беззако́ннии врази́, но воскре́се Госпо́дь, я́коже прорече́, разреша́я у́зы мно́гих мои́х согреше́ний: мо́жет бо, ели́ка хо́щет, твори́ти.

Воскресы́й из гро́ба, и Плени́вый а́да, и Оживи́вый ме́ртвыя, и нетле́ние Источи́вый мне Твои́м воста́нием, разреши́ у́зы мно́гих мои́х согреше́ний: мо́жеши бо, ели́ка хо́щеши, твори́ти.

Вои́стину постыди́теся, беззако́ннии, Христо́с бо воскре́се и совоздви́же ме́ртвыя, зовы́й: дерза́йте, Аз победи́х мир. Ве́руйте у́бо Ему́ или́ умолчи́те, лестцы́, отмета́ющиися Воскресе́ния Его́.

Мироно́сицам, е́же ра́дуйтеся, воскресы́й от гро́ба возгласи́в, Бла́же, и апо́столом пропове́дайте воста́ние Мое́, разреши́ у́зы мно́гих мои́х согреше́ний: мо́жеши бо, ели́ка хо́щеши, твори́ти.

Ио́сифа благообра́знаго, ревни́теля благоче́стия, сове́тника и ученика́, с мироно́сицами почти́м и апо́столами, зову́ще с ни́ми и ве́рно воспева́юще Спа́сово Воскресе́ние све́тло.

Слава, Троичен : Пресу́щнаго Божества́ неразде́льную сла́ву кто́ возмо́жет изрещи́? Еди́но бо естество́м су́щи Тро́ица пое́тся Безнача́льная, сра́сленная я́ко Еди́ница, в Тро́ице пева́емая Ипоста́сьми просты́ми.

И ныне, Богородичен : Во чре́во Твое́ Все́льшагося безму́жно ро́ждшая, Ма́ти Де́во Чи́стая, непреста́нно моли́, я́ко Богоро́дица, разреши́ти у́зы мно́гих мои́х согреше́ний: мо́жеши бо, ели́ка хо́щеши, помощи́.

Катавасия : На боже́ственней стра́жи:

Ирмос : Утренюем у́треннюю глубоку́:

Безме́рное Твое́ благоутро́бие: Присту́пим, свещено́снии:

Богородичны : Просвеща́ется боже́ственными: Не разве́рзл еси́ врата́:

Ирмос : Мглу души́ моея́, Спа́се мой, разгна́в,/ све́том за́поведей Твои́х озари́ мя,// я́ко Еди́н Царь ми́ра.

Ты пе́рвую оде́жду мою́, ю́же ми истка́, увы́ мне, се́ятель греха́, совле́кл еси́, Спа́се мой, обле́кся в мя.

Ли́ствие смоко́вное сши мне грех мой: увы́ мне, не сохра́ншему, Спа́се мой, пречи́стую за́поведь Твою́ змии́ным сове́том.

Уязви́вшуюся ду́шу мою́ разбо́йническими помышле́ньми мои́ми, предста́вый И́же от Мари́и и еле́й возлия́в, исцели́ Христо́с.

У Креста́ предстоя́щи, Пречи́стая Богоро́дица Ма́терски взыва́ше: оста́вил Мя́ еси́ еди́ну, о Сы́не Мо́й и Бо́же!

Ты злонача́льнаго зми́я ору́жием Креста́ Твоего́ низложи́в, Твои́м воста́нием сокруши́л еси́ жа́ло сме́рти, Иису́се.

Где твое́, сме́рте, жа́ло? Где твоя́, а́де, побе́да? Ада́м да свопие́т: сокруши́лся еси́ оживле́нием Воздви́гшаго ме́ртвыя.

Мироно́сицы жены́, гро́ба Твоего́ дости́гшия, Оживи́вшаго до́льных, глас слы́шаху, глаго́лющий: воскре́се Христо́с.

Благочести́вых мироно́сиц па́мять соверша́юще и всех учени́к Твои́х, в све́тлом Твое́м воста́нии воспева́ем Тя, Христе́.

Благообра́знаго вси почти́м досто́йно, и́же Те́ло Госпо́дне от Дре́ва сня и погребе́ ве́рно.

Слава, Троичен : Тебе́, Бо́гу и Отцу́ и Сы́ну и Ду́ху, покланя́юся, Трем Ипоста́сем, и Еди́но Три ве́рую, Существо́м Еди́нем.

И ныне, Богородичен : Тя, безсе́менным рождество́м Роди́вшую па́че естества́ обнови́вшаго естество́ Христа́, Еди́наго Влады́ку, воспева́ем, ве́рнии.

Катавасия : Утренюем у́треннюю глубоку́:

Ирмос : Снизше́л еси́ в преиспо́дняя земли́:

Сохрани́в це́ла зна́мения, Христе́: Спа́се мой, живо́е же и неже́ртвенное:

Богородичны : Возведе́ся дре́вле: Сни́де в преиспо́дняя земли́:

Ирмос : Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь:/ но я́коже Ио́ну от зве́ря,// и мене́ от страсте́й возведи́ и спаси́ мя.

Мертв есть ад, дерза́йте, земноро́днии, Христо́с бо, на Дре́ве ви́сяй, ве́рже ору́жие нань, и лежи́т мертв: я́же бо имя́ше, плени́ся, обнажи́вся.

Плени́ся ад, дерза́йте, ме́ртвии, и гро́би отверзо́шася, воста́ните от а́да, вопие́т вам Христо́с, вся прише́дый изба́вити от сме́рти и тли.

Ме́ртвыя я́коже возмо́г поже́рл еси́ иногда́, ны́не истязу́емь, а́де, отда́ждь Ми, вопие́т тебе́ Жизнода́вец и Бог, вся прише́дый изба́вити от несы́таго твоего́ чре́ва.

Жены́ мироно́сицы, что тщите́ся про́чее? Что же Живо́му ми́ра прино́сите? Воскре́се Христо́с, я́коже предрече́. Да преста́нут ва́ша сле́зы, преше́дшия на ра́дость.

Плащани́цею Тя, Христе́, обви́в, Ио́сиф благообра́зный во гро́бе положи́: миропома́зав же разоре́нный Твоего́ Телесе́ храм, привали́ ка́мень вели́кий ко гро́бу.

Госпо́дь воскре́се, плени́вый врага́, и у́зники исто́ргнув, возведе́ вся, и первозда́ннаго Ада́ма, того́ возставля́я, я́ко Благоутро́бен и Человеколю́бец Бог.

Слава, Троичен : Тро́ицу во Еди́нстве воспои́м, ве́рнии, с Сы́ном Отца́ сла́вяще, и Ду́ха Единосу́щна Сы́ну, и су́ща во Отце́ Собезнача́льнаго и Присносу́щнаго Бо́га.

И ныне, Богородичен : Во чре́ве невозде́ланно зачала́ еси́, Чи́стая, нетле́ния грозд, я́ко лоза́, из Нея́же безсме́ртия то́ки, я́коже вино́, нам источа́ют ве́чную жизнь.

Катавасия : Снизше́л еси́ в преиспо́дняя земли́:

Ра́доватися мироно́сицам повеле́л еси́,/ пла́ч прама́тере Е́вы утоли́л еси́/ Воскресе́нием Твои́м, Христе́ Бо́же,/ апо́столом же Твои́м пропове́дати повеле́л еси́:// Спа́с воскре́се от гро́ба.

На гро́б Тво́й, Спа́се, мироно́сицы иду́щия, к себе́ недоумева́хуся умо́м и веща́ху: кто́ на́м ка́мень отвали́т гро́бный? И воззре́вша ви́дят, я́ко ка́мень отвале́н бе́, зра́ку же А́нгелову со одея́нием дивля́хуся, содержи́ми же бя́ху тре́петом и бежа́ти помышля́ху. И к ни́м ю́ноша возопи́: не бо́йтеся вы́, Его́же и́щете воста́, прииди́те, ви́дите ме́сто, иде́же лежа́ше Те́ло Иису́сово, и, ско́ро ше́дшия, возвести́те ученико́м:// Спа́с воскре́се от гро́ба.

Ирмос : О́троки от пе́щи Изба́вивый:

Жены́ с ми́ры богому́дрыя: Сме́рти пра́зднуем умерщвле́ние: Я́ко вои́стину свяще́нная:

Богородичны : Умертви́в Сын Твой смерть: Всем ца́рствуяй созда́нием:

Ирмос : Херуви́мы подража́юще, о́троцы в пещи́ ликовствова́ху, вопию́ще:/ благослове́н еси́, Бо́же,/ я́ко и́стиною и судо́м наве́л еси́ сия́ вся́,/ гре́х ра́ди на́ших,// препе́тый и препросла́вленный во вся́ ве́ки.

Ты, я́ко Человеколю́бец, хотя́й вся́ спасти́ от пре́лести, я́же созда́л еси́, претерпе́л еси́ пригвозди́тися на Кресте́, да погребе́нный о́браз страстьми́, се́й Пло́тию Твое́ю обнови́ши, Спа́се, и, а́д низложи́в, воскреси́л еси́ и уме́ршия с Собо́ю.

На Кресте́ возвыша́емь, вся призва́л еси́ к Себе́, Ще́дре, я́коже обеща́л еси́, Бла́же: я́ко вои́стину вся сия́ грехо́в ра́ди на́ших пострада́ти благоволи́л еси́. Те́мже и разбо́йнику ра́йская врата́ отве́рзл еси́, Спа́се.

Ты храм теле́сный воздви́гл еси́, разоре́нный, тридне́вно из гро́ба, я́коже обеща́л еси́, Бла́же, да вои́стину ска́жеши сла́ву Твою́, ю́же нам источа́еши ве́рою, у́зы разреши́в, и́хже держа́ше дре́вле ад свя́занных.

О , иуде́йское безу́мие! О, неи́стовство беззако́нных! Что́ неве́рное ви́девше, не ве́ровасте Христу́? Я́ко немощны́я не сло́вом ли воздви́же? Или́ я́ко ве́сь ми́р То́й не спасе́ ли? Да уверя́ют ва́с поне́ во́ини или́ воскре́сшие из ме́ртвых.

Омертве́вшии стра́жие ны́не да глаго́лют, ка́ко укра́ден бысть, Его́же не ви́деша неразу́мнии всегда́? А́ще бо воскре́сша не ви́деша, ни ощути́ша, ка́ко укра́дена Сего́ разуме́ти можа́ху когда́? Да уве́рит вы поне́ ка́мень сей и погреба́льная Христо́ва.

Что́, я́ко ме́ртва, блюде́те? Что́ печа́ти на ка́мени положи́сте, евре́е, стра́хом боя́щеся краде́ния? Се́ вои́стину гро́б запечатле́ся: ка́ко у́бо воскре́се, а́ще не бы Бо́г бы́л Христо́с? Да уверя́ют вы́ воскре́сшии и ви́дени бы́вшии мно́гими.

Слава, Троичен : Со Отце́м сла́вим Сы́на и Ду́ха Свята́го, вопию́ще непреста́нным гла́сом: Тро́ице, Еди́нственное Существо́, поми́луй, спаси́ вся, в Трие́х Ли́цех Еди́нице, уще́дри ны, Препросла́вленный Бо́же во ве́ки.

И ныне, Богородичен : Во чре́ве Твое́м, Пречи́стая, ка́ко вмести́ла еси́ Младе́нца, Его́же трепе́щут Си́лы а́нгельския я́ко Бо́га? Ра́зве, я́коже восхоте́, я́коже ве́сть, всели́ся, вся́ спасти́ хотя́й от Ада́ма земноро́дныя, разреши́вый Ада́ма кля́твы о́ныя, сне́дию го́рькою.

Катавасия : О́троки от пе́щи Изба́вивый:

Ирмос : Сей нарече́нный и святы́й день:

Прииди́те, но́ваго виногра́да: Возведи́ о́крест о́чи твои́, Сио́не, и ви́ждь: О́тче Вседержи́телю и Сло́ве и Ду́ше:

Богородичны : Прии́де Тобо́ю в мир Госпо́дь: Всю низложи́в сме́рти держа́ву:

Ирмос : В купине́ Моисе́ю Де́вы чу́до/ на Сина́йстей горе́ Прообрази́вшаго иногда́/ по́йте, благослови́те// и превозноси́те во вся́ ве́ки.

Со́лнечныя зари́ спря́тахуся стра́хом Христо́вых страда́ний, и востая́ху ме́ртвии, и го́ры прекланя́хуся, и колеба́шеся земля́, и ад обнажа́шеся.

В пещи́ су́щии иногда́ треблаже́ннии о́троцы, возвыша́юще ру́ки, прообража́ху, Бла́же, пречестны́й Крест Твой, и́мже низложи́л еси́, Христе́, вра́жию си́лу.

О иуде́е слепи́и, преле́стницы и престу́пницы, Христо́ву Воскресе́нию неве́рующии, я́ко ло́жному, что неве́рное ви́дите, я́ко воскре́се Христо́с, ме́ртвыя воздви́гий?

О иуде́е врази́, а́ще и нам не ве́руете, ва́ша во́ины вы вопроси́те, что пострада́ша они́? Кто отвали́вый рука́ми ка́мень от гро́ба?

Кто изсуши́вый смоко́вницу? Кто же суху́ю исцели́вый ру́ку? Кто насы́тивый иногда́ мно́жества в пусты́ни, а́ще не Христо́с Бог, ме́ртвыя воздви́гнувый?

Кто просвети́вый слепцы́, и прокаже́нныя очи́стивый, и хромы́я испра́вивый, и пешеше́ствовавый мо́ре немо́кренно, я́ко су́шу, а́ще не Христо́с Бог, ме́ртвыя воздви́гнувый?

Кто воздви́гнувый ме́ртва четверодне́вна из гро́ба и вдови́ча сы́на? Кто стягну́вый, я́ко Бог, разсла́блена на одре́, а́ще не Христо́с Бог, ме́ртвыя воздви́гнувый?

Зове́т ка́мень са́мый, печа́ти вопию́т, я́же вы положи́вше, поста́висте стра́жу храня́щую гроб: вои́стину воскре́се Христо́с и живе́т во ве́ки.

Вои́стину воскре́се Христо́с, плене́н бысть ад, умертви́ся змий, изба́вися Ада́м, потрясо́шася до́льнии: что не ве́руете про́чее, врази́ и престу́пницы?

Благослови́м Отца́ и Сы́на и Свята́го Ду́ха, Го́спода.

Троичен : Со Отце́м Сы́на и Ду́ха Свята́го, Святу́ю Тро́ицу в Божестве́ Еди́ном прославля́ем, вопию́ще: Свя́т, Свя́т, Свя́т еси́ во ве́ки.

И ныне, Богородичен : Во чре́ве Твое́м, Чи́стая, присноживо́тный Хлеб, смеше́ный несме́сно смеше́нием на́шим, родила́ еси́ непрело́жно Еди́наго Христа́ Бо́га во двою́ существу́.

Катавасия : Сей нарече́нный и святы́й день:

Честнейшую : не поем до отдания Пасхи во вся Недели .

Ирмос : Свети́ся, свети́ся:

О , Боже́ственнаго, о, любе́знаго: О Па́сха ве́лия и свяще́ннейшая, Христе́!

Богородичны : Согла́сно, Де́во, Тебе́ блажи́м: Весели́ся и ра́дуйся:

Ирмос : Преесте́ственно пло́тию Заче́ншую во чре́ве/ от Отца́ безле́тно предвозсия́вшее Сло́во/ в пе́снех немо́лчных// велича́ем, ве́рнии.

И́же на Кресте́ разбо́йника, позна́вша Тя́ Бо́га, насле́дника соде́лал еси́ мы́сленному раю́, е́же помяни́ мя́, вопию́ща, Всеси́льне Спа́се.

Зауше́н нас ра́ди и оплева́н был еси́, Иису́се, от беззако́нников, скрижа́ли зако́на начерта́вый в Сина́и уго́днику Моисе́ю.

О́цта и же́лчи, Спа́се, напое́н был еси́ нас ра́ди, да́вый нам Те́ло и честну́ю Кровь в снедь же и питие́ ве́чныя Твоея́ жи́зни.

В животво́рныя ре́бра копие́м прободе́н быв, Христе́, пречи́стую Твою́ Кровь и честну́ю во́ду источи́л еси́ ми́рови, я́ко присноживо́тный Исто́чник.

Вмени́лся еси́ в ме́ртвых, Оживле́й ме́ртвыя, во гро́бе положе́н еси́, Истощи́вый гро́бы, плени́л еси́ ад, воскреси́в Ада́ма.

Воскре́сл еси́, Иису́се, свя́зан бысть враг, плени́ся ад, испраздни́шася гро́би, воста́ша до́льнии, покланя́ющеся Тебе́, Христе́.

Кто укра́дый ме́ртваго, па́че же и на́га? Что льстите́ся, евре́е? Христо́с воскре́се, и разруша́ются а́довы у́зы и вереи́.

Сла́ва Тебе́, Христе́ Спа́се, источи́вый жи́знь, и све́т возсия́вый су́щим во тьме́ неве́дения, и всю́ зе́млю просвети́вый воста́нием Твои́м.

Благообра́зный сове́тник Ио́сиф да пое́тся с мироно́сицами и боже́ственными ученики́, я́ко пропове́дник сый и сей воста́ния Христо́ва.

Ио́сифа чу́днаго да восхва́лим, ве́рнии, ку́пно с Никоди́мом и мироно́сицами ве́рными вопию́щия: Госпо́дь воскре́се вои́стину.

Слава, Троичен : Безнача́лен еси́, О́тче, несозда́нен еси́, Сы́не, сопресто́лен и Ду́ше Святы́й, Еди́но [сия́ Три] естество́м, и Три Ли́цы, Еди́не Бо́же и́стинный.

И ныне, Богородичен : Да весели́тся Иессе́й, да ликовству́ет и Дави́д: се бо Де́ва богора́сленный Жезл прозябе́, Цвет Присноживо́тный, Христа́.

Катавасия : Свети́ся, свети́ся:

Таже : Свят Госпо́дь Бог наш: на глас 2 .

Ексапостиларий Пасхи : Пло́тию усну́в: единожды .

Жены́, услы́шите гла́с ра́дования: мучи́теля а́да Попра́вый, от тли́ ми́р воздви́же, тецы́те, друго́м рцы́те Мои́м благове́стия, хощу́ бо созда́ние Свое́ ра́достию озари́ти, отону́дуже прии́де печа́ль.

На хвалитех поставим стихов 8 и поем стихиры воскресны, глас 2 .

Стих : Сотвори́ти в них суд напи́сан,/ сла́ва сия́ бу́дет всем преподо́бным Его́.

Вся́кое дыха́ние и вся тварь/ Тя сла́вит, Го́споди,/ я́ко Кресто́м смерть упраздни́л еси́,/ да пока́жеши лю́дем е́же из ме́ртвых Твое́ Воскресе́ние,// я́ко Еди́н Человеколю́бец.

Стих : Хвали́те Бо́га во святы́х Его́,/ хвали́те Его́ во утверже́нии си́лы Его́.

Да реку́т иуде́и,/ ка́ко во́ини погуби́ша стрегу́щии Царя́?/ Почто́ бо ка́мень не сохрани́ Ка́меня Жи́зни?/ Или́ Погребе́ннаго да дадя́т,/ или́ Воскре́сшему да покло́нятся,/ глаго́люще с на́ми:/ сла́ва мно́жеству щедро́т Твои́х,// Спа́се наш, сла́ва Тебе́.

Стих : Хвали́те Его́ на Си́лах Его́,/ хвали́те Его́ по мно́жеству вели́чествия Его́.

Ра́дуйтеся, лю́дие, и весели́теся,/ А́нгел, седя́й на ка́мени гро́бнем,/ той нам благовести́, рек:/ Христо́с воскре́се из ме́ртвых,/ Спас ми́ра, и испо́лни вся́ческая благоуха́ния,// ра́дуйтеся, лю́дие, и весели́теся.

Стих : Хвали́те Его́ во гла́се тру́бнем,/ хвали́те Его́ во псалти́ри и гу́слех.

А́нгел у́бо, е́же ра́дуйся,/ пре́жде Твоего́ зача́тия, Го́споди, Благода́тней принесе́:/ А́нгел же ка́мень сла́внаго Твоего́ гро́ба в Твое́м Воскресе́нии отвали́./ О́в у́бо в печа́ли ме́сто весе́лия о́бразы возвеща́я:/ се́й же вме́сто сме́рти Влады́ку Жизнода́вца пропове́дуя на́м./ Те́мже вопие́м Ти́:// Благоде́телю все́х Го́споди, сла́ва Тебе́.

И восточны 4, глас тойже .

Стих : Хвали́те Его́ в тимпа́не и ли́це,/ хвали́те Его́ во стру́нах и орга́не.

Возлия́ша ми́ра со слеза́ми/ на гро́б Тво́й жены́,/ и испо́лнишася ра́дости уста́ и́х,// внегда́ глаго́лати: воскре́се Госпо́дь.

Стих : Хвали́те Его́ в кимва́лех доброгла́сных, хвали́те Его́в кимва́лех восклица́ния./ Вся́кое дыха́ние да хва́лит Го́спода.

Да похва́лят язы́цы и лю́дие Христа́ Бо́га на́шего,/ во́лею нас ра́ди Крест претерпе́вшаго/ и во а́де тридне́вновавшаго,/ и да покло́нятся Его́ из ме́ртвых Воскресе́нию,// и́мже просвети́шася всего́ ми́ра концы́.

Стих : Воскресни́, Го́споди Бо́же мой, да вознесе́тся рука́ Твоя́,/ не забу́ди убо́гих Твои́х до конца́.

Ра́спят и погребе́н был еси́, Христе́,/ я́коже изво́лил еси́,/ испрове́ргл еси́ смерть и воскре́сл еси́ во сла́ве,/ я́ко Бог и Влады́ка,/ да́руя ми́рови жизнь ве́чную// и ве́лию ми́лость.

Стих : Испове́мся Тебе́, Го́споди, всем се́рдцем мои́м,/ пове́м вся чудеса́ Твоя́.

О , вои́стину беззако́ннии,/ печа́тавшии ка́мень,/ бо́льших на́с чуде́с сподо́бисте!/ И́мут ра́зум стра́жие,/ дне́сь про́йде из гро́ба и глаго́лаху:/ рцы́те, я́ко, на́м спя́щим,/ приидо́ша ученицы́ и украдо́ша Его́./ И кто́ кра́дет мертвеца́, па́че же и на́га?/ Са́м воскре́се самовла́стно, я́ко Бо́г,/ оста́вль во гро́бе и погреба́тельная Своя́./ Прииди́те, ви́дите, иуде́е,/ ка́ко не расто́рже печа́ти сме́рть Попра́вый/ и ро́ду челове́ческому безконе́чную жи́знь Да́руяй// и ве́лию ми́лость.

Слава, глас 2 . Стихира евангельская:

С ми́ры прише́дшим я́же с Мари́ею жена́м/ и недоумева́ющимся,/ ка́ко бу́дет и́м улучи́ти жела́ние,/ яви́ся ка́мень взя́тый,/ и боже́ственный ю́ноша, утоля́яй мяте́ж ду́ш и́х:/ воста́ бо, глаго́лет, Иису́с Госпо́дь./ Те́мже пропове́дите пропове́дником Его́,/ ученико́м, в Галиле́ю тещи́/ и ви́дети Его́ воскре́сша из ме́ртвых,// я́ко Жизнода́вца и Го́спода.

И ныне : Преблагослове́нна еси́:

Славословие великое. Тропарь : Воскре́с из гро́ба: Ектении и отпуст. И час первый .

На часех тропарь воскресен : Егда́ снизше́л: Слава: Благообра́зный Ио́сиф: И ныне : Богородичен часов. По Трисвятом кондак : Ра́доватися мироно́сицам:

Кондак же воскресен не глаголем до скончания Цветной Триоди .

На Божественной Литургии

По возгласе тропарь : Христо́с воскре́се: трижды. Мы же допеваем обычно .

Блаженна гласа на 4, глас 2 .

Блаже́ни ми́лостивии,/ я́ко ти́и поми́ловани бу́дут.

Помяни́, Благоутро́бне, и нас,/ я́коже помяну́л еси́ разбо́йника во Ца́рствии Небе́снем.

Блаже́ни чи́стии се́рдцем,/ я́ко ти́и Бо́га у́зрят.

Дре́во изгна́ Ада́ма,/ Кре́ст введе́ разбо́йника в Ца́рство Небе́сное.

Блаже́ни миротво́рцы ,/ я́ко ти́и сы́нове Бо́жии нареку́тся .

Гроб подъя́т Тя, Спа́се, гро́бы истощи́вшаго/ и ме́ртвым живо́т дарова́вшаго, я́ко Бо́га.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Апо́столи сла́внии Христо́вы,/ Того́ моли́те приле́жно, да от бед спасе́т ны.

И от канона дне песнь 6 – я на 4 .

Блаже́ни есте́, егда́ поно́сят вам,/ и изжену́т, и реку́т всяк зол глаго́л на вы, лжу́ще, Мене́ ра́ди.

Жены́ мироно́сицы, что тщите́ся про́чее?/ Что же Живо́му ми́ра прино́сите?/ Воскре́се Христо́с, я́коже предрече́./ Да преста́нут ва́ша сле́зы, преше́дшия на ра́дость.

Ра́дуйтеся и весели́теся,/ я́ко мзда ва́ша мно́га на Небесе́х.

Плащани́цею Тя́, Христе́, обви́в,/ Ио́сиф благообра́зный во гро́бе положи́:/ миропома́зав же разоре́нный Твоего́ Телесе́ хра́м,/ привали́ ка́мень вели́кий ко гро́бу.

Тро́ицу во Еди́нстве воспои́м, ве́рнии,/ с Сы́ном Отца́ сла́вяще,/ и Ду́ха Единосу́щна Сы́ну,/ и су́ща во Отце́ Собезнача́льнаго и Присносу́щнаго Бо́га.

Во чре́ве невозде́ланно зачала́ еси́, Чи́стая,/ нетле́ния грозд, я́ко лоза́,/ из Нея́же безсме́ртия то́ки, я́коже вино́,/ нам источа́ют ве́чную жизнь.

По входе тропари, глас 2 :

Егда́ снизше́л еси́ к сме́рти, Животе́ безсме́ртный,/ тогда́ ад умертви́л еси́ блиста́нием Божества́:/ егда́ же и уме́ршия от преиспо́дних воскреси́л еси́,/ вся Си́лы Небе́сныя взыва́ху:// Жизнода́вче Христе́, Бо́же наш, сла́ва Тебе́.

Благообра́зный Ио́сиф,/ с Дре́ва снем пречи́стое Твое́ Те́ло,/ плащани́цею чи́стою обви́в/ и благоуха́ньми, во гро́бе но́ве закры́в положи́:/ но тридне́вен воскре́сл еси́, Го́споди,// подая́й ми́рови ве́лию ми́лость.

Слава, кондак Триоди, глас тойже :

Ра́доватися мироно́сицам повеле́л еси́,/ пла́ч прама́тере Е́вы утоли́л еси́/ Воскресе́нием Твои́м, Христе́ Бо́же,/ апо́столом же Твои́м пропове́дати повеле́л еси́:// Спа́с воскре́се от гро́ба.

И ныне, Пасхи : А́ще и во гроб:

Прокимен, глас 6 : Спаси́, Го́споди, лю́ди Твоя́/ и благослови́ достоя́ние Твое́.

Стих : К Тебе́, Го́споди, воззову́, Бо́же мой, да не премолчи́ши от Мене ́.

Апостол Деяний, зачало 16 : Умно́жившимся ученико́м :

Аллилуия, глас 8 : Благоволи́л еси́, Го́споди, зе́млю Твою́, возврати́л еси́, пле́н Иа́ковль.

Стих : Ми́лость и и́стина срето́стеся, пра́вда и ми́р облобыза́стася.

Евангелие от Марка, зачало 69 : Прии́де Ио́сиф:

За Достойно поем : А́нгел вопия́ше: Свети́ся, свети́ся:

Причастный : Те́ло Христо́во приими́те: Другий : Хвали́те Го́спода с Небе́с:

По возгласе : Спаси́, Бо́же, лю́ди Твоя́: поем тропарь : Христо́с воскре́се: единожды. На возглас : Всегда́, ны́не и при́сно: отвещаем : Ами́нь. Да испо́лнятся: и прочая .

По возгласе : Сла́ва Тебе́, Христе́ Бо́же: поем : Христо́с воскре́се: трижды .

Сице да поем Божественную Литургию во вся недели до отдания Пасхи .

Зри : Аще храм святых жен мироносиц, на малей и велицей вечерни, и на утрени, и на Литургии, поем во всем подобне, якоже великомученику Георгию. Точию на вечерни паремии чтем, писаны в Неделю всех святых .

На утрени по полиелеи величание поем сице :

Велича́ем ва́с,/ святы́я мироно́сицы,/ и чте́м святу́ю па́мять ва́шу:/ вы́ бо мо́лите о на́с// Христа́, Бо́га на́шего.

Псалом : Блаже́н муж, боя́йся Го́спода: и прочая .

Источник: Праздничные службы Цветной Триоди / Е. Кустовский – М.: СофтИздат, 2008. – 280 с.

Поделиться ссылкой на выделенное

Нажмите правой клавишей мыши и выберите «Копировать ссылку»

Источник